Оинномаи Ҷамъияти саҳомии кушодаи "Барқи Тоҷик"

1. МУҚАРРАРОТИ УМУМӢ

1. Ҷамъияти саҳомии кушодаи "Барқи Тоҷик" (минбаъд - "Ҷамъият") дар асоси Кодекси граждании Ҷумҳурии Тоҷикистон, Қонуни Ҷумҳурии Тоҷикистон "Дар бораи ҷамъиятҳои саҳомӣ" ва дигар санадҳои меъёрии ҳуқуқии Ҷумҳурии Тоҷикистон таъсис дода шудааст.

2. Ҷамъият дар фаъолияти худ Конститутсияи Ҷумҳурии Тоҷикистон, Кодекси граждании Ҷумҳурии Тоҷикистон, Қонуни Ҷумҳурии Тоҷикистон "Дар бораи ҷамъиятҳои саҳомӣ", дигар санадҳои меъёрии ҳуқуқии Ҷумҳурии Тоҷикистон, шартномаҳои байналмилалие, ки аз ҷониби Ҷумҳурии Тоҷикистон эътироф гардидаанд ва Оинномаи мазкурро ба роҳбарӣ мегирад.

2. НОМИ ФИРМАВӢ ВА МАҲАЛЛИ ҶОЙГИРШАВИИ ҶАМЪИЯТ

3. Номи расмии пурраи фирмавии Ҷамъият бо забони давлатӣ - Ҷамъияти саҳомии кушодаи "Барқи Тоҷик".

4. Номи мухтасар бо забони давлатӣ - ҶСК "Барқи Тоҷик".

5. Номи расмии пурраи Ҷамъият бо забони русӣ - Открытое акционерное общество "Барки Точик".

6. Номи мухтасар бо забони русӣ - ОАО "Барки Точик".

7. Номи пурраи Ҷамъият бо забони англисӣ - "Open Joint Ғtock Company "Barqi Tojik".

8. Номи мухтасар бо забони англисӣ - OJҒC "Barqi Tojik".

9. Маҳалли ҷойгиршавии Ҷамъият: Ҷумҳурии Тоҷикистон, шаҳри Душанбе, хиёбони Исмоили Сомонӣ, 64.

3. ВАЗЪИ ҲУҚУҚИИ ҶАМЪИЯТ

10. Вазъи ҳуқуқии Ҷамъият мувофиқи қонунгузории Ҷумҳурии Тоҷикистон ва Оинномаи мазкур муайян карда мешавад.

11. Ҷамъият тибқи қонунгузории Ҷумҳурии Тоҷикистон шахси ҳуқуқӣ ба шумор меравад.

12. Муассиси Ҷамъият Ҳукумати Ҷумҳурии Тоҷикистон мебошад, ки сад фоизи саҳмияҳои Ҷамъият ба он тааллуқ доранд.

13. Ҷамъият дорои молу мулки алоҳида мебошад, ки дар тавозуни мустақили он ба ҳисоб гирифта шуда, метавонад аз номи худ ҳуқуқҳои молумулкӣ ва ғайримолумулкии шахсиро ба даст орад, дорои уҳдадорӣ бошад, дар суд ҳамчун даъвогар ва ҷавобгар баромад кунад.

14. Ҷамъият ҳуқуқ дорад, ки бо тартиби муқаррарнамудаи қонунгузории Ҷумҳурии Тоҷикистон дар ҳудуди Ҷумҳурии Тоҷикистон ва берун аз он суратҳисобҳои бонкӣ кушояд.

15. Ҷамъият аз рӯйи уҳдадориҳояш бо тамоми молу мулки ба ӯ тааллуқдошта ҷавобгар мебошад. Ҷамъият аз рӯйи уҳдадориҳои саҳмдорони худ ҷавобгар нест. Саҳмдорон аз рӯйи уҳдадориҳои Ҷамъият дар доираи арзиши саҳмияҳои ба онҳо тааллуқдошта ҷавобгар мебошанд.

16. Ҷамъият дорои муҳри мудаввар бо зикри номи пурраи фирмавии он бо забони давлатӣ мебошад.

17. Ҷамъият ҳуқуқ дорад, ки бо тартиби муқарраргардида муҳр (штамп) ва бланкҳои бо зикри номи худ, инчунин тамғаи молии бақайдгирифташуда ва воситаҳои дигари тасвирии шинохташаванда дошта бошад.

18. Ҷамъият метавонад филиалҳо ва намояндагиҳоро дар ҳудуди Ҷумҳурии Тоҷикистон тибқи қонунгузории Ҷумҳурии Тоҷикистон ва берун аз он тибқи қонунгузории давлати хориҷӣ, ки дар он ҷо филиал ва намояндагӣ ҷой гирифтааст, таъсис диҳад, агар мувофиқи шартномаҳои байналмилалии Ҷумҳурии Тоҷикистон тартиби дигаре пешбинӣ нашуда бошад.

19. Роҳбари филиал ва намояндагии Ҷамъият дар мувофиқа бо шӯрои нозирони Ҷамъият аз ҷониби директори генералии Ҷамъият ба вазифа таъин ва аз вазифа озод карда шуда, дар асоси низомнома ё ваколатномаи аз ҷониби директори генералии Ҷамъият додашуда амал менамояд.

20. Ҷамъият барои фаъолияти филиал ва намояндагии худ масъул мебошад.

21. Ҷамъият метавонад тибқи қонунгузории Ҷумҳурии Тоҷикистон ҷамъиятҳои саҳомии фаръӣ ва вобастаи дорои ҳуқуқи шахси ҳуқуқиро дошта бошад.

22. Ҷамъият метавонад бо шахсони воқеӣ ва ҳуқуқии беэътимоде, ки қаблан бо Ҷамъият ҳамкорӣ намуда, уҳдадориҳои худро иҷро накардаанд, ҳамкорӣ накунад ва шартномаҳои нав ба имзо нарасонад.

23. Ҷамъият метавонад бо мақсади нигоҳ доштани мутахассисон ва дар оянда самаранок истифода бурдани онҳо захираи кадрӣ ташкил намояд.

