Бо қарори Ҳукумати ҶТ аз 1.08.2018 № 376 аз 1.08.2018 № 376 аз эътибор соқит дониста шуд.

 

Ҳукумати Ҷумҳурии Тоҷикистон

ҚАРОР

Дар бораи тасдиқи Оинномаи Муассисаи давлатии "Донишгоҳи аграрии Тоҷикистон ба номи Шириншоҳ Шоҳтемур"

Мутобиқи моддаи 12 Қонуни Ҷумҳурии Тоҷикистон "Дар бораи Ҳукумати Ҷумҳурии Тоҷикистон" ва ҷиҳати иҷрои Фармони Президенти Ҷумҳурии Тоҷикистон аз 27 феврали соли 2008 № 428 "Дар бораи такмили минбаъдаи сохтори мақомоти марказии ҳокимияти иҷроияи Ҷумҳурии Тоҷикистон" Ҳукумати Ҷумҳурии Тоҷикистон қарор мекунад:

Оинномаи замимагардидаи Муассисаи давлатии "Донишгоҳи аграрии Тоҷикистон ба номи Шириншоҳ Шоҳтемур" тасдиқ карда шавад.

ОИННОМАИ МУАССИСАИ ДАВЛАТИИ "ДОНИШГОҲИ АГРАРИИ ТОҶИКИСТОН БА НОМИ ШИРИНШОҲ ШОҲТЕМУР"

1. Муқаррароти умумӣ

1) Муассисаи давлатии "Донишгоҳи аграрии Тоҷикистон ба номи Шириншоҳ Шоҳтемур" (минбаъд Донишгоҳ номида мешавад) бо қарори Раёсати Шӯрои иқтисодии Осиёимиёнагӣ аз 3 марти соли 1931 №220 ҳамчун Донишкадаи Осиёимиёнагии меваю сабзавот таъсис ёфта, соли 1934 ба Институти хоҷагии қишлоқи Тоҷикистон, сипас бо қарори Девони Вазирони Ҷумҳурии Тоҷикистон аз 10 августи соли 1992 №311 ба Донишгоҳи аграрии Тоҷикистон табдил дода шудааст.

Донишгоҳ бо қарори Ҳукумати Ҷумҳурии Тоҷикистон аз 31 октябри соли 2009 № 603 "Муассисаи давлатии "Донишгоҳи аграрии Тоҷикистон ба номи Шириншоҳ Шотемур" номгузорӣ карда шудааст.

2) Аз вақти тасдиқ гардидани Оинномаи мазкур Оинномаи амалкунандаи Донишгоҳ, ки дар Идораи нотариалии давлатии ноҳияи Исмоили Сомонии ш. Душанбе 29.12.2001 таҳти №19р-177 сабт шудааст, эътибори худро гум мекунад.

3) Муассиси Донишгоҳ Ҳукумати Ҷумҳурии Тоҷикистон (минбаъд Муассис) буда, Донишгоҳ дар Номгӯи ташкилотхри ғайритиҷоратии Вазорати кишоварзии Ҷумҳурии Тоҷикистон шомил мебошад.

4) Донишгоҳ муассисаи таълимии олӣ буда, фаъолияти худро мутобиқи Конститутсияи (Сарқонуни) Ҷумҳурии Тоҷикистон, Қонуни Ҷумҳурии Тоҷикистон "Дар бораи маориф", фармону амрҳои Президенти Ҷумҳурии Тоҷикистон, қарорҳо ва фармонҳои Ҳукумати Ҷумҳурии Тоҷикистон, Низомномаи намунавӣ оид ба муассисаи таълимии таҳсилоти олии касбии Ҷумҳурии Тоҷикистон, дигар санадҳои меъёрии ҳуқуқии Ҷумҳурии Тоҷикистон ва Оинномаи мазкур амалӣ менамояд.

5) Донишгоҳ шахси ҳуқуқӣ ба ҳисоб рафта, дорои мӯҳрҳо бо рамзҳои давлатӣ ва Донишгоҳ, нишона ва парчами Донишгоҳ, бланкаҳо бо номгӯи худ, баланси мустақил, суратҳисобҳои асъорӣ, ҷорӣ ва ғайра мебошад. Ҳуҷҷатнигорӣ ва ҳисоботи давлатиро тибқи тартиби муқарраргардида анҷом медиҳад.

6) Фаъолияти Донишгоҳ асосан аз ҳисоби маблағҳои буҷети давлатӣ, маблағҳои махсуси Донишгоҳ ва дигар манбаъҳои маблағгузорие, ки қонунгузории Ҷумҳурии Тоҷикистон манъ накардааст, амалӣ карда мешавад.

7) Номи расмии Донишгоҳ бо забонҳои тоҷикӣ, русӣ ва англисӣ чунин мебошад:

бо забони тоҷикӣ - "Донишгоҳи аграрии Тоҷикистон ба номи Шириншох Шоҳтемур";

бо забони русӣ - "Таджикский аграрный университет имени Шириншох Шотемур"

бо забони англисӣ - "Tajik Agrarian University named after Shirinsho Shotemur".

8) Суроғаи ҳуқуқӣ ва маҳали ҷойгиршавии Донишгоҳ: 734017, Ҷумҳурии Тоҷикистон, шаҳри Душанбе, хиёбони Рудакӣ 146.

2. Маром, ҳуқуқ, вазифа ва сохтори Донишгоҳ

9) Дар Донишгоҳ барномаҳои касбии аз ҷиҳати мӯҳлат ва сатҳ гуногуни маълумоти олию пас аз хатми мактаби олӣ дар мутобиқат бо стандартҳои муқарраргардидаи давлатӣ, тибқи самтҳои илм, техника ва фарҳанг амалӣ гардонда мешавад, ки азхудкунии онҳо бо дипломҳои намунаашон тасдиқёфта оид ба маълумоти олии сатҳашон гуногун, ҳуҷҷатҳо оид ба баланд бардоштани тахассус ва аз нав тайёр намудани мутахассисон тасдиқ карда мешавад.

10) Донишгоҳ маркази тайёр ва азнавтаёркунии мутахассисони гуногун барои соҳаи кишоварзӣ буда, мақоми асосиро дар муҳимтарин бахшҳои тараққиёти соҳаи кишоварзӣ, экологӣ, иҷтимоию фарҳангӣ, илмию таълимии ҷумҳурӣ ишғол менамояд.

11) Ҳадафи фаъолияти Донишгоҳ ҳамчун маркази тайёр ва азнавтайёркунии мутахассисон аз инҳо иборат мебошад:

- тайёр намудан ва баланд бардоштани тахассуси кадрҳо оид ба самту ихтисосҳои гуногун барои соҳаи кишоварзии Ҷумҳурии Тоҷикистон;

- ташкил ва гузаронидани тадқиқоти илмии бунёдӣ, ҷустуҷӯӣ, тадқиқоти илмию амалӣ ва таҷрибавию ихтироъкорӣ дар соҳаҳои гуногуни илм ва техника;

- паҳн намудани дастовардҳои илмию амалии кишоварзӣ, экологӣ, иқтисодӣ, баланд бардоштани сатҳи маълумотӣ, иҷтимоию сиёсӣ ва фарҳангии аҳолӣ;

- ташкил ва хизматрасонии аграрӣ ва кӯмаки машваратӣ ба шахсони ҳуқуқию воқеӣ;

- истеҳсол, коркард, нигоҳдорӣ ва фурӯши маҳсулоти кишоварзӣ, доруҳои биологӣ ва кимиёвӣ ва дигар молҳои истеъмолии халқ аз ашёи хоҷагии кишоварзӣ, маводи маҳаллӣ, ҳамчунин ашёи хоми гуногуни фармоишгарон бо тартиби пешбининамудаи ҳамин Оиннома.

