Тартиби пешниҳод намудани реҷаи махсуси танзимӣ дар соҳаи инноватсия ва технологияҳои рақамӣ

1. МУҚАРРАРОТИ УМУМӢ

1. Тартиби пешниҳод намудани реҷаи махсуси танзим дар соҳаи инноватсия ва технологияҳои рақамӣ (минбаъд – Тартиби мазкур) муқарраротро оид ба шартҳои асосии пешниҳод намудани реҷаи махсуси танзимӣ ба субъектони фаъолияти инноватсионӣ ва технологияҳои рақамӣ, ҳуқуқ ва уҳдадориҳои мақомоти ваколатдори давлатӣ, ҳуқуқ ва уҳдадориҳои субъектоне, ки аз реҷаи махсуси танзимӣ истифода менамоянд ва дигар масъалаҳоро мавриди танзим қарор медиҳад.

2. МАФҲУМҲОИ АСОСӢ

2. Дар Тартиби мазкур мафҳумҳои асосии зерин истифода мешаванд:

- реҷаи махсуси танзимӣ, шароити махсуси ташкиливу ҳуқуқӣ (минбаъд – реҷаи махсус) барои шахсони ҳуқуқии ҷорикунандаи технологияҳо дар соҳаи инноватсия ва рақамикунонӣ, аз ҷумла муомилоти дороиҳои рақамӣ, пешниҳоди имтиёзҳо дар муносибатҳое, ки дар ҷараёни амалигардонии лоиҳаҳои озмоишӣ ба миён меоянд, фаҳмида мешаванд;

- лоиҳаи озмоишӣ – ҷорӣ ва амалӣ намудани лоиҳаҳои ба истифода намудани технологияҳо дар соҳаи инноватсия ва рақамикунонӣ, аз ҷумла муомилоти дороиҳои рақамӣ нигаронидашуда;

- дороиҳои рақамӣ – ифодаи рақамии молумулке, ки муомилоти онҳо дар технологияи низоми иттилоотии муайянгаштаи ғайримарказии тақсимшуда ва ё дар технологияҳои ҳаммонанд тибқи қоидаҳои мақомоти ваколатдори давлатӣ дар соҳаи инноватсия ва технологияҳои рақамӣ амалӣ карда мешаванд;

- низоми иттилоотӣ – низоми мушаххас ва ё барномаи заминавии мушаххас бо мақсади амалӣ намудани фаъолияти инноватсионӣ ва истифодаи технологияҳои рақамӣ, аз ҷумла ҷиҳати ба роҳ мондани муомилоти дороиҳои рақамӣ ба воситаи таъмини имконияти бастани аҳдҳои гуногун бо дороиҳои рақамӣ аз ҷониби субъектони реҷаи махсус;

- мақоми ваколатдори давлатӣ – Агентии инноватсия ва технологияҳои рақамии назди Президенти Ҷумҳурии Тоҷикистон;

- субъекти реҷаи махсус – субъектоне, ки технологияҳоро дар соҳаи инноватсия ва рақамикунонӣ ҷорӣ менамоянд ва нисбати онҳо тибқи Тартиби мазкур реҷаи махсус татбиқ карда мешавад;

- аризадиҳанда – шахси ҳуқуқие, ки бо мақсади фарогир шудан бо реҷаи махсус аризаи дахлдор ва дигар ҳуҷҷатҳои заруриро тибқи Тартиби мазкур ба мақомоти ваколатдори давлатӣ пешниҳод менамояд;

- Феҳристи субъектони реҷаи махсус – руйхате, ки аз ҷониби мақомоти ваколатдори давлатӣ тибқи Тартиби мазкур таҳия карда шуда, дар он маълумот оид ба субъектони реҷаи махсус дарҷ карда мешавад.

3. ХУСУСИЯТҲОИ РЕҶАИ МАХСУС

3. Реҷаи махсус барои ҷорӣ намудани технология дар соҳаи инноватсия ва технологияҳои рақамӣ дар чаҳорчӯбаи лоиҳаи озмоишӣ тибқи Тартиби мазкур аз ҷониби субъекти реҷаи махсус, равона карда мешавад.

4. Реҷаи махсус субъектони барои реҷаи махсус имкони татбиқ намудани як қатор ҳуқуқҳо ва уҳдадориҳоро, ки дар санадҳои меъёрии ҳуқуқии ҷории Ҷумҳурии Тоҷикистон ва Тартиби мазкур бо мақсади амалӣ намудани лоиҳаи озмоишӣ пешбинӣ карда шудаанд, медиҳад.

