Тартиби интихоб ва тайёр намудани мутахассисон дар давлатҳои хориҷӣ

1. МУҚАРРАРОТИ УМУМӢ

1. Тартиби интихоб ва тайёр намудани мутахассисон дар давлатҳои хориҷӣ (минбаъд - Тартиб) тартиби ташкил ва баргузории озмун, талабот ба довталабон ва номгӯйи ҳуҷҷатҳо барои интихоб ва тайёр намудани мутахассисон дар давлатҳои хориҷӣ тавассути Стипендияи байналмилалии Президенти Ҷумҳурии Тоҷикистон "Дурахшандагон" (минбаъд - Стипендияи Дурахшандагон) ва бурсияҳои давлатҳои хориҷӣ (минбаъд - бурсияҳо)-ро танзим менамояд.

2. Интихоби довталабон ҷиҳати дарёфти Стипендияи Дурахшандагон ва бурсия тариқи озмун, инчунин бо риояи талаботи давлати хориҷӣ ва ё ташкилоти пешниҳодкунандаи бурсия сурат мегирад.

2. ОЗМУН БАРОИ ДАРЁФТИ СТИПЕНДИЯИ ДУРАХШАНДАГОН ВА БУРСИЯ

3. Озмун барои дарёфти Стипендияи Дурахшандагон ва бурсияҳо аз ҷониби Комиссияи ҷумҳуриявӣ ташкил ва баргузор карда мешавад.

4. Корҳои ташкилӣ вобаста ба баргузории озмун, аз ҷумла эълони баргузории озмун, қабули ҳуҷҷатҳои довталабон ва ба баррасии Комиссияи ҷумҳуриявӣ омода намудани рӯйхати довталабон аз ҷониби Вазорати маориф ва илми Ҷумҳурии Тоҷикистон (минбаъд - мақоми ваколатдор) бо тартиби пешбининамудаи Тартиби мазкур анҷом дода мешавад.

5. Эълони баргузории озмун ба воситаи шабакаҳои телевизионӣ, радио ва дигар воситаҳои ахбори оммаи ҷумҳуриявӣ ва маҳаллӣ, инчунин ҷой додан дар сомонаҳои расмӣ ва саҳифаҳои шабакаҳои иҷтимоии мақоми ваколатдор ройгон паҳн карда мешавад.

6. Эълони баргузории озмун маълумоти зеринро дар бар мегирад:

- номи давлат, муассисаи таълимии давлати хориҷӣ;

- маълумот дар бораи ихтисос;

- сатҳи донистани забонҳои хориҷӣ;

- номгӯйи ҳуҷҷатҳои пешниҳодшаванда;

- талабот нисбат ба довталаб;

- муҳлати қабули ҳуҷҷатҳо;

- маҳалли ҷойгиршавӣ, суроға, сомона, суроғаи электронӣ, рақами телефон ва факси мақоми ваколатдор;

- маълумоти иловагии дигаре, ки ба санадҳои меъёрии ҳуқуқӣ мухолиф нест.

7. Барои дарёфти Стипендияи Дурахшандагон ва бурсияҳо ба Комиссияи ҷумҳуриявӣ тавассути Муассисаи давлатии "Маркази барномаҳои байналмилалӣ" ҳуҷҷатҳои зерин пешниҳод карда мешаванд:

- ариза;

- варақаи шакли тасдиқшуда;

- нусхаи шиноснома.

- маълумотнома дар бораи доштан (надоштан)-и доғи судӣ, далели таъқиби ҷиноятӣ ё қатъ шудани таъқиби ҷиноятӣ;

- маълумотномаи тиббӣ (мавҷудияти бемориҳои наркологӣ, равонӣ ва вируси норасоии масунияти одам);

- ҳуҷҷати тасдиқкунандаи таҳсилот барои идомаи таҳсил аз рӯйи зинаи таҳсилоти интихобшуда.

8. Талабот ба довталабон ҷиҳати дарёфти Стипендияи Дурахшандагон ва бурсияҳо аз ҷониби Комиссияи ҷумҳуриявӣ бо пешниҳоди мақоми ваколатдор муқаррар карда мешавад.

9. Барои интихоби довталабон дар зинаи бакалавриат ё мутахассис тариқи Стипендияи Дурахшандагон ва бурсияҳо озмун дар ду марҳила гузаронида мешавад.

10. Дар марҳилаи