Низомномаи Комиссияи ҷумҳуриявӣ оид ба интихоб ва тайёр намудани мутахассисон дар давлатҳои хориҷӣ

1. МУҚАРРАРАТИ УМУМӢ

1. Низомномаи Комиссияи ҷумҳуриявӣ оид ба интихоб ва тайёр намудани мутахассисон дар давлатҳои хориҷӣ (минбаъд - Низомнома) тартиби ташкил ва фаъолияти Комиссияи ҷумҳуриявӣ оид ба интихоб ва тайёр намудани мутахассисон дар давлатҳои хориҷиро (минбаъд - Комиссияи ҷумҳуриявӣ) танзим менамояд.

2. Комиссияи ҷумҳуриявӣ мақоми назоратию машваратӣ мебошад, ки бо мақсади интихоб ва ба кишварҳои хориҷӣ ҷиҳати таҳсил дар муассисаҳои таҳсилоти миёна ва олии касбӣ, инчунин касбии баъд аз муассисаҳои олии таълимӣ ва коромӯзӣ фиристонидани шаҳрвандони Ҷумҳурии Тоҷикистон (минбаъд - Стипендиат) таъсис дода шудааст.

3. Стипендиат ба кишварҳои хориҷӣ барои таҳсил тавассути стипендияи байналмилалии Президенти Ҷумҳурии Тоҷикистон "Дурахшандагон" (минбаъд - Стипендияи Дурахшандагон), бурсияҳои кишварҳои хориҷӣ ва ташкилотҳо фиристода мешавад.

4. Комиссияи ҷумҳуриявӣ дар фаъолияти худ Конститутсияи Ҷумҳурии Тоҷикистон, Қонуни Ҷумҳурии Тоҷикистон "Дар бораи маориф", дигар санадҳои меъёрии ҳуқуқии Ҷумҳурии Тоҷикистон, аз ҷумла санадҳои ҳуқуқии байналмилалии эътирофнамудаи Ҷумҳурии Тоҷикистон ва Низомномаи мазкурро ба роҳбарӣ мегирад.

5. Вазифаи асосии Комиссияи ҷумҳуриявӣ интихоб ҷиҳати таҳсил ба давлатҳои хориҷӣ фиристодан, назорати раванди таълим, таҳсил ва бо кор таъмин намудани Стипендиат баъди хатми таҳсил мебошад.

2. ТАРТИБИ КОРИ КОМИССИЯИ ҶУМҲУРИЯВӢ

6. Фаъолияти Комиссияи ҷумҳуриявӣ дар шакли ҷаласа тибқи нақшаи корӣ, ки аз ҷониби раиси Комиссияи ҷумҳуриявӣ тасдиқ мегардад, ба роҳ монда мешавад.

7. Қарор оид ба баргузории ҷаласа аз ҷониби раиси Комиссияи ҷумҳуриявӣ (дар ҳолати ҳузур надоштани ӯ, аз ҷониби муовини раиси Комиссияи ҷумҳуриявӣ) қабул карда мешавад ва ба маълумоти аъзои Комиссияи ҷумҳуриявӣ аз ҷониби котиби Комиссияи ҷумҳуриявӣ на дертар аз даҳ рӯзи корӣ то санаи баргузории ҷаласа расонида мешавад.

8. Ҷаласаи Комиссияи ҷумҳуриявӣ дар ҳолате баргузоршуда ҳисобида мешавад, ки агар дар он на кам аз нисфи аъзои Комиссияи ҷумҳуриявӣ иштирок намоянд. Узви Комиссияи ҷумҳуриявие, ки дар ҷаласа бо сабабҳои узрнок иштирок карда наметавонад, ҳуқуқ дорад фикру андешаҳои худро оид ба масъалаи рӯзнома дар шакли хаттӣ пешниҳод намояд.

