Тартиби пешниҳоди ҳисоботҳо ва эъломияҳо ба Агентии байналмилалии энергияи атомӣ дар бораи маводи ядроӣ ва дастгоҳи ядроии дар ҳудуди Ҷумҳурии Тоҷикистон мавҷудбуда мувофиқи санадҳои ҳуқуқии байналмилалии аз ҷониби Тоҷикистон эътирофшуда

1.МУҚАРРАРОТИ УМУМӢ

1. Тартиби пешниҳоди ҳисоботҳо ва эъломияҳо ба Агентии байналмилалии энергияи атомӣ дар бораи маводи ядроӣ ва дастгоҳи ядроии дар ҳудуди Ҷумҳурии Тоҷикистон мавҷудбуда мувофиқи санадҳои ҳуқуқии байналмилалии аз ҷониби Тоҷикистон эътирофшуда (минбаъд - Тартиб) қоидаҳои пешниҳоди ҳисоботҳо ва эъломияҳоро ба Агентии байналмилалии энергияи атомӣ дар бораи маводи ядроӣ ва дастгоҳи ядроии дар ҳудуди Ҷумҳурии Тоҷикистон мавҷудбуда мутобиқи Шартномаи паҳн накардани силоҳи ядроӣ ва Созишномаи байни Ҷумҳурии Тоҷикистон ва Агентии байналмилалии энергияи атомӣ оид ба татбиқи кафолатҳо (минбаъд - Созишнома оид ба кафолатҳо) ва Протоколи иловагӣ ба ин Созишнома муқаррар менамояд.

2. Иҷрои муқаррароти Тартиб барои ҳамаи вазорату идораҳо, инчунин барои ҳамаи шахсони воқеию ҳуқуқӣ ва соҳибкорони инфиродие, ки бо коркард, истеҳсол, муомилоти маводи ядроӣ, истифодабарии дастгоҳ ё маҳалҳои ҷойгиршавии берун аз дастгоҳ, истихроҷи уран ё консентратсияи маъдани уран ё торий, содирот, воридот, истифодаи мавод ва унсурҳои маводи ядроии дар Замимаи II-и дар Протоколи иловагӣ пешбинишуда машғуланд, инчунин ба ҳамаи шахсони воқеию ҳуқуқӣ ва соҳибкорони инфиродие, ки фаъолияти марбут ба давраи сӯзишвории ядроӣ, аз ҷумла, корҳои илмию тадқиқотӣ ва корҳои таҷрибавию конструктории вобаста ба давраи сӯзишвории ядроии дар онҳо маводи ядроӣ истифоданашаванда анҷом медиҳанд, ё ҳама гуна фаъолияти дигари анҷомдодашаванда, ки тибқи Протоколи иловагӣ бояд аз ҷониби Тоҷикистон эъломия гардад, ҳатмист.

3. Дар Тартиб мафҳумҳои зерин истифода мешаванд:

- маълумот оид ба конструксия - маълумоти мансуб ба маводи ядроӣ, ки тибқи Созишнома оид ба кафолатҳо бояд зери кафолат қарор гирад, инчунин оид ба хусусияти дастгоҳҳое, ки ба маводи зери кафолат қароргиранда дахл дорад. Маълумот оид ба конструксия тавсифи дастгоҳ, шакл, миқдор, ҷойгиршавӣ ва миқдори маводи ядроии истифодашаванда, ҷойгиршавии дастгоҳ ва хусусиятҳои чораҳои амниятӣ, расмиёти баҳисобгирӣ ва назорати маводи ядроиро дар бар мегирад. Ин маълумот аз ҷониби Агентии байналмилалии энергияи атомӣ, ба ғайр аз маълумоти дигар барои таҳияи муносибат ба татбиқи кафолат дар дастгоҳ, муайян кардани минтақаҳои тавозуни мавод ва интихоби нуқтаҳои калидии ченкунӣ ва дигар маконҳои калидӣ, таҳияи нақшаи санҷиши маълумот оид ба конструксия ва тартиб додани рӯйхати таҷҳизоти асосӣ истифода мешавад;

- Протоколи иловагӣ - Протоколи иловагӣ ба Созишномаи байни Ҷумҳурии Тоҷикистон ва Агентии байналмилалии энергияи атомӣ оид ба татбиқи кафолатҳо вобаста ба Шартномаи паҳн накардани силоҳи ядроие, ки соли 2004 эътибор пайдо кардааст;

