Тартиби беэътимод эътироф кардани қарзи андозӣ ва аз ҳисоб баровардани қарзи андозии беэътимод эътирофшуда

1. МУҚАРРАРОТИ УМУМӢ

1. Тартиби беэътимод эътироф кардани қарзи андозӣ ва аз ҳисоб баровардани қарзи андозии беэътимод эътирофшуда (минбаъд - Тартиб) тартиби беэътимод эътироф кардани қарзҳои андозии андозсупорандагон аз рӯйи андозҳо, ҷаримаҳо ва фоизҳо, инчунин аз ҳисоб баровардани қарзи андозии беэътимод эътирофшударо муайян менамояд.

2. Дар ҳолатҳои зерин қарз аз рӯйи андозҳо, ҷаримаҳо ва фоизҳои андозсупорандагон (агентҳои андоз) қарзи беэътимод эътироф (минбаъд - қарзи беэътимод) карда мешавад:

1) барҳамдиҳии шахси ҳуқуқӣ - мутобиқи муқаррароти моддаи 126 Кодекси андози Ҷумҳурии Тоҷикистон ҳангоми нокифоя будани молу мулки шахси ҳуқуқӣ ва (ё) имконнопазир будани пардохти он аз ҷониби муассисон (иштироккунандагон)-и ин шахси ҳуқуқӣ, бо тартиби муқаррарнамудаи қонунгузорӣ;

2) муфлис эътироф шудани соҳибкорони инфиродӣ ва шахси ҳуқуқӣ дар ҳолатҳои пешбининамудаи моддаи 150 Кодекси андози Ҷумҳурии Тоҷикистон ҳангоми нокифоя будани молу мулк;

3) фавти шахси воқеӣ ё фавтида эълон шудан, бедарак ғоиб ё ғайри қобили амал эътироф шудани шахси воқеӣ аз ҷониби суд бо тартиби пешбининамудаи моддаи 129 Кодекси андози Ҷумҳурии Тоҷикистон ҳангоми нокифоя будани молу мулки чунин шахсон ё ба моликияти давлатӣ гузаронидани мерос;

4) қабули санади судӣ, ки дар робита ба он мақомоти андоз ҳуқуқи ситонидани қарзи андозиро бо сабаби ба охир расидани муҳлати муқарраршуда оид ба ситонидани қарзи андозӣ ё рад намудани ариза дар бораи барқарор намудани муҳлати баохиррасида аз даст медиҳад;

5) аз баҳисобгирии андозӣ баровардани шахси ҳуқуқии хориҷӣ дар мақомоти андоз мутобиқи муқаррароти моддаи 78 Кодекси андози Ҷумҳурии Тоҷикистон ҳангоми нокифоя будани молу мулки муассисаи доимии шахси ҳуқуқии хориҷӣ ва ғайриимкон гардидани пардохти он аз ҷониби шахси ҳуқуқӣғайрирезиденти Ҷумҳурии Тоҷикистон дар доира ва бо тартиби муқаррарнамудаи қонунгузории Ҷумҳурии Тоҷикистон;

6) ҳангоми офатҳои табиӣ (заминларза, обхезӣ), ҳолатҳои фавқулода (эпидемия ва пандемия) ва ҳолатҳои дигари шабеҳ, ки пардохти қарзи андозро ғайриимкон менамоянд.

3. Новобаста ба муқаррароти Кодекси андози Ҷумҳурии Тоҷикистон ва Тартиби мазкур Ҳукумати Ҷумҳурии Тоҷикистон метавонад қарзи андозии андозсупорандаро беэътимод эътироф намояд.