5. Субъекти реҷаи махсус ҳуқуқ надорад фаъолиятро дар самти истихроҷ (майнинг)-и дороиҳои рақамӣ ва миёнаравӣ дар истифодаи онҳо ба сифати воситаи пардохт амалӣ намояд.

4. ТАРТИБИ ПЕШНИҲОДИ РЕҶАИ МАХСУС

6. Шахси ҳуқуқие, ки мехоҳад фарогири реҷаи махсус бошад, бо аризаи шаклаш тасдиқгардида (замимаи №1 ба Тартиби мазкур) ва пешниҳоди дигар ҳуҷҷатҳои дар Тартиби мазкур дарҷгардида, ба мақомоти ваколатдори давлатӣ муроҷиат менамояд.

7. Шахси ҳуқуқие, ки мехоҳад фарогирӣ реҷаи махсус бошад, бо ариза чунин ҳуҷҷатҳоро пешниҳод менамояд:

- Маълумотнома (замимаи №2 ба Тартиби мазкур);

- нусхаи ҳуҷҷати бақайдгирии давлатӣ;

- нусхаи ҳуҷҷатҳои таъсисӣ;

- нусхаи РМА (барои шахсони ҳуқуқии ватанӣ);

- нусхаи шиносномаи роҳбари шахси ҳуқуқӣ;

- маълумотнома аз мақомоти андози дахлдор оид ба надоштани қарз вобаста ба уҳдадориҳои андозӣ (барои шахсони ҳуқуқии ватанӣ);

- лоиҳаи озмоишӣ.

8. Ҳуҷҷатҳои мазкур метавонанд ба таври ҳомили коѓазӣ ва ё тариқи интиқол бо воситаи почтаи электронӣ ба мақомоти ваколатдори давлатӣ ирсол карда шаванд.

9. Дар ҳолате, ки ҳуҷҷат аз ҷониби мақомоти давлати хориҷӣ пешниҳод карда шудааст, бояд апостил гузошта шуда, ба забони тоҷикӣ тарҷума ва аз ҷониби мақомоти нотариати давлатӣ тасдиқ карда шавад.

10. Дар ҳолате, ки агар давлате, ки мақомоти он ҳуҷҷатро пешниҳод кардааст, дар созишномаҳои байналмилалии бо иштироки Ҷумҳурии Тоҷикистон, ки гузоштани апостилро пешбинӣ менамоянд, ширкат наварзад, чунин ҳуҷҷат бояд пас аз тайиди (легализатсияи) консулӣ ба мақомоти ваколатдори давлатӣ пешниҳод карда шавад.

11. Мақомоти ваколатдори давлатӣ ҳангоми дастрас шудани ариза ва ҳуҷҷатҳо ба аризадиҳанда хабарро ба почтаи электронӣ ва ё телефони дар Маълумотнома дарҷгардида ирсол менамояд.

12. Муҳлати баррасии ариза ва ҳуҷҷатҳои дарҷгардида то 15 рӯзи корӣ мебошад.

13. Ҳисоби муҳлати баррасии ариза ва ҳуҷҷатҳои пешниҳодшуда аз рӯзи дигари кории санаи ба аризадиҳанда ирсол намудани хабар оид ба қабул шудани ариза ва ҳуҷҷатҳо оғоз мегардад.

14. Мақомоти ваколатдори давлатӣ дар муҳлати муқарраркардашуда ариза ва ҳуҷҷатҳоро баррасӣ намуда, оид ба натиҷаи он ба таври расмӣ аризадиҳандаро хабар медиҳад.

15. Барои таҳлили ариза, ҳуҷҷатҳои аризадиҳандагон, инчунин интихоби лоиҳаи озмоишӣ барои гирифтани мақоми субъекти низоми махсус аз ҳисоби намояндагони мақомоти марказии ҳокимияти давлатӣ Шурои мушовирон таъсис дода мешавад.

16. Низомнома ва ҳайати Шурои мушовиронро Ҳукумати Ҷумҳурии Тоҷикистон тасдиқ мекунад (қарори Ҳукумати ҶТ аз 26.12.2024 № 665).