- минтақаи тавозуни мавод - минтақае дар дохили дастгоҳ ва ё берун аз онро ифода мекунад, ки дар он миқдори маводи ядроиро ҳангоми ҳар як ҷойивазкунӣ дар ҳар як минтақаи тавозуни мавод ё берун аз он муайян кардан мумкин аст. Ҳангоми зарурат, миқдори мавҷудаи ҳақиқии маводи ядроиро дар ҳар як минтақаи тавозуни мавод мувофиқи расмиёти муқарраргардида муайян кардан мумкин аст, барои он ки бо мақсадҳои татбиқи кафолати Агентии байналмилалии энергияи атомӣ имкони ҷамъбасти тавозуни мавод бошад;

- миқдори инвентарии бақайдгирифта дар минтақаи тавозуни мавод - ҷамъи алгебравии миқдори мавҷудаи ҳақиқии мавод дар ин минтақаи тавозуни мавод аз рӯйи муайянкунии ниҳоӣ ва ҳамаи тағйироти миқдори инвентарӣ, ки аз лаҳзаи чунин муайянкунии миқдори мавҷудаи ҳақиқии мавод ба амал омадааст;

- дастгоҳ - реактор, дастгоҳи бӯҳронӣ, дастгоҳи конверсионӣ, дастгоҳ барои истеҳсоли сӯзишвории ядроӣ, дастгоҳ барои коркарди сӯзишвории ядроӣ, дастгоҳ барои ҷудокунии изотопҳо ё анбори алоҳида ё ҳама ҷойҳое, ки дар он маводи ядроӣ ба таври муқаррарӣ ба миқдори аз як килограмми самаранок зиёд истифода мешавад ё ҳама гуна макони ҷойгиршавӣ, ки дар он ҷо маводи ядроӣ одатан бо миқдори афзояндаи килограмми самаранок истифода мегардад;

- маводи аввалия - уран бо таркиби изотопҳо бо таносуби дар урани табиӣ мавҷудбуда, урани бо изотопи 235 коҳишёфта, торий, ҳама гуна моддаҳои дар боло зикршуда дар шакли металл, хӯла, пайвастагиҳои кимиёвӣ ё консентрат, ҳама гуна маводи дигаре, ки як ё якчанд моддаҳои дар боло зикршударо дар чунин консентратсия, ки аз ҷониби Шӯрои идоракунандагони Агентии байналмилалии энергияи атомӣ дар ҳар вақт муайян мегардад ва чунин маводи дигаре, ки Шӯрои идоракунандагони Агентии байналмилалии энергияи атомӣ дар ҳар вақт муайян мекунад;

- нуқтаи калидии ченкунӣ - маконеро нишон медиҳад, ки маводи ядроӣ дар ҳамон шакле мебошад, ки онро барои муайян кардани интиқоли мавод ё миқдори инвентарӣ чен кардан мумкин аст. Ҳамин тариқ, нуқтаҳои калидии ченкунӣ (вале бе истисно) воридот ва баромади мавод (аз ҷумла талафоти бебозгашти ченшуда) ва инчунин анбори нигоҳдорӣ дар минтақаи тавозуни моддиро дар бар мегиранд;

- тағйирёбии миқдори инвентарӣ - зиёд ё кам шудани миқдори маводи ядроӣ дар минтақаи тавозуни мавод. Ин тағйирот бо яке аз сабабҳои зерин рух медиҳад: зиёдшавӣ, яъне воридот, воридшавии дохилидавлатӣ аз минтақаҳои дигари тавозуни мавод, истеҳсолоти ядроӣ, зиёдшавии тасодуфӣ, бозгашт аз партовҳои нигоҳдошташуда ва таҷдиди татбиқи кафолатҳои Агентии байналмилалии энергияи атомӣ нисбат ба маводи ядроӣ; камшавӣ, яъне содирот, интиқоли дохилидавлатӣ ба дигар минтақаҳои тавозуни мавод, талафоти ядроӣ, талафоти дигар, талафоти бебозгашти ченшуда, интиқол ба партовҳои нигоҳдошташуда, озод кардани маводи ядроӣ аз кафолатҳои Агентии байналмилалии энергияи атомӣ ва қатъ кардани кафолатҳои Агентии байналмилалии энергияи атомӣ нисбат ба маводи ядроие, ки ба истифодаи ғайриядроӣ супорида шудааст;

- миқдори маводи баҳисобгирифтанашуда - фарқияти байни миқдори инвентарии бақайдгирифта ва миқдори инвентарии мавҷудаи аслии мавод;