9. Қарори Комиссияи ҷумҳуриявӣ ба воситаи овоздиҳии кушод бо аксарияти овози аъзои Комиссияи ҷумҳуриявӣ қабул карда мешавад. Дар ҳолати баробар будани овозҳо, овози раисикунандаи ҷаласаи Комиссияи ҷумҳуриявӣ ҳалкунанда мебошад.

10. Қарорҳои дар ҷаласаи Комиссияи ҷумҳуриявӣ қабулшуда тавассути протокол ба расмият дароварда мешавад. Протоколи ҷаласаи Комиссияи ҷумҳуриявӣ аз ҷониби раиси Комиссияи ҷумҳуриявӣ ва котиби Комиссияи ҷумҳуриявӣ ба имзо расонида мешавад. Назорати рафти иҷрои муқаррароти протоколи ҷаласаи Комиссияи ҷумҳуриявиро котиби Комиссияи ҷумҳуриявӣ амалӣ менамояд.

11. Иҷрои қарорҳои Комиссияи ҷумҳуриявӣ, ки дар доираи ваколатҳояш қабул гардидаанд, барои вазорату идораҳо, мақомоти иҷроияи маҳаллии ҳокимияти давлатӣ ва ташкилотҳо, новобаста аз шакли ташкилию ҳуқуқӣ ҳатмӣ мебошад.

12. Фаъолияти кори Комиссияи ҷумҳуриявӣ аз ҷониби котиби Комиссияи ҷумҳуриявӣ ташкил карда мешавад.

13. Маводи ҷаласаҳои Комиссияи ҷумҳуриявӣ аз ҷониби Вазорати маориф ва илми Ҷумҳурии Тоҷикистон (минбаъд - мақоми ваколатдор) ба воситаи котиби Комиссияи ҷумҳуриявӣ дар муҳлати на дертар аз панҷ рӯзи корӣ пеш аз баргузории ҷаласа ба аъзои Комиссияи ҷумҳуриявӣ дастрас карда мешавад.

14. Дар кори Комиссияи ҷумҳуриявӣ бо иҷозати раиси он намояндагони вазорату идораҳо ва ташкилотҳо бе ҳуқуқи овоздиҳӣ иштирок карда метавонанд.

3. ҲУҚУҚ ВА УҲДАДОРИҲОИ КОМИССИЯИ ҶУМҲУРИЯВӢ

15. Комиссияи ҷумҳуриявӣ ҳуқуқ дорад:

- номгӯйи ихтисосҳои барои иқтисодиёт, саноат ва иҷтимоиёти ҷумҳурӣ заруриро дар асоси пешниҳоди мақоми дахлдори давлатӣ тасдиқ намояд;

- тибқи тартиби муқарраршуда озмунро ҷиҳати интихоби Стипендиат ташкил ва баргузор намояд;

- шакли феҳристи ягонаи донишҷӯён ва коромӯзон-шаҳрвандони Ҷумҳурии Тоҷикистон дар давлатҳои хориҷиро тасдиқ карда, тартиби пешбурди онро муайян намояд;

- ба мақоми ваколатдор дар бораи ба таҳсил дар давлатҳои хориҷӣ равон кардани Стипендиатҳо супориш диҳад;

- шартҳои гузаронидани марҳилаҳои якум ва дуюми озмунро тасдиқ мекунад;

- дорои ҳуқуқҳои дигаре мебошад, ки бо қонунгузории Ҷумҳурии Тоҷикистон пешбинӣ шудаанд.