2. АСОСҲО ВА ШАРТҲОИ БЕЭЪТИМОД ЭЪТИРОФ НАМУДАН ВА АЗ ҲИСОБ БАРОВАРДАНИ ҚАРЗИ АНДОЗИИ АНДОЗСУПОРАНДА

4. Мақомоти андози маҳалли баҳисобгирии андозсупоранда аризаи пешниҳоднамудаи андозсупоранда ё шахси дигари ваколатдорро дар муҳлати то 10 рӯзи корӣ аз рӯзи қабули он баррасӣ намуда, дар ҳолати муайян намудани воқеияти ҳолатҳои пешбининамудаи зербандҳои 1)-6) банди 2 Тартиб дар хусуси беэътимод эътироф кардани қарзи андозии андозсупоранда хулоса тартиб дода, бо замимаи ҳуҷҷатҳои пешбининамудаи банди 6 Тартиб ба Кумитаи андози назди Ҳукумати Ҷумҳурии Тоҷикистон пешниҳод менамояд.

5. Дар ҳолати мавҷуд набудани муроҷиати андозсупоранда ё шахси дигари ваколатдор, ки қарзи андозии ӯ тибқи зербандҳои 1)-6) банди 2 Тартиб бояд беэътимод эътироф дониста шавад, мақомоти андози маҳалли баҳисобгирии андозсупоранда уҳдадор аст дар муҳлати 10 рӯзи корӣ пас аз муайян намудани ҳолати мазкур ба Кумитаи андоз бо замимаи ҳуҷҷатҳои пешбининамудаи банди 6 Тартиб хулоса пешниҳод намояд.

6. Барои баррасии масъалаи беэътимод эътироф кардан ва аз ҳисоб баровардани қарзи андозии андозсупоранда ё шахси дигари ваколатдор аз ҷониби мақомоти андози маҳалли баҳисобгирии андозсупоранда ба Кумитаи андози назди Ҳукумати Ҷумҳурии Тоҷикистон ҳуҷҷатҳои зерин пешниҳод карда мешаванд:

1) дар ҳолати барҳамдиҳии шахси ҳуқуқӣ:

- аризаи андозсупоранда;

- нусхаи санади санҷишӣ оид ба барҳамдиҳии шахси ҳуқуқӣ;

- маълумотнома оид ба нокифоя будани молу мулки шахси ҳуқуқӣ ва (ё) имконнопазир будани пардохти он аз ҷониби муассисон (иштироккунандагон)-и ин шахси ҳуқуқӣ;

- санади муқоисавӣ оид ба иҷрои уҳдадориҳои андозӣ (то рӯзи пешниҳоди мавод);

- маълумотнома аз бонки хизматрасон оид ба ҳолати молиявӣ ба санаи пешниҳоди ариза;

- хулосаи мақомоти андози маҳалли баҳисобгирии андозсупоранда дар хусуси беэътимод эътироф намудани қарз;

2) дар ҳолати муфлис эътироф шудани соҳибкори инфиродӣ ва шахси ҳуқуқӣ:

- аризаи андозсупоранда;

- қарори суд дар бораи муфлис эътироф намудани соҳибкори инфиродӣ ва шахси ҳуқуқӣ ва таъиноти суд дар хусуси ба охир расидани истеҳсолоти озмунӣ барои дар рӯйхати ягонаи давлатии шахси ҳуқуқӣ даровардани қайди барҳамхӯрии қарздор;

- санади муқоисавӣ оид ба иҷрои уҳдадориҳои андозӣ (то рӯзи пешниҳоди мавод);

- хулосаи мақомоти андози маҳалли баҳисобгирии андозсупоранда дар хусуси беэътимод эътироф намудани қарз;

3) дар ҳолати фавти шахси воқеӣ ё фавтида эълон шудан, бедарак ғоиб ё ғайри қобили амал эътироф шудани шахси воқеӣ:

- аризаи ворисони андозсупоранда ё шахси дигари ваколатдор;

- шаҳодатномаи вафоти шахси воқеӣ ё санади судӣ дар бораи фавтида эълон шудан, бедарак ғоиб ё ғайри қобили амал эътироф шудани шахси воқеӣ:

- маълумотнома оид ба нокифоя будани молу мулки чунин шахсон ё ба моликияти давлатӣ гузаронидани мерос;

- санади муқоисавӣ оид ба иҷрои уҳдадориҳои андоз (то рӯзи пешниҳоди мавод);

- хулосаи мақомоти андози маҳалли баҳисобгирии андозсупоранда дар хусуси беэътимод эътироф намудани қарз;