- рӯйхати миқдори мавҷудаи аслӣ - ҳисоботи аз ҷониби мақоми ваколатдори давлатӣ ба Агентии байналмилалии энергияи атомӣ пешниҳодшаванда вобаста ба аз ҷониби истифодабаранда муайян кардани миқдори мавҷудаи ҳақиқӣ бо зикри баста (партия)-ҳои маводи ядроӣ дар алоҳидагӣ ва бо нишон додани мушаххасоти мавод ва маълумот барои ҳар як баста (партия);

- миқдори мавҷудаи аслии инвентарӣ - миқдори умумии ченшуда ё арзёбишудаи маводи ядроӣ дар як баста, бо мавҷудияти ҳақиқии ҳамин вақт дар минтақаи тавозуни мавод, ки тибқи расмиёти мувофиқашуда ба даст омадааст. Миқдори мавҷудаи ҳақиқӣ аз ҷониби истифодабарандаи дастгоҳ ё макони ҷойгиршавӣ берун аз дастгоҳ аз рӯйи натиҷаҳои инвентаризатсияи ҷисмонӣ муайян карда мешавад ва оид ба натиҷа ба Агентии байналмилалии энергияи атомӣ дар шакли рӯйхати миқдори мавҷудаи ҳақиқӣ гузориш дода мешавад;

- ҳисобот оид ба тағйирёбии миқдори инвентарӣ - ҳисоботи баҳисобгирӣ, ки аз ҷониби давлат ба Агентии байналмилалии энергияи атомӣ пешниҳод карда мешавад ва тағйиротро дар бораи миқдори инвентарии маводи ядроӣ нишон медиҳад;

- макони ҷойгиршавӣ берун аз дастгоҳ - ҳама гуна объект ё макони ҷойгиршавие, ки дастгоҳ ҳисоб намешавад ва дар он маводи ядроӣ одатан бо миқдори на бештар аз як килограмми самаранок истифода мешавад;

- ҳисоботи тавозунию маводӣ - ҳисоботи баҳисобгирии муҳосибии аз ҷониби давлат ба Агентии байналмилалии энергияи атомӣ пешниҳодшаванда, ки тавозуни моддиро дар асоси миқдори мавҷудаи ҳақиқии маводи ядроие, ки дар минтақаи тавозуни мавод мавҷуд аст, нишон медиҳад;

- инвентаризатсияи ҷисмонӣ - муайян кардани миқдори мавҷудаи ҳақиқии маводи ядроӣ дар минтақаи тавозуни мавод, дар корхона тибқи расмиёти муқарраршуда.

4. Мутобиқи моддаи 32 Қонуни Ҷумҳурии Тоҷикистон "Дар бораи истифодаи энергияи атомӣ" дар доираи амалисозии муқаррароти Созишнома оид ба кафолатҳо мақоми ваколатдори давлатӣ дар сатҳи миллӣ иҷрои уҳдадориҳои Ҷумҳурии Тоҷикистонро ҷиҳати кафолатҳои ядроӣ, ки аз талаботи Созишнома оид ба кафолатҳо бармеоянд, ҳамоҳанг ва идора мекунад.

5. Мақоми ваколатдори давлатӣ аз истифодабарандагон талаб менамояд, ки тамоми маълумоти барои иҷрои Созишнома оид ба кафолат заруриро пешниҳод намоянд ва ин маълумотро ҷамъоварӣ, нигоҳдорӣ ва ба Агентии байналмилалии энергияи атомӣ пешниҳод намояд.

6. Мутобиқи Созишнома оид ба кафолатҳо мақоми ваколатдори давлатӣ бояд ба Агентии байналмилалии энергияи атомӣ маълумот ва огоҳиномаҳои зеринро пешниҳод намояд:

1) маълумот оид ба конструксия барои дастгоҳҳои дар марҳилаи банақшагирӣ ё сохтмон, бояд ҳарчи зудтар, вале на дертар аз 180 рӯз аз оғози сохтмон ва на дертар аз 180 рӯз пеш аз расидани маводи ядроӣ ба дастгоҳи нав, пешниҳод карда шавад. Барои дастгоҳҳои мавҷуда, маълумоти навшуда оид ба конструксия бояд дар сурати ворид шудани дилхоҳ тағйирот дар шароити истифодабарӣ, ки ба татбиқи кафолат дар ин дастгоҳ дахл дорад, пешниҳод карда шавад;

