ҲУКУМАТИ ҶУМҲУРИИ ТОҶИКИСТОН

ҚАРОР

Мутобиқи моддаи 7 Қонуни Ҷумҳурии Тоҷикистон «Дар бораи шартномаҳои байналмилалии Ҷумҳурии Тоҷикистон» Ҳукумати Ҷумҳурии Тоҷикистон қарор мекунад:

1. Лоиҳаи Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Исломии Покистон оид ба ҳамкорӣ дар соҳаи карантини растаниҳо маъқул дониста шавад.

2. Раиси Кумитаи бехатарии озуқавории назди Ҳукумати Ҷумҳурии Тоҷикистон Созишномаи мазкурро аз номи Ҳукумати Ҷумҳурии Тоҷикистон ба имзо расонад ва ҳангоми зарурат ба матни он таѓйиру иловаҳои хусусияти муҳимнадоштаро ворид намояд.

3. Вазорати корҳои хориҷии Ҷумҳурии Тоҷикистон бо тартиби муқарраргардида бо ҷониби Покистон сана ва маҳалли ба имзо расондани Созишномаи мазкурро мувофиқа намояд.

СОЗИШНОМА байни Ҳукумати Ҷумҳурии Тоҷикистон ва Ҳукумати Ҷумҳурии Исломии Покистон оид ба ҳамкорӣ дар соҳаи карантини растаниҳо

Ҳукумати Ҷумҳурии Тоҷикистон ва Ҳукумати Ҷумҳурии Исломии Покистон (минбаъд дар алоҳидагӣ «Тараф» ва дар якҷоягӣ «Тарафҳо» номида мешаванд),

муносибатҳои дӯстонаи байни ду кишварро бори дигар тасдиқ намуда, бо хоҳиши таҳкими минбаъдаи муносибатҳои дӯстона,

ҷиҳати мусоидат намудан ба ҳамкории дуҷониба дар соҳаи карантини растанӣ ва пурқувват намудани муҳофизат дар ҳудуди давлатҳо аз интиқоли организмҳои зараррасони карантинӣ кам кардани талафоти эҳтимолии аз онҳо расонидашуда мусоидат намуда,

содагардонии савдо ва мубодилаи тухмиҳо, маҳсулоти растанӣ ва маводҳои дигарро, ки таҳти таъсири қоидаҳои карантини растаниҳои ҳарду давлат қарор дорад, ба инобат гирифта, ба мувофиқаи зерин расиданд.

Моддаи 1

Барои татбиқи Созишномаи мазкур мақомоти зерини ваколатдори Тарафҳо масъуланд:

- аз ҷониби Ҷумҳурии Тоҷикистон - Кумитаи бехатарии озуқавории назди Ҳукумати Ҷумҳурии Тоҷикистон;

- аз ҷониби Ҷумҳурии Исломии Покистон - Вазорати амнияти озуқаворӣ ва тадқиқоти Покистон.

Моддаи 2

Барои мақсадҳои Созишномаи мазкур истилоҳоти зерин дар Созишномаи мазкур истифода шуда, маънои дахлдори ба онҳо додашударо доранд, агар аз муҳтавои ин Созишнома маънои дигаре бар наояд.

«объектҳои карантинӣ» - намудҳои ҳашароти зараррасон, баррангезандагони касалиҳои растанӣ ва алафҳои бегона, ки мавҷуд нестанд ё дар ҳудуди давлатҳо маҳдуд паҳн гаштаанд, вале метавонанд ба растанӣ ё маҳсулоти он зарари калон расонанд;

«энтеомофагҳо» – ҳашароти фоидаовари табиӣ, ки барои мубориза бар зидди организмҳои зараррасон истифода бурда мешавад;

«феромонҳо» - маводе, ки ҳашарот барои таъсиррасонии дохилинавъӣ тавассути ҳисси шомма ҷудо мекунад;

«биомавод» - маводи муборизаи биологӣ мебошад, ки ҳамчун маводи кимиёвӣ тарҳрезӣ шуда барои мубориза бар зидди ҳашароти зараррасон истифода бурда мешавад;

«маводҳои таҳти назорати карантинӣ қарордошта» - ҳама гуна маводҳое, ки ба паҳншавӣ мусоидат мекунад ё бо ёрии он объектҳои карантинӣ паҳн шуда метавонанд (тухмӣ, маводи кӯчатӣ, растаниҳо ва қисмати онҳо, маҳсулоти дигар аз растанӣ).

Моддаи 3

Организми зараррасони карантинӣ дар доираи Созишномаи мазкур организме мебошад, ки дар минтақа мавҷуд нест, маҳдуд паҳн гаштааст ва таҳти назорати расмӣ қарор дорад.

