Низомномаи Палатаи ҳисоби Ҷумҳурии Тоҷикистон

1. МУҚАРРАРОТИ УМУМӢ

1. Палатаи ҳисоби Ҷумҳурии Тоҷикистон (минбаъд - Палатаи ҳисоб) мақоми олии аудити давлатӣ мебошад, ки аудити берунаи мустақили давлатиро оид ба баҳодиҳӣ ба лоиҳаи буҷети давлатӣ, ҳисоботи маҷмуии солонаи Ҳукумати Ҷумҳурии Тоҷикистон дар бораи иҷрои буҷети давлатӣ ва истифодаи мақсадноку самараноки маблағҳо ва захираҳои давлатӣ анҷом дода, аз рӯйи натиҷаҳои он хулоса пешниҳод менамояд.

2. Палатаи ҳисоб фаъолияти худро дар асоси Конститутсияи Ҷумҳурии Тоҷикистон, қонунҳои конститутсионӣ ва қонунҳои Ҷумҳурии Тоҷикистон, қарорҳои Маҷлиси миллӣ ва Маҷлиси намояндагони Маҷлиси Олии Ҷумҳурии Тоҷикистон, фармон ва амрҳои Президенти Ҷумҳурии Тоҷикистон, қарор ва фармоиши Ҳукумати Ҷумҳурии Тоҷикистон, санадҳои ҳуқуқии байналмилалии эътирофнамудаи Тоҷикистон ва Низомномаи мазкур ба роҳ мемонад.

3. Палатаи ҳисоб барои иҷрои вазифаҳои худ бо мақомоти ҳифзи ҳуқуқ, назоратӣ, вазорату идораҳо ва воҳидҳои аудити дохилӣ дар ташкилотҳои бахши давлатӣ, мақомоти маҳаллии ҳокимияти давлатӣ, мақомоти андоз ва гумрук ҳамкорӣ менамояд.

2. ВАЗИФА ВА ВАКОЛАТҲОИ ПАЛАТАИ ҲИСОБ

4. Палатаи ҳисоб вазифаҳои зеринро иҷро менамояд:

- пешниҳоди маълумоти саҳеҳ ва беғаразона ба Президенти Ҷумҳурии Тоҷикистон ва Маҷлиси намояндагони Маҷлиси Олии Ҷумҳурии Тоҷикистон оид ба лоиҳаи буҷети давлатӣ, ҳисоботи солонаи маҷмуии Ҳукумати Ҷумҳурии Тоҷикистон дар бораи иҷрои буҷети давлатӣ ва идоракунии захираҳои давлатӣ;

- ташхиси лоиҳаи буҷети давлатӣ ва аудити ҳисоботи солонаи маҷмуии Ҳукумати Ҷумҳурии Тоҷикистон дар бораи иҷрои буҷети давлатӣ ва аз натиҷаи онҳо пешниҳод намудани хулоса ба Президенти Ҷумҳурии Тоҷикистон ва Маҷлиси намояндагони Маҷлиси Олии Ҷумҳурии Тоҷикистон барои мусоидат ба назорати истифодаи мақсаднок ва самараноки маблағҳои гирифташуда ва харҷгардидаи буҷети давлатӣ ва идоракунии зарурии захираҳои давлатӣ.

5. Ваколатҳои Палатаи ҳисоб аз инҳо иборатанд:

- ташхиси лоиҳаи буҷети давлатӣ ва бо тартиби муқарраргардида пешниҳод кардани хулосаи аудиторӣ ба он;

- аудити иҷрои буҷети давлатӣ, буҷети ҷумҳуриявӣ, фондҳои мақсадноки давлатӣ ва буҷетҳои маҳаллӣ;

- арзёбии фаъолияти мақомоти андоз, гумрук ва мақомоти дахлдори дигар вобаста ба иҷрои қисми даромади буҷети давлатӣ;

- аудити фаъолияти корхонаву муассисаҳои давлатӣ ва ташкилотҳои дигар, ки маблағҳои давлатӣ, моликияти давлатӣ ва захираҳои давлатиро истифода намудаанд;