24. Ба сохтори Ҷамъият филиалҳои зерин дохил мебошанд:

- филиали "Неругоҳи Норак"-и Ҷамъияти саҳомии кушодаи "Барқи Тоҷик" воқеъ дар шаҳри Норак,735000;

- филиали "Неругоҳи Бойғозӣ"-и Ҷамъияти саҳомии кушодаи "Барқи Тоҷик" воқеъ дар шаҳри Норак, 735300, кӯчаи Рӯдакӣ;

- филиали "Силсилаи неругоҳҳои Варзоб"-и Ҷамъияти саҳомии кушодаи "Барқи Тоҷик" воқеъ дар шаҳри Душанбе, 734017, кӯчаи Карамов, 70/1;

- филиали "Силсилаи неругоҳҳои Вахш"-и Ҷамъияти саҳомии кушодаи "Барқи Тоҷик" воқеъ дар шаҳри Левакант, 734147;

- филиали "Неругоҳи Қайроққум"-и Ҷамъияти саҳомии кушодаи "Барқи Тоҷик" воқеъ дар шаҳри Гулистон, 735750, кӯчаи Истиқлол, 114;

- филиали "Маркази барқу гармидиҳии 1"-и Ҷамъияти саҳомии кушодаи "Барқи Тоҷик" воқеъ дар шаҳри Душанбе, 734026, кӯчаи Абдулаҳад Қаҳҳоров, 39А;

- филиали "Маркази барқу гармидиҳии 2"-и Ҷамъияти саҳомии кушодаи "Барқи Тоҷик" воқеъ дар шаҳри Душанбе, хиёбони Ҳофизи Шерозӣ;

- филиали "Маркази барқу гармидиҳии Ёвон"-и Ҷамъияти саҳомии кушодаи "Барқи Тоҷик" воқеъ дар ноҳияи Ёвон, кӯчаи Пионерон, ҷамоати Чоргул;

- филиали "Тоҷикэнерготаъминот"-и Ҷамъияти саҳомии кушодаи "Барқи Тоҷик" воқеъ дар шаҳри Душанбе, кӯчаи Раҳмон Набиев, 345;

- филиали "Базаи нақлиётӣ ва таъминоти ангишт"-и Ҷамъияти саҳомии кушодаи "Барқи Тоҷик" воқеъ дар шаҳри Душанбе, кӯчаи Раҳмон Набиев, 345/3.

4. МАҚСАД ВА САМТҲОИ ФАЪОЛИЯТИ ҶАМЪИЯТ

25. Мақсади асосии фаъолияти Ҷамъият ба даст овардани фоида мебошад. Барои ба мақсади худ ноил шудан Ҷамъият истеҳсоли энергияи барқ ва гармӣ, инчунин функсияи оператори бозори неруи барқро амалӣ менамояд.

26. Барои ба даст овардани фоида Ҷамъият ҳуқуқ дорад ҳама намуди фаъолиятро, ки ба қонунгузории Ҷумҳурии Тоҷикистон мухолиф нест, амалӣ созад, аз ҷумла:

- амалисозии фаъолияти самаранок ва боэътимоди иншоотҳои истеҳсоли барқу гармӣ;

- таъмини рушди устувори иншоотҳои истеҳсоли барқу гармӣ;

- истеҳсоли боэътимод ва босифати барқу гармӣ;

- хизматрасонӣ дар самти истеҳсоли барқу гармӣ;

- идоракунии фаврӣ-технологии иншооти истеҳсоли барқу гармӣ;

- истифодаи дуруст ва дар ҳолати корӣ нигоҳ доштани таҷҳизотҳои истеҳсоли барқу гармӣ дар мутобиқат бо талаботи меъёрҳои муқарраргардида, гузарондани хизматрасониҳои техникӣ, ташхис, таъмири иншоотҳои истеҳсоли барқу гармӣ ва иншооти дигари дар тавозуни Ҷамъият қарордошта;

- гузарондани корҳои озмоишу ченкунии таҷҳизоти барқии дар тавозуни Ҷамъият қарордошта;

- таъмини дуруст ва дар ҳолати хуби корӣ нигоҳ доштани шабакаҳои истеҳсоли барқу гармӣ, гузарондани хизматрасониҳои техникӣ, ташхис ва таъмири шабакаҳои алоқаи технологӣ, воситаҳои ченкунанда ва баҳисобгирӣ, таҷҳизоти ҳимояи релегӣ ва худкори зиддисадамавӣ ва дигар таҷҳизоти технологӣ, ки ба фаъолияти иншооти истеҳсоли барқу гармӣ алоқаманд мебошанд;

- татбиқи барномаҳои сармоягузорӣ ва таҳияи вазифаҳои техникӣ;

- ба имзо расондани шартномаҳо (созишномаҳо) бо Ҷамъияти саҳомии кушодаи "Шабакаҳои интиқоли барқ" оид ба хизматрасонӣ ва бо Ҷамъияти саҳомии кушодаи "Шабакаҳои тақсимоти барқ" оид ба хариду фурӯши энергияи барқ;

- дар мувофиқа бо Шӯрои нозирон ба имзо расондани шартномаҳо ва қарордодҳо бо сармоягузорон;

- таҳия намудани барномаҳо бо мақсади рушди инфрасохтори истеҳсоли барқу гармӣ;

- баланд бардоштани эътимоднокии технологӣ ва иқтисодии марбут ба иншооти истеҳсоли барқу гармӣ, тавассути татбиқи қарорҳои техникӣ ва истифода бурдани технологияи нав;

- татбиқи идоракунии самараноки барномаҳо бо мақсади кам кардани хароҷотҳо тавассути ҷорӣ намудани технологияи муосир дар ҷараёни истеҳсолот;

- ба роҳ мондани коргузорӣ дар асоси қоидаҳои қабулшудаи техникии соҳавӣ ва бехатарӣ аз сӯхтор;

- ба роҳ мондани санҷиши занҷирҳои ҷараён ва шиддат, муайян намудани сарбории трансформаторҳои ченкунӣ, таъмин намудани мутобиқати онҳо бо асбобҳои ченкунанда тибқи қоидаҳои истифодабарии техникии таҷҳизоти дар тавозунаш қарордошта;

