ҲУКУМАТИ ҶУМҲУРИИ ТОҶИКИСТОН

ҚАРОР

 Қарори Шурои Маҷлиси намояндагони Маҷлиси Олии Ҷумҳурии Тоҷикистон аз 6 майи соли 2024, №2188 «Дар бораи лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи таҳсилоти калонсолон»-ро баррасӣ намуда, Ҳукумати Ҷумҳурии Тоҷикистон қарор мекунад:

Хулосаи замимагардидаи Ҳукумати Ҷумҳурии Тоҷикистон ба лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи таҳсилоти калонсолон» ба баррасии Маҷлиси намояндагони Маҷлиси Олии Ҷумҳурии Тоҷикистон пешниҳод карда шавад.

Хулосаи Ҳукумати Ҷумҳурии Тоҷикистон ба лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи таҳсилоти калонсолон»

Ҳукумати Ҷумҳурии Тоҷикистон лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи таҳсилоти калонсолон»-ро, ки бо қарори Шурои Маҷлиси намояндагони Маҷлиси Олии Ҷумҳурии Тоҷикистон аз 6 майи соли 2024, №2188 барои додани хулоса ба Ҳукумати Ҷумҳурии Тоҷикистон пешниҳод гардидааст, мавриди баррасӣ қарор дода, нисбат ба моддаи 1 он пешниҳоди зеринро манзур менамояд:

1. Оид ба қисми 1:

• сархатҳои чорум ва панҷуми ба моддаи 1 Қонуни мазкур иловашаванда хориҷ карда шаванд, зеро мафҳумҳои иловашаванда дар матни Қонуни Ҷумҳурии Тоҷикистон «Дар бораи таҳсилоти калонсолон» истифода нашуда, зарурати илова кардани онҳо ҷой надорад;
• сархати шашуми ба моддаи 1 Қонуни мазкур иловашаванда хориҷ карда шавад, зеро ба шарҳи мафҳуми «сиёсати давлатӣ дар соҳаи таҳсилоти калонсолон» зарурат ҷой надошта, он дар як вақт номукаммал мебошад;
• сархати ҳафтуми ба моддаи 1 Қонуни мазкур иловашаванда хориҷ карда шавад, зеро мафҳуми «таҳсилоти фосилавӣ» дар Қонуни Ҷумҳурии Тоҷикистон «Дар бораи маориф» пешбинӣ гардида, такрор кардани он зарурат надорад;
• сархати ҳаштуми ба моддаи 1 Қонуни мазкур иловашаванда хориҷ карда шавад, зеро зарурати шарҳи мафҳуми «таҳсилоти иловагии калонсолон» ҷой надошта, дар як вақт он бо мафҳуми пешбиникардаи Қонуни Ҷумҳурии Тоҷикистон «Дар бораи таҳсилоти калонсолон» номутобиқ мебошад;
• сархати нуҳуми ба моддаи 1 Қонуни мазкур иловашаванда дар шакли номукаммал таҳия гардида, таҷдид карда шавад;
• сархати даҳуми ба моддаи 1 Қонуни мазкур иловашаванда хориҷ карда шавад, зеро он моҳиятан дар Қонуни Ҷумҳурии Тоҷикистон «Дар бораи таҳсилоти олии касбӣ ва таҳсилоти касбӣ баъд аз муассисаи олии таълимӣ» шарҳ дода шудааст:
• сархатҳои ёздаҳум, дувоздаҳум, сенздаҳум, чордаҳум, понздаҳум, шонздаҳум ва ҳабдаҳуми ба моддаи 1 Қонуни мазкур иловашаванда хориҷ карда шаванд, зеро зарурати шарҳ додани мафҳумҳои пешниҳодшуда ҷой надорад.

2. Қисми 2 хориҷ карда шавад, зеро шакли моликият ва талабот нисбат ба номи шахси ҳуқуқӣ дар Кодекси мадании Ҷумҳурии Тоҷикистон танзим гардида, зарурати такрори он дида намешавад. Ҳамзамон моддаи иловашаванда номукаммал буда, ишора кардани хусусияти фаъолият дар номи шахси ҳуқуқӣ дар шакли пешниҳодшуда қобили қабул намебошад.
3. Қисми 3 хориҷ карда шавад, зеро масъалаи мазкур дар моддаҳои 23 ва 25 Қонуни Ҷумҳурии Тоҷикистон «Дар бораи таҳсилоти калонсолон» пурра танзим гардида, зарурати дар таҳрири нав пешбинӣ намудани моддаи 23 Қонуни мазкур ҷой надорад.

Дар асоси гуфтаҳои боло лоиҳа дар шакли пешниҳодгардида қобили қабул набуда, ба такмил ниёз дорад.