16. Комиссияи ҷумҳуриявӣ уҳдадор аст:

- доир ба масъалаҳои тайёр намудани мутахассисон дар давлатҳои хориҷӣ тибқи тартиби муқарраршуда аз вазорату идораҳо, мақомоти иҷроияи маҳаллии ҳокимияти давлатӣ ва ташкилотҳо, новобаста аз шакли ташкилию ҳуқуқӣ маълумоти заруриро талаб менамояд;

- маълумоти таҳлилиро оид ба фаъолияти мақомоти давлатӣ ва ташкилотҳо дар самти ба давлатҳои хориҷӣ ба таҳсил фиристонидани шаҳрвандони Ҷумҳурии Тоҷикистон аз мақомоти дахлдор дархост намояд;

- ҷиҳати ҷудо намудани маблағҳо аз ҳисоби буҷети давлатӣ барои пардохти хароҷоти ҳамасолаи шаҳрвандоне, ки гирандаи Стипендияи Дурахшандагон мешаванд, ба Президенти Ҷумҳурии Тоҷикистон дархост пешниҳод намояд;

- ҳар сол то 15 январ нақшаи қабули шаҳрвандони Ҷумҳурии Тоҷикистонро барои Стипендияи Дурахшандагон тасдиқ намояд;

- тибқи тартиби муқарраргардида номзадҳоро барои таҳсил дар давлатҳои хориҷӣ интихоб намояд;

- ҳангоми интихоби номзадҳо барои таҳсил дар кишварҳои хориҷӣ талаботи минтақаҳои ҷумҳуриро ба мутахассисони баландихтисос ба инобат гирад;

- ба воситаи мақоми ваколатдор ва мақомоти дахлдор ҷараёни таҳсили Стипендиатро дар давлати хориҷӣ пайваста назорат намояд;

- назорати бо ҷойи кор таъмин намудани хатмкардагони Стипендияи Дурахшандагонро ба роҳ монад;

- мувофиқи тартиби муқарраргардида доир ба масъалаҳои тайёр намудани мутахассисон дар давлатҳои хориҷӣ ба Ҳукумати Ҷумҳурии Тоҷикистон ҳисобот пешниҳод намояд;

- уҳдадориҳои дигареро, ки қонунгузории Ҷумҳурии Тоҷикистон муайян намудааст, амалӣ намояд.

4. МУҚАРРАРОТИ ХОТИМАВӢ

17. Комиссияи ҷумҳуриявӣ барои риояи талаботи Низомномаи мазкур масъул мебошад.

Ҳайати Комиссияи ҷумҳуриявӣ оид ба интихоб ва тайёр намудани мутахассисон дар давлатҳои хориҷӣ

Муовини Сарвазири Ҷумҳурии Тоҷикистон - раиси Комиссияи ҷумҳуриявӣ;

вазири маориф ва илми Ҷумҳурии Тоҷикистон - муовини раиси Комиссияи ҷумҳуриявӣ;

сардори раёсати маориф, фарҳанг ва иттилооти Дастгоҳи иҷроияи Президенти Ҷумҳурии Тоҷикистон - котиби
Комиссияи ҷумҳуриявӣ.

Аъзои Комиссияи ҷумҳуриявӣ:

ёрдамчии Президенти Ҷумҳурии Тоҷикистон оид ба масъалаҳои кадрҳо;          

ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа;         

вазири адлияи Ҷумҳурии Тоҷикистон;       

вазири меҳнат, муҳоҷират ва шуғли аҳолии Ҷумҳурии Тоҷикистон;

вазири молияи Ҷумҳурии Тоҷикистон;

вазири рушди иқтисод ва савдои Ҷумҳурии Тоҷикистон;  

вазири корҳои хориҷии Ҷумҳурии Тоҷикистон;

вазири тандурустӣ ва ҳифзи иҷтимоии аҳолии Ҷумҳурии Тоҷикистон;    

раиси Кумитаи давлатии амнияти миллии Ҷумҳурии Тоҷикистон;

директори Агентии назорат дар соҳаи маориф ва илми назди Президенти Ҷумҳурии Тоҷикистон;

сардори раёсати робитаҳои хориҷии Дастгоҳи иҷроияи Президенти Ҷумҳурии Тоҷикистон;

директори Маркази миллии тестии назди Президенти Ҷумҳурии Тоҷикистон;

директори Муассисаи давлатии "Маркази барномаҳои байналмилалӣ".