4) дар ҳолати қабули санади судӣ, ки дар робита ба он мақомоти андоз ҳуқуқи ситонидани қарзи андозӣ бо сабаби ба охир расидани муҳлати муқарраршуда оид ба ситонидани қарзи андозӣ ё рад намудани ариза дар бораи барқарор намудани муҳлати баохиррасида аз даст медиҳад:

- аризаи андозсупоранда;

- санади судӣ, ки дар робита ба он мақомоти андоз ҳуқуқи ситонидани қарзи андозиро бо сабаби ба охир расидани муҳлати муқарраршуда оид ба ситонидани қарзи андозиро надорад ё рад намудани ариза дар бораи барқарор намудани муҳлати баохиррасида аз даст медиҳад;

- санади муқоисавӣ оид ба иҷрои уҳдадориҳои андоз (то рӯзи пешниҳоди мавод);

- хулосаи мақомоти андози маҳалли баҳисобгирии андозсупоранда дар хусуси беэътимод эътироф намудани қарз;

5) дар ҳолати аз баҳисобгирии андозӣ баровардани шахси ҳуқуқии хориҷӣ дар мақомоти маҳалли баҳисобгирии андозсупоранда:

- аризаи андозсупоранда;

- санади санҷишӣ оид ба иҷрои уҳдадориҳои андоз (агар имконияти гузаронидани санҷиш мавҷуд набошад,-хулосаи мақомоти андоз оид ба асос ва сабаби нагузаронидани санҷиш);

- маълумотнома оид ба нокифоя будани молу мулки муассисаи доимии шахси ҳуқуқии хориҷӣ ва ғайриимкон гардидани пардохти он аз ҷониби шахси ҳуқуқии ғайрирезиденти Ҷумҳурии Тоҷикистон;

- санади муқоисавӣ оид ба иҷрои уҳдадориҳои андоз (то рӯзи пешниҳоди мавод);

- хулосаи мақомоти андози маҳалли баҳисобгирии андозсупоранда дар хусуси беэътимод эътироф намудани қарз;

6) ҳангоми офатҳои табиӣ (заминларза, обхезӣ) ва ҳолатҳои фавқулода (эпидемия ва пандемия), инчунин ҳолатҳои дигари шабеҳ, ки пардохти қарзи андозро ғайриимкон менамоянд:

- аризаи андозсупоранда;

- хулосаи мақоми ваколатдори дахлдори давлатии соҳавӣ дар бораи офатҳои табиӣ (заминларза, обхезӣ) ва ҳолатҳои фавқулода (эпидемия ва пандемия), инчунин ҳолатҳои дигари шабеҳ, ки пардохти андозро ғайриимкон мегардонад;

- санади муқоисавӣ оид ба иҷрои уҳдадориҳои андозӣ (то рӯзи пешниҳоди мавод);

- маълумотнома аз бонки хизматрасон оид ба ҳолати молиявӣ ба санаи пешниҳоди ариза;

- хулосаи мақомоти андози маҳалли баҳисобгирии андозсупоранда дар хусуси беэътимод эътироф намудани қарз.

7. Қарзи андозӣ бо супориши Ҳукумати Ҷумҳурии Тоҷикистон мутобиқи банди 3 Тартиби мазкур бо пешниҳоди ариза (мактуб)-и андозсупоранда ё шахси дигари ваколатдор, хулосаҳои Кумитаи андози назди Ҳукумати Ҷумҳурии Тоҷикистон ва Вазорати молияи Ҷумҳурии Тоҷикистон дар хусуси беэътимод эътироф намудани қарз ва санади муқоисавӣ оид ба иҷрои уҳдадориҳои андозӣ (то рӯзи пешниҳод) аз ҷониби Ҳукумати Ҷумҳурии Тоҷикистон беэътимод дониста мешавад.

