Тартиби иваз намудани манзилҳои истиқоматии тибқи шартномаи кирояи иҷтимоӣ додашуда

1. МУҚАРРАРОТИ УМУМӢ

1. Тартиби иваз намудани манзилҳои истиқоматии тибқи шартномаи кирояи иҷтимоӣ додашуда (минбаъд - Тартиб) иваз намудани манзилҳои истиқоматии тибқи шартномаи кирояи иҷтимоӣ байни кироядеҳ ва кироягир додашударо муайян менамояд.

2. Тартиби мазкур ба вазорату идораҳо, ташкилотҳои давлатӣ, мақомоти иҷроияи маҳаллии ҳокимияти давлатӣ, мақомоти худидоракунии шаҳрак ва деҳот, инчунин субъектҳои дигари хоҷагидорие, ки дар сармояи оинномавии онҳо ҳиссаи давлат мавҷуд мебошад, татбиқ мегардад.

2. АСОСҲОИ ИВАЗ НАМУДАНИ МАНЗИЛҲОИ ИСТИҚОМАТИИ ТИБҚИ ШАРТНОМАИ КИРОЯИ ИҶТИМОӢ ДОДАШУДА

3. Иваз намудани манзилҳои истиқоматии тибқи шартномаи кирояи иҷтимоӣ додашуда байни шаҳрвандоне сурат мегирад, ки онҳо дар як маҳал ё маҳалҳои гуногуни Ҷумҳурии Тоҷикистон зиндагӣ менамоянд.

4. Барои иваз намудани манзилҳои истиқоматии тибқи шартномаи кирояи иҷтимоӣ додашуда шаҳрвандон ба кироядеҳ дар шакли хаттӣ муроҷиат менамоянд.

5. Асос барои иваз намудани манзилҳои истиқоматӣ қарори кироядеҳ дар бораи иваз намудани манзилҳои истиқоматӣ мебошад.

6. Кироягири манзили истиқоматӣ бо розигии хаттии кироядеҳ ва аъзои болиғи оилаи худ ҳуқуқ дорад манзили истиқоматии тибқи шартномаи кирояи иҷтимоӣ додашударо бо кироягири дигар иваз намояд.

7. Ҳангоми иваз намудани манзили истиқоматӣ талаботи моддаи 64 Кодекси манзили Ҷумҳурии Тоҷикистон ба инобат гирифта мешавад.

8. Ҳангоми иваз намудани манзили истиқоматӣ аъзои оилаи кироягир, ки бо ӯ якҷоя истиқомат менамоянд, метавонанд аз кироягир манзили истиқоматии баробарро, ки тибқи шартномаи кирояи иҷтимоӣ бо кироягири дигар иваз карда мешавад, талаб намоянд.

9. Иваз намудани манзилҳои истиқоматии тибқи шартномаи кирояи иҷтимоӣ додашуда, ки дар он ноболиғон, шахсони ғайриқобили амал ё қобилияти амалкуниашон маҳдуд истиқомат менамоянд, ки аъзои оилаи кироягири манзили истиқоматӣ мебошанд, бо розигии мақомоти васояту парасторӣ анҷом дода мешавад. Агар иваз намудани манзили истиқоматии тибқи шартномаи кирояи иҷтимоӣ додашуда ҳуқуқ ва манфиатҳои шахсони мазкурро поймол намояд, мақомоти васоят ва парасторӣ аз додани ризоият даст мекашад. Қарори мақомоти васоят ва парасторӣ барои додани ризоият оид ба иваз намудани манзили истиқоматии тибқи шартномаи кирояи иҷтимоӣ додашуда ё даст кашидан аз он дар шакли хаттӣ дар давоми даҳ рӯзи корӣ қабул карда мешавад.

3. БАРАСМИЯТДАРОРИИ ИВАЗ НАМУДАНИ МАНЗИЛҲОИ ИСТИҚОМАТИИ ТИБҚИ ШАРТНОМАИ КИРОЯИ ИҶТИМОӢ ДОДАШУДА

10. Иваз намудани манзилҳои истиқоматии тибқи шартномаи кирояи иҷтимоӣ додашуда байни кироягирон бо розигии кироядеҳ тибқи шартномаи кирояи иҷтимоӣ дар шакли хаттӣ ба расмият дароварда мешавад.

11. Нусхаи аслии шартномаи иваз намудани манзилҳои истиқоматӣ баъди бастани он аз ҷониби кироядеҳ ба кироягирон пешниҳод мегардад.

12. Ҳар кироядеҳе, ки бо ӯ шартномаи кирояи иҷтимоӣ оид ба иваз намудани манзилҳои истиқоматӣ баста мешавад, ризоияти хаттӣ медиҳад.

13. Бастан ва бекор кардани шартномаи кирояи иҷтимоиро кироядеҳ на дертар аз 30 рӯзи корӣ аз рӯзи пешниҳоди аризаи шаҳрванд анҷом медиҳад.

4. МУҚАРРАРОТИ ХОТИМАВӢ

14. Кироядеҳ аз иваз намудани манзилҳои истиқоматӣ дар асоси муқаррароти пешбининамудаи моддаи 69 Кодекси манзили Ҷумҳурии Тоҷикистон метавонад даст кашад.

15. Дар сурати ба миён омадани баҳс вобаста ба иваз намудани манзилҳои истиқоматии тибқи шартномаи кирояи иҷтимоӣ, тарафҳо метавонанд бо тартиби муқарраргардида ба суд муроҷиат намоянд.