Низомнома дар бораи нишони Палатаи ҳисоби Ҷумҳурии Тоҷикистон

1. Нишони Палатаи ҳисоби Ҷумҳурии Тоҷикистон нишони расмӣ буда, тааллуқ доштани онро ба мақоми олии аудити давлатии Ҷумҳурии Тоҷикистон нишон медиҳад.

2. Нишони Палатаи ҳисоби Ҷумҳурии Тоҷикистон дар воситаҳои нақлиёти хизматӣ, либоси хизматӣ, ашёи инфиродӣ, нишони хизматию сарисинагӣ, таҷҳизоти хизматӣ, ҳуҷҷатгузории хизматӣ, муҳрҳо (ба ғайр аз муҳри асосӣ бо тасвири Нишони давлатии Ҷумҳурии Тоҷикистон), инчунин дар бино ва иншооти Палатаи ҳисоби Ҷумҳурии Тоҷикистон ҷойгир ва насб карда мешавад.

3. Тасвир ва тавсифи нишони Палатаи ҳисоби Ҷумҳурии Тоҷикистон тибқи замимаҳои 1 ва 2 муайян карда мешаванд.

Тавсифи нишони Палатаи ҳисоби Ҷумҳурии Тоҷикистон

1. Нишони Палатаи ҳисоби Ҷумҳурии Тоҷикистон даврашакли рангаш зарҳалӣ буда, ба кураи замин шабоҳат дода шудааст. Дар дохили он офтоб, уқоб, сипар, харитаи Ҷумҳурии Тоҷикистон ва сандуқ тасвир ёфтааст. Дар қисмати болоии нишон навиштаҷоти "ПАЛАТАИ ҲИСОБИ ҶУМҲУРИИ ТОҶИКИСТОН" ва дар қисмати поёнии он бо забони англисӣ навиштаҷоти "ACCOUNTS CHAMBER OF THE REPUBLIC OF TAJIKISTAN" сабт шудааст.

2. Тасвири офтоб дар нишони Палатаи ҳисоб ифодаи нуру равшанӣ, некию саховат ва инъикоси Тоҷикистони офтобрӯя мебошад.

3. Тасвири харита ҳудуди Ҷумҳурии Тоҷикистони соҳибихтиёрро инъикос намуда, тибқи мақсад, вазифа ва ваколатҳояш дастрасӣ доштани Палатаи ҳисобро дар самти истифодаи самаранок ва мақсадноки маблағҳои буҷетӣ, моликияти давлатӣ ва захираҳои давлатх ба тамоми шохаҳои ҳокимияти давлатӣ гувоҳӣ медиҳад.

4. Тасвири уқоб дар нишон ифодаи он аст, ки ҳамчун пуштибони адлу инсоф ва ростию адолат мардумро аз ҳар гуна бенизомӣ ва хатарҳо огоҳ ва эмин нигоҳ дорад.

5. Дар нишони Палатаи ҳисоб инъикос ёфтани сипар маънои онро дорад, ки мақоми мазкур дар таъмини амнияти буҷети давлат, ҳифзи моликияти давлатӣ ва захираҳои давлатӣ ҳамчун сипар уҳдадор мебошад.

6. Сандуқ ҳамчун рамзи сарват, хазина ва бойигарии давлат оварда шудааст, ки Палатаи ҳисоб уҳдадор аст онро ғанӣ ва ҳифз намояд.

7. Нишон аз хӯлаи даврашакли зарҳалӣ тайёр карда шуда, як тараф дорад, ки дарозӣ ва бараш баробар мебошад.