8. Барои баррасии масъалаи беэътимод эътироф кардани қарзи андозӣ ва аз ҳисоб баровардани он дар назди Кумитаи андози назди Ҳукумати Ҷумҳурии Тоҷикистон ва Вазорати молияи Ҷумҳурии Тоҷикистон аз ҳисоби кормандони сарраёсат ва раёсатҳои дахлдори ин мақомот комиссия таъсис дода мешавад.

9. Кумитаи андози назди Ҳукумати Ҷумҳурии Тоҷикистон маводи пешниҳодгардидаро дар муҳлати то 5 рӯзи корӣ баррасӣ карда, дар ҳолати мутобиқат намудан ба муқаррароти бандҳои 2-6 Тартиб хулосаи дахлдор қабул карда, бо ҳуҷҷати асосноккунанда дар муҳлати 5 рӯзи корӣ ба Вазорати молияи Ҷумҳурии Тоҷикистон ирсол менамояд.

10. Хулосаи пешниҳоднамудаи Кумитаи андози назди Ҳукумати Ҷумҳурии Тоҷикистон дар комиссияи назди Вазорати молияи Ҷумҳурии Тоҷикистон бо дарназардошти муқаррароти Кодекси андози Ҷумҳурии Тоҷикистон ва Тартиб дар муҳлати муқаррарнамудаи қонунгузорӣ мавриди баррасӣ қарор дода шуда, аз натиҷаи он протокол тартиб ва хулосаи дахлдор қабул карда мешавад.

11. Қарор дар бораи беэътимод эътироф кардани қарзи андозӣ ва аз ҳисоб баровардани қарзи андозии беэътимод эътирофшуда, ки ба талаботи зербандҳои 1)-6) банди 2 Тартиб мутобиқ буда, то 5000 нишондиҳанда барои ҳисобҳо нисбат ба ҳар як андозсупоранда мебошад, аз ҷониби Вазорати молияи Ҷумҳурии Тоҷикистон якҷо бо Кумитаи андози назди Ҳукумати Ҷумҳурии Тоҷикистон қабул карда мешавад.

12. Қарор дар бораи беэътимод эътироф кардани қарзи андозӣ ва аз ҳисоб баровардани қарзи андозии беэътимод эътирофшуда, ки ба талаботи зербандҳои 1)-6) банди 2 Тартиб мутобиқ буда, зиёда аз 5000 нишондиҳанда барои ҳисобҳо нисбат ба ҳар як андозсупоранда мебошад, аз ҷониби Ҳукумати Ҷумҳурии Тоҷикистон қабул карда мешавад.

13. Мақомоти андози маҳалли баҳисобгирии андозсупоранда дар муҳлати то 5 рӯзи корӣ пас аз мавриди амал қарор гирифтани қарори Ҳукумати Ҷумҳурии Тоҷикистон ва ё қарори якҷояи Вазорати молияи Ҷумҳурии Тоҷикистон ва Кумитаи андози назди Ҳукумати Ҷумҳурии Тоҷикистон дар бораи беэътимод эътироф кардани қарзи андозӣ ва аз ҳисоб баровардани қарзи андозии беэътимод эътирофшуда бо роҳи дар ҳисобварақаи андозсупоранда ворид намудани тағйироти дахлдор қарзи андозии беэътимод эътирофшударо аз ҳисоб мебарорад.

14. Баҳисобгирии маблағи аз ҳисоб баровардашудаи қарзи андозии беэътимод эътирофгардидаи андозсупоранда дар ҳисоботи дахлдор аз ҷониби мақомоти маҳалли баҳисобгирии андозсупоранда ба роҳ монда мешавад.

3. МУҚАРРАРОТИ ХОТИМАВӢ

15. Шахсони ҳуқуқӣ ва соҳибкорони инфиродӣ уҳдадоранд якҷо бо мақомоти андози маҳалли баҳисобгирии андозсупоранда ҷиҳати иҷрои уҳдадориҳои андозии минбаъда санади муқоисавӣ бо тартиби муқаррарнамудани қонунгузорӣ таҳия намоянд.

16. Шахсоне, ки муқаррароти Тартибро риоя намекунанд, тибқи қонунгузории Ҷумҳурии Тоҷикистон ба ҷавобгарӣ кашида мешаванд.