12) Ба сохтори Донишгоҳ марказҳои машваратии факултетҳои таълимӣ, такмили ихтисоси кадрҳои муҷтамеи агросаноатӣ, курсҳои тайёрӣ дар вилоятҳои Суғд ва Хатлон, пажӯҳишгоҳи биотехнологияи кишоварзӣ, гурӯҳи таъмини бехатарии фаъолият ва риояи тартиботи дохилии Донишгоҳ, бригадаҳои сохтмонӣ, озмоишгоҳҳои таълимию тадқиқотии махсусгардонидашуда, литсей, марказ ва озмоишгоҳҳои таълимию таҷрибавӣ, илмӣ, истеҳсолӣ, саноатӣ, факултет, хоҷагиҳои таълимию таҷрибавӣ, дӯкони китоб, дорухона, бунгоҳи тиббӣ, фароғатгоҳ, муассисаҳои агросервисӣ ва тиҷоратӣ дохил мегарданд.

13) Донишгоҳ тибқи тартиби муқарраргардида ё бо розигии Муассис метавонад дар маркази Вилояти Мухтори Кӯҳистони Бадахшон, вилоятҳои Хатлон, Суғд ва минтақаҳои ҷумҳурӣ филиалҳои қисмҳои сохторӣ (факултетҳо, шӯъбаҳо) ва литсейҳои махсуси худро таъсис диҳад ва дар таҳкими эаминаи моддию техникӣ ва нигоҳ доштану афзун намудани иқтидори илмию педагогии онҳо аз ҳисоби маблағҳои махсуси Донишгоҳ ёрии амалӣ расонад.

14) Донишгоҳ комплекси таълимию илмӣ ва истеҳсолӣ ба ҳисоб рафта, ба он ҳамаи муассисаҳо, хоҷагиҳои таълимӣ ва дигар қисмҳое, ки баланси мустақил доранд, ба тарзи муташаккил дохил мегарданд. Дар ин маврид Донишгоҳ вазифаи асосӣ- пешоҳанги комплекси истеҳсолии муассисотӣ ва таълимию илмиро иҷро менамояд.

15) Тибқи қонунгузории Ҷумҳурии Тоҷикистон дар Донишгоҳ ташкилотҳои иттифоқи касаба таъсис дода мешаванд. Ба ташкили ҳизбҳои сиёсӣ ва дигар сохторҳои ташкилӣ дар ҳайати Донишгоҳ иҷозат дода намешавад.

Дар сохтори Донишгоҳ бо мақсади ҳимояи манфиати донишҷуён метавонад иттиҳодияҳои ҷаъмиятии донишомӯзон ташкил карда шавад, ки муносибат бо онҳо дар асоси шартнома бо маъмурияти Донишгоҳ муайян карда мешавад.

16) Донишгоҳ аз рӯи ӯҳдадориҳои худ бо маблағи пулие, ки дар суратҳисоби мустақили худ дорад, ҷавобгар мебошад. Дар сурати нокифоя будани маблағи Донишгоҳ, масъулият аз рӯи ӯҳдадориҳои он ба зиммаи соҳибмулк вогузошта мешавад. Муассис аз рӯи ӯҳдадориҳои Донишгоҳ масъулияти субсидиарӣ дорад.

3. Қабул ба Донишгоҳ

17) Шаҳрвандони Ҷумҳурии Тоҷикистон ҳуқуқ доранд дар асоси озмун дар Донишгоҳ ба маълумоти олии касбӣ соҳиб шаванд.

Қабули шаҳрвандони ҷумҳурӣ ба Донишгоҳ бо мақсади гирифтани маълумоти олии дуюми касбӣ мувофиқи шартнома (танҳо дар асоси пардохти маблағ) сурат мегарад.

Қабул ба Донишгоҳ дар баробари тайёр намудани мутахассисон аз ҳисоби маблағи буҷети давлатӣ, дар асоси шартнома ва аҳдномаҳо бо фармоишгарони гуногун амалӣ гардонида мешавад.

Қабул ба Донишгоҳ тибқи қонунгузории Ҷумҳурии Тоҷикистон амалӣ гардонида мешавад.

18) Шаҳрвандони хориҷӣ танҳо дар асоси шартнома, ки байни Донишгоҳ ва шахсони ҳуқуқию воқеӣ баста мешаванд ё дар матни созишномаҳои байниҳукуматӣ бо Ҳукумати Ҷумҳурии Тоҷикистон ва ҳукуматҳои давлатҳои хориҷӣ, ҳамчунин ташкилотҳои байналмилалӣ омадаанд, қабул карда мешаванд.

4. Фаъолияти таълимӣ ва илмии Донишгоҳ

19) Дар Донишгоҳ тибқи мӯҳлат ва сатҳи тайёр кардани мутахассисони касбӣ барномаҳои идловагӣ, таълимӣ дар асоси аз нав тайёр намудану баланд бардоштани тахассуси кадрҳо татбиқ мегардад.

Самти тайёр кардан ва аз нав тайёр намудани мутахассисон дар асоси иҷозатномаи пешбурди фаъолияти таълимӣ ва шаҳодатнома оид ба акредитатсияи давлатӣ, ки ба Донишгоҳ аз ҷониби Вазорати маорифи Ҷумҳурии Тоҷикистон дода шудааст, муайян карда мешавад.

20) Донишгоҳ мӯҳтавою услуби раванди таълимро вобаста ба ихтисосҳои дар банди 11 Оинномаи мазкур дарҷёфта, мӯҳлати меъёри азхудкунии онҳоро тибқи нақшаи таълимӣ ва барномаҳои амалкунандаи таълимӣ ва бо фарогирии ҷараёни таълимӣ ва мутобиқ ба стандартҳои давлатии таълим ба роҳ мемонад.

21) Амалисозии барномаи тарбияи мутахассисон дар Донишгоҳ ба забонҳои тоҷикию русӣ дар бахшҳои таълими рӯзонаю ғоибона сурат мегирад.

22) Донишгоҳ барои таҳсили шахсони алоҳида, бо дарназардошти малакаю тайёрии пешакиашон, барнома ва нақшаи раванди таълимиро мустақилона таҳия ва тасдиқ мекунад.

23) Донишгоҳ шаклҳои зерини дарсҳои таълимӣ ва корҳоро таъмин мекунад: дарсҳои лексионӣ, амалӣ, озмоишию семинарӣ, тақвиятӣ, корҳои мустақилонаю фардӣ, таҷрибаомӯзии таълимию истеҳсолӣ, корҳои дипломӣ ва курсӣ, лоиҳаҳои корҳои курсӣ ва дипломӣ ё кори таълимию тадқиқотӣ.

24) Барои ҳамаи шаклҳои дарсҳои аудиторӣ соати академии тӯлониашон 45 дақиқа, бо танаффуси 5 дақиқа баъди ҳар як 45 дақиқа ва 10 дақиқа байни ҷуфтҳои алоҳида ё 80 дақиқа байни ҷуфтҳои бо танафуси 10 дақиқагии байни дарсҳо муайян карда мешавад.

25) Марҳалаи асосии омӯзиш дар Донишгоҳ курси давомнокиаш як соли хониш муайян шудааст.

Соли хониш ба ду семестри таълимӣ, ки бо сессияҳои санҷишию имтиҳонӣ анҷом меёбанд, тақсим мешавад. Оғози таҳсил 1-уми сентябр буда, дар мӯҳлати муайянкардаи нақшаи таълимӣ анҷом меёбад. Соли таҳсилро барои шакли ғоибонаи таҳсил нақшаи таълимӣ муайян сохта, сессияҳои лабораторӣ, санҷишӣ ва имтиҳонӣ мутобиқи ҷадвали раванди таълим, ки тибқи тартиби муқарраршуда тасдиқ мешаванд, доир мегарданд.

Сарбории таълимии донишҷӯ дар ҳафта набояд аз 54 соат зиёд бошад. Дар айни ҳол ҳаҷми дарсҳои ҳатмии синфии донишҷӯ, бо назардошти дарсҳои тарбияи ҷисмонӣ, тайёрии ҳарбӣ, дарсҳои факултативӣ ба ҳисоби миёна набояд аз 31-39 соат зиёд бошад.