2) маълумот дар бораи маводи ядроӣ, ки одатан берун аз дастгоҳ истифода мешавад, тавсифи умумии истифодаи маводи ядроӣ ва ҷойгиршавии ҷуғрофии он, инчунин номи истифодабаранда ва суроғаи он. Тавсифи умумии расмиёти мавҷуда ва пешниҳодшавандаи баҳисобгирӣ ва назорати маводи ядроӣ низ бояд пешниҳод карда шавад;

3) ҳисоботи баҳисобгирии давлат дар бораи ҳолати маводи ядроӣ барои ҳар як минтақаи тавозуни мавод, ки ҳисоботи зеринро дар бар мегирад:

- ҳисобот дар бораи тағйирёбии миқдори инвентарӣ дар давоми 30 рӯз бо гузашти моҳе, ки дар он тағйироти миқдори инвентарӣ рух додааст, фиристода мешавад;

- ҳисоботи моддию тавозунӣ ва Рӯйхати миқдори мавҷудаи ҳақиқӣ дар давоми 30 рӯз пас аз анҷоми инвентаризатсияи ҷисмонӣ фиристода мешаванд;

- ҳисоботи махсус ҳангоми садама ё ҳолатҳои ғайриоддӣ, ки метавонад боиси гум шудани маводи ядроӣ, зиёд шудани миқдори он ё беиҷозат гирифтани он гардад, фиристода мешавад;

- ислоҳҳо ба ҳисоботҳои пешина, ислоҳҳо дар шакли намуди ҳисоботӣ, ба онҳо дахлдошта, бо маълумотномаи мухтасар, ки сабабҳои носаҳеҳ ва хатоҳоро шарҳ медиҳад, инчунин тадбирҳои бартараф намудани онҳо нишон дода мешаванд, пешниҳод мегарданд;

4) огоҳиномаҳо:

- дар бораи интиқоли байналмилалии маводи ядроӣ дар миқдори зиёда аз як килограмми самаранок;

- дар бораи таҳвилҳои содиротӣ ва воридотӣ барои истифодаи ядроии маводи ибтидоие, ки ҳанӯз барои истеҳсоли сӯзишворӣ ё ғанисозии изотопӣ (масалан, "консентрати кони уран") мувофиқ нестанд;

- оид ба мусоидат ба Агентии байналмилалии энергияи атомӣ дар иҷрои фаъолиятҳои санҷишии худ, ба монанди санаҳои баргузории инвентаризатсияи ҷисмонии навбатӣ, огоҳии пешакӣ дар бораи интиқоли дохилидавлатии маводи ядроӣ ва реҷаи корӣ дар дастгоҳи истифодабарии маводи ядроӣ барои соли оянда.

7. Мутобиқи Протоколи иловагӣ ба Созишномаи оид ба кафолатҳо мақоми ваколатдори давлатӣ бояд ба Агентии байналмилалии энергияи атомӣ эъломияҳои зеринро пешниҳод намояд:

1) маҷмуи аввалияи эъломияҳо дар давоми 180 рӯз аз санаи эътибор пайдо кардани Протоколи иловагӣ;

2) маълумоти навшудаи марбут ба соли гузаштаи тақвимӣ, ки дар бастаи эъломияҳои аввалия мавҷуд мебошад ва ин маълумот ҳар сол то 15 май пешниҳод карда мешавад;

3) маълумот дар бораи таҳвили содиротӣ ва воридотии маводи ибтидоӣ барои истифодаи ғайриядроӣ дар соли гузаштаи тақвимӣ, ки ин маълумот ҳар сол то 15 май пешниҳод карда мешавад;

4) маълумоти семоҳа оид ба таҳвили содиротии таҷҳизот ва маводи дар Протоколи иловагӣ зикргардида, ки дар давоми 60 рӯзи баъди ба охир расидани семоҳаи дахлдор пешниҳод карда мешавад;

5) барои маконҳои ҷойгиршавии партовҳои радиоактивии дараҷаи миёна ё баланди фаъолнокӣ, ки дорои плутоний, урани баландғанишуда ё урани-233 мебошанд, маълумот дар бораи тағйирот дар ин маконҳои ҷойгиршавӣ барои соли тақвимии гузашта, ҳар сол то 15 май пешниҳод карда мешавад, агар коркарди минбаъдаи ин мавод ба нақша гирифта шуда бошад, ба Агентии байналмилалии энергияи атомӣ бояд дар ин бора 180 рӯз пеш аз оғози коркард маълумот фиристода шавад;

