Тартиби ҷойивазкунии (ротатсияи) кормандони мақомоти адлия

1. МУҚАРРАРОТИ УМУМӢ

1. Тартиби ҷойивазкунии (ротатсияи) кормандони мақомоти адлия (минбаъд - Тартиб) қоидаҳои гузаронидани ҷойивазкунии (ротатсияи) кормандони Вазорати адлияи Ҷумҳурии Тоҷикистонро (минбаъд - Вазорат) муқаррар менамояд.

2. Таҳти мафҳуми "кормандони мақомоти адлия" дар Тартиб хизматчиёни давлатӣ ва кормандони ташкилотҳои низоми Вазорат, ки дар банди 4 Тартиб пешбинӣ карда шудаанд, фаҳмида мешаванд.

3. Ҷойивазкунии (ротатсияи) кормандони Вазорат (минбаъдҷойивазкунӣ) бо риояи талаботи тахассусӣ ба дигар мансаби баробар ё баланд дар ҳамин мақомот таъин кардани корманд мебошад.

4. Кормандони мақомоти адлияро хизматчиёни давлатӣ, инчунин шахсони дигаре, ки муносибатҳои меҳнатии онҳо тибқи Кодекси меҳнат ва дигар санадҳои қонунгузории Ҷумҳурии Тоҷикистон танзим мешаванд, ташкил медиҳанд.

5. Амали Тартиб нисбат ба кормандони категорияҳои сеюм, чорум ва панҷуми дастгоҳи марказии Вазорат, раёсатҳои адлияи Вилояти Мухтори Кӯҳистони Бадахшон ва вилоятҳо, категорияҳои сеюм, чорум, панҷум ва шашуми шуъба-хонаҳои ақди никоҳи шаҳрҳои Душанбе ва Хуҷанд, бахшҳои сабти асноди ҳолати шаҳрвандӣ дар шаҳру ноҳияҳо, саридораи нотариалии давлатӣ, идораҳои нотариалии давлатии шаҳрҳо ва ноҳияҳо, инчунин кормандони ҳайати роҳбарикунандаи ташкилотҳои низоми Вазорат ва воҳидҳои сохтории онҳо, аз ҷумла роҳбарони зерсохторҳои таълимии ташкилотҳои низоми Вазорат татбиқ мегардад.

6. Ҷойивазкунии хизматчиёни давлатии категорияҳои олӣ, якум ва дуюми Вазорат мутобиқи тартиби муқаррарнамудаи Президенти Ҷумҳурии Тоҷикистон гузаронида мешавад.

7. Ҷойивазкунии хизматчиёни ҳарбӣ ва кормандони воҳидҳои ҳифзи ҳуқуқи низоми Вазорат тибқи қонунгузории соҳавӣ амалӣ карда мешавад.

8. Ҷойивазкунии хизматчиёни давлатие, ки таъини онҳо тибқи қонунгузории Ҷумҳурии Тоҷикистон хусусияти дуҷониба дорад, бо риояи Тартиби мазкур амалӣ карда мешавад.

9. Ҷойивазкунӣ дар панҷ сол як маротиба гузаронида мешавад.

10. Ҷойивазкунӣ бо мақсади зерин гузаронида мешавад:

- истифодаи самараноки маҳорати касбии кормандони Вазорат;

- таҳкими иқтидори кадрии Вазорат ва воҳидхои сохтории он;

- иҷрои супоришҳои махсусан муҳими давлатӣ;

- таъин (интихоб) гардидани яке аз ҳамсарон ба мансаби давлатӣ дар дигар маҳал;

- тайёр кардани кадрҳои роҳбарикунанда;

- пешгирии ҳолатҳои эҳтимолии содиркунии амалҳои коррупсионӣ ё бархӯрди манфиатҳо.

11. Принсипҳои ҷойивазкунии кормандони Вазорат аз инҳо иборат мебошанд:

- ҷойивазкунӣ ба мансабҳои категорияҳои баробар ё баланд бидуни озмун;

- ҷойивазкунӣ ба мансабҳои мувофиқ;

- ҷойивазкунӣ бо дар назар доштани риояи талаботи тахассусӣ ва натиҷаи кор;

- шаффоф ва холисона гузаронидани ҷойивазкунӣ;

- таъмини кафолат ҳангоми гузаронидани ҷойивазкунӣ.

12. Ҳангоми гузаронидани ҷойивазкунӣ розигии корманд талаб карда намешавад.

2. ХУСУСИЯТҲОИ ҶОЙИВАЗКУНӢ

13. Ба маҳалли дигар ҷой иваз намудани кормандоне, ки ба тарбияи кӯдакони маъюб, нигоҳубини падар ё модари танҳо машғуланд, танҳо бо розигии онҳо гузаронида мешаванд.