- таҳияи тавозуни обу энергетикӣ ва татбиқи чорабиниҳо оид ба истеҳсоли барқ дар давраи тирамоҳу зимистон;

- баланд бардоштани самаранокии кор бо роҳи такмили иқтисодию ҳуқуқӣ;

- назорати таҷҳизоти баҳисобгирии энергияи барқ дар неругоҳҳои барқӣ;

- бақайдгирии нуқтаҳои баҳисобгирии тиҷоратӣ ва техникии электроэнергия дар сарҳад бо шабакаҳои интиқол ва тақсимоти барқ;

- таҳия намудани ҳуҷҷатҳои зарурӣ вобаста ба ҷорӣ намудани низоми таъминкунандаи тамоюли устувори кам кардани талафот дар иншооти истеҳсоли барқу гармӣ ва андешидани чораҳои амалӣ дар ин самт;

- дар асоси низоми ягонаи идоракунӣ мутобиқ намудани раванди фаъолияти иншооти истеҳсоли барқ бо мақсади баланд бардоштани дараҷаи автоматикунонии идоракунӣ ба воситаи низоми идоракунии рақамӣ ва кам намудани теъдоди қатъшавиҳо ва муддати барқарорсозии садамаҳо;

- ҳамоҳанг намудани реҷаи маҳдудияти таъмини энергияи барқ дар ҳолатҳои сербории шабака бо шабакаҳои интиқол ва тақсимот;

- таҳияи дурнамои рушди миёнамуҳлат ва дарозмуддати истеҳсоли неруи барқ ва гармӣ, нақшаҳои оянда ва ҷории рушди инфрасохтори истеҳсоли барқу гармӣ, барномаҳои мақсадноки маҷмӯии илмӣ-техникӣ, иқтисодӣ ва барномаҳои иҷтимоӣ;

- рушди иқтидорҳои истеҳсоли барқу гармӣ, аз ҷумла лоиҳакашӣ, таҳқиқоти муҳандисӣ, сохтмон, таҷдид, азнавмуҷаҳҳазгардонии техникӣ ва васлу насби таҷҳизотҳои барқӣ;

- рушди алоқаи технологӣ ва телемеханикӣ, воситаҳои ченкунанда ва баҳисобгирӣ, таҷҳизотҳои ҳимояи релегӣ ва автоматикаи зиддисадамавӣ ва таҷҳизотҳои дигари технологӣ, ки ба фаъолияти истеҳсоли барқ алоқамандӣ доранд, бо дар назар доштани лоиҳакашӣ, таҳқиқоти муҳандисӣ, сохтмон, таҷдид, азнавмуҷаҳҳазгардонии техникӣ ва васлу насби таҷҳизотҳои барқӣ;

- фароҳам овардани шароити мусоид барои кормандон ҷиҳати омӯзишу азхудкунии таҷҳизотҳо ва технологияҳои нав, ки барои самаранокӣ, бехатарӣ аз сӯхтор, бехатарии истеҳсолот ва ҳифзи муҳити зисти кори иншооти истеҳсоли барқу гармиро таъмин менамоянд ва татбиқи барномаҳои илмию техникӣ ва инноватсионӣ вобаста ба самти фаъолият;

- ташкили кор оид ба таъмини ҳифзи меҳнат;

- бартарафсозии қатъшавиҳои технологӣ (садамаҳо) дар иншооти шабакаҳои истеҳсоли барқу гармӣ;

- самаранок ба роҳ мондани корҳои амалӣ, ки бо ҳифзи муҳити зист алоқамандӣ доранд;

- корҳое, ки ба таъсир ба муҳити зист алоқаманд мебошанд, аз ҷумла ҷамъ ва истифода намудан, безараргардонӣ, нигоҳдорӣ, несткунӣ, интиқолдиҳӣ ва ҷойгиркунии партовҳои саноатӣ;

- фаъолияти соҳавӣ дар самти истифодаи иншооти гидротехникӣ;

- фаъолияти соҳавӣ ҷиҳати истифодаи захираҳои об;

- фаъолияти соҳавӣ дар соҳаи метрология;

- фаъолият ҷиҳати таъмири воситаҳои ченак;

- фаъолият оид ба пешниҳоди хизматрасониҳо вобаста ба насб, таъмир ва хизматрасонии техникии таҷҳизот ва асбобҳои ченкунӣ, назоратӣ, озмоишӣ;

- фаъолият оид ба истифодаи партовҳои хатарнок;

- фаъолият вобаста ба огоҳ ва хомӯш намудани сӯхтор;

- ташкил ва гузарондани кор бо кадрҳо, аз ҷумла омӯзиш ва бозомӯзӣ, баҳогузории кормандон вобаста ба қоидаҳои истифодаи техникии таҷҳизотҳои барқӣ, қоидаҳои бехатарӣ аз сӯхтор ва қоидаҳои ҳифзи меҳнат, қоидаҳои техникаи бехатарӣ, инчунин дигар қоидаҳо ва дастурҳои мувофиқи санадҳои меъёрии ҳуқуқӣ;

- ба роҳ мондани корҳо ҷиҳати гузарондани кормандон аз санҷиши малакаи дониш;

- ба роҳ мондани фаъолият вобаста ба иҷрои вазифа ва уҳдадориҳо ба ҳайси фармоишгар ва пудратчӣ;

- омода намудани ҳуҷҷатҳои лоиҳавии иншоотҳои сохтмони асосӣ;

- амалӣ намудани фаъолият оид ба истифодабарӣ, сохтмон, азнавсозӣ ва таъмири асосӣ дар иншоотҳо истеҳсоли барқу гармӣ;

- фаъолият дар соҳаи истифодаи сарфакорона ва самараноки энергия;

- таҳияи нақшаҳо ҷиҳати ҷорӣ намудани маҳдудиятҳои садамавӣ;

- истифода намудан аз воситаҳои хизматрасониҳои иттилоотӣ;

- ба иҷора гирифтани биноҳо, иншоотҳо, таҷҳизотҳо, мошинҳо ва механизмҳо;

- фаъолияти ҳимоявӣ танҳо ба манфиати амнияти худӣ;