6) бо дархости Агентии байналмилалии энергияи атомӣ маълумоти марбут ба кафолати фаъолияти истифодабарӣ дар дастгоҳҳо ва маконҳои ҷойгиршавӣ берун аз дастгоҳ, ки бо Агентии байналмилалии энергияи атомӣ ва Ҷумҳурии Тоҷикистон дар асоси афзоиши эҳтимолии таъсирбахшӣ ё самаранокӣ мувофиқа шудааст, муҳлат ва мунтазамии чунин маълумот яке аз мавзуи созишҳои Агентии байналмилалии энергияи атомӣ ва Ҷумҳурии Тоҷикистон мебошад;

7) бо дархости махсуси Агентии байналмилалии энергияи атомӣ тасдиқи таҳвили воридотии таҷҳизот ва маводи дар Протоколи иловагӣ зикршуда пешниҳод карда мешавад;

8) бо дархости Агентии байналмилалии энергияи атомӣ Ҷумҳурии Тоҷикистон дақиқият ё тавзеҳоти ҳама гуна иттилоотеро, ки давлат дар эъломияҳои худ аз рӯйи Протоколи иловагӣ пешниҳод кардааст, ба ҳамон андозае пешниҳод менамояд, ки ӯ ба мақсади кафолатҳо муносибат дошта бошад.

2. ТАРТИБИ ПЕШНИҲОДИ ҲИСОБОТ ВА МАЪЛУМОТ МУВОФИҚИ СОЗИШНОМА ОИД БА КАФОЛАТҲО

8. Истифодабарандагони дар банди 2 Тартиб нишондодашуда бояд ҳисоботи баҳисобгирӣ, аз ҷумла "Ҳисоботи тағйирёбии миқдори инвентарӣ", "Ҳисоботи моддию тавозунӣ" ва "Рӯйхати миқдори инвентарии мавҷудаи ҳақиқӣ"-ро пешниҳод намоянд, ки дарбаргирандаи инҳо аст:

1) ҳисобот оид ба тағйирёбии миқдори инвентарӣ:

- тамоми тағйирот, тавзеҳот ва тасҳеҳоти миқдори инвентарии маводи ядроиро ба ҳисобот ворид мекунад ва ба мақоми ваколатдори давлатӣ тавассути роҳҳои мувофиқашудаи интиқоли иттилоот расман пешниҳод мекунад;

- ҳисобот дар бораи воридот дар давоми 5 рӯз аз лаҳзаи ҳар воридоти маводи ядроӣ пешниҳод карда мешавад;

- ҳисобот оид ба интиқоли маводи ядроӣ на дертар аз охири рӯзи кории пас аз рӯзи интиқолдиҳӣ пешниҳод карда мешавад ва ҳисобот дар бораи интиқол то анҷоми интиқол дастраси ҳамагон гардонида намешавад;

- ҳисобот дар бораи дигар тағйироти миқдори инвентарӣ, масалан, дар натиҷаи коҳиши радиоактивӣ (коҳиши худбахудрӯйдиҳии моддаи радиоактивӣ), талафоти ядроӣ (сарфаи маводи ядроӣ дар натиҷаи табдил ёфтани он ба дигар элементҳо дар натиҷаи реаксияҳои ядроӣ), истеҳсоли ядроӣ (табдилдиҳии моддаи ядроӣ ба маводи махсус таҷзияшаванда дар натиҷаи шуоъдиҳӣ дар реактори ядроӣ) дар давоми 10 рӯзи баъди оғози инвентаризатсияи ҷисмонӣ пешниҳод карда мешавад ва бояд ба ҳисоботи моддию тавозунӣ замима карда шаванд;

2) ҳисоботи моддию тавозунӣ:

- истифодабаранда ҳисоботҳои зеринро таҳия менамояд, ки тавозуни маводро дар асоси миқдори мавҷудаи аслии инвентарии маводи ядроӣ, ки дар минтақаи тавозуни мавод мавҷуд аст, дар бар мегирад ва тавассути роҳҳои мувофиқашудаи интиқоли иттилоот ба мақоми ваколатдори давлатӣ пешниҳод менамояд;

- ҳисоботи моддию тавозунӣ дар давоми 10 рӯзи баъди оғози инвентаризатсияи ҷисмонӣ пешниҳод карда мешавад;