Барои донишҷуёни шакли рӯзонаи таҳсил ду маротиба ба мӯҳлати на камтар аз ду ҳафта таътил муайян мешавад. Давомнокии мушаххаси таътил тибқи нақшаи таълимию тақвимии тасдиқшуда муқаррар карда мешавад.

26) Ташкил ва такмили раванди таълим аз ҷониби шӯъбаи таълимию методӣ таҳти роҳбарии ноиби ректор оид ба таълим ба роҳ монда мешавад. Сохтору вазифаҳои шӯъбаи таълимию методӣ тибқи Низомномаи аз ҷониби Шӯрои илмии Донишгоҳ тасдиқшуда муайян карда мешавад.

27) Ҷузъи асосии таълимию тарбиявии Донишгоҳро кафедраҳо ташкил медиҳанд, ки дар асоси Низомномаи кафедраи муассисаи таҳсилоти олии касбии Ҷумҳурии Тоҷикистон фаъолият мекунанд. Вазифаи асосии онҳо аз ташкилу амалисозии корҳои омӯзишӣ, таълимию услубӣ, ташкилию методӣ, илмию тадқиқотӣ, тарбиявӣ ва тайёркунии кадрҳои илмию педагогӣ ва баландбардории савияи касбии омӯзгорон иборат аст. Барои сифати тарбияи кадрҳо, аз ҷумла барои сифати тахассуси мутахассисон тамоми кафедраҳо масъулиятро ба зимма доранд.

28) Донишу маҳорат ва малакаи донишҷуён дар ҳуҷҷатҳои маълумотдиҳӣ бо баҳоҳои зерин муайян карда мешаванд: "аъло", "хуб", "қаноатбахш" ва "ғайриқаноатбахш". Баҳоҳо, аз ҷумла "ғайриқаноатбахш" дар имтиҳон ё дар шакли дигар ҳангоми гузаронидани аттестатсияи натиҷаи кори донишҷӯён гузошта мешаванд. Дар дафтарчаи имтиҳонӣ баҳои "ғайриқаноатбахш" гузошта намешавад.

Донишҷӯёне, ки аз натиҷаи баҳои санҷиши ҷорӣ норозӣ мебошанд, ҳуқуқ доранд имтиҳонҳоро аз нав супоранд.

Аз рӯи фан ва шакли кори омӯзишие, ки барои донишҷӯ санҷиш муайян шудааст, баҳои "комёб" ё "ноком" гузошта мешаванд. Дар дафтарчаи имтиҳонии донишҷӯ баҳои "ноком" гузошта намешавад.

29) Аз курс ба курс гузаронидани донишҷӯён тибқи фармони ректори Донишгоҳ, бо назардошти аз ҷониби онҳо пурра иҷро гаштани ҳамаи талаботи меъёрие, ки нақшаи таълимию барномаҳои рмӯзишӣ пешбинӣ намудаанд, на дертар аз оғози соли нави таҳсил сурат мегирад.

Донишҷуёне, ки дар соли таҳсил аз аттестатсия нашгузаштаанд, ба курси дигар гузаронида намешаванд ва аз Донишгоҳ хориҷ карда мешаванд.

Барои донишҷӯёне, ки бо сабабҳои узрнок (беморӣ, даъват ба хизмати ҳарбӣ, карантин ва ғайра) аттестатсия нашудаанд, ҷадвали инфиродии супоридани қарзҳо муайян карда мешавад.

30) Донишҷӯёне, ки талаботи нақшаи таълимиро иҷро намудаанд, ба аттестатсияи ҷамъбастии давлатӣ роҳ дода шуда, бо назардошти натиҷаи он ба онҳо тахассуси (квалификатсияи) муносиби бакалавр, мутахассис ва магистри ихтисоси дахлдор, диплом ва нишони сарисинагӣ дода мешавад. Дар замимаи диплом баҳоҳои дар Донишгоҳ гирифтаи донишҷӯ сабт карда мешавад.

31) Донишҷӯёне, ки барои гузаронидани корҳои илмию тадқиқотӣ маҳорати зарурӣ доранд, ҳатман ба Ҷамъияти илмии донишҷӯён, мактаби профессорон ва ҳалли мавзӯъҳои илмии кафедраҳо ҷалб карда мешаванд.

32) Ба донишҷӯёне, ки дар таҳсил ба муваффақиятҳо ноил гашта, на камтар аз 75 фоизи баҳояшон аз фанҳои нақшаи таълимӣ "аъло" ва боқимонда "хуб" аст, инчунин аттестатсияи ҷамъбастии давлатиро ба баҳои "аъло" супоридаанд, бо қарори комиссияи давлатии аттестатсионӣ дипломи аъло дода мешавад.

Ба донишҷӯёне, ки дар ҷараёни таҳсил маҳорати баланди омӯзиш нишон дода, ба корҳои илмию тадқиқотӣ майлу рағбат доранд, барои дохилшавӣ ба магистратура тавсия дода мешаванд. Ба аспирантура донишҷӯён баъди хатми магистратура ё гирифтани дипломи мутахассис кдбул карда мешаванд.

33) Ташкилотҳои ҷамъиятию худидоракунии донишҷӯён бо назардошти завқмандии ҳайати кормандон ва иттиҳодияҳои мустақили донишҷӯёни Донишгоҳ фаъолияти клубу маҳфилҳоро ба роҳ мемонанд.

34) Ба донишҷӯёни фаъоли бахши рӯзонаи таълим стипендия дода мешавад. Ҳаҷми онро Донишгоҳ бо риояи қарори Ҳукумати Ҷумҳурии Тоҷикистон ва шартномаҳои бо сарпарастони (фармоишгарони) алоҳида басташуда муқаррар менамояд.

35) Донишгоҳ метавонад бо қарори Шӯрои илмии Донишгоҳ стипендияи номиро таъсис диҳад, ки ҳаҷми онро худи Донишгоҳ муайян мекунад.

36). Ба донишҷӯёни ноҳияҳои дурдасти бахши рӯзона, инчунин аз рӯи имконият ба донишҷӯёни бахши ғоибона хобгоҳ дода мешавад. Хобгоҳ дар асоси аризаи донишҷӯ бо қарори раёсат ва кумитаи иттифоқи касабаи донишҷӯёни Донишгоҳ дода мешавад.

37) Тибқи қоидаҳои тартиботи дохилии Донишгоҳ барои муваффақият дар таҳсил ва иштироки фаъолона дар корҳои ҷаъмиятӣ ва илмию тадқиқотӣ барои донишҷӯён шаклҳои зерини ҳавасмандкунии моддию маънавӣ пешбинӣ шудааст:

- эълони раҳматнома;

- додани унвони аълочии хониш;

- ҷой додан дар тахтаи аълочиён;

- додани ифтихорнома;

- фиристодани раҳматнома ба волидайн;

- пардохти стипендияи номӣ;

- додани тӯҳфа ва мукофот дар ҳаҷми стипендияи думоҳа;

- додани роҳхатҳои пуливу ройгон барои истироҳат дар лагерҳо ва фароғатгоҳҳо;

- барои таҳсили минбаъда фиристодан ба донишгоҳҳои олии хориҷа.

Шакли ҳавасмандкунии моддию маънавӣ бо қарори ректори Донишгоҳ, тибқи пешниҳоди деканони факултетҳо, ташкилотҳои ҷамъиятии донишҷӯён ва роҳбарони мавзӯъҳои алоҳида амалӣ мешаванд.