- ҳимояи техникии маълумотҳои дорои эътибори махфӣ дошта;

- ташкил ва гузарондани чорабиниҳо оид ба масъалаҳои мобилизатсионӣ, мудофиаи гражданӣ, пешгӯйӣ ва бартарафсозии ҳолатҳои фавқулода;

- дар асоси санадҳои меъёрии ҳуқуқии Ҷумҳурии Тоҷикистон ҳимояи сирри давлатӣ;

- ташкил ва гузарондани чорабиниҳо оид ба ҳимоя намудани маълумотҳои сирри тиҷоратидошта;

- тибқи тартиби муқаррарнамудаи қонунгузории Ҷумҳурии Тоҷикистон ба роҳ мондани фаъолиятҳои таълимӣ, аз ҷумла барои инкишоф додани таҷрибаи кормандон ташкил ва гузарондани дарсҳои омӯзишӣ;

- ҷалби сармоя ва татбиқи лоиҳаҳои сармоягузорӣ дар самти истеҳсоли энергияи барқу гармӣ.

27 Бо мақсади баланд бардоштани сатҳи шаффофият дар баҳисобгирии неруи барқ ва иқтидор дар сохтори Ҷамъият раёсат ба ҳайси оператори бозор, ки бо ҳисобу китоб (пардохт) байни иштирокчиёни бозори неруи барқ машғул аст, таъсис дода мешавад.

28. Оператори бозор фаъолияти худро дар самтҳои зерин ба роҳ мемонад:

- ҳисоби неруи барқи истеҳсолшуда, интиқолшуда, аз тарафи шабакаи тақсимоти барқ харидоришуда, ба хориҷи кишвар содиротшуда ва воридшуда (харидоришуда);

- тартиб додани санадҳои дахлдор оид ба мубодилаи неруи барқ (иқтидор) барои ҳисобу китоби тарафайн байни иштирокчиёни бозори неруи барқ ва пешниҳоди онҳо ба ҷонибҳо;

- ба роҳ мондани баҳисобгирии ҷараёнҳои байнидавлатии неруи барқ бо системаҳои энергетикии кишварҳои минтақа;

- бақайдгирии шартномаҳои тарафайни иштирокчиёни бозори неруи барқ, инчунин шартномаҳои содироту воридоти неруи барқ (иқтидор);

- ҷамъоварӣ ва таҳлили маълумоти низоми баҳисобгирии тиҷоратӣ ва ченкунии неруи барқ;

- таҳияи тавозуни пешгӯйишавандаи обу энергетикӣ дар системаи ягонаи электроэнергетикӣ.

29. Ҷамъият метавонад ба дигар намуди фаъолият дар асоси иҷозатнома, ки номгӯи онҳо тибқи қонунгузории Ҷумҳурии Тоҷикистон муайян карда мешавад, машғул гардад.

30. Ҷамъият фаъолияти истеҳсолию хоҷагии худро дар асоси қарордодҳои хоҷагӣ ба роҳ мемонад.

31. Ҷамъият метавонад намудҳои дигари фаъолиятро, ки қонунгузории Ҷумҳурии Тоҷикистон манъ накардааст, амалӣ намояд.

5. САРМОЯИ ОИННОМАВИИ ҶАМЪИЯТ

32. Сармояи оинномавии Ҷамъият аз арзиши номиналии саҳмияҳои Ҷамъият иборат мебошад.

33. Сармояи оинномавии Ҷамъият 9307295600 (нуҳ миллиарду сесаду ҳафт миллиону дусаду наваду панҷ ҳазору шашсад) сомониро ташкил медиҳад ва ба 93072956 (наваду се миллиону ҳафтоду ду ҳазору нуҳсаду панҷоҳу шаш) адад саҳмияҳои одӣ бо арзиши номиналии ҳар як саҳмия 100 (сад) сомонӣ тақсим шудааст (қарори Ҳукумати ҶТ аз 29.04.2024 № 244, аз 28.08.2024 № 474).

34. Сармояи оинномавии Ҷамъият бо роҳи сармоягузорӣ дар шакли бино, иншоот, таҷҳизот ва арзишҳои дигари моддӣ, коғазҳои қиматнок, моликияти зеҳнӣ, инчунин ҳуқуқҳои дигари молумулкӣ, воситаҳои пулӣ ташаккул меёбад ва арзиши онҳо бо пули миллӣ баҳо дода мешаванд.

35. Сармояи оинномавии Ҷамъият метавонад:

- бо роҳи зиёд намудани арзиши номиналии саҳмияҳо ё барориши саҳмияҳои иловагӣ зиёд карда шавад;

- бо роҳи кам кардани арзиши номиналии саҳмияҳо ё кам кардани шумораи умумии онҳо ё ба тариқи харида гирифтан ва бозпардохти қисме аз саҳмияҳо тибқи ҳолатҳои дар Қонуни Ҷумҳурии Тоҷикистон "Дар бораи ҷамъиятҳои саҳомӣ" пешбинишуда кам карда шавад.

36. Зиёд намудани сармояи оинномавии Ҷамъият фақат баъди пардохти пурраи он мумкин аст. Ба зиёд намудани сармояи оинномавӣ бо мақсади ҷуброн намудани зараре, ки ба Ҷамъият расидааст ё барои пардохти қарзи муҳлаташ гузаштаи кредиторӣ иҷозат дода намешавад.

37. Кам кардани сармояи оинномавӣ бо тартиби пешбининамудаи қонунгузории Ҷумҳурии Тоҷикистон ва Оинномаи мазкур амалӣ гардонида мешавад. Ҷамъият уҳдадор аст, ки сармояи оинномавии худро тибқи ҳолатҳои муқаррарнамудаи қонунгузории Ҷумҳурии Тоҷикистон кам намояд.

6. САҲМДОРОНИ ҶАМЪИЯТ, ҲУҚУҚ ВА ВАЗИФАҲОИ ОНҲО

38. Ҷамъият уҳдадор аст, ки пешбурд ва нигоҳдории феҳристи саҳмдорони Ҷамъиятро мутобиқи қонунгузории Ҷумҳурии Тоҷикистон аз лаҳзаи бақайдгирии давлатии Ҷамъият таъмин намояд.

