ҲУКУМАТИ ҶУМҲУРИИ ТОҶИКИСТОН

ҚАРОР

Мутобиқи моддаи 7 Қонуни Ҷумҳурии Тоҷикистон «Дар бораи шартномаҳои байналмилалии Ҷумҳурии Тоҷикистон» Ҳукумати Ҷумҳурии Тоҷикистон қарор мекунад:

1. Лоиҳаи Ёддошти тафоҳум байни Вазорати кишоварзии Ҷумҳурии Тоҷикистон ва Вазорати муҳити зист, об ва кишоварзии Шоҳигарии Арабистони Саудӣ оид ба ҳамкорӣ дар соҳаи кишоварзӣ маъқул дониста шавад.
2. Вазири кишоварзии Ҷумҳурии Тоҷикистон Ёддошти тафоҳуми мазкурро ба имзо расонад ва ҳангоми зарурат ба матни он тағйиру иловаҳои хусусияти муҳимнадоштаро ворид намояд.
3. Вазорати корҳои хориҷии Ҷумҳурии Тоҷикистон бо тартиби муқарраргардида сана ва маҳалли ба имзо расонидани Ёддошти тафоҳуми мазкурро бо ҷониби Шоҳигарии Арабистони Саудӣ мувофиқа намояд.

Ёддошти тафоҳум байни Вазорати кишоварзии Ҷумҳурии Тоҷикистон ва Вазорати муҳити зист, об ва кишоварзии Шоҳигарии Арабистони Саудӣ оид ба ҳамкорӣ дар соҳаи кишоварзӣ

Вазорати кишоварзии Ҷумҳурии Тоҷикистон ва Вазорати муҳити зист, об ва кишоварзии Шоҳигарии Арабистони Саудӣ, ки минбаъд «Тарафҳо» номида мешаванд

бо хоҳиши вусъат додани ҳамкорӣ дар соҳаи кишоварзӣ мувофиқи қонун ва қоидаҳои амалкунандаи Тарафҳо

ба мувофиқаи зерин расиданд:

Моддаи 1

Мақсади Ёддошти тафоҳуми мазкур амалисозии ҳамкории дуҷониба дар соҳаи кишоварзӣ дар заминаи эътимод, баробарӣ ва нафъи мутақобила ва мусоидат ба рушди равобит миёни субъектҳои иқтисодии ду кишвар мебошад.

Моддаи 2

Тарафҳо барои ба роҳ мондани ҳамкорӣ дар соҳаҳои зерин ҳавасманд мебошанд:

1. Растанипарварӣ, чорводорӣ ва парандапарварӣ;
2. Гузаронидани корҳои илмию тадқиқотии муштарак;
3. Муҳофизати растаниҳо аз касалию ҳашароти зараррасон;
4. Содироти маҳсулоти кишоварзӣ дар доираи қонунгузории миллии Тарафҳо;
5. Парвариш ва мубодилаи тухмиҳои афзалиятноки зироатҳои кишоварзӣ.
6. Омӯзиши проблемаҳои соҳаи кишоварзӣ ва ҳалли онҳо;
7. Соҳаҳои дигаре, ки Тарафҳо ба мувофиқа меоянд.

Моддаи 3

Татбиқи ҳамкории Тарафҳо дар соҳаҳое, ки дар моддаи 2 Ёддошти тафоҳум зикр шудаанд, бо тарзе, ки онҳо мувофиқ мешуморанд, амалӣ карда мешавад, аз ҷумла:

1. Мубодилаи иттилооти илмию техникӣ ва натиҷаҳои корҳои тадқиқотӣ.
2. Ташкил ва гузаронидани семинарҳо, конфронсҳо ва намоишгоҳҳо;

3. Мубодилаи мутахассисон, донишҷуён ва таҷрибаомузони соҳаи кишоварзӣ;
4. Мубодилаи таҷрибаи илмию амалӣ ва техникӣ миёни мутахассисони соҳаи кишоварзӣ, олимон ва деҳқонон.

Моддаи 4

Тарафҳо тибқи қонунгузории миллии худ барои муҳайё намудани шароити мусоид ҳангоми муқаррар намудани муносибати бевосита миёни субъектҳои хоҷагидории Тарафҳо оид ба воридоти маҳсулоти кишоварзӣ, инчунин барои татбиқи масъалаҳои техникӣ ва захираҳои моддӣ ҷиҳати рушди соҳаи кишоварзӣ корбарӣ менамоянд.