38) Барои иҷро накардани нақшаю барномаҳо, риоя накардани масъулияти хидматии дар Оинномаи мазкур зикргардида, аз ҷумла вайрон кардани низоми таълим, қоидаҳои тартиботи дохилии Донишгоҳ, қоидаҳои зист дар хобгоҳ ва истифодаи китобхона аз ҷониби донишҷӯён нисбати онҳо ҷазо андешида мешавад:

- сарзаниш;

- танбеҳ;

- рондан аз хобгоҳ;

- маҳрум намудан аз унвони донишҷӯи аълохон ва гирифтан аз тахтаи аълочиён;

- хориҷ кардан аз Донишгоҳ.

Ҳамаи намуди ҷазои интизомӣ бо фармони ректори Донишгоҳ, тибқи пешниҳоди деканҳои факултетҳо, мудирони кафедраҳо ва ташкилотҳои ҷамъиятию роҳбарони мавзӯъҳои алоҳида ба амал бароварда мешаванд.

39) Донишгоҳ фаъолияти илмии худро аз ҳисоби буҷет ва маблагҳои ҷалбшаванда мустақилона ба нақша мегирад.

5. Ҳуқуқ, вазифа ва ӯҳдадориҳои донишҷӯён (бакалаврҳо, мутахассис, магистрҳо), шунавандагони Донишгоҳ

40) Донишҷӯёни Донишгоҳ шахсоне ҳисоб мешаванд, ки бо фармони ректор ба таҳсил иҷозат дода шудаанд.

41) Қабул, хориҷ, барқарор ва аз як курс ба курси дигар гузаронидани донишҷӯён тибқи қоидаи амалкунанда, ки аз ҷониби Вазорати маорифи ҷумҳурӣ муқаррар шудааст, инчунин дигар санадҳои меъёрии ҳуқуқии Ҷумҳурии Тоҷикистон ба роҳ монда мешавад.

42) Ҳуқуқу вазифаҳои донишҷӯёни Донишгоҳ дар асоси Оинномаи мазкур ва дигар санадҳои меъёрии хуқуқӣ муайян карда мешаванд.

43) Донишҷӯи Донишгоҳ ҳуқуқ дорад дорои дониши ҷавобгӯи дараҷаи инкишофи илм, техника ва фарҳанги муосир бошад.

44) Донишҷӯён (бакалаврҳо, магистрҳо ва мутахассисон)-и Донишгоҳ ӯҳдадоранд:

-ҳамаи талаботи Оинномаи мазкур, қоидаҳои тартиботи дохилии Донишгоҳ, қоидаҳои зист дар хобгоҳ, қоидаҳои истифода аз китобхона, синфхона, ҷадвали дарсӣ ва ҷадвалҳои гузаронидани машғулиятҳои иловагӣ ва факултативиро иҷро намоянд;

-ҳатман дар ҳамаи машғулиятҳои таълимӣ иштирок карда, дар дарсҳо ба пӯшидани либос мувофиқи Дастуруламали Вазорати маорифи Ҷумҳурии Тоҷикистон оид ба "Либосҳои тавсиявии хонандагон ва донишҷӯёни муассисаҳои таҳсилоти ибтидоӣ, миёна ва олии касбӣ" таваҷҷӯҳ зоҳир намоянд.

-ҳамаи намудҳои корҳоеро, ки дар нақшаҳои таълимӣ ва тақвимӣ, барномаҳои корӣ тасдиқ шудаанд, иҷро намоянд;

-малака ва маҳорати назариявӣ ва амалиро доир ба ихтисоси интихобнамуда баланд бардоранд;

-баҳри баланд бардоштани сатҳи донишҳои фарҳангӣ, камолоти ахлоқӣ ва тандурустӣ саъйю кӯшиш намоянд;

-қарорҳои Шӯрои илмӣ, ректорат, ташкилотҳои ҷамъиятӣ ва фармонҳои Донишгоҳро иҷро кунанд;

-нисбат ба моликият ва воситаҳои Донишгоҳ, инчунин амвол, либосҳои махсус, ашёи хоми ба ӯ боваркардашуда боэҳтиёт бошанд;

-қоидаҳои зидди сӯхтор ва ҳифзи муҳити зистро риоя намоянд.

45) Шунавандагони Донишгоҳ шахсоне эътироф карда мешаванд, ки дар шӯъбаҳои тайёрӣ, Маркази такмили ихтисоси мутахассисони Муҷтамеи агросаноатӣ ва аз нав тайёр намудани мутахассисон, аз ҷумла курсҳои пулакӣ тах,сил мекунанд, инчунин шахсоне мебошанд, ки маълумоти олии дуюм мегиранд.

46) Шунавандагони Донишгоҳ низ дорои ҳамон ҳуқуқ ва ӯҳдадориҳо мебошанд, ки дигар донишҷӯёни шаклҳои таълимашон ба онҳо мувофиқ дар ихтиёр доранд.

6. Омӯзгорон ва кормандони Донишгоҳ

47) Дар Донишгоҳ вазифаҳои ҳайати кормандони илмӣ, омӯзгорӣ, инженерию техникӣ, маъмурӣ, истеҳсолӣ ва ғайра пешбинӣ карда шудааст.

Ҳамаи вазифаҳои холӣ мутобиқи қонунгузорӣ дар бораи меҳнат, Қонуни Ҷумҳурии Тоҷикистон "Дар бораи маориф" ва дигар санадҳои меъёрии ҳуқуқӣ танзим карда мешаванд. Ҳамаи омӯзгорон ва кормандон ҳангоми қабул ба кор оид ба вазифаҳои асосии корманд, сохтор ва миқдори сарбории омӯзгор, ҳаҷм, шароит ва тартиби пардохти музди меҳнат аз рӯи дараҷаи тахассусии корманд, риояи қоидаҳои тартиботи дохилии Донишгоҳ шартнома мебанданд. Барои ҳайати профессорону омӯзгорон ва ходимони илмӣ аз рӯи пешниҳоди кафедраҳо, пеш аз бастани шартнома, Шӯрои илмии Донишгоҳ ё шӯроҳои илмии факултетҳо озмуни интихобии довталабонро мегузаронанд.

Интихоби мудирони кафедраҳо дар асоси озмун гузаронида мешаванд.

Ректор ҳуқуқ дорад масъалаи интихоби озмуниро барои ишғоли ҳама гуна вазифаҳои омӯзгорӣ ба баррасии Шӯрои илмии Донишгоҳ пешниҳод намояд.

Тартиби гузаронидани интихоби озмунӣ барои ишғоли вазифаи холӣ тибқи Дастур дар бораи тартиби ишғоли вазифаи ҳайати омӯзгорон, ки аз тарафи мақомоти давлатии идораи маълумоти олӣ - Вазорати маорифи Ҷумҳурии Тоҷикисгон тасдиқ шудааст, танзим мегардад.

48) Донишгоҳ дар доираи маблағҳои барои музди меҳнат пешбинишуда метавонад мустақилона шаклу системаи пардохти музди меҳнатро тибқи Кодекси меҳнати Ҷумҳурии Тоҷикистон муқаррар намояд.

49) Сарбории таълимии ҳайати профессорону омӯзгоронро Донишгоҳ мустақилона, вобаста ба тахассус, зарурият ва аҳамиятнокии фаъолияти омӯзгорон муқаррар менамояд ва наметавонад дар соли хониш зиёда аз 900 соат (дар доираи маоши вазифавӣ) муқаррар намояд.

50) Аз кор озод намудани омӯзгорони штатии Донишгоҳ бо ташаббуси маъмурият дар асоси Кодекси меҳнатии Ҷумҳурии Тоҷикистон амалӣ карда мешавад.