39. Ҳуқуқу уҳдадориҳои саҳмдорон тибқи қонунгузории Ҷумҳурии Тоҷикистон муайян карда мешаванд.

40. Ҳар як саҳмияи одии Ҷамъият ба саҳмдор - соҳиби он маҷмуъи баробари ҳуқуқҳоро фароҳам меорад.

41. Саҳмдорон - соҳибони саҳмияҳои одии Ҷамъият ҳуқуқ доранд:

- шахсан ё тавассути намоянда дар маҷлиси умумии Ҷамъият иштирок намоянд;

- суди саҳмияҳои эълоншудаи Ҷамъиятро гиранд;

- оид ба фаъолияти Ҷамъият маълумот гиранд ва тибқи қонунгузории Ҷумҳурии Тоҷикистон бо ҳуҷҷатҳои Ҷамъият шинос шаванд;

- дар ҳолати барҳамдиҳии Ҷамъият қисме аз моликияти ӯро тибқи тартиби муқарраршудаи қонунгузории Ҷумҳурии Тоҷикистон гиранд;

- ҳуқуқҳои дигарро, ки қонунгузории Ҷумҳурии Тоҷикистон ва Оинномаи мазкур пешбинӣ кардааст ва бо қарорҳои маҷлиси умумии саҳмдорон дар асоси салоҳиятҳои он қабул карда шудаанд, амалӣ намоянд.

7. СУДИ САҲМИЯҲО

42. Ҷамъият уҳдадор аст соле на кам аз як маротиба оид ба пардохти суди саҳмияҳо аз рӯйи саҳмияҳои паҳнкардашуда тибқи қонунгузории Ҷумҳурии Тоҷикистон қарор қабул кунад.

43. Суди саҳмияҳои ҷойгиркардашуда аз даромади софи Ҷамъият бо пули миллӣ пардохта мешавад.

44. Қарор дар бораи пардохт ва андозаи суди саҳмияҳои ҷойгиркардашудаи солонаи Ҷамъият тибқи тартиби муқарраргардидаи қонунгузории Ҷумҳурии Тоҷикистон қабул карда мешавад. Муҳлати пардохти суди саҳмияҳои ҷойгиркардашуда аз рӯзи қабули қарор дар хусуси пардохти суди саҳмияҳо аз 90 рӯз бештар буда наметавонад. Рӯйхати шахсоне, ки барои гирифтани суди саҳмияҳо ҳуқуқ доранд, дар санаи таҳияи рӯйхати шахсоне, ки барои иштирок дар маҷлиси умумии саҳмдорон ҳуқуқ доранд, тартиб дода мешавад.

8. ФОНДҲОИ ҶАМЪИЯТ

45. Ҷамъият метавонад ба андозаи 5 (панҷ) фоизи сармояи оинномавии Ҷамъият фонди захиравӣ ташкил намояд. Андозаи ҳиссаҷудокунии ҳатмии ҳарсола ба фонди захиравии Ҷамъият то ба маблағи муқарраршудаи фонди захиравӣ расидан 5 фоизи маблағи фоидаи софи Ҷамъиятро ташкил медиҳад.

46. Фонди захиравии Ҷамъият барои рӯйпуш намудани зарарҳои молиявӣ, пардохтҳои вомҳои Ҷамъият ва харидории саҳмияҳои Ҷамъият дар сурати норасоии дигар маблағҳо, пешбинӣ шудааст. Фонди захиравии Ҷамъиятро барои мақсадҳои дигар истифода бурдан манъ аст.

47. Ҷамъият метавонад тибқи тартиби муқарраргардидаи қонунгузории Ҷумҳурии Тоҷикистон, инчунин дар мувофиқа бо шӯрои нозирони Ҷамъият фондҳои дигарро, ки фаъолияти молиявию хоҷагидории ӯро таъмин менамояд, таъсис диҳад.

48. Молу мулки Ҷамъият аз ҳисоби сарчашмаҳои зерин ташаккул меёбад:

- аз даромади фурӯши маҳсулот, кор ва хизматрасонӣ;

- қарзи бонкӣ;

- аз кумакҳои бебозгашти молиявӣ ва хайрияи созмонҳои байналмилалӣ;

- молу мулке, ки аз ҷониби Ҳукумати Ҷумҳурии Тоҷикистон ба сармояи оинномавии Ҷамъият гузошта шудааст;

- сарчашмаҳои дигаре, ки қонунгузории Ҷумҳурии Тоҷикистон манъ накардааст.

9. МАҚОМОТИ ИДОРАКУНИИ ҶАМЪИЯТ

49. Мақомоти идоракунии Ҷамъият инҳо мебошанд:

- мақоми олӣ - маҷлиси умумии саҳмдорон;

- мақоми идора - шӯрои нозирон;

- мақоми иҷроия - директори генералӣ.

10. МАҶЛИСИ УМУМИИ САҲМДОРОН

50. Бо дар назар доштани он ки ҳамаи саҳмияҳои овоздори Ҷамъият ба Ҳукумати Ҷумҳурии Тоҷикистон тааллуқ доранд, қарорҳо оид ба масъалаҳои ба салоҳияти маҷлиси умумии саҳмдорон мансуббуда аз ҷониби Ҳукумати Ҷумҳурии Тоҷикистон қабул гардида, хаттӣ ба расмият дароварда мешаванд.

