Тартиби пешбурди номгӯйи роҳҳои автомобилгарди истифодаи умуми дорои аҳамияти байналмилалӣ ва ҷумҳуриявӣ

1. МУҚАРРАРОТИ УМУМӢ

1. Тартиби пешбурди номгӯйи роҳҳои автомобилгарди истифодаи умуми дорои аҳаммияти байналмилалӣ ва ҷумҳуриявӣ (минбаъд - Тартиб) қоидаҳои пешбурд ва ворид намудани тағйирот ба номгӯйи роҳҳои автомобилгарди истифодаи умуми дорои аҳаммияти байналмилалӣ ва ҷумҳуриявиро (минбаъд - Номгӯй) муқаррар менамояд.

2. Мақоми ваколатдори давлатӣ дар соҳаи фаъолияти роҳдорӣ оид ба пешбурди Номгӯй Вазорати нақлиёти Ҷумҳурии Тоҷикистон (минбаъд - мақоми ваколатдори давлатӣ) мебошад.

3. Мақоми роҳҳои байналмилалӣ тибқи шартномаҳои байналмилалии Ҷумҳурии Тоҷикистон муқаррар карда мешавад.

2. ТАРТИБИ ПЕШБУРД ВА ВОРИДСОЗИИ ИТТИЛООТ БА НОМГӯЙ

4. Номгӯй мутобиқи таснифи техникии роҳҳои автомобилгарди истифодаи умум бо нишондиҳандаҳои асосӣ ва меъёрҳои муайянкунандаи роҳҳои автомобилгард дар шакли чопӣ ва электронӣ пеш бурда мешавад.

5. Дар ҳолати номутобиқатии маълумоти чопӣ бо электронӣ шакли чопии он афзалият дорад.

6. Ворид намудани самтҳои нави роҳҳои автомобилгард ба Номгӯй дар мувофиқа бо вазорату идораҳои дахлдор, мақомоти иҷроияи маҳаллии ҳокимияти давлатӣ ва соҳибони роҳи автомобилгард амалӣ карда мешавад.

7. Мақоми ваколатдори давлатӣ маълумоти пешниҳодгардидаро баррасӣ намуда, дар сурати ҷавобгӯ будан ё набудан ба Тартиби мазкур, дар муҳлати 30 рӯз хулосаи худро ба муроҷиаткунанда ба таври хаттӣ ирсол менамояд.

3. ВОРИД НАМУДАНИ ТАҒЙИРОТ БА НОМГӯЙ ВА ХОРИҶ НАМУДАНИ ИТТИЛООТ АЗ ОН

8. Пешниҳод оид ба ворид намудани тағйирот ба Номгӯй дар ду нусха ба мақоми ваколатдори давлатӣ ирсол карда мешавад.

9. Пешниҳод оид ба ворид намудани тағйирот ба Номгӯй, ки аз ҳудуди ду ва зиёда вилояту ноҳияҳо мегузарад, бо мақомоти иҷроияи маҳаллии ҳокимияти давлатӣ мувофиқа карда мешавад.

10. Пешниҳод оид ба ворид намудани тағйирот ба Номгӯй, ки соҳибони роҳи автомобилгард, шахсони воқеӣ ва ҳуқуқӣ ба мақоми ваколатдори давлатӣ ирсол мекунанд, бояд маълумот ва ҳуҷҷатҳои зеринро дар бар гирад:

- ном ва маҳалли ҷойгиршавии роҳи автомобилгард;

- мутобиқ будани роҳи автомобилгард ба нишондиҳандаҳои асосӣ ва меъёрҳои муайянкунандаи роҳҳои автомобилгарди истифодаи умуми дорои аҳамияти байналмилалӣ ва ҷумҳуриявӣ;

- ба талаботи техникӣ мутобиқ будани роҳи автомобилгард;

- асоснокии ворид намудани тағйирот ба Номгӯй;

- таркиби боркашонӣ ва мусофиркашонӣ аз рӯйи намудҳои ҳамлу нақл бо муайянкунии ҳиссаи бор ва мусофиркашонии маҳаллӣ дар сарҳадҳо;

- ҳолати нақлиётиву истифодабарии роҳҳои автомобилгарде, ки бо маводи ташхисӣ тасдиқ шудааст;