51) Омӯзгорон ва кормандони Донишгоҳ ҳуқуқ доранд:

- фаъолияти касбии худро таъмин намоянд;

- ба мақомоти идоракунии Донишгоҳ интихоб намоянд ва интихоб шаванд;

- дар муҳокима ва ҳалли муҳимтарин масъалаҳои Донишгоҳ ҳам мустақиман ва ҳам тавассути ташкилотҳои ҷамъиятӣ ва мақомоти идории Донишгоҳ иштирок намоянд;

- аз озмоишгоҳҳо, утоқҳои кори, синфхонаҳо, толорҳои хониш, китобхонаҳо, маркази ахборию таҳлилӣ, қисмҳои таълимию илмӣ, муассисаҳо, профилактория - санаторияҳо, хадамоти табобатӣ ва ғайра истифода баранд;

- усул ва воситаҳои таълим, гузаронидани тадқиқотҳои илмӣ, корҳои таълимӣ ва илмӣ, илмию тадқиқотие, ки ба қобилияти фардии онҳо нисбатан ҷавобгӯ мебошанд, интихоб намоянд, то ки сифати баланди онҳо таъмин карда шавад;

- аз рӯзи кории шашсоатаи ба меъёр даровардашуда ва рухсатии дарозмуддати пардохтшавандаи 48 -рӯза, ки Кодекси меҳнати Ҷумҳурии Тоҷикистон муқаррар намудааст, истифода баранд;

- нисбати фармон ва супоришҳои маъмурияти Донишгоҳ ба тартиби муқарраргардида эътироз баён намоянд;

- аз имтиёзоте, ки қонунгузории Ҷумҳурии Тоҷикистон, қоидаҳои тартиботи дохилии Донишгоҳ ва шартномаҳои коллективии Донишгоҳ муқаррар намудааст, баҳравар бошанд.

52) Профессорону омӯзгорон ва ҳайати илмӣ ӯҳдадоранд:

- самаранокии баланди ҷараёни таълимӣ ва илмӣ, тарбияи мутахассисони баландпоя дар рӯҳияи маънавиёти умумиинсонӣ, инкишоф додани мустақилият, ташаббускорӣ, қобилияти эҷодӣ, малакаи кор бо коллективро таъмин намоянд;

- малака ва иқтидори зеҳнии худро барои баланд бардоштани дараҷаи дарсазхудкунӣ, маълумоти касбӣ ва ҷаҳонбинии донишҷӯён, бо истифодаи усулҳои муосири услубӣ, педагогию равоншиносӣ равона созанд;

- шаъну эътибори мутахассисони ояндаро эҳтиром намуда, ба ташаккули фарҳангию ҷисмонии онҳо мусоидат кунанд;

- сатҳи касбӣ ва умумифарҳангӣ, малака ва тахассусро мунтазам баланд бардоранд.

53) Донишгоҳ барои профессорону омӯзгорон ва дигар кормандон шаклҳои гуногуни мукофотҳои маънавию моддиро барои муваффақият дар фаъолияти таълимӣ, методӣ ва илмии дар Оиннома дарҷёфта муқаррар менамояд.

54) Ҳуқуқу ӯҳдадориҳои мушаххаси ҳайати таълимию ёрирасон ва маъмурию ҳоҷагидорӣ бо қоидаҳои амалкунандаи Донишгоҳ ва дастурламалҳои хизматӣ муайян карда мешавад.

7. Тайёр намудан ва баланд бардоштани дараҷаи тахассуси кадрҳои илмию педагогӣ

55) Дар Донишгоҳ шаклҳои зерини маълумоти мактаби олӣ амал мекунад:

- барои гирифтани тахассус (5 сол);

- барои гирифтани бакалавр (4 сол);

- докторартура (3 сол);

- магистратура (2 сол);

- аспирантура (3-4 сол);

- унвонҷӯй;

- коромӯзии илмӣ, педагогӣ ва эҷодӣ;

- гузаронидани омӯзгорон ба вазифаҳои кормандони илмӣ бо мақсади анҷом додани корҳои эҷодӣ ва рисолаҳои илмй;

- аз нав тайёр намудан, баланд бардоштани сатҳи тахассуси омӯзгорон ва кормандони роҳбарикунанда;

- кор аз рӯи нақшаҳои инфиродӣ.

56) Ҳукуқҳои аспирантони Донишгоҳ:

- интихоб намудан ва интихоб гаштан дар мақоми идоракунии Донишгоҳ;

- истифода аз озмоишгохдо, иштирок дар муҳокима ва ҳалли масъалаҳои муҳими фаъолияти Донишгоҳ, утоқҳои корӣ, синфхонаҳо, толорҳои хониш, китобхонаҳо, маркази ахборию таҳлилӣ, қисмҳои таълимӣ ва илмӣ, профилактория- санатория, хадамоти табобатӣ ва ғайра;

- интихоби усул ва воситаҳои гузаронидани тадқиқотҳои илмие, ки ба қобилияти фардии онҳо ҷавобгӯ мебошанд ва таъмини сифати баланди корҳои илмию тадқиқотӣ аз рӯи нақшаҳои инфиродӣ;

- баёни эътироз оид ба фармон ва амрҳои маъмурияти Донишгоҳ тибқи тартиби муқарраргардида.

57) ӯҳдадориҳои аспирантони Донишгоҳ:

- соҳиб шудан ба донишҳои амиқи касбӣ, усули гузаронидани тадқиқотҳои илмӣ, аз худ намудани малакаи мустақилонаи корҳои илмию тадқиқотӣ, доштани ҷаҳонбинии васеи илмӣ;

- пурра иҷро намудани барномаи кори инфиродӣ, аз худ намудани усули тарҳрезии математикӣ, истифодаи техникаи комтотерӣ, гузаштан аз таҷрибаи педагогӣ;

- супоридани имтиҳонҳои номзадӣ аз фалсафа, яке аз забонҳои хориҷӣ ва фанни ихтисосӣ;

- риояи Оинномаи мазкур, қоидаҳои тартиботи дохилии Донишгоҳ;

- иҷро намудани қарорҳои Шӯрои илмӣ ва ректорати Донишгоҳ;

- муносибати эҳтиёткорона ба моликият ва воситаҳои Донишгоҳ;

- риояи қоидаҳои зидди сӯхтор ва ҳифзи муҳити зист.

58) Ба аспирантоне, ки курси таълимиро дар аспирантура ба итмом расонидаанд дараҷаи тахассусии соҳавӣ (аграноми муҳаққиқ, зооинженери муҳаққиқ, ветеринари муҳаққиқ, инженери муҳаққиқ, иқтисодчии муҳакқиқ ва ғайра) дипломи намунаи муқарраргашта ва ҳангоми ишғол намудани вазифаҳои омӯзгорӣ ва илмӣ имтиёз дода мешаванд.

59) Барои аспирантони шакли таълимиашон рӯзона дар тобистон ё вақти барояшон муносиб бо давомнокии 4 ҳафта таътил муқаррар карда мешавад.

60) Ба аспирантоне, ки аз истеҳсолот ҷудо нашуда таълим мегиранд ва барномаи инфиродиашонро бомуваффақият ба иҷро мерасонанд, аз ҷои кор, бо нигоҳ доштани музди меҳнат бо давомнокии 30 рӯз тақвимӣ, барои супоридани имтиҳоноти номзадӣ ва иҷрои корҳои диссертатсионӣ рухсатии иловагии ҳарсола дода мешавад.

61) Аспирантоне, ки доир ба гузаронидани тадқиқотҳои илмӣ қобилият зоҳир накардаанд ва дар мӯҳлати муқарраргашта барномаи фардиашонро иҷро нанамудаанд, аз сафи аспирантон хориҷ карда мешаванд.

8. Идоракунии Донишгоҳ

62) Донишгоҳ мутобиқи тартиби муқаррарнамудаи Кодекси граждании Ҷумҳури Тоҷикистон, санадҳои меъёрии Ҳукумати Ҷумҳурии Тоҷикистон, Оинномаи мазкур, қоидаҳои тартиботи дохилии меҳнатӣ, шартномаҳои коллективӣ ва дигар санадҳои меъёрӣ идора карда мешавад.

63) Мақомоти идоракунии Донишгоҳ инҳоянд:

- конференсияҳои умумии ҳайати кормандони Донишгоҳ;

- Шӯрои илмӣ;

- ректорат.