Моддаи 5

Тарафҳо барои машварат ва андешидани чораҳои зарурӣ баҳри рушд ва густариши ҳамкориҳои дар Ёддошти тафоҳуми мазкур пешбинишуда аз ҳисоби шумораи баробари аъзо аз ҳарду Тараф гурӯҳи корӣ ташкил менамоянд. Гурӯҳ ҳангоми зарурат бо навбат дар ҳарду кишвар мулоқот мекунад.

Моддаи 6

Хар яке аз Тарафҳо мувофиқи захираҳои мавҷудаи худ хароҷоти молиявиро, ки аз иҷрои уҳдадориҳои худ дар доираи Ёддошти тафоҳуми мазкур бармеояд, ба уҳда мегирад.

Моддаи 7

Тарафҳо уҳдадор мешаванд, ки маълумот ва ҳуҷҷатҳоеро, ки мубодила мекунанд, ба истиснои мақсадҳое, ки барои онҳо мувофиқа карда шудаанд, истифода баранд ва бе розигии пешакии хаттии Тарафе, ки чунин маълумотро пешниҳод мекунад, онҳоро ба шахси сеюм намедиҳанд.

Моддаи 8

Тарафҳо барои ҳифзи ҳуқуқҳои моликияти зеҳнӣ, ки аз ҳама гуна фаъолият дар доираи Ёддошти тафоҳуми мазкур ба вуҷуд меоянд, бо дарназардошти қонунҳо ва қоидаҳои амалкунандаи кишварҳои худ инчунин созишномаҳои байналмилалие, ки ҳар кадом иштирокчии онҳо мебошанд, чораҳои заруриро меандешанд.

Моддаи 9

Ҳама гуна баҳсҳое, ки вобаста ба тафсир ё татбиқи Ёддошти тафоҳуми мазкур ба миён меоянд, бо роҳи машварати байни Тарафҳо ба манфиати Тарафҳо ҳал карда мешаванд.

Моддаи 10

Ҳеҷ муқаррарот дар доираи Ёддошти тафоҳуми мазкур ба ҳуқуқ ё имтиёзҳои Тарафҳо, ки дар натиҷаи созишномаи байналмилалие, ки яке ё ҳардуи онҳо иштирокчии он мебошанд, таъсир намерасонад.

Моддаи 11

Ёддошти тафоҳуми мазкур тавассути роҳҳои дипломатӣ, аз рӯзи гирифтани огоҳиномаи хаттии охирини тасдиқкунандаи иҷрои расмиёти дохилидавлатии Тарафҳо, ки барои эътибор пайдо кардани он зарур аст, эътибор пайдо мекунад.

Ёддошти тафоҳуми мазкур ба муҳлати 3 (се) сол баста шуда, худ аз худ ба муддати 3 (се) соли дигар тамдид меёбад, агар яке аз Тарафҳои аҳдкунанда дар бораи хоҳиши қатъ намудани Ёддошти тафоҳум Тарафи дигарро бо роҳи дипломатӣ ба таври хаттӣ 6 (шаш) моҳ пеш аз ба охир расидани муҳлати амали Ёддошти тафоҳум огоҳ насозад.

Ба Ёддошти тафоҳуми мазкур бо розигии хаттии Тарафҳо метавонанд тағйиру иловаҳо ворид карда шаванд, ки мутобиқи муқаррароти банди 1 Ёддошти тафоҳуми мазкур эътибор пайдо менамоянд.

Қатъи амали Ёддошти тафоҳум ба лоиҳа ва барномаҳои дар давоми фаъолияти Ёддошти тафоҳум татбиқгардида таъсир намерасонад.

Ёддошти тафоҳум дар _______ «__» _______ соли 2024 дар ду нусха бо забонҳои тоҷикӣ арабӣ ва англисӣ, ки ҳамаи матнҳо эътибори якхела доранд, ба имзо расонида шуд.

Дар сурати пайдо шудани ихтилофот дар тафсири Ёддошти тафоҳуми мазкур, афзалият ба матни забони англисӣ дода мешавад.