17. Мақоми ваколатдори давлатӣ дар рафти баррасии ариза муайян мекунад, ки оё барои татбиқи лоиҳаи озмоишӣ истисно ва (ё) қабули меъёрҳои дахлдори санадҳои меъёрии ҳуқуқӣ зарур аст ё не.

18. Ҳангоми зарурати маҳдуд кардани меъёрҳои дахлдори санадҳои меъёрии ҳуқуқӣ бо мақсади татбиқи лоиҳаи озмоишӣ, мақоми ваколатдори давлатӣ бо мақомоти дахлдори ваколатдор машварат доир мекунад ва дар қарор меъёрҳои дахлдори санадҳои меъёрии ҳуқуқиро, ки ҳангоми татбиқи лоиҳаи озмоишӣ хориҷ карда мешаванд, нишон медиҳад.

19. Дар доираи баррасии ариза ва ҳуҷҷатҳои пешниҳодшуда, мақомоти ваколатдори давлатӣ мушаххасгардонии роҳбари шахси ҳуқуқӣ - аризадиҳанда ва баҳрагирандагони (бенефитсиарони) онро тибқи талаботи қонунгузории Ҷумҳурии Тоҷикистон дар бораи муқовимат ба қонунигардонӣ (расмикунонӣ)-и даромадҳои бо роҳи ҷиноят бадастоварда, маблағгузории терроризм ва маблағгузории паҳнкунии силоҳи қатли ом амалӣ менамояд.

20. Асос барои рад намудани пешниҳоди реҷаи махсус ба аризадиҳанда ин пешниҳод нашудани тамоми ҳуҷҷатҳои зарурӣ, ба талаботи Тартиби мазкур ва қонунгузории ҷории Ҷумҳурии Тоҷикистон ҷавобгуй набудани ҳуҷҷатҳои пешниҳодгардида, аз ҷумла лоиҳаи озмоишӣ, шахсони роҳбарикунанда ва баҳрагирандагони аризадиҳанда мебошад.

21. Дар ҳолати мусбӣ будани натиҷаи баррасии ариза ва ҳуҷҷатҳои пешниҳодшуда, мақомоти ваколатдори давлатӣ санади дахлдорро қабул намуда, мушаххасоти аризадиҳандаро ба Феҳристи субъектони реҷаи махсус ворид намуда, дар муҳлати 2 рӯзи корӣ аризадиҳандаро ба таври хаттӣ хабардор менамояд.

22. Субъекти реҷаи махсус уҳдадор аст, ки аз санаи гирифтани хабарнома оид ба ворид намудан Феҳристи субъектони реҷаи махсус фаъолияти худро бо мақсади амалӣ намудани лоиҳаи озмоишӣ оғоз намояд.

23. Давомнокии амали реҷаи махсус, вобаста аз лоиҳаи озмоишӣ, то ду солро ташкил менамояд. Муҳлати амали реҷаи махсус дар асоси аризаи субъекти реҷаи махсус аз ҷониби мақомоти ваколатдори давлатӣ ба муҳлати то як соли дигар тамдид карда мешавад.

24. Муҳлати мушаххаси пешниҳоди реҷаи махсус дар санади мақомоти ваколатдори давлатӣ оид ба пешниҳоди реҷаи махсус дарҷ карда мешавад.

25. Реҷаи махсус дар ҳолатҳои зерин қатъ мегардад:

- бо сабаби ба итмом расидани муҳлати реҷаи махсус;

- ноил шудан ба ҳадафҳои татбиқи лоиҳаи озмоишӣ;

- қатъ шудани фаъолияти субъекти реҷаи махсус дар ҳолатҳои пешбинишудаи қонунгузории амалкунандаи Ҷумҳурии Тоҷикистон;

- ба таври мунтазам вайрон намудани муқаррароти қонунгузории амалкунандаи Ҷумҳурии Тоҷикистон ва Тартиби мазкур;

- иҷро накардани муқаррароти шартномаҳо ва созишномаҳо, ки баҳри амалисозии лоиҳаи озмоишӣ равона карда шудаанд;

- содир намудани ҷиноят аз ҷониби шахсони масъули субъекти реҷаи махсус, ки раванди амалисозии лоиҳаи озмоиширо халалдор менамоянд;

- истифодаи ғайримақсадноки имтиёзҳои пешниҳодшуда ба субъекти реҷаи махсус;

- муфлис эътироф карда шудани субъекти реҷаи махсус бо тартиби муқарраркардаи қонунгузории амалкунандаи Ҷумҳурии Тоҷикистон;

- дигар ҳолатҳои пешбининамудаи Тартиби мазкур.