51. Ба салоҳияти маҷлиси умумии саҳмдорон масъалаҳои зерин дохил мешаванд:

- тасдиқи ҳайат, низомнома ва теъдоди аъзои шӯрои нозирони Ҷамъият;

- ба мансаб таъин ва аз вазифа озод намудани директори генералии Ҷамъият;

- ворид намудани тағйиру иловаҳо ба Оинномаи Ҷамъият ва тасдиқи он дар таҳрири нав;

- азнавташкилдиҳии Ҷамъият;

- барҳамдиҳии Ҷамъият, таъини комиссияи барҳамдиҳӣ ва тасдиқи тавозуни фосилавӣ ва ниҳоии барҳамдиҳӣ;

- муайян намудани миқдор, арзиши номиналӣ, намуд (навъ)и саҳмияҳои эълоншуда ва вомбаргҳо ва ҳамчунин ҳуқуқҳое, ки ба ин саҳмияҳо ва вомбаргҳо дода шудааст;

- зиёд кардани сармояи оинномавии Ҷамъият бо роҳи зиёд кардани арзиши номиналии саҳмияҳо ё бо роҳи паҳн кардани саҳмияҳои иловагӣ;

- кам кардани сармояи оинномавии Ҷамъият бо роҳи кам кардани арзиши номиналии саҳмияҳо;

- қабули қарор дар бораи иштироки Ҷамъият дар таъсис ё фаъолияти дигар шахсони ҳуқуқӣ бо роҳи супоридани як ё якчанд қисми дороӣ ба маблағе, ки дар маҷмуъ 25 фоиз ё бештари ҳамаи дороии Ҷамъиятро ташкил медиҳад;

- тасдиқи ҳуҷҷатҳои дохилии Ҷамъият, ки фаъолияти маҷлиси умумии саҳмдорони Ҷамъият ва шӯрои нозиронро танзим мекунанд, инчунин дигар ҳуҷҷатҳои дохилии Ҷамъият, ки тасдиқи онҳо мутобиқи қонунгузорӣ таҳти салоҳияти маҷлиси умумии саҳмдорон қарор дорад;

- масъалаҳои дигаре, ки тибқи Қонуни Ҷумҳурии Тоҷикистон "Дар бораи ҷамъиятҳои саҳомӣ" ба салоҳияти маҷлиси умумии саҳмдорон мансубанд.

52. Масъалаҳое, ки ба салоҳияти маҷлиси умумии саҳмдорон мансуб мебошанд, наметавонанд ҷиҳати ҳал намудан ба мақоми иҷроияи Ҷамъият дода шаванд.

53. Масъалаҳои омода намудан ва гузарондани маҷлиси умумии саҳмдорон, маҷлиси умумии ғайринавбатии саҳмдорон, аз ҷумла тартиби иштироки саҳмдорон дар маҷлиси умумии саҳмдорон, кворуми маҷлиси умумии саҳмдорон, пешниҳоди иттилоот дар бораи гузарондани маҷлиси умумии саҳмдорон, тартиби пешниҳоди таклифҳо ба рӯзномаи маҷлиси умумии саҳмдорон, тартиби қабул кардани қарори маҷлиси умумии саҳмдорон, тартиби овоздиҳӣ дар маҷлиси умумии саҳмдорон, талабот нисбати таҳияю тасдиқи протоколҳои маҷлиси умумии саҳмдорон мутобиқи Қонуни Ҷумҳурии Тоҷикистон "Дар бораи ҷамъиятҳои саҳомӣ" амалӣ карда мешавад.

11. ШӯРОИ НОЗИРОНИ ҶАМЪИЯТ

54. Шӯрои нозирони Ҷамъият мақоми идоракунӣ буда, роҳбарии умумии фаъолияти Ҷамъиятро амалӣ менамояд, иҷрои қарорҳои маҷлиси умумии саҳмдорони Ҷамъиятро мутобиқи талаботи қонунгузории Ҷумҳурии Тоҷикистон зери назорат мегирад.

55. Ба салоҳияти шӯрои нозирони Ҷамъият масъалаҳои зерин дохил мешаванд:

- муайян намудани самтҳои афзалиятноки фаъолияти Ҷамъият;

- тасдиқи нақшаҳои корӣ ва молиявии Ҷамъият, ҳисоботҳо оид ба иҷрои онҳо, инчунин тасдиқи харҷномаи ҳарсола;

- баррасии пешниҳодҳо оид ба дохил намудани масъалаҳо ба рӯзномаи маҷлиси шӯрои нозирон ва номзадҳо ба вазифаҳои интихобшаванда дар Ҷамъият;

- тасдиқи ҳисоботи солона, ҳисоботи муҳосибӣ, аз ҷумла ҳисобот оид ба фоида ва зарари Ҷамъият, инчунин тақсими фоидаи даромад аз рӯйи натиҷаҳои соли молиявӣ, аз он ҷумла пардохти суди саҳмияҳо;

- тасдиқи аудитори Ҷамъият ва ҳаҷми подоши хизматрасонии он;

- таъсиси воҳиди аудити дохилӣ, тасдиқи тартиби гузаронидани аудити дохилӣ ва пешниҳоди ҳисоботҳо оид ба натиҷаҳояш, таъин ва қатъ намудани ваколатҳои роҳбари воҳиди аудити дохилии Ҷамъият;

- муайян намудани ҳаҷми маошҳои вазифавии кормандон, шартҳои пардохти музди меҳнат ва ҳавасмандгардонии аъзои мақоми иҷроияи Ҷамъият;

- муайян намудани маълумоти ба Ҷамъият ё фаъолияти он дахлдошта, ки дорои сирри хизматӣ, тиҷоратӣ ё сирри дигари бо қонунгузорӣ ҳифзшаванда мебошад, инчунин муайян намудани тартиби кушодани он ба шахсони сеюм аз ҷониби Ҷамъият;

- аз ҷониби Ҷамъият ҷойгир кардани саҳмияҳо, вомбаргҳо ва дигар коғазҳои қиматноки эмиссионӣ дар ҳолатҳои пешбининамудаи Қонуни Ҷумҳурии Тоҷикистон "Дар бораи ҷамъиятҳои саҳомӣ";

- таъсиси филиалҳо ва кушодани намояндагиҳои Ҷамъият;

- муайян намудани нигоҳдорандаи феҳристи Ҷамъият ва шартҳои шартномаи бо ӯ басташуда, инчунин бекор кардани шартнома;

- таъсиси гуруҳо дар ҳолати зарурӣ барои ҳалли масъалаҳои мушаххас аз ҳисоби худ ва аз ҳисоби дагар кормандони Ҷамъият;

- тасдиқи ҳуҷҷатҳои дохилии Ҷамъият, ки тартиби ташкил ва истифодаи фондҳоро муайян менамоянд;

