Низомнома дар бораи нишони сарисинагии "Корманди фахрии мақоми олии аудити давлатӣ"

1. Бо нишони сарисинагии "Корманди фахрии мақоми олии аудити давлатӣ" (минбаъд - нишони сарисинагӣ) кормандони мақоми олии аудити давлатӣ, ки дар рушди ин мақом саҳми арзандаи худро гузошта, ба нишондиҳандаҳои хуби корӣ ноил гардидаанд ва уҳдадориҳои хизматиро дар сатҳи намунавӣ иҷро карда, на камтар аз 5 сол дар мақоми олии аудити давлатӣ фаъолият намудаанд, сарфароз гардонида мешаванд.

2. Бо нишони сарисинагӣ барои хизмат дар соҳаи аудити берунаи мустақили давлатӣ, инчунин шахсони дигар низ сарфароз гардонида мешаванд.

3. Тартиби пешниҳод барои бо нишони сарисинагӣ сарфароз гардонидани корманди мақоми олии аудити давлатӣ ва шахсони дигар аз тарафи раиси Палатаи ҳисоби Ҷумҳурии Тоҷикистон тасдиқ карда мешавад.

4. Қарор дар бораи бо нишони сарисинагӣ сарфароз гардонидан бо фармоиши раиси Палатаи ҳисоби Ҷумҳурии Тоҷикистон дар асоси протоколи ҷаласаи ҳайати мушовараи Палатаи ҳисоби Ҷумҳурии Тоҷикистон ба расмият дароварда мешавад.

5. Сарфарозгардонӣ бо нишони сарисинагӣ аз тарафи раиси Палатаи ҳисоби Ҷумҳурии Тоҷикистон ё муовини ӯ дар вазъияти тантанавӣ анҷом меёбад.

6. Корманди бо нишони сарисинагӣ сарфарозгардидаи мақоми олии аудити давлатӣ, ки ҷинояти қасдона содир кардааст, бо пешниҳоди сардори воҳиди сохтори дахлдори дастгоҳи Палатаи ҳисоби Ҷумҳурии Тоҷикистон тибқи протоколи ҷаласаи ҳайати мушовараи Палатаи ҳисоби Ҷумҳурии Тоҷикистон бо фармоиши раиси Палатаи ҳисоби Ҷумҳурии Тоҷикистон аз нишони сарисинагӣ маҳрум карда мешавад.

7. Шахсони дигар, ки бо нишони сарисинагӣ сарфароз гардидаанд, дар ҳолати содир кардани ҷинояти қасдона бо пешниҳоди раиси

Палатаи ҳисоби Ҷумҳурии Тоҷикистон тибқи қарори ҳайати мушовараи Палатаи ҳисоби Ҷумҳурии Тоҷикистон аз нишони сарисинагӣ маҳрум карда мешаванд.

8. Сарфароз гардонидани кормандони мақоми олии аудити давлатӣ ё маҳрум намудани онҳо аз нишони сарисинагӣ дар дафтарчаи меҳнатии корманд сабт карда мешавад.

9. Нишони сарисинагӣ аз тарафи рости сина пас аз мукофотҳои давлатӣ ва дар ҳолати набудани онҳо, дар ҷойи онҳо овехта мешавад.

10. Кормандони мақоми олии аудити давлатӣ ва шахсони дигар бо нишони сарисинагӣ такроран сарфароз гардонида намешаванд. Ҳангоми гум кардани нишони сарисинагӣ ва (ё) шаҳодатномаи он, нусхаи дуюм дода намешавад. Дар ҳолати гум шудани нишони сарисинагӣ маълумотнома дар бораи сарфарозгардонӣ бо он дода мешавад.

11. Тасвир ва тавсифи нишони сарисинагии "Корманди фахрии мақоми олии аудити давлатӣ" тибқи замимаҳои 1 ва 2 муайян карда мешаванд.

Тавсифи нишони сарисинагии "Корманди фахрии мақоми олии аудити давлатӣ"

1. Нишони сарисинагии "Корманди фахрии мақоми олии аудити давлатӣ" (минбаъд - нишони сарисинагӣ) аз ситораи ҳафтгӯша ва унсури рӯйкашӣ дар марказ, нишони даврашакли рангаш зарҳалӣ иборат буда, дар дохили он офтоб, харита, уқоб, сипар ва сандуқ тасвир ёфтааст.

2. Андозаи нишони сарисинагӣ 40x40 мм буда, аз хӯлаи биринҷии бо зарҳал пӯшонидашуда тайёр карда шудааст, ки ғафсиаш 2,5 мм мебошад.

3. Дар қисми болоии нишон тасмаи рангаш сурх бо навиштаҷоти "КОРМАНДИ ФАХРИИ" ҷойгир аст.

4. Дар маркази он нишони Мақоми олии аудити давлатӣ гузошта шуда, бо ранги зарҳалӣ пур карда шудааст, дар дохили он офтоб, харита, уқоб, сипар ва сандуқ тасвир ёфтааст.

5. Дар қисми поёнии нишон тасмаи сурх бо навиштаҷоти "МАҚОМИ ОЛИИ АУДИТИ ДАВЛАТӢ" ҷойгир аст.

6. Тарафи дигари нишони сарисинагӣ сатҳи ҳамвор дошта, он аз рақамҳои тартибӣ дар шакли барҷаста ва сӯзанак барои часпонидани нишон ба либос насб шудааст.