5. ВАКОЛАТИ МАҚОМОТИ ВАКОЛАТДОРИ ДАВЛАТӢ

26. Мақомоти ваколатдори давлатӣ тамоми масъалаҳоро оид ба пешниҳод намудани реҷаи махсус баррасӣ намуда, ваколатҳои дар Тартиби мазкур ва санадҳои меъёрии ҳуқуқии амалкунандаи Ҷумҳурии Тоҷикистон пешбинӣ шудаанд, амалӣ менамояд.

27. Мақомоти ваколатдори давлатӣ дорои чунин ваколатҳо мебошанд:

- қабул, бақайдгирӣ ва баррасӣ намудани ариза ва ҳуҷҷатҳои пешниҳодшаванда;

- баррасӣ ва таҳлил намудани лоиҳаи озмоишӣ аз нуқтаи назари мубрамият ва аҳамияти онҳо барои Ҷумҳурии Тоҷикистон;

- таҳия ва қабули санадҳои меъёрии ҳуқуқии дахлдор бо мақсади танзими масъалаҳои алоҳидаи вазъи ҳуқуқии субъекти реҷаи махсус, аз ҷумла масъалаи пешниҳод намудани имтиёзҳо ба субъекти реҷаи махсус;

- қабули санади дахлдор оид ба пешниҳод ва ё рад намудани пешниҳоди реҷаи махсус;

- мусоидат ва назорати татбиқи реҷаи махсус аз ҷониби субъекти реҷаи махсус, аз ҷумла масъалаи татбиқи дахлдори имтиёзҳои пешниҳодшуда;

- ҳамкорӣ бо мақомоти давлатӣ, шахсони ҳуқуқӣ, соҳибкорони инфиродӣ ҷиҳати ба таври дахлдор иҷро намудани ваколатҳои худ;

- таҳияи лоиҳаи ҳуҷҷатҳо ва шартномаҳо, ки барои истифода ба субъекти реҷаи махсус дар ҷараёни амалисозии лоиҳаи озмоишӣ зарур мебошанд;

- мусоидат ба субъекти реҷаи махсус дар амалӣ намудани лоиҳаи озмоишӣ, аз ҷумла пешниҳод намудани хизматрасониҳои машваратӣ ва намудҳои дигари хизматрасониҳо дар асоси шартномаҳои байни мақомоти ваколатдори давлатӣ ва субъекти реҷаи махсус басташуда;

- пешбурди Феҳристи субъектони реҷаи махсус;

- қатъ намудани вазъи ҳуқуқии реҷаи махсус мутобиқи муқаррароти Тартиби мазкур;

- ваколатҳои дигаре, ки бо Тартиби мазкур ва санадҳои дигари меъёрии ҳуқуқии амаликунанда Ҷумҳурии Тоҷикистон пешбини шудаанд.

6. ЛОИҲАИ ОЗМОИШӢ ВА ТАРТИБИ НАЗОРАТИ АМАЛИШАВИИ ОН

28. Лоиҳаи озмоишӣ бояд иттилоотро вобаста ба хусусиятҳо ва ҳадафҳои лоиҳаи озмоишӣ, зарурати амалӣ намудани лоиҳаи озмоишӣ барои пешрафти иқтисодиёт, саноат ва соҳаҳои дигари Ҷумҳурии Тоҷикистон, сарчашмаҳои маблағгузории лоиҳаи озмоишӣ, муҳлати амали лоиҳаи озмоишӣ ва масъалаҳои дигаре, ки барои пурра баҳо додани моҳияти лоиҳаи озмоишӣ зарур мебошанд, доро бошад.

29. Аз ҷониби аризадиҳанда инчунин, асосноккунӣ оид ба зарурати маҳдуд (истисно) кардан ва/ё қабули меъёрҳои дахлдори санадҳои меъёрии ҳуқуқӣ, ворид намудани тағйироту иловаҳо ба санадҳои меъёрии ҳуқуқии Ҷумҳурии Тоҷикистон ва ё таҳияи лоиҳаи санадҳои меъёрии ҳуқуқии нав ҷиҳати татбиқ намудани лоиҳаи озмоишӣ барои баррасии мақомоти ваколатдори давлатӣ пешниҳод карда мешавад.