64) Конферецсияҳои умумӣ мақомоти олии идоракунии Донишгоҳ ба ҳисоб рафта, тамоми масъалаҳои таҳти салоҳияташбударо ҳал менамояд, ба шарте, ки агар дар он аз 3/2 ҳиссаи намояндагони интихобшуда ҳозир бошанд.

65) Ҳайати намояндагаи конференсияро қарори якҷояи маъмурият ва кумитаи иттифоқи касабаи кормандони Донишгоҳ муайян мекунад.

66) Конференсияи умумӣ:

- Оинномаи Донишгоҳро таҳия намуда, ба Вазорати кишоварзии Ҷумҳурии Тоҷикистон ва Ҳукумати Ҷумхурии Тоҷикистон пешниҳод мекунад;

- ҳайати нахустини Шӯрои илмиро интихоб менамояд;

- самтҳои асосии истифодаи захираҳои Донишгоҳро муайян мекунад;

- масъалаҳои асрсии иқтисодӣ ва иҷтимоии инкишофи ҳайати кормандони Донишгоҳро баррасӣ менамояд;

- самтҳои асосии истифодабарии буҷети Донишгоҳро муайян мекунад;

- масъалаҳои дохил гаштани Донишгоҳро ба иттиҳодия, анҷуман ва иттифоқҳои дигар, инчунин хориҷ гаштани онро баррасӣ менамояд;

- ҳисоботи ректорро мешунавад;

- масъалаҳои дигари истеҳсолӣ, иҷтимоию иқтисодии тараққиёти Донишгоҳро арзёбӣ менамояд;

- конференсия вобаста ба зарурият на камтар аз як бор дар як сол гузаронида мешавад;

- конференсия бо ташаббуси ректор, бо талаби аз 3/1 ҳиссаи аъзои ҳайати кормандон, ё бо қарори кумитаи иттифоқи касабаи кормандони Донишгоҳ даъват мешавад.

67) Роҳбарии умумии Донишгоҳ аз ҷониби мақомоти бонуфузи интихобшаванда, яъне Шӯрои илмии Донишгоҳ, ки сарварии онро ректор ба ӯхда дорад, ба амал бароварда мешавад.

68) Интихоби ҳайати Шӯрои илмӣ аз ҷониби конференсияи умумии Донишгоҳ муайян карда мешавад.

Интихоботи минбаъдаи аъзои Шӯрои илмӣ дар маҷлиси умумии раёсат гузаронида мешавад.

Намояндагони бахшҳо дар Шӯрои илмӣ интихоб ё бозхонда мешаванд, агар барои он зиёда аз 50 фоизи ҳозирини маҷлис овоз диҳанд.

Интихобот ба таври овоздиҳии кушод гузаронида, бо протокол ба расмият дароварда мешавад.

Ҳайати Шӯрои илмӣ бо фармони ректор муайян карда мешавад. Интихоботи пеш аз мӯҳлат бо талаби на камтар аз нисфи аъзои Шӯрои илмӣ ҳангоми будани кворум ё бо қарори конференсияи умумӣ гузаронида мешавад.

69) Мӯҳлати ваколати Шӯрои илмӣ 3 сол аст.

70) Шакли асосии Шӯрои илмӣ ҷаласа мебошад. Ҷаласа ҳамон вақт ҳуқуқи қарор қабул карданро пайдо мекунад, ки агар дар он аз 3/2 ҳиссаи аъзо ҳозир бошанд.

71) Шӯрои илмӣ:

- масъалаҳои асосии ташкили таълиму тарбия, илмию тадқиқотӣ ва дигар фаъолияти Донишгоҳро дар соҳаи тайёр ва такмили мутахассисони маълумоти олии касбӣ, аз ҷумла номгӯи курсҳои омӯхташуда, ҳаҷми он, шаклҳои назорати дониши донишҷӯён, вақти ягонаи оғоз ва анҷоми семестрҳои таълимиро баррасӣ менамояд;

- масъалаҳои такмили идора ва сохтори Донишгоҳ, аз ҷумла ташкил (ё барҳам додани) факултаҳо, кафедраҳо, шӯъбаҳо, озмоишгоҳҳо, қисми илмию эҷодӣ, истеҳсолӣ, агробизнес ва ғайраро баррасӣ менамояд;

- масъалаҳои асосии инкишофи иқтисодӣ ва иҷтимоии Донишгоҳро ҳал менамояд;

- рӯйхати вазифаҳо ва ҳаҷми музди меҳнатро дар мувофиқа бо Кумитаи иттифоқи касабаи кормандон муайян менамояд;

- аспирантура ва докторантура мекушояд;

- тибқи тартиби муқарраршуда филиалҳо, намояндагӣ ва ихтисосҳои нав таъсис медиҳад;

- нақшаҳои дурнамои мавзӯъҳои илмиро баррасӣ ва тасдиқ мекунад;

- муқаррарот оид ба кафедраҳо ва дигар воҳидҳои таълимию илмии Донишгоҳро тасдиқ мекунад;

- муқаррарот оид ба низоми ишголи ҷойҳои холии ҳайати профессорию омӯзгоронро тасдиқ мекунад;

- барои ишғоли вазифаҳои холии ҳайати профессорону омӯзгорон озмуни интихобии хоҳишмандонро ба роҳ мемонад;

- ҳалли масоили тайёрӣ, бозомӯзӣ, такмили ихтисос ва ҳавасмандкунии кадрҳоро ба зимма дошта, барои дохилшавӣ ба аспирантура, докторантура, гузаштани омӯзгорон ба вазифаи ходими калони илмӣ бо мақсади анҷоми рисолаи докторӣ тавсия медиҳад;

- олимонро барои дарёфти унвонҳои фахрӣ, мукофоту ҷоизаҳои давлатӣ пешниҳод мекунад;

- номзадии олимони ватанӣ ва хориҷиро барои дарёфти унвони фахрии профессори Донишгоҳ тасдиқ менамояд;

- ҳайат ва қарорҳои комиссияю шӯроҳои амалкунанда ва муваққатиро тасдиқ мекунад;

- арзиши тайёркунии мутахассисонро тибқи шартнома муайян менамояд.

72) Ректорат мақомоти иҷроия ва амрдиҳандаи Донишгоҳ мебошад. Шакли асосии фаъолияти ректорат ҷаласаҳо ба шумор рафта, он моҳе як ё ду маротиба ва аз рӯи зарурат, бо ташаббуси ректор ё дархости аз 3/1 ҳиссаи аъзои он гузаронида мешавад.

73) Теъдод ва ҳайати шахсии ректорат бо фармони ректор ба мӯҳлати як соли таҳсил тасдиқ карда мешавад.

74) Ба ҳайати ректорат аз рӯи вазифа инҳо шомиланд:

ректор, ноибони ректор, ёрдамчиёни ректор, мушовири ҳуқуқӣ, сармуҳосиб, деканҳо, роҳбарони муассисаҳо, ташкилотҳо, филиалҳо, намояндагиҳо ва ташкилотҳои ҷамъиятии Донишгоҳ.

Ба ҳайати ректорат метавонанд олимон ва сармутахассисон ҳамроҳ карда шаванд.

75) Ректорат дар доираи салоҳияти худ қарору фармонҳо қабул мекунад. Ҷаласаи ректорат дар сурати ҳузури аз 3/2 ҳиссаи аъзо барпогардида дониста мешавад. Қарорҳо бо аксарияти овозҳо қабул карда мешаванд.

76) Ректорати Донишгоҳ:

- барои татбиқи барномаҳои тайёркунии мутахассисон чораҳо меандешад;

- масъалаҳои ҷудогонаи хоҷагидорӣ, фаъолияти таълимӣ, методӣ, ташкилию услубии Донишгоҳро дида мебарояд;

- таъмини амалии қоидаҳои тартиботи дохилии Донишгоҳ, қарорҳои Шӯрои олимон, конференсияи умумии Донишгоҳ, шартномаи коллективӣ, нақшаҳои методии Донишгоҳро ба роҳ мемонад.

