Тартиби эътироф кардани шаҳрвандони эҳтиёҷманд ба манзили истиқоматие, ки бо шартномаи кирояи иҷтимоӣ дода мешавад

1. Тартиби эътироф кардани шаҳрвандони эҳтиёҷманд ба манзили истиқоматие, ки бо шартномаи кирояи иҷтимоӣ дода мешавад (минбаъд - Тартиб), раванди эътироф кардани шаҳрвандони эҳтиёҷмандро ба манзили истиқоматие, ки бо шартномаи кирояи иҷтимоӣ дода мешавад, муайян менамояд.

2. Эътироф кардани шаҳрванд ҳамчун эҳтиёҷманд ба манзили истиқоматие, ки бо шартномаи кирояи иҷтимоӣ дода мешавад аз ҷониби мақомоти иҷроияи маҳаллии ҳокимияти давлатӣ, мақомоти худидоракунии шаҳрак ва деҳот, инчунин ҷойи кор дар асоси ариза, ки дар он ҳуҷҷатҳои зерин замима мегарданд, амалӣ мегардад:

1) шиносномаи шаҳрванд ё ҳуҷҷати дигари тасдиқкунандаи шахсият;

2) ҳуҷҷатҳои тасдиқкунанда дар бораи аъзои оилаи шаҳрванд (шаҳодатномаи таваллуд ва шаҳодатномаи ақди никоҳ);

3) ҳуҷҷатҳое, ки ҳуқуқи бе навбат додани манзили истиқоматиро тибқи моддаи 52 Кодекси манзили Ҷумҳурии Тоҷикистон тасдиқ менамоянд;

4) ҳуҷҷатҳо (маълумотномаҳо) дар бораи гирифтор будани аризадиҳанда ва (ё) аъзои оилаи ӯ ба бемориҳои вазнини музмине, ки истиқомати якҷояи онҳоро дар як хона имконнопазир мегардонад;

5) ҳуҷҷати тасдиқкунандаи он, ки шаҳрванд тибқи шартномаи кирояи иҷтимоӣ кироягир ё молики манзили истиқоматӣ намебошад;

6) ҳуҷҷати тасдиқкунандаи он, ки масоҳати умумии манзили истиқоматӣ барои ҳар як нафари аъзои оила аз меъёри муқаррарнамудаи моддаи 53 Кодекси манзили Ҷумҳурии Тоҷикистон камтар мебошад;

7) ҳуҷҷатҳои тасдиқкунандаи истиқомат дар манзиле, ки ба талаботи муқаррарнамудаи қонунгузории Ҷумҳурии Тоҷикистон ҷавобгӯй намебошад;

8) ҳуҷҷатҳои тасдиқкунандаи надоштани манзили истиқоматӣ аз ҷойи кор.

3. Ҳангоми баррасии аризаҳои аз ҷониби якчанд шаҳрванд дар як вақт (дар як рӯз) пешниҳодгардида, навбати онҳо аз рӯйи вақти пешниҳод муайян карда мешавад.

4. Ҳуҷҷатҳои дар банди 2 Тартиб зикргардида, дар шакли асл ва нусха пешниҳод мегарданд. Ҳуҷҷати асл баъд аз муайян намудани мутобиқатии он ба нусха баргардонида шуда, ба шаҳрванд дастхат дар бораи қабул гардидани ариза дода мешавад.

5. Аризаи шаҳрванд аз ҷониби мақомоти иҷроияи маҳаллии ҳокимияти давлатӣ, мақомоти худидоракунии шаҳрак ва деҳот, инчунин ҷойи кор дар китоби бақайдгирии ариза оид ба баҳисобгирии шаҳрвандони эҳтиёҷманд ба манзили истиқоматӣ, ки тибқи шартномаи кирояи иҷтимоӣ дода мешавад (минбаъд - китоби бақайдгирии аризаҳо), ба қайд гирифта мешавад.

6. Дар китоби бақайдгирии аризаҳо ворид намудани тағйиру иловаҳо манъ аст, ба истиснои тағйиру иловаҳое, ки дар асоси ҳуҷҷат ворид карда мешаванд.