30. Технологияҳои истифодашаванда дар доираи лоиҳаи озмоишӣ ва молу маҳсулоти истеҳсолшаванда барои бозори Ҷумҳурии Тоҷикистон хусусияти навгониро бояд дошта бошанд.

31. Дар ҷараёни амалисозии лоиҳаи озмоишӣ истифодаи дороиҳои рақамӣ ба сифати воситаи пардохт дар ҳудуди Ҷумҳурии Тоҷикистон манъ мебошанд.

32. Мақомоти ваколатдори давлатӣ ҳангоми баррасӣ намудани ҳуҷҷатҳои пешниҳодшуда, аз ҷумла лоиҳаи озмоишӣ, танҳо он лоиҳаҳои озмоиширо ба назар мегирад ва дастгирӣ менамояд, ки барои истифода аз дороиҳои рақамӣ ва/ё технологияи рақамӣ ва муосир равона шуда, рушди соҳаи муайянро тақозо намояд ва ба дигар талаботи дар Тартиби мазкур ҷавобгӯй бошад.

33. Назорати ҷараёни амалишавии лоиҳаи озмоишӣ аз ҷониби мақомоти ваколатдори давлатӣ тибқи Тартиби мазкур амалӣ карда мешавад.

34. Ҳангоми амалӣ намудани назорати амалишавии лоиҳаи озмоишӣ мақомоти ваколатдори давлатӣ ҳама гуна маълумот ва ҳуҷҷатҳоро вобаста ба амалисозии лоиҳаи озмоишӣ ва ноил шудан ба ҳадафҳои банақшагирифтаи субъекти реҷаи махсусро талаб менамояд.

35. Бо мақсади амалӣ намудани назорати ҷараёни татбиқи лоиҳаи озмоишӣ, субъекти реҷаи махсус ҳисобот оид ба раванди иҷрои лоиҳаи озмоиширо дар давраи муайян ба мақомоти ваколатдори давлатӣ пешниҳод менамояд.

36. Ҳисобот дар шакли ҳуҷҷатӣ ва ё шакли электронӣ тариқи ирсол намудани он почтаи электронии мақомоти ваколатдори давлатӣ сурат мегирад.

37. Ҳисобот дар се моҳ як маротиба то санаи 10-уми моҳи дигар баъди моҳи ба итмом расидани моҳи ҳисоботӣ пешниҳод карда мешавад.

38. Зиёда аз ду маротиба пайи ҳам пешниҳод накардани ҳисоботи ҷорӣ асос барои қатъ намудани вазъи ҳуқуқии субъекти реҷаи махсус мегардад.

39. Баъд аз ба итмом расидани муҳлати татбиқи лоиҳаи озмоишӣ аз ҷониби субъекти реҷаи махсус ҳисоботи ниҳоӣ оид ба татбиқ шудани лоиҳаи озмоишӣ то санаи 10-уми моҳи дигар баъди моҳи ба итмом расидани муҳлати татбиқи лоиҳаи озмоишӣ пешниҳод карда мешавад. Дар ҳисоботи ниҳоӣ оид ба ҷамъбасти лоиҳаи озмоишӣ маълумот оид ба ҳадафҳои ноилшуда дар ҷараёни татбиқи лоиҳаи озмоишӣ бояд дарҷ карда шаванд.

7. МУҲЛАТИ АМАЛИШАВИИ ЛОИҲАИ ОЗМОИШӢ ВА ТАРТИБИ ТАМДИДИ ОН

40. Муҳлати амалишавии лоиҳаи озмоишӣ ду солро дар бар мегирад.

41. Муҳлати амалишавии лоиҳаи озмоишӣ аз ҷониби мақоми ваколатдори давлатӣ дар асоси аризаи субъекти реҷаи махсус бо дарҷи сабабҳои ба итмом нарасонидани амалишавии лоиҳаи озмоишӣ ба муҳлати то як соли дигар тамдид карда мешавад.

42. Тамдиди лоиҳаи озмоишӣ чун тамдиди вазъи ҳуқуқии субъекти реҷаи махсус эътироф мегардад.