- ҳисоботи моддию тавозунӣ миқдори мавҷудаи аслии инвентарии ибтидоӣ, тағйирёбии миқдори инвентарӣ (зиёдшавӣ ва камшавӣ), миқдори инвентарии бақайдгирифташудаи интиҳоӣ, фарқият байни маълумоти интиқолдиҳанда ва қабулкунанда, миқдори инвентарии бақайдгирифташудаи интиҳоии тасҳеҳшуда, миқдори мавҷудаи аслии инвентарии интиҳоӣ ва миқдори маводи баҳисобгирифтанашударо дар бар мегирад;

- истифодабаранда дар шакли маълумоти мухтасар оид ба ҳама гуна миқдори маводи баҳисобгирифтанашуда, аз сифр фарқкунанда, ки ба ҳисоботи моддию тавозунӣ замима карда мешавад, тавзеҳот медиҳад.

3) рӯйхати миқдори мавҷудаи аслии инвентарӣ:

- истифодабаранда рӯйхатҳоро тартиб дода, ба мақоми ваколатдори давлатӣ тавассути роҳи мувофиқашудаи интиқоли иттилоот пешниҳод менамояд;

- истифодабаранда бояд дар давоми 10 рӯз баъди ба охир расидани инвентаризатсияи ҷисмонӣ, рӯйхати миқдори мавҷудаи аслии инвентариро дар дастгоҳ пешниҳод намояд;

- рӯйхати миқдори мавҷудаи аслии инвентарӣ якҷоя бо ҳисоботи моддию тавозунӣ, ба истиснои рӯйхати миқдори мавҷудаи аслии инвентарии аввалия, ки ҳисоботи тавозунию маводиро талаб намекунад, пешниҳод мешавад;

- ҳамаи тағйироти миқдори инвентарие, ки дар санаи гузарондани инвентаризатсияи ҷисмонӣ ба амал омадааст, бояд дар рӯйхати миқдори мавҷудаи аслии инвентарии дахлдор ва ҳисоботи моддию тавозунӣ инъикос карда шаванд.

9. Пешниҳоди маълумот оид ба конструксия, ҳисоботи баҳисобгирӣ ва огоҳиномаҳо дар бораи интиқол оид ба дастгоҳҳо:

1) пешниҳоди маълумот оид ба конструксия. Мақоми ваколатдори давлатӣ аз Агентии байналмилалии энергияи атомӣ варақаи намунаи холиро барои чунин навъи дастгоҳ мегирад ва аз истифодабарандаи дастгоҳ хоҳиш мекунад, ки онро хонапурӣ кунад. Ҳама гуна масъалаҳо бо Агентии байналмилалии энергияи атомӣ тавассути мақоми ваколатдори давлатӣ ҳамоҳанг карда мешаванд. Пас аз хонапурӣ намудани варақа мақоми ваколатдори давлатӣ онро бо истифода аз роҳҳои муқарраршудаи алоқа ба Агентии байналмилалии энергияи атомӣ мефиристад. Агар ба конструксия ё ба фаъолияти истифодабарии дастгоҳ тағйироте ворид карда шавад, ки ба татбиқи кафолат таъсирбахш аст, истифодабарандаи дастгоҳ варақаи намунаро аз нав хонапурӣ мекунад ва ба мақоми ваколатдори давлатӣ барои ирсоли минбаъда ба Агентии байналмилалии энергияи атомӣ мефиристад. Барои дастгоҳҳои наве, ки дар марҳилаи банақшагирӣ қарор дошта, дар онҳо маълумот оид ба конструксия ҳануз мавчуд нест, танҳо маълумоти умумӣ дар бораи макони ҷойгиршавӣ, намуд ва тавоноии истеҳсолии дастгоҳи дар оянда сохташаванда пешниҳод карда мешавад;

2) пешниҳоди ҳисоботҳои баҳисобгирӣ. Ҳисоботҳо аз ҷониби истифодабарандагон барои ҳар як минтақаи тавозуни мавод таҳия карда мешаванд ва сараввал ба мақомоти ваколатдори давлатӣ пешниҳод карда мешаванд, то ки дурустӣ ва пайдарпайии онҳоро нисбат ба ҳисоботҳои қаблӣ тафтиш намуда, сипас тавассути роҳҳои муқарраршудаи пешниҳоди иттилоот ба Агентии байналмилалии энергияи атомӣ онҳоро ирсол мегардонад. Бо ин мақсад мақоми ваколатдори давлатӣ махзани маълумот ва барномаи компютерии дахлдорро истифода мебарад. Мақоми ваколатдори давлатӣ инчунин кори пешниҳоди ислоҳот ба ҳисоботи баҳисобгириро ба Агентии байналмилалии энергияи атомӣ ҳамоҳанг месозад;

3) пешниҳоди огоҳиномаҳо. Огоҳиномаҳо оид ба интиқол дар ҳар як минтақаи тавозуни мавод таҳия карда мешаванд, сипас онҳо ба мақомоти ваколатдори давлатӣ фиристода мешаванд, ки онҳоро ба Агентии байналмилалии энергияи атомӣ мефиристад.

