Тартиби ташаккули фонди манзили давлатии иҷтимоӣ

1. Тартиби ташаккули фонди манзили давлатии иҷтимоӣ (минбаъд - Тартиб) раванди ташаккули фонди манзили давлатии истифодаи иҷтимоиро муайян менамояд.

2. Фонди манзили давлатии истифодаи иҷтимоӣ бо мақсади таъмини шаҳрвандони эҳтиёҷманд бо манзилҳои истиқоматӣ ташаккул дода мешавад.

3. Мақоми ваколатдори давлатӣ дар соҳаи манзил якҷо бо вазорату идораҳо, мақомоти иҷроияи маҳаллии ҳокимияти давлатӣ ва мақомоти худидоракунии шаҳрак ва деҳот фонди манзили давлатии иҷтимоиро дар доираи маблағҳои буҷети ҷумҳуриявӣ, маҳаллӣ ва манбаъҳои дигари маблағгузорие, ки қонунгузории Ҷумҳурии Тоҷикистон манъ накардааст, ташаккул медиҳад.

4. Вазорату идораҳо, мақомоти иҷроияи маҳаллии ҳокимияти давлатӣ, мақомоти худидоракунии шаҳрак ва деҳот рӯйхати манзилҳои истиқоматиеро, ки дар тавозунашон мавҷуд мебошанд, ҷиҳати ташаккули фонди манзили давлатии истифодаи иҷтимоӣ ба мақоми ваколатдори давлатӣ дар соҳаи манзил пешниҳод менамоянд.

5. Манбаъҳои асосии ташаккули фонди манзили давлатии истифодаи иҷтимоӣ:

1) манзилҳои истиқоматие, ки аз ҳисоби маблағҳои ташкилотҳои коммуналӣ ва ё ҷумҳуриявӣ, ташкилотҳои хусусии тиҷоратӣ, ғайритиҷоратӣ ва хайрияҳо сохта шудаанд;

2) манзилҳои истиқоматии хусусие, ки дар асоси шартнома ба мақомоти иҷроияи маҳаллии ҳокимияти давлатӣ барои истифода ҳамчун манзили иҷтимоӣ супорида шудаанд;

3) манзили истиқоматие, ки аз фондҳои дигари манзил дар асоси талаботи қонунгузорӣ ба фонди мазкур гузаронда шудааст;

4) таҷдиди манзили давлатии истифодаи иҷтимоӣ;

5) табдили биноҳои ғайриистиқоматӣ ба манзили давлатии истифодаи иҷтимоӣ;

6) манзили истиқоматие, ки аз ҷониби шахсони воқеӣ, ҳуқуқӣ ва ташкилотҳои ҷамъиятии байналмилалӣ ба фонди мазкур ҳадя гардидааст;

7) манзили истиқоматие, ки дар асоси санади судӣ мусодира гардидааст ё бо тартиби муқаррарнамудаи қонунгузорӣ бесоҳиб эътироф шуда ва ба фонди мазкур супорида шудааст;

8) манзили истиқоматие, ки тибқи аҳд ба фонди мазкур гузаштааст.

6. Манзилҳои истиқоматӣ аз фонди манзили давлатии истифодаи иҷтимоӣ ба шаҳрвандон тибқи шартномаи кирояи иҷтимоӣ барои истифодаи муваққатӣ дода мешаванд ва бояд ба талаботи санитарию техникӣ ҷавобгӯй бошанд.

7. Бо мақсади ташаккули босубот ва ҳифзи фонди манзили давлатии истифодаи иҷтимоӣ, аз ҳисоби фонди манзили давлатии иҷтимоӣ ба фондҳои дигари манзил гузарондани манзилҳои истиқоматӣ манъ аст, агар дар қонунгузории Ҷумҳурии Тоҷикистон тартиби дигар пешбинӣ нашуда бошад.