43. Тамдиди муҳлати амалишавии лоиҳаи озмоишӣ дар асоси санади дахлдори мақомоти ваколатдори давлатӣ сурат мегирад ва дар Феҳристи субъектони реҷаи махсус маълумоти дахлдор дарҷ карда мешаванд.

8. ИМТИЁЗҲОИ СУБЪЕКТИ РЕҶАИ МАХСУС

44. Субъекти реҷаи махсус аз имтиёзҳои пешбининамудаи қонунгузории амалкунандаи ҷории Ҷумҳурии Тоҷикистон истифодабарӣ менамояд.

45. Тамоми он имтиёзҳое, ки дар қонунҳо ва санадҳои дигари меъёрии ҳуқуқии амалкунандаи Ҷумҳурии Тоҷикистон барои субъектони паркҳои технологӣ, аз ҷумла субъектони парки технологии маҳсулоти барномавӣ ва технологияҳои иттилоотӣ пешбинӣ карда шудаанд, ба субъекти реҷаи махсус татбиқ карда мешаванд.

46. Нисбат ба субъекти реҷаи махсус имтиёзҳои андозие, ки тибқи муқаррароти қонунгузории андоз ба субъектони фаъолияти инноватсионию технологӣ пешниҳод карда шудаанд, тибқи Кодекси андоз пурра татбиқ карда мешаванд.

47. Дар ҳолати ба таври пурра ва дахлдор амалӣ шудани лоиҳаи озмоишӣ дар муҳлати муқарраргашта, имтиёзҳои нисбат ба субъекти реҷаи махсус тибқи Тартиби мазкур пешбинишуда баъд аз қатъи реҷаи махсус ба субъекти мазкур бо мақсади васеъ татбиқ намудани дастовардҳои дар ҷараёни татбиқи лоиҳаи озмоишӣ ноилшуда пешниҳод карда мешаванд.

9. ФЕҲРИСТИ СУБЪЕКТОНИ РЕҶАИ МАХСУС

48. Мақомоти ваколатдори давлатӣ Феҳристи субъектони реҷаи махсусро пеш мебарад.

49. Дар Феҳристи субъектони реҷаи махсус маълумоти зерин дарҷ карда мешаванд:

- номи пурраи субъекти реҷаи махсус; шакли ташкилию ҳуқуқии он; суроғаи ҳуқуқӣ ва маҳалли ҷойгиршавии воқеъгардидии он ва маълумоти дигаре, ки дар Маълумотнома дарҷ карда мешаванд;

- сана ва рақами санади мақомоти ваколатдори давлатӣ оид ба пешниҳод намудани реҷаи махсус ва қатъи он;

- сана ва рақами санади мақомоти ваколатдори давлатӣ оид ба тамдиди реҷаи махсус.

50. Феҳристи субъектони реҷаи махсус ва маълумот дар бораи онҳо дар сомонаи мақомоти ваколатдори давлатӣ гузошта мешаванд.

51. Бо дархости субъекти реҷаи махсус ба ӯ аз ҷониби мақомоти ваколатдори давлатӣ иқтибос аз Феҳристи субъектони реҷаи махсус пешниҳод карда мешавад.

10. МУҚАРРАРОТИ ХОТИМАВӢ

52. Ба Низомномаи мазкур тибқи тартиби муқарраргардида метавонад тағйиру иловаҳо ворид карда шаванд.

53. Ворид намудани тағйиру иловаҳо дар асоси пешниҳоди мақоми ваколатдори давлатӣ амалӣ карда мешавад.

Эҳтиромона хоҳиш карда мешавад, ки тибқи муқаррароти Тартиби пешниҳод намудани реҷаи махсуси танзимӣ дар соҳаи инноватсия ва технологияҳои рақамӣ ба _______________________________________________________________________________

                                        (шакли ташкилию ҳуқуқӣ ва номи пурраи аризадиҳанда)

барои баррасӣ намудани ҳуҷҷатҳои замимагардида ва пешниҳод намудани реҷаи махсус мусоидат намоед.

Замимаҳо: дар _________саҳифа

Бо эҳтиром,

____________________                     ______________                        _______________

(мақоми шахси ҳуқуқӣ)                         (имзо)                             (ному насаб)

ҷ.м.

                                                                                                                                                                                                                             Замимаи 2

☐ Тамоми маълумоти пешниҳодшуда дуруст мебошанд, ҳуҷҷатҳои пешниҳодшаванда маълумоти дурустро доро мебошанд.