Мақомоти ваколатдори Тарафҳо метавонанд дар оянда ба рӯйхатҳои дахлдори худ тағйирот ва иловаҳо ворид кунанд. Ҳама гуна тағйиру иловаҳо ба мақоми ваколатдори Тарафи дигар тавассути роҳҳои дипломатӣ ирсол карда мешаванд ва шаст (60) рӯз пас аз чунин огоҳинома аз тариқи Портали Байналмилалии Фитосанитарӣ эътибор пайдо мекунанд.

Моддаи 4

Бо мақсади рушд ва густариши ҳамкорӣ дар соҳаи карантини растанӣ Тарафҳо уҳдадоранд:

- оид ба пешгирии паҳншавии объектҳои карантинӣ аз ҳудуди давлати як Тараф ба ҳудуди давлати Тарафи дигар ҳангоми воридот, содирот ва транзит чораҳои зарурӣ андешанд;

- дар бораи пайдоиш ва паҳн шудани объектҳои карантинӣ дар ҳудуди давлатҳои Тарафҳо ва усулҳои мубориза бар зидди онҳо ба таври хаттӣ мубодилаи иттилоот намоянд;

- дар бораи ворид намудани тағйирот ба қоидаҳои фитосанитарӣ, ки воридот, содирот ва транзити маводи карантиниро танзим мекунанд, маълумот диҳанд;

- дар гузаронидани чорабиниҳо оид ба ошкор намудани маҳалҳои ҷойгиршавӣ ва барҳам додани объектҳои карантинӣ ба ҳамдигар ёрии илмӣ, техникӣ ва машваратӣ расонанд;

- мушкилиҳои марбут ба карантини растаниҳо пешомадаро дар нуқтаҳои гузаргоҳҳои давлатӣ бо истифода аз дастовардҳои соҳаи карантини растанӣ таҳлил ва ҳал намоянд;

- ҳамкории мутақобилаи мутахассисони Тарафҳоро ҷиҳати азназаргузаронии маводи таҳти карантинқарордошта, ки ба ҳудуди давлати Аҳдкунанда ворид мешавад, дар ҷойҳои истеҳсоли онҳо ташкил кунанд;

- экспедитсияҳои мутахассисонро барои гузарондани тадбирҳои якҷоя ҳангоми вазъияти фавқулода дар соҳаи карантини растаниҳо сафарбар намоянд.

Моддаи 5

Мақомоти ваколатдори Тарафҳо аввали баҳори ҳар сол оид ба пайдоиш ва паҳншавии организмҳои карантинӣ, ҳашароти фоидаовари табиӣ, маводи биологӣ, феромонҳо ва маводи дигари мубориза бар зидди организмҳои зараррасони карантинӣ мубодилаи афкор менамоянд.

Моддаи 6

Воридот, содирот ва транзити молҳое, ки бояд таҳти назорати карантинӣ қарор дошта бошанд, аз ҳудуди давлати як Тараф ба ҳудуди давлати Тарафи дигар ба воситаи нуқтаҳои воридшавии кишвари воридкунанда, ки мақоми ваколатдори давлати Аҳдкунанда муайян кардааст, анҷом дода мешаванд.

Моддаи 7

Тарафҳо ба мувофиқа расиданд, ки ҳангоми содироти маводи таҳти карантин қарордошта, барои бастабандии мавод коғаз, пластика ва маводи дигари пайдоиши ғайрирастанидоштаро истифода мебаранд.

Воситаҳои боркашонии маводҳои таҳти карантиницарордошта бояд пеш аз бор кардан пурра тоза ва безараргардонӣ карда шаванд.

Моддаи 8

Ҳар маводи таҳти батанзимдарории карантинӣ қарордошта, ки аз ҳудуди давлати як Тараф ба ҳудуди давлати дигар Тараф содирот ё тавассути ҳудуди он содирот карда мешавад, бояд бо сертификати фитосанитарӣ, ки аз ҷониби мақомоти ваколатдор оид ба карантини растаниҳои давлати содиркунанда дода мешавад, ҳамроҳӣ карда шавад ва маънои онро дорад, ки мол ба талаботи фитосанитарии давлати Тарафи воридкунанда, ки дар иҷозатномаи воридот зикр шудааст, мувофиқат мекунад. Сертификатҳои фитосанитарӣ бо ду забон дода мешаванд: бо забони расмии давлати содиркунанда ва бо забони англисӣ. Дар ҳолати зарурӣ сертификати фитосанитарии реэкспортӣ талаб карда мешавад.

Воридот ё транзити молҳои таҳти назорати карантинқарордошта ба ҳудуди давлати Тарафҳо ё ба воситаи ҳудуди он бо риояи шартҳое, ки дар иҷозатномаи воридоти карантинии аз ҷониби хадамоти карантини растаниҳои воридкунанда додашуда амалӣ карда мешавад.