77) Ректорат таҳти роҳбарии ректор амал мекунад.

Ректор аз ҷониби Ҳукумати Ҷумҳурии Тоҷикистон ба вазифа таъин ва аз вазифа озод карда мешавад.

78) Ректор барои раванди таълиму тарбия, корҳои илмию тадқиқотӣ ва маъмурию хоҷагидории Донишгоҳ масъул аст.

79) Дар як вақт иҷрои вазифаи ректорӣ бо вазифаи дигари пардохтшаванда, ғайр аз корҳои таълимӣ, илмию методӣ, иҷозат дода намешавад.

80) Ректори Донишгоҳ:

- вобаста ба вазифаю мақсадхри Донишгоҳ иҷрои қарорҳои Муассис, Вазорати кишоварзии Ҷумхурии Тоҷикистон, Вазорати маорифи Ҷумҳурии Тоҷикистон, конференсияи умумии Донишгоҳ, Шӯрои олимон ва ректоратро таъмин мекунад;

- муовинони (ноибони) худро аз ҷумлаи олимони обрӯманд, бо мувофиқаи Муассис ба вазифа таъин ва аз вазифа озод менамояд.

- мутобиқи Оинномаи мазкур ва дигар санадҳои меъёрии ҳуқуқӣ фаъолияти таълимӣ, илмӣ, истеҳсолӣ, маъмурию хоҷагидорӣ, соҳибкорӣ, ва молиявии Донишгоҳро роҳбарӣ мекунад;

- қабул ба кор, гузаштан ба кори дигар, аз кор озод кардан, бастан ва қатъи шартномаҳо бо кормандони Донишгоҳ, ҳамчунин роҳбарону сармутахассисони ҳамаи ташкилоту муассисаҳои марбут ба сохтори Донишгоҳ, аз ҷумла дар ҳисоби хоҷагӣ бударо таъмин мекунад;

- ҳайати ректорату Шӯрои профессорон ва вохидҳои роҳбарикунандаро ташкил ва тасдиқ мекунад;

- сохтори роҳбарӣ, дастуруламали хизматии рӯйхати мансабҳо, суратхароҷоти иҷрои хизматрасонии аграрӣ, бозомӯзии кадрҳо ва дигар хизматрасониро тасдиқ мекунад;

- бе ваколатномаи Донишгоҳ бо ҳамаи ташкилотҳои давлатию ҷамъиятӣ, муассисаю ташкилотҳо, шахсони хориҷӣ, воқеӣ ва ҳуқуқӣ муносибатҳои амволӣ, молиявӣ, таълимию илмӣ ва ғайраро ба роҳ мемонад;

- барои ҳавасмандкунӣ ва додани ҷазоҳои интизомӣ фармонҳо қабул мекунад;

- дар доираи салоҳияташ фармону супоришҳо содир мекунад, ки иҷрои онҳо аз ҷониби ҳамаи кормандону донишҷӯёни Донишгоҳ ҳатмӣ мебошад.

81) Роҳбарии фаъолияти факултетро декан ба ӯҳда дорад. Декани факултетро ректор ба вазифа таъин ва аз вазифа озод менамояд.

82) Декан вазифаҳои зеринро иҷро мекунад:

- идораи бевоситаи кори таълимӣ, методӣ, ташкилӣ ва тарбиявию илмии факултет;

- таъмини иҷрои нақшаю барномаҳои таълимӣ;

- назорати иҷрои ҷадвали дарсҳои таълимӣ;

- ташкили назорати давомот ва иштироки донишҷӯён ба дарсҳо, муайянсозии мӯҳлати супоридани имтиҳонҳо;

- тартиб додан ва амалисозии чорабиниҳо оид ба такмили раванди таълим, баландбардории сифати тайёркунии мутахассисон;

- ба ректори Донишгоҳ пешниҳод намудани дархостҳо дар бораи аз курс ба курс гузаронидани донишҷӯён, додани рухсатии академӣ, нақшаи корҳои инфиродӣ, хориҷ ва барқароркунии донишҷӯён;

- иҷозати донишҷӯён ба имтиҳонҳои давлатӣ, тайёр намудани лоиҳаи корҳои дипломӣ ва ҳимояи лоиҳаи корҳои дипломӣ аз рӯи пешниҳоди кафедраҳо;

- коркард ва амалӣ гардонидани чорабиниҳо ҷиҳати беҳбуди шароити зисти донишҷӯён;

- дар ҳамкорӣ бо кумитаи иттифоқи касабаи донишҷӯён намудани масъалаи бо манзилнома таъмин намудани донишҷӯён ва ҷудо намудани ҷой дар хобгоҳҳо;

- ҳал намудани дигар масъалаҳое, ки ба салоҳияти ӯ вобастаанд ва ба Оинномаи мазкур мутобиқанд.

83) Дар факултет таҳти роҳбарии декан Шӯрои факултет ба мӯҳлати се сол ташкил карда мешавад. Тарзи ташкил ва вазифаҳои он шабеҳи таъсиси Шӯрои олимони Донишгоҳ буда, танҳо дар доираи факултет амал мекунад.

84) Роҳбарии фаъолияти кафедраҳоро мудирони кафедраҳо ба зимма дошта, онҳо дар асоси Низомномаи кафедраи муассисаи таҳсилоти олии касбии Ҷумҳурии Тоҷикистон ба мӯҳлати 4 сол интихоб мешаванд.

85) Роҳбарии филиали Донишгоҳ, институти илмию тадқиқотӣ ва ҳоҷагиҳои таълимию таҷрибавиро директорҳо ба зимма доранд. Онҳоро ректори Донишгоҳ аз ҳисоби мутахассисони варзидаи соҳаи дахлдор ба вазифа таъин ва аз вазифа озод менамояд.

9. Мустақилияти Донишгоҳ ва назорати фаъолияти он

86) Донишгоҳ дар доираи стандарти ягонаи давлатии маълумот, бо салоҳдиди худ курсҳои муосири таълимӣ, методикаи таълиму омӯзиш, вазифаи тадқиқотҳои илмию роҳҳои ҳалли онҳо интихоб намуда, барои таъмини раванди таълиму гузаронидани тадқиқотҳои илмӣ роҳи бемамонияти гирифтани иттилоот мусоидат менамояд.

87) Донишгоҳ дар қабули қарорҳо ва амалигардонии фаъолияташ, ки аз Оинномаи мазкур бармеояд, мустақил мебошад. Дахолати мақомоти идораи давлатӣ ба раванди фаъолияти таълимӣ, илмӣ, хоҷагидорӣ ва дигар ҷамбаъҳои Донишгоҳ, ғайр аз ҳолатҳои дар қонунгузории Ҷумҳурии Тоҷикистон муайяншуда, иҷозат дода намешавад.

88) Донишгоҳ ҳуқуқ дорад бо ҳамаи ташкилотҳои Ҷумҳурии Тоҷикистон ва созмонҳои байналмилалӣ робитаҳои илмию амалӣ дошта бошад.

10. Фаъолияти иқтисодию молиявии Донишгоҳ

89) Донишгоҳ ҳамчун муассисаи давлатӣ нисбат ба амвол дорои ҳуқуқи идоракунии оперативӣ мебошад.

90) Ба Донишгоҳ дар доираи қонунгузорӣ моликият, маблағҳои пулӣ, молӣ ва дигар иншоот дода шудаанд, инчунин амволи аз шахсони воқеӣ ва ҳуқуқӣ дар шакли тӯҳфа ё васият пешниҳодгардида, аз ҷумла маҳсули меҳнати зеҳнӣ, даромадҳо аз фурӯши молу хизматрасониҳои аз ҷониби ташкилоту зермуассисаҳои гуногуни Донишгоҳ бадастомада, маблағи фаъолияти ҳисоби хоҷагидорӣ тааллуқ доранд, ки барои тайёр кардану бозомӯзӣ ва такмили тахассуси мутахассисон истифода бурда мешаванд.