- аудити фаъолияти корхона, муассиса ва ташкилотҳои дигар, ки ҳиссаи давлат дар сармояи онҳо ба таври назоратшаванда маҳсуб меёбад, инчунин дар ҳолатҳои истисноӣ бо супориши Президенти Ҷумҳурии Тоҷикистон ё дархости Маҷлиси намояндагони Маҷлиси Олии Ҷумҳурии Тоҷикистон ҳангоми 10 дарсад ва зиёда аз онро ташкил намудани ин ҳисса;

- аудити фаъолияти корхона, муассиса ва ташкилотҳои дигаре, ки воситаҳои буҷетиро дар шакли кумаки молиявӣ мегиранд;

- аудити истифодаи воситаҳои махсуси буҷетӣ ва воситаҳои ғайрибуҷетӣ;

- арзёбии татбиқи барномаҳои мақсадноки давлатӣ;

- аудити идоракунӣ ва истифодаи моликияти давлатӣ ва коммуналӣ;

- аудити мутақобила дар корхона, муассиса ва ташкилотҳои дигар, новобаста ба шакли ташкилию ҳуқуқӣ, ки маблағҳои давлатиро истифода намудаанд;

- аудити истифодаи маблағҳои сармоягузории давлатӣ, грантҳо ва қарзи берунаи давлатӣ, ки бо кафолати Ҳукумати Ҷумҳурии Тоҷикистон ҷалб карда шудаанд;

- аудити идоракунии қарзи давлатии дохилии Ҷумҳурии Тоҷикистон;

- аудити иҷрои буҷети суғуртаи иҷтимоӣ ва нафақаи Ҷумҳурии Тоҷикистон;

- аудити идоракунӣ ва истифодаи захираҳои табиии Ҷумҳурии Тоҷикистон, аз ҷумла иҷрои созишномаҳо оид ба тақсими маҳсулот;

- аудит вобаста ба дархости мақомоти ҳокимияти давлатӣ, корхона, муассиса ва ташкилотҳои дигар оид ба асоснокии истифодаи воситаҳои буҷетӣ ва захираҳои давлатӣ;

- аудити Бонки миллии Тоҷикистон, бонкҳои давлатӣ, аз ҷумла бонкҳои давлатии исломӣ;

- аудити бонкҳои дигар ва ташкилотҳои қарзии ғайрибонкӣ вобаста ба хизматрасонии воситаҳои буҷетӣ, фондҳои давлатӣ ва қарзи давлатӣ;

- ба роҳбари объекти аудит пешниҳод намудани тавсияҳо барои андешидани тадбирҳо оид ба бартараф намудани камбудию қоидавайронкуниҳои молиявӣ, ки аз натиҷаи чорабиниҳои аудитории Палатаи ҳисоб муайян карда шудаанд;

- ба Маҷлиси намояндагони Маҷлиси Олии Ҷумҳурии Тоҷикистон пешниҳод намудани таклифҳо оид ба такмили қонунгузории Ҷумҳурии Тоҷикистон дар соҳаи молияи давлатӣ ва буҷети давлатӣ;

- бо дархости Маҷлиси намояндагони Маҷлиси Олии Ҷумҳурии Тоҷикистон пешниҳод намудани ҳисобот оид ба масъалаҳои алоҳидаи иҷрои буҷети давлатӣ ва воситаҳои ғайрибуҷетӣ;

- ба Президенти Ҷумҳурии Тоҷикистон ва Маҷлиси намояндагони Маҷлиси Олии Ҷумҳурии Тоҷикистон пешниҳод намудани маълумот дар бораи иҷрои буҷети давлатӣ ва натиҷаи тадбирҳои андешидашуда;

- ба Президенти Ҷумҳурии Тоҷикистон ва Маҷлиси намояндагони Маҷлиси Олии Ҷумҳурии Тоҷикистон пешниҳод намудани ҳисоботи ҷамъбастӣ аз натиҷаи чорабиниҳои аудитории гузарондашуда;

- амалӣ намудани дигар намуди аудити берунаи давлатӣ;

- амалӣ намудани ваколатҳои дигар, ки аз санадҳои қонунгузории Ҷумҳурии Тоҷикистон бармеоянд.