10. Пешниҳоди маълумоти умумӣ, ҳисоботи баҳисобгирӣ ва огоҳиномаҳо оид ба интиқол барои макони ҷойгиршавии берун аз дастгоҳ:

1) мақоми ваколатдори давлатӣ маълумоти умумиро оид ба ҳар як макони ҷойгиршавии берун аз дастгоҳ ҷамъоварӣ намуда, ба Агентии байналмилалии энергияи атомӣ пешниҳод мекунад;

2) мақоми ваколатдори давлатӣ инчунин ҳисоботи баҳисобгирӣ ва огоҳиномаҳо оид ба интиқолро аз рӯйи минтақаҳои тавозуни маводи маконҳои ҷойгиршавии берун аз дастгоҳ тартиб дода, ба Агентии байналмилалии энергияи атомӣ пешниҳод менамояд;

11. Истифодабаранда ба мақоми ваколатдори давлатӣ ҳисоботи махсус пешниҳод мекунад:

1) оид ба талафоти маводи ядроӣ;

2) дар сурати осеб ёфтани бутунии (яклухтии) воситаҳои нигаҳдорӣ ва назорати маводи ядроӣ.

12. Ҳисоботи махсус ба мақоми ваколатдори давлатӣ дар муддати 8 соат аз лаҳзаи ошкорсозии ҳолатҳои дар банди 11 Тартиб овардашуда пешниҳод карда мешавад.

13. Истифодабаранда 60 рӯз пеш аз оғози амалиёт ба мақоми ваколатдори давлатӣ дар ҳолатҳои зерин огоҳии пешакӣ пешниҳод мекунад:

1) харҷ ва миқдори талафоти ҷуброннашавандаи маводи ядроӣ;

2) нияти содирот ё воридоти маводи ядроӣ.

14. Ба огоҳии пешакӣ маълумоти зерин дохил карда мешаванд:

1) номгӯ ва мушаххасоти истифодабаранда;

2) мушаххасот, миқдор ва таркиби маводи ядроии сарфшуда, бебозгашт, гумшуда, воридот ё содиротшаванда;

3) санаи оғоз ва анҷоми амалиёт;

4) тавсифи мухтасари амалиёт ва вазифаҳои он.

15. Ҳангоми интиқоли дохилидавлатӣ истифодабарандаи интиқолдиҳанда ба қабулкунанда ва мақоми ваколатдори давлатӣ оид ба тағйирёбии миқдори инвентарӣ ҳисобот пешниҳод мекунад, ки дар он бояд маълумот оид ба миқдор ва навъи маводи ядроии интиқолшаванда дарҷ карда шавад.

16. Истифодабарандаи қабулкунанда маълумоти зикрнамудаи истифодабарандаи интиқолдиҳандаро месанҷад ва мақоми ваколатдори давлатиро дар бораи тағйирёбии миқдори инвентарӣ бо ҳисоботи дахлдор огоҳ мекунад.

17. Дар сурати мавҷудияти номутобиқатӣ байни маълумоти нишондодаи тарафҳои интиқолдиҳанда ва қабулкунанда, яке аз тарафҳо аз мақоми ваколатдори давлатӣ ченкунии назоратиро талаб мекунад, ки натиҷаи он барои баҳисобгирӣ ҳалкунанда мебошад.

18. Ҳангоми интиқоли байналмилалӣ истифодабаранда бояд мақоми ваколатдори давлатиро дар бораи ҳама гуна интиқоли пешбинишудаи маводи ядроӣ аз Ҷумҳурии Тоҷикистон ва ба Ҷумҳурии Тоҷикистон дар давоми 60 рӯз аз лаҳзаи интиқоли пешбинишуда огоҳ намояд.

19. Истифодабаранда на камтар аз 30 рӯз пеш аз оғози бастакушоии банақшагирифта ба мақоми ваколатдори давлатӣ дар бораи ҳама гуна воридоти маводи ядроӣ огоҳиномаи пешакӣ пешниҳод мекунад.