91) Сарчашмаҳои ташаккули моликият ва маблағгузории фаъолияти Донишгоҳ инҳо мебошанд;

- воситаҳои буҷети сатҳҳои гуногуни барои таъмини стандарти давлатии маълумот ҷудошаванда:

- маводу пардохтҳои пулии Муассис;

- маблағи аз ҳисоби муассисаю ташкилотҳои ватанию хориҷӣ ва хоҷагиҳои таълимию таҷрибавии Донишгоҳ воридшаванда;

- маводу маблағгузории мақсадноки супоришдиҳандагон ва дигар сарпарастон, ки барои тайёркунӣ, бозомӯзӣ ва такмили ихтисоси мутахассисон ворид шудаанд, ҳамчунин ҳадяи ихтиёрии шахсони ҳуқуқию воқеӣ ва ҳамкорони хориҷӣ;

- даромад аз фурӯши маҳсулоти илмию таълимӣ, хизматрасониҳо ва арзиши моддии корҳои анҷомдодашуда.

92) Донишгоҳ барои амалигардонии вазифаҳои оинномавии худ ҳуқуқ дорад:

- идораи хоҷагидориии ашёву захираҳои ба ӯ тааллуқцоштаро назорат намояд;

- тибқи қонунгузории Ҷумҳурии Тоҷикистон фаъолияти соҳибкорӣ, робитаи иқтисодии хориҷӣ ва ғайраро пеш барад;

- тибқи тартиби муайяншуда филиалу факултет, институт ва дигар намояндагии худро кушояд;

- олимони ватанӣ ва хориҷиро барои хизматҳои шоиста ва ҳамкории самаранок бо унвони фахрии профессори Донишгоҳ сазовор гардонад;

- хизматрасониро дар соҳаи кишоварзӣ, иттилоотӣ, машваратӣ ва дарсҳои иловагию сабақгардонӣ дар асоси пулакӣ амалӣ созад;

- шаклҳои гуногуни шартномаҳои меҳнатиро ба имзо расонад;

- сатҳи иҷтимоии кормандонро аз ҳисоби маблағҳои махсус баланд бардорад;

- сохтори созмонии Донишгоҳ ва ҷузъҳои тобеъро ташкил ва тасдиқ намояд, шаклҳои ташкилу ҳавасмандкунии меҳнатиро муайян созад;

- ҷадвали воҳидҳои кориро тасдиқ ва бо риояи музди меҳнат вазифаҳоро муайян созад;

- бо тартиби муайянкардаи санадҳои меъёрии ҳуқуқӣ мавод ва китобу дигар воситаҳоро ба иҷора диҳад, амволи кӯҳнаю корношоямшударо аз ҳисоб барорад;

- табодули устодон, донишҷуён ва шунавандагонро бо кишварҳои хориҷӣ дар асоси шартнома ба роҳ монад;

- дар тендеру музоядаҳои дохилӣ, ҷумҳуриявӣ ва хориҷӣ дар ҳамгироӣ бо дигар муассисаю ташкилотҳо ва ширкату ассотсиатсияҳо иштирок намояд;

- ба шаклҳои дигар фаъолияте, ки қонунгузории Ҷумҳурии Тоҷикистон иҷозат медиҳад, машгул шавад.

11. Фаъолияти байналмилалии Донишгоҳ

93) Ҳамкории байналмилалии Донишгоҳ дар доираи фаъолияти сиёсати хориҷии давлат, дар асоси эътимоду боварии тарафайн ва ба шартномаю созишномаҳои байнидавлатӣ амалӣ мегардад.

94) Донишгоҳ ҳукуқ дорад, ки дар соҳаи таҳсилоти олии касбӣ, баъд аз таҳсилоти олии касбй ва таҳсилоти касбии иловагӣ, илмӣ ва (ё) илмию техникӣ, омӯзгорй ва дигар фаъолиятро мутобиқи қонунгузории Ҷумҳурии Тоҷикистон ва шартномаҳои байналмилалй ҳамкориҳои байналмилалӣ амалӣ намояд.

95) Донишгоҳ ҳуқуқ дорад бо Муассис, фондҳои гуманитарӣ ва ташкилотҳои молиявии байналмилалии хориҷӣ робитаи бевосита муқаррар намояд, барномаҳои байналмилалии таълимӣ, илмию методӣ ва илмию тадқиқотиро бо тартиби муқаррарнамудаи қонунгузории Ҷумҳурии Тоҷикистон татбиқ намояд.

96) Донишгоҳ тайёр намудан, бозомӯзӣ ва такмили ихтисоси шаҳрвандони давлатҳои хориҷӣ, кори омӯзгорӣ ва илмию таҳқиқотии шаҳрвандони Ҷумҳурии Тоҷикистонро дар хориҷи кишвар дар асоси созишномаи байнидавлатӣ, созишномаи байни Вазорати маорифи Ҷумҳурии Тоҷикистон, Муассис ва мақомоти идораи таҳсилоти давлатҳои хориҷӣ, инчунин тибқи шартномаҳои бевосита, ки Донишгоҳ ба шахсони ҳуқуқии хориҷӣ, аз ҷумла муассисаҳои таълимӣ ё ба шаҳрвандони хориҷӣ бастааст, амалӣ менамояд.

97) Асъоре, ки Донишгоҳ аз фаъолияти иқтисодии хориҷӣ ба даст меорад, дар ихтиёрдороии он қарор дошта, ба истиснои муқаррароти қонун, мусодира карда намешавад. Ин маблаг барои рушди соҳаи таҳсилот, таҳкими заминаи модцию техникӣ ва рушди иҷтимоии Донишгоҳ харҷ карда мешавад.

12. Ҳисобот ва ҳисобдиҳӣ

98) Донишгоҳ ҳисоби фаврӣ ва муҳосибавиро оид ба натиҷаҳои фаъолияти худ мутобиқи қонунгузории Ҷумҳурии Тоҷикистон ба роҳ мемонад. Он тибқи шакли муқарраршуда баҳисобгирии муҳосибавӣ, оморӣ, коргузорӣ, амалиёти бойгониро пеш бурда, дар ин хусус ба Муассис ҳисобот пешниҳод менамояд.

99) Вазифаи асосии баҳисобгирии муҳосибавӣ инҳо мебошанд:

- ташкили ахбори комилан дурусти раванди хоҷагидорӣ ва натиҷаҳои корҳо ҷиҳати идора ва роҳбарии фаврӣ;

- таъмини назорати мавҷудият ва гардиши пули накд, васоити молӣ, меҳнатӣ ва ғайра мувофиқи меъёр, ченакҳо ва сметаҳо;

- сари вақт огоҳонидан аз зухуроти номатлуб дар фаъолияти молиявию хоҷагӣ, ошкор ва сафарбар намудани захираҳои дохилии Донишгоҳ.

100) Донишгоҳ ба таври мустаким тибқи муқаррароти қонунгузории Ҷумҳурии Тоҷикистон ба мақомоти молия, андоз, омор ва дигар мақомоти марбута ҳисобот пешниҳод менамояд.

101) Давраи ҳисоботӣ барои Донишгоҳ соли тақвимӣ буда, аз 1 январ то 31 декабр идома меёбад.

102) Донишгоҳ маблағҳои буҷетиро тибқи қонунгузории Ҷумҳурии Тоҷикистон дар хазинадории марказии Вазорати молияи Ҷумҳурии Тоҷикистон нигоҳ медорад.

103) Донишгоҳ баҳисобгирии муҳосибавию омории худро дар асоси муқаррароти қонунгузорӣ ба роҳ мемонад.

13. Қатьи фаъолияти Донишгоҳ

104) Азнавташкилдиҳӣ ё барҳамдиҳии Донишгоҳ тибқи тартиби муқаррарнамудаи қонунгузорӣ бо қарори Муассис анҷом дода мешавад.