3. ТАШКИЛИ ФАЪОЛИЯТИ ПАЛАТАИ ҲИСОБ

6. Ҳайати мушовараи Палатаи ҳисоб мақоми олии идоракунӣ мебошад, ки масъалаҳои муҳимми идоракунии Палатаи ҳисобро баррасӣ карда, қарорҳои дахлдорро бо тарафдории аксарияти аъзои ҳайати мушовара қабул менамояд ва ба онҳо раиси ҳайати мушовара имзо мегузорад. Ба Палатаи ҳисоб ва кори ҳайати мушовара раиси Палатаи ҳисоб роҳбарӣ мекунад ва иҷрои қарорҳои ҳайати мушовара барои тамоми кормандони Палатаи ҳисоб ҳатмӣ мебошад.

7. Ҳайати мушовара аз раис, муовини раис ва панҷ сараудитори Палатаи ҳисоб иборат мебошад.

8. Раис, муовини раис ва сараудитори Палатаи ҳисоб бо пешниҳоди Президенти Ҷумҳурии Тоҷикистон аз ҷониби Маҷлиси намояндагони Маҷлиси Олии Ҷумҳурии Тоҷикистон ба муҳлати ҳафт сол ба мансаб таъин карда мешаванд. Раис, муовини раис ва сараудитори Палатаи ҳисоб наметавонанд ин мансабро зиёда аз ду маротиба ишғол намоянд.

9. Тартиби фаъолият ва ваколатҳои ҳайати мушовараи Палатаи ҳисоб тибқи Қонуни Ҷумҳурии Тоҷикистон "Дар бораи Палатаи ҳисоби Ҷумҳурии Тоҷикистон" муқаррар карда мешаванд.

10. Раиси Палатаи ҳисоб:

- роҳбарии умумии фаъолияти Палатаи ҳисобро амалӣ менамояд;

- ваколатҳои мансабиро дар байни муовини раис ва сараудиторони Палатаи ҳисоб тақсим менамояд;

- ҷадвали воҳидҳои кории Палатаи ҳисоб, пардохти маблағи хизматрасонии коршиноси берунаро дар доираи фонди музди меҳнат тасдиқ ва сметаи хароҷоти Палатаи ҳисобро имзо менамояд, инчунин дар ҳолати зарурӣ мустақилона ва асоснок оид ба дархости маблағи иловагӣ барои таъмини фаъолияти Палатаи ҳисоб муроҷиат менамояд;

- ба ҳайати мушовараи Палатаи ҳисоб роҳбарӣ менамояд ва ба қарорҳои он имзо мегузорад;

- роҳбари дастгоҳи Палатаи ҳисоб, аудитор ва корманди дигари Палатаи ҳисобро бо тартиби муқаррарнамудаи қонунгузории Ҷумҳурии Тоҷикистон ба мансаб таъин ва аз мансаб озод мекунад;

- дар ҳолати беморӣ ё дар рухсатии меҳнатӣ будани сараудитор самти фаъолияти ӯро ба сараудитори дигар вобаста менамояд;

- низомномаҳои воҳидҳои сохториро тасдиқ мекунад;

- дастурамалҳои мансабиро тасдиқ менамояд;

- ҳавасмандгардонӣ, расондани кумаки моддӣ ба кормандон ва нисбат ба онҳо татбиқ намудани ҷазои интизомиро бо тартиби муқаррарнамудаи қонунгузории Ҷумҳурии Тоҷикистон анҷом медиҳад;

- ба Президенти Ҷумҳурии Тоҷикистон оид ба пешбарии кормандон ба рутбаҳои махсуси ҳайати олии роҳбарикунанда ва сарфарозгардонӣ бо мукофотҳои давлатии Ҷумҳурии Тоҷикистон таклиф пешниҳод менамояд;