20. Истифодабаранда на камтар аз 30 рӯз пеш аз омода кардани мавод барои бастабандӣ ва интиқол ба мақоми ваколатдори давлатӣ дар бораи содироти маводи ядроӣ огоҳиномаи пешакӣ пешниҳод мекунад.

3. ТАРТИБИ ПЕШНИҲОДИ ЭЪЛОМИЯҲО ТИБҚИ ПРОТОКОЛИ ИЛОВАГӢ БА СОЗИШНОМА ОИД БА КАФОЛАТҲО

21. Тартиби таҳия ва пешниҳоди эъломияҳо тибқи Протоколи иловагӣ ба Созишнома оид ба кафолатҳо:

1) мақоми ваколатдори давлатӣ ба вазорату идораҳо дархостро барои пешниҳоди маълумот оид ба моддаҳои мушаххаси Протоколи иловагӣ ба Созишнома оид ба кафолатҳо мефиристад. Вазорат ё идораи дахлдор ба мақоми ваколатдори давлатӣ дар муҳлати муқаррарнамудаи мақоми ваколатдори давлатӣ дар шакли мувофиқашуда ба мақоми ваколатдори давлатӣ маълумот медиҳад. Ғайр аз ин, мақоми ваколатдори давлатӣ барои омода намудани ҷавобҳо ба дархостҳои Агентии байналмилалии энергияи атомӣ оид ба тавзеҳот ва пешниҳоди эъломияҳои иловагӣ ҳамоҳангсоз мебошад;

2) вазорату идораҳои дар поён зикргардида ба мақоми ваколатдори давлатӣ тибқи моддаҳои Протоколи иловагӣ ба Созишнома оид ба кафолатҳо маълумоти дахлдор пешниҳод мекунанд:

- Вазорати маориф ва илми Ҷумҳурии Тоҷикистон маълумотро оид ба моддаҳои 2.а.(i), 2.а.(iii), 2.а.(iv), 2.а.(vii), 2.а.(viii) ва 2.а.(х);

- Вазорати саноат ва технологияҳои нави Ҷумҳурии Тоҷикистон маълумотро тибқи моддаҳои 2.а.(i), 2.а.(iii), 2.а.(iv),2.а.(v), 2.а.(vi), 2.а.(vii), 2.а.(viii) ва 2.а.(х);

- Академияи миллии илмҳои Тоҷикистон маълумотро тибқи моддаҳои 2.а.(i), 2.а.(iii), 2.а.(iv), 2.а.(vii), 2.а. (viii) ва 2.а.(х);

- Хадамоти гумруки назди Ҳукумати Ҷумҳурии Тоҷикистон тибқи моддаи 2.а.(ix);

- Саридораи геологияи назди Ҳукумати Ҷумҳурии Тоҷикистон тибқи моддаи 2.а.(х).

3) мақоми ваколатдори давлатӣ барои омода намудани маълумот аз рӯйи моддаҳои 2.а.(ii), 2.b.(i), 2.b.(ii) бо мақомоти дахлдор ва истифодабарандагон машварат мекунад.

22. Ҳангоми омодакунии эъломияҳо дар доираи Протоколи иловагӣ дастурҳои Агентии байналмилалии энергияи атомӣ нисбат ба таҳияи ин эъломияҳо, инчунин барномаи компютерии "Protocol Reporter", ки аз ҷониби Агентии байналмилалии энергияи атомӣ пешниҳод шудааст, истифода мешаванд. Мақоми ваколатдори давлатӣ эъломияҳоро бо истифода аз роҳҳои муқарраршудаи пешниҳоди иттилоот ба Агентии байналмилалии энергияи атомӣ мефиристад.

23. Мақоми ваколатдори давлатӣ махзани маълумотро пеш мебарад, ки он ҳамаи эъломияҳоро, ки ба Агентии байналмилалии энергияи атомӣ ирсол шудаанд, дар бар гирифта, барои ҳамоҳангсозии корҳо оид ба додани саҳеҳият ва тавзеҳот нисбат ба эъломияҳои қаблан пешниҳодшуда масъул аст.

24. Мақоми ваколатдори давлатӣ барои сари вақт пешниҳод намудани эъломияҳо ба Агентии байналмилалии энергияи атомӣ тибқи талаботи моддаи 3 Протоколи иловагии Созишнома оид ба кафолатҳо масъул аст. 1