- муайян намудани сиёсати қарзии Ҷамъият дар қисми гирифтани қарзҳо, бастани шартномаҳои қарзҳо, барориши вомбаргҳо, додани замонатҳо, ҳамаи намудҳои кафолатҳо ва аккредитивҳо;

- муайян намудани шартҳои қарордоди меҳнатӣ бо директори генералии Ҷамъият;

- қабули қарор дар бораи иштироки Ҷамъият дар фаъолияти дигар ташкилотҳои тиҷоратӣ ва ғайритиҷоратӣ, тағйири ҳиссаи иштирок ва қатъ намудани иштироки он дар фаъолияти ташкилотҳои дигар;

- шунидан ва баррасӣ намудани ҳисоботи директори генералӣ оид ба фаъолияти Ҷамъият (аз ҷумла оид ба иҷрои уҳдадориҳои вазифавӣ аз тарафи ӯ) ва иҷрои қарорҳои маҷлиси умумии саҳмдорони Ҷамъият ва шӯрои нозирони Ҷамъият;

- ба ҷавобгарӣ ҷалб намудани директори генералии Ҷамъият ва ҳавасмандкунии он тибқи қонунгузории Ҷумҳурии Тоҷикистон;

- пешакӣ маъқул донистани шартномаи дастаҷамъӣ ва созишномаҳое, ки аз тарафи Ҷамъият дар доираи танзими муносибатҳои иҷтимоию меҳнатӣ баста шудаанд;

- муайян намудани сиёсати хариди Ҷамъият ва қабули қарорҳо мутобиқи ҳуҷҷатҳои тасдиқшуда, ки фаъолияти хариди Ҷамъиятро ба танзим медароранд;

- қабули қарор дар бораи истифодаи фонди захиравӣ ва дигар фондҳои Ҷамъият;

- масъалаҳои дигаре, ки ҳалли онҳо тибқи Қонуни Ҷумҳурии Тоҷикистон "Дар бораи ҷамъиятҳои саҳомӣ", оинномаи Ҷамъият ва низомномаи шӯрои нозирон ба салоҳияти шӯрои нозирон дохил шудааст.

56. Масъалаҳое, ки ба салоҳияти шӯрои нозирон медароянд, наметавонанд барои ҳаллу фасл ба мақоми иҷроияи Ҷамъият супорида шаванд.

57. Аъзои шӯрои нозирон ҳангоми татбиқи ҳуқуқҳои худ ва иҷрои уҳдадориҳо бояд ба манфиати Ҷамъият амал намуда, ҳуқуқу уҳдадориҳои худро нисбат ба Ҷамъият софдилона татбиқ намоянд.

58. Тартиби даъват ва баргузории ҷаласаҳои шӯрои нозирони Ҷамъият ва қабули қарорҳои шӯрои нозирони Ҷамъият, ҳамчунин тартиби интихоби раис ва котиби шӯрои нозирони Ҷамъият бо Низомномаи шӯрои нозирони Ҷамъият, ки аз ҷониби маҷлиси умумии саҳмдорон бо дар назар доштани муқаррароти Қонуни Ҷумҳурии Тоҷикистон "Дар бораи ҷамъиятҳои саҳомӣ" тасдиқ карда мешавад, муайян мегардад.

59. Шӯрои нозирои Ҷамъият метавонад ба ҷаласаҳои худ коршиносони байналмилалӣ ва маҳаллиро даъват намояд.

12. МАҚОМИ ИҶРОИЯИ ҶАМЪИЯТ - ДИРЕКТОРИ ГЕНЕРАЛӢ

60. Ба фаъолияти ҷории Ҷамъият мақоми иҷроиядиректори генералӣ роҳбарӣ мекунад, ки ба маҷлиси умумии саҳмдорони Ҷамъият ва шӯрои нозирони Ҷамъият ҳисоботдиҳанда мебошад.

61. Директори генералии Ҷамъият аз тарафи маҷлиси умумии саҳмдорони Ҷамъият ба мансаб таъин ва аз вазифа озод карда мешавад.

62. Ба салоҳияти директори генералии Ҷамъият ҳамаи масъалаҳои роҳбарии фаъолияти ҷории Ҷамъият, ба истиснои масъалаҳои таҳти салоҳияти маҷлиси умумии саҳмдорон ва шӯрои нозирони Ҷамъият қарордошта марбутанд.

63. Директори генералии Ҷамъият бе ваколатнома аз номи Ҷамъият баромад мекунад, аз ҷумла манфиатҳои Ҷамъиятро ҳимоя менамояд, аз номи Ҷамъият дар мувофиқа бо Шӯрои нозирони ҷамъият аҳдҳо мебандад, сохтор ва ҷадвали вазифавӣ тасдиқ намуда, фармонҳо мебарорад ва супоришҳо медиҳад, ки иҷрои онҳо барои ҳамаи кормандони Ҷамъият ҳатмӣ мебошанд, аз ҷумла:

- иҷрои нақшаҳои Ҷамъиятро таъмин менамояд;

- иҷрои қарорҳои маҷлиси умумии саҳмдорон ва шӯрои нозирони Ҷамъиятро ташкил менамояд;

- пешбурди баҳисобгирии муҳосибӣ ва ҳисоботдиҳиро таъмин менамояд;

- тибқи тартиби муқарраргардидаи қонунгузорӣ молу мулки Ҷамъиятро идора менамояд, аз номи Ҷамъият амалиётҳо мегузаронад, ваколатномаҳо медиҳад, дар бонкҳо ва ташкилотҳои дигари қарзӣ суратҳисобҳои Ҷамъиятро мекушояд;

- аз номи Ҷамъият шартномаҳо мебандад, инчунин амалҳои дигареро, ки ба қонунгузории Ҷумҳурии Тоҷикистон мухолифат надоранд, анҷом медиҳад;

- ҳуҷҷатҳои пулӣ, ҳисобӣ ва дигар ҳуҷҷатҳоро имзо менамояд;

- нархҳои шартномавиро ба маҳсулот, арзиши хизматрасониҳоро тибқи талаботи қонунгузорӣ муайян ва тасдиқ мекунад;