Барои воридот ё транзити молҳое, ки таҳти қоидаҳои муайяни карантинӣ қарор мегиранд, мақомоти ваколатдори Тарафҳо ҳуқуқи таҳияи шартҳо ва талаботи иловагиро оид ба сертификати фитосанитарии онҳо нигоҳ медоранд.

Моддаи 9

Дар ҳолати пайдо гардидани ягон организми карантинӣ ҳангоми азназаргузаронии фитосанитарӣ дар давлати воридкунанда, мақоми ваколатдори ин давлат метавонад маводи таҳти карантинро рад карда, ба давлати содиркунанда реэкспорт кунад ё безараргардонӣ намояд, агар безараргардонӣ имконнопазир бошад. Тарафҳо ваколат доранд, ки онро тибқи қоидаҳои фитосанитарии давлати худ нобуд созанд. Мақомоти давлати воридкунанда мақоми ваколатдори давлати содиркунандаро дар бораи чораҳои андешидашуда ба таври хаттӣ хабардор мекунад.

Моддаи 10

Дар ҳолатҳои зарурӣ мақомоти ваколатдори Тарафҳо ба ҳамдигар оид ба карантини растаниҳо ёрии илмию техникӣ ва ғайра мерасонанд.

Моддаи 11

Мақомоти ваколатдори Тарафҳо на камтар аз як маротиба дар як сол ҷаласаҳои машваратӣ гузаронида, масъалаҳои марбут ба татбиқи Созишномаи мазкурро баррасӣ мекунанд. Сана, макон ва барномаи ҷаласаҳо бо розигии мутақобилаи мақомоти ваколатдори Тарафҳо ҳал карда мешаванд. Хароҷоти ташкили ҷаласа, ҷойгиркунии ҳайати ташрифоварандаро Тарафи қабулкунанда ва хароҷоти сафарро Тарафи фиристонанда ба уҳда мегирад.

Моддаи 12

Ҳама гуна баҳсҳое, ки вобаста ба тафсир ва татбиқи Созишномаи мазкур ба миён меоянд, аз ҷониби мақомоти ваколатдор Тарафҳо тавассути гуфтушунид ва машваратҳо ҳал карда мешаванд. Дар сурати бо роҳи гуфтушунид ҳал нагардидани баҳс, он бо роҳҳои дипломатӣ ҳал карда мешавад.

Моддаи 13

Тарафҳо бо розигии хаттии мутақобила метавонанд ба Созишномаи мазкур тавассути протоколҳои алоҳида, ки қисми ҷудонашавандаи он ҳисобида мешаванд, тағйиру иловаҳо дохил намоянд. Протокол тибқи муқаррароти моддаи 15 Созишномаи мазкур эътибор пайдо мекунад.

Моддаи 14

Муқаррароти Созишномаи мазкур ба ҳуқуқ ва уҳдадориҳои Тарафҳо, ки аз дигар шартномаҳои байналмилалие, ки Тарафҳо иштирокдори он мебошанд, бармеоянд, дахл надорад.

Моддаи 15

Созишномаи мазкур си (30) рӯз пас аз гирифтани огоҳиномаи охирини хаттӣ тавассути роҳҳои дипломатӣ дар бораи аз ҷониби Тарафҳо иҷро гардидани расмиёти дохилидавлатии онҳо, ки барои эътибор пайдо кардани он заруранд, эътибор пайдо мекунад.

Созишномаи мазкур ба муҳлати панҷ (5) сол эътибор дорад ва то он даме, ки агар ягон Тарафҳо Тарафи дигарро оид ба нияти худ ҷиҳати қатъ намудани Созишномаи мазкур огоҳ накунад, амали Созишномаи мазкур худ аз худ барои давраи панҷ (5) соли минбаъда тамдид карда мешавад.

Амали Созишномаи мазкур баъд аз шаш (6) моҳи аз ҷониби яке аз Тарафҳо бо роҳҳои дипломатӣ гирифтани огоҳиномаи хаттӣ оид ба нияташ дар бораи қатъ намудани Созишномаи мазкур қатъ мегардад.

Созишномаи мазкур дар шаҳри ___________ «____» _________ соли 2024 дар ду нусхаи аслӣ бо забонҳои тоҷикӣ ва англисӣ тартиб дода шуд, ки ҳар ду нусха эътибори якхелаи ҳуқуқӣ дорад, ба имзо расонидашуд.

Дар ҳолати ба миён омадани ихтилофоти назар дар тафсири муқаррароти Созишномаи мазкур, матни забони англисӣ ба асос гирифта мешавад.