- бо тартиби муқарраргардида лоиҳаи қонун ва дигар санадҳои меъёрии ҳуқуқиро оид ба масъалаҳои мансуб ба салоҳияти Палатаи ҳисоб таҳия ва барои баррасӣ пешниҳод менамояд;

- бемамониат бо ҳуҷҷатҳо вобаста ба лоиҳаи буҷети давлатӣ ва иҷрои буҷети давлатӣ, бо назардошти риояи талаботи сирри давлатӣ ва сирри дигари бо қонун ҳифзшаванда, шинос мешавад;

- дар ҷаласаҳо оид ба масъалаҳои ҳисоботи солонаи Ҳукумати Ҷумҳурии Тоҷикистон дар бораи иҷрои буҷети давлатӣ, муҳокимаи парламентӣ оид ба иҷрои буҷети давлатӣ, инчунин баррасии лоиҳаи буҷети давлатӣ ва масъалаҳои дигар вобаста ба вазифаҳои Палатаи ҳисоб иштирок ва баромад мекунад;

- ба воҳидҳои сохтории Палатаи ҳисоб супориш дода, иҷрои онро назорат менамояд;

- назорати сифати аудит ва бо воситаҳои технологияи муосири иттилоотию коммуникатсионӣ гузарондани аудитро таъмин менамояд;

- роҳбари гурӯҳ ва аъзои онро барои гузарондани аудитҳои молиявӣ, мутобиқат, самаранокӣ ва аудитҳои дигар таъин мекунад;

- муроҷиатҳои шахсони воқеӣ ва ҳуқуқиро бо тартиби муқаррарнамудаи қонунгузории Ҷумҳурии Тоҷикистон баррасӣ ва назорат менамояд;

- фармоишҳоро дар доираи ваколатҳои худ қабул менамояд ва шартномаҳоро ба имзо мерасонад;

- Палатаи ҳисобро дар мақомоти давлатии Ҷумҳурии Тоҷикистон ва хориҷа намояндагӣ менамояд;

- ваколатҳои дигари муқаррарнамудаи қонунгузории Ҷумҳурии Тоҷикистонро амалӣ менамояд.

11. Ваколатҳои муовини раис ва сараудиторони Палатаи ҳисоб тибқи Қонуни Ҷумҳурии Тоҷикистон "Дар бораи Палатаи ҳисоби Ҷумҳурии Тоҷикистон" пешбинӣ мегардад ва ҳангоми набудани раиси Палатаи ҳисоб, муовини раис уҳдадориҳои хизматии ӯро иҷро менамояд.

12. Муовини раис ва сараудиторон дар доираи ваколатҳои худ масъалаҳои вобаста ба ташкили фаъолияти самти вобастгардидаро мустақилона ҳал намуда, барои сифати чорабиниҳо ва натиҷаи онҳо масъул мебошанд.

13. Ваколатҳои роҳбари дастгоҳ:

- ба фаъолияти дастгоҳи Палатаи ҳисоб роҳбарӣ карда, кори онро ташкил ва супоришҳои раиси Палатаи ҳисобро иҷро менамояд;

- фаъолияти воҳидҳои сохтории дастгоҳро ҳамоҳанг месозад;

- иҷрои амру фармонҳои Президенти Ҷумҳурии Тоҷикистон, қарорҳои Маҷлиси миллӣ ва Маҷлиси намояндагони Маҷлиси Олии Ҷумҳурии Тоҷикистон, ҳайати мушовара ва нақшаи кори Палатаи ҳисоб дар воҳидҳои сохториро таъмин ва назорат менамояд;

- омода ва таҳия намудани ҳуҷҷатҳо оид ба ташкили фаъолияти Палатаи ҳисобро таъмину назорат менамояд;

- бо супориши раис Палатаи ҳисобро дар мақомоти давлатӣ, ҳифзи ҳуқуқ, судӣ ва ташкилотҳои дигар намояндагӣ менамояд;