14. Ҷойивазкунии занони ҳомила ва шахсоне, ки дар рухсатӣ барои нигоҳубини кӯдак мебошанд, пас аз як соли баъди баромадан аз рухсатӣ гузаронида мешаванд.

15. Дар раёсати адлияи Вилояти Мухтори Кӯҳистони Бадахшон ва вилоятҳо ҷойивазкунии корманд метавонад пеш аз муҳлати муқарраргардида, вале на камтар аз нисфи он гузаронида шавад.

16. Дар сурати тағйир ёфтани уҳдадориҳои мансабии шахсони ба ҷойивазкунӣ фарогирифташуда онҳо ба курси тайёрии назариявӣ ва амалии такмили ихтисоси мутобиқ ба вазифаҳои воҳиди сохтории нав ҷалб карда мешаванд.

17. Ба кормандоне, ки бинобар ҷойивазкунӣ ба маҳалли дигар (вилоят, шаҳр, ноҳия) фиристода шудаанд, хароҷот бо тартиби муқаррарнамудаи қонунгузории Ҷумҳурии Тоҷикистон ҷуброн карда мешавад.

18. Агар ба корманди ба ҷойивазкунӣ фарогирифташуда ва аъзои оилаи ӯ мутобиқи қонунгузории Ҷумҳурии Тоҷикистон манзили истиқоматӣ ҷудо карда нашавад, манзили ишғолнамудаи онҳо дар хонаҳои фонди манзили давлатӣ нигоҳ дошта мешавад.

19. Бо дар назар доштани хусусияти маҳалҳои дурдаст, таъмини манзил ва дигар масъалаҳои иҷтимоӣ кормандон метавонанд ба ҷойивазкунӣ фаро гирифта нашаванд.

3. ТАРТИБИ ТАШКИЛ ВА ГУЗАРОНИДАНИ ҶОЙИВАЗКУНӢ

20. Ҷойивазкунии кормандони Вазорат дар асоси фармоиши вазири адлия гузаронида мешавад.

21. Аз тарафи хадамоти кадрии Вазорат барои ҷойивазкунӣ ҳуҷҷатҳои зерин пешниҳод карда мешаванд:

- пешниҳод (тавсия)-и муовини якум ва муовинон, роҳбарони бевоситаи воҳидҳои сохторӣ ва хадамоти кадрии Вазорат дар бораи ҷойивазкунӣ;

- маълумотнома дар бораи корманд;

- парвандаи шахсии корманд;

- муроҷиати хаттии корманд дар ҳолати ҷойивазкунӣ бо ташаббуси ӯ.

22. Хадамоти кадрӣ рӯйхати кормандони Вазоратро, ки дар соли оянда ба ҷойивазкунӣ фаро гирифта мешаванд, ҷиҳати тасдиқ ба вазири адлия пешниҳод менамояд.

23. Хадамоти кадрии Вазорат бо мақсади ташкил ва гузаронидани ҷойивазкунӣ вазифаҳои зеринро иҷро менамояд:

- рӯйхати кормандони воҳидҳои сохториро барои ҷойивазкунӣ ба баррасии вазири адлия манзур менамояд;

- дар муҳлати як моҳ то санаи баргузории ҷойивазкунӣ кормандони ҷойивазшавандаро хабардор менамояд;

- маълумот дар бораи мансабҳои холиро омода мекунад;

- ҳар сол мониторинги натиҷаи ҷойивазкуниро гузаронида, рӯйхати кормандонро, ки дар соли дахлдор ба ҷойивазкунӣ фаро гирифта шудаанд, тартиб дода, ба вазири адлия пешниҳод менамояд.

4. МУҚАРРАРОТИ ХОТИМАВӢ

24. Вазорат ҳар сол аз натиҷаи фаъолияти худ ба мақомоти ваколатдори соҳаи хизмати давлатӣ рӯйхати хизматчиёни давлатии ба ҷойивазкунӣ фаро гирифташуда, инчунин рӯйхати кормандони дар соли минбаъдаи тақвимӣ ба ҷойивазкунӣ фаро гирифташавандаро пешниҳод менамояд.

25. Кормандоне, ки то қабули Тартиб ба вазифа дар воҳидҳои сохтории мақомоти адлия таъин гардидаанд, новобаста аз таҷдиди сохтор ва иваз шудани номи воҳиди сохторӣ муҳлати фаъолияти онҳо аз рӯзи таъинашон ба мансабҳои ишғолнамуда ҳисоб карда шуда, ба ҷойивазкунӣ фаро гирифта мешаванд.

26. Баҳсҳо вобаста ба ҷойивазкунӣ тибқи тартиби муқарраргардидаи қонунгузорӣ баррасӣ карда мешавад. Дар ҳолати розӣ набудан бо ҷойивазкунӣ, корманди Вазорат тибқи қонунгузорӣ метавонад ба суд муроҷиат намояд.