- дарозии роҳҳои автомобилгарди ҳудуди ноҳияҳо, шаҳрҳо бо тафсилоти ҳар як маҳалли аҳолинишин;

- ҳаҷми маблағгузориҳое, ки барои рушди роҳҳои автомобилгард зарураст, аз ҷумла барои ба анҷом расондани сохтмон (азнавсозӣ)-и қитъаҳои алоҳида, сохтмон (азнавсозӣ)-и роҳҳои баанҷомнарасида, барои сохтмони роҳҳои даврзании нуқтаҳои аҳолинишин;

- ҳаҷми маблағгузориҳое, ки ҳарсола барои таъмир ва нигоҳдорӣ, таъмири асосии роҳҳои автомобилгард зарур аст;

- маълумоти баҳисобгирӣ ва ҳисоботдиҳии молиявии роҳҳои автомобилгард;

- нусхаи шиносномаи техникии роҳи автомобилгарде, ки аз ҷониби соҳибони роҳи автомобилгард тасдиқ карда шудааст.

11. Тағйирот ба Номгӯй дар 5 сол як маротиба ворид карда мешавад. Пешниҳодҳо ҷиҳати ворид намудани тағйирот ба Номгӯй аз ҷониби мақоми ваколатдори давлатӣ баррасӣ карда мешаванд.

12. Барои баррасии пешниҳод оид ба ворид намудани тағйирот ба Номгӯй аз ҷониби мақоми ваколатдори давлатӣ комиссия таъсис дода мешавад.

13. Ҳайати комиссия ва тартиби фаъолияти он бо санади дахлдори мақоми ваколатдори давлатӣ муайян карда мешавад.

14. Дар ҷаласаи комиссия намояндагони соҳибони роҳи автомобилгард, вазорату идораҳо, мақомоти дахлдор, инчунин шахсони манфиатдори дигар иштирок мекунанд.

15. Ҳангоми баррасии пешниҳод оид ба ворид намудани тағйирот ба Номгӯй ҳамкории бевосита бо соҳибони роҳҳои автомобилгард таъмин карда мешавад.

16. Комиссия аз рӯйи натиҷаи баррасии пешниҳод ба Номгӯй чунин таклифҳоро пешниҳод менамояд:

- дар сурати қабули қарори мусбат ба мақоми ваколатдори давлатӣ оид ба таҳияи лоиҳаи қарор;

- дар сурати қабули қарори манфӣ дар бораи рад кардани пешниҳод барои ворид намудани тағйирот ба Номгӯй бо нишон додани сабабҳои мушаххас.

17. Дар асоси пешниҳоди комиссия мақоми ваколатдори давлатӣ дар сурати қабули қарори мусбат лоиҳаи қарори дахлдорро бо тартиби муқарраргардида таҳия карда, барои мувофиқа ба мақомоти иҷроияи маҳаллии ҳокимияти давлатӣ ва мақомоти дахлдор ирсол менамояд ва ба соҳибони роҳи автомобилгард хабар медиҳад. Дар сурати қабули қарори манфӣ мақоми ваколатдори давлатӣ ба соҳибони роҳи автомобилгард дар бораи рад кардани пешниҳод дар Номгӯй бо нишон додани сабабҳо хабар медиҳад.

18. Пешниҳод оид ба ворид намудани тағйирот ба Номгӯй дар ҳолатҳои зерин рад карда мешавад:

- пешниҳод ба талаботи банди 10 Тартиби мазкур ҷавобгӯ набошад;

- дар ин самт роҳи автомобилгарди истифодашавандаи умум мавҷуд бошад;

19. Пешниҳод оид ба хориҷ кардани роҳҳои автомобилгард аз Номгӯй дар мавриди мутобиқ набудан ба нишондиҳандаҳои асосӣ ва меъёрҳои муайянкунанда дар мувофиқа бо мақомоти иҷроияи маҳаллии ҳокимияти давлатӣ ва соҳибони роҳҳои автомобилгард баррасӣ карда мешавад.

4. МУҚАРРАРОТИ ХОТИМАВӢ

20. Барои риоя накардани муқаррароти Тартиби мазкур шахсони воқеӣ ва ҳуқуқӣ тибқи қонунгузории Ҷумҳурии Тоҷикистон ба ҷавобгарӣ кашида мешаванд.