- иҷрои талаботи низомнома, дастурамалҳои мансабии кормандон ва мутахассисони воҳидҳои сохтории дастгоҳро назорат карда, маълумот доир ба иҷрои супоришу нақшаҳои корӣ аз ҷониби онҳоро талаб менамояд;

- дар хусуси ворид намудани тағйиру иловаҳо дар сохтори Палатаи ҳисоб, воҳидҳои корӣ ва санадҳои меъёрии ҳуқуқии соҳавӣ ба раиси Палатаи ҳисоб таклифҳо пешниҳод менамояд;

- дар кори ҷаласаҳои ҳайати мушовара, семинару машваратҳо, гурӯҳҳои корӣ, комиссияҳои озмунӣ ва аттестатсионӣ иштирок менамояд;

- дар таҳияи санадҳои меъёрии дохилиидоравӣ, стандартҳо ва методологияи татбиқи онҳо ва пешниҳоди таклифҳо вобаста ба онҳо иштирок менамояд;

- тибқи тартиби муқарраргардида ба раиси Палатаи ҳисоб барои андешидани чораҳои ҳавасмандгардонӣ ё татбиқи ҷазои интизомӣ ба кормандони дастгоҳ таклифу пешниҳод менамояд;

- оид ба натиҷаҳои фаъолияти дастгоҳ ба раиси Палатаи ҳисоб, муовини раис ва ҳайати мушовара маълумот пешниҳод менамояд.

14. Ваколатҳои сардорони воҳидҳои сохторӣ, аудиторон ва кормандони дигари Палатаи ҳисоб, ки дар низомномаҳои воҳидҳои сохторӣ ва дастурамалҳои мансабӣ пешбинӣ мегардад, аз ҷониби раис тасдиқ карда мешавад.

4. МУҚАРРАРОТИ ХОТИМАВӢ

15. Таъминоти моддию техникии Палатаи ҳисоб аз ҳисоби маблағҳои буҷети ҷумҳуриявӣ ва манбаъҳои дигаре, ки қонунгузории Ҷумҳурии Тоҷикистон манъ накардааст, амалӣ карда мешавад.

16. Палатаи ҳисоб дорои молу мулк мебошад, ки ба он дар асоси қонунгузории Ҷумҳурии Тоҷикистон бо ҳуқуқи идоракунии оперативӣ дода шудааст.

17. Палатаи ҳисоб шахси ҳуқуқӣ буда, дорои муҳр бо тасвири Нишони давлатии Ҷумҳурии Тоҷикистон, ном бо забони давлатӣ, нишони худ, муҳрҳои дахлдор ва штампу бланкҳо мебошад.

18. Маҳалли ҷойгиршавии Палатаи ҳисоб: Ҷумҳурии Тоҷикистон, шаҳри Душанбе, хиёбони Рӯдакӣ, 36.

Сохтори Палатаи ҳисоби Ҷумҳурии Тоҷикистон

Роҳбарият;

Раёсати баҳодиҳии буҷети давлатӣ;

Раёсати баҳодиҳии буҷетҳои маҳаллӣ;

Раёсати аудити соҳаҳои иҷтимоӣ;

Раёсати аудити соҳаҳои кишоварзӣ, саноат, субъектҳои истеҳсолӣ ва моликияти давлатӣ;

Раёсати аудити сармоягузорӣ, қарз ва бонкҳои давлатӣ;

Раёсати аудити соҳаи мудофиа ва мақомоти ҳифзи ҳуқуқ;

Раёсати аудити самаранокӣ;

Раёсати таҳлил, рушд, стандарт ва ҳамкориҳои байналмилалӣ;

Раёсати технологияҳои иттилоотию коммуникатсионӣ;

Шуъбаи кафолати сифати аудит;

Шуъбаи ҳуқуқ;

Шуъбаи молия ва хоҷагидорӣ;

Шуъбаи кадрҳо ва корҳои махсус;

Шуъбаи умумӣ.