7. Мақомоти иҷроияи маҳаллии ҳокимияти давлатӣ, мақомоти худидоракунии шаҳрак ва деҳот, инчунин ташкилоте, ки шаҳрванди эҳтиёҷманд дар онҷо фаъолият дорад, на дертар аз сӣ рӯзи корӣ дар асоси ҳуҷҷатҳои пешниҳодшуда, қарорро дар бораи эътироф кардан ё накардани шаҳрванд ҳамчун эҳтиёҷманд ба манзили истиқоматие, ки бо шартномаи кирояи иҷтимоӣ дода мешавад, қабул менамоянд.

8. Дар ҳолатҳои зерин шаҳрванд ҳамчун эҳтиёҷманд ба манзили истиқоматие, ки бо шартномаи кирояи иҷтимоӣ дода мешавад, эътироф намегардад:

1) пешниҳод нагардидани ҳуҷҷатҳои дар банди 2 Тартиби мазкур пешбинигардида;

2) ҳуҷҷатҳои пешниҳодгардидае, ки дар асоси онҳо эҳтиёҷманд эътироф намудани шаҳрванд ба манзили истиқоматӣ ғайриимкон аст;

3) аризадиҳанда ба гурӯҳи шаҳрвандони дар моддаи 52 Кодекси манзили Ҷумҳурии Тоҷикистон пешбинишуда дохил набошад.

9. Дар сурати қабули қарори рад оид ба эътироф гардидани шаҳрванд ҳамчун эҳтиёҷманд ба манзили истиқоматие, ки бо шартномаи кирояи иҷтимоӣ дода мешавад, нисбати қарор тибқи тартиби муқаррарнамудаи қонунгузории Ҷумҳурии Тоҷикистон шикоят овардан мумкин аст.

10. Ба ҳар як ҳуҷҷати пешниҳодшуда, ки доир ба он дар бораи эътироф кардан ё накардани шаҳрванд ҳамчун эҳтиёҷманд ба манзили истиқоматие, ки бо шартномаи кирояи иҷтимоӣ дода мешавад, қарор қабул гардидааст, парванда тартиб дода мешавад.

11. Ба парванда рақам гузошта мешавад, ки он бояд ба рақами китоби бақайдгирии аризаҳо мутобиқ бошад. Дар рӯйи парванда сол ва рақами парванда, насаб, ном ва номи падари аризадиҳанда, суроға ва рақами телефони ӯ сабт мегардад.

12. Парванда ҷузвдоне мебошад, ки дар он инҳо нигоҳ дошта мешавад:

1) аризаи шаҳрванд;

2) ҳуҷҷатҳои зарурие, ки шаҳрванд дар замимаи ариза пешниҳод намудааст;

3) нусхаи қарор дар бораи эътироф кардан ё накардан.

13. Ҳуҷҷатҳо дар парванда аз рӯйи тартиби хронологӣ вобаста ба рӯзи воридшавиашон аз поён ба боло ҷойгир, рақамгузорӣ ва ба рӯйхат ворид карда мешаванд.

14. Парванда дар мақомоти иҷроияи маҳаллии ҳокимияти давлатӣ, мақомоти худидоракунии шаҳрак ва деҳот, инчунин ҷойи кор дар давоми даҳ сол нигоҳ дошта мешавад.

15. Мақомоти иҷроияи маҳаллии ҳокимияти давлатӣ, мақомоти худидоракунии шаҳрак ва деҳот, инчунин ҷойи кор дар як сол як маротиба бо мақсади муқаррар намудани эҳтиёҷмандии шаҳрванд ба манзили истиқоматие, ки бо шартномаи кирояи иҷтимоӣ дода мешавад, азнавбақайдгирӣ мегузаронанд.

16. Мақомоти иҷроияи маҳаллии ҳокимияти давлатӣ, мақомоти худидоракунии шаҳрак ва деҳот, инчунин ҷойи кор метавонанд ҳуҷҷатгузории электрониро оид ба Тартиби мазкур ташкил намоянд.