- кормандон ва роҳбарони сохторҳои Ҷамъиятро ба кор қабул мекунад ва аз кор озод менамояд, бо онҳо шартномаҳои меҳнатӣ мебандад, тағйир медиҳад ва қать месозад;

- дар мувофиқа бо шӯрои нозирон муовинони директори генералӣ, сармуҳосиб, роҳбарони филиал ва намояндагиҳои Ҷамъиятро ба вазифа таъин ва аз вазифа озод менамояд, бо онҳо шартномаи меҳнатӣ мебандад, тағйир медиҳад ва қатъ месозад;

- вазифаҳоро байни муовинони директори генералӣ тақсим менамояд;

- нисбати кормандони Ҷамъият мувофиқи қонунгузории меҳнат ҳуқуқу вазифаҳои корфарморо амалӣ менамояд;

- ҳуҷҷатҳои дохилии Ҷамъиятро тасдиқ менамояд, ба истиснои ҳуҷҷатҳои дохилие, ки тасдиқи онҳо ба салоҳияти маҷлиси умумии саҳмдорон ва шӯрои нозирони Ҷамъият мутобиқи муқаррароти қонунгузории Ҷумҳурии Тоҷикистон дохил мебошад;

- масъалаҳои дигари ҷории фаъолияти Ҷамъиятро ҳал менамояд.

64. Муовинон (муовин)-и директори генералӣ ва дигар кормандони Ҷамъият дар доираи ваколати ба онҳо додаи директори генералии Ҷамъият, ки дар ваколатнома дарҷ гардидааст, аз номи Ҷамъият амал намуда, дар мақомоти давлатӣ, ташкилотҳо ва давлатҳои хориҷӣ манфиатҳои онро намояндагӣ менамоянд, муомилот ва амалҳои дигари ҳуқуқиро анҷом медиҳанд.

13. АУДИТОРИ ҶАМЪИЯТ

65. Барои амалигардонии назорати фаъолияти солонаи молиявию ҳоҷагидории Ҷамъият, шӯрои нозирон мутобиқи қонунгузории Ҷумҳурии Тоҷикистон ва Оинномаи Ҷамъият аудиторро ҷалб мекунад.

66. Аудити Ҷамъият мутобиқи Қонуни Ҷумҳурии Тоҷикистон "Дар бораи фаъолияти аудиторӣ" амалӣ карда мешавад. Аудитор бо Ҷамъият муносибатҳои молумулкӣ дошта наметавонад.

14. БАҲИСОБГИРИИ МУҲОСИБӢ ВА ҲИСОБОТИ МОЛИЯВИИ ҶАМЪИЯТ

67. Ҷамъият уҳдадор аст баҳисобгирии муҳосибӣ ва ҳисоботи молиявиро тибқи тартиби муқаррарнамудаи Қонуни Ҷумҳурии Тоҷикистон "Дар бораи ҷамъиятҳои саҳомӣ", дигар санадҳои меъёрии ҳуқуқии Ҷумҳурии Тоҷикистон ва тибқи стандартҳои байналмилалии аудитӣ пеш мебарад.

68. Масъулияти ташкил, ҳолат ва саҳеҳии баҳисобгирии муҳосибӣ дар Ҷамъият, сари вақт пешниҳод намудани ҳисоботи солона ва дигар ҳисоботи молиявӣ ба мақомоти дахлдори давлатӣ, инчунин маълумот оид ба фаъолияти Ҷамъият, ки барои маҷлиси умумии саҳмдорони Ҷамъият, шӯрои нозирони Ҷамъият, кредиторон ва воситаҳои ахбори омма пешниҳод мегарданд, мутобиқи Қонуни Ҷумҳурии Тоҷикистон "Дар бораи ҷамъиятҳои саҳомӣ" ва Оинномаи мазкур ба зиммаи директори генералии Ҷамъият гузошта шудааст.

69. Саҳеҳии маълумоти ҳисоботи солонаи Ҷамъият ва ҳисоботи солонаи муҳосибӣ бояд аз ҷониби аудитори Ҷамъият тасдиқ карда шавад.

70. Ҷамъият вазифадор аст пеш аз нашри ҳуҷҷатҳои дар моддаи 91 Қонуни Ҷумҳурии Тоҷикистон "Дар бораи ҷамъиятҳои саҳомӣ" нишондодашуда, барои тафтиши ҳарсола ва тасдиқи ҳисоботи солонаи молиявӣ аудитореро, ки бо Ҷамъият ва ё саҳмдорони он дар асоси манфиатҳои молумулкӣ алоқаманд намебошад, ҷалб намояд.

15. АЗНАВТАШКИЛДИҲӢ ВА БАРҲАМДИҲИИ ҶАМЪИЯТ

71 Азнавташкилдиҳии Ҷамъият бо роҳи муттаҳидшавӣ, ҳамроҳшавӣ, тақсимшавӣ, табдилдиҳӣ, мутобиқи Кодекси граждании Ҷумҳурии Тоҷикистон ва бо дар назар доштани талаботи Қонуни Ҷумҳурии Тоҷикистон "Дар бораи ҷамъиятҳои саҳомӣ" амалӣ мегардад.

72. Молу мулки Ҷамъият, ки дар натиҷаи азнавташкилдиҳӣ ба миён меояд, танҳо аз ҳисоби молу мулки ҷамъияти аз нав ташкилшаванда ташаккул меёбад.

73. Ҷамъият бо тартиби муқаррарнамудаи Кодекси гражданӣ, бо дарназардошти талаботи Қонуни Ҷумҳурии Тоҷикистон "Дар бораи ҷамъиятҳои саҳомӣ" ва Оинномаи Ҷамъият ё ин ки бо қарори суд аз рӯйи асосҳои пешбининамудаи қонунгузории Ҷумҳурии Тоҷикистон метавонад барҳам дода шавад.

74. Ҳангоми азнавташкилдиҳӣ, барҳамдиҳии Ҷамъият ё қатъ намудани корҳое, ки дорои маълумоти сирри давлатӣ мебошанд, Ҷамъият вазифадор аст, ки амнияти ин маълумот, бехатарии зиддисӯхторӣ ва ҳифз аз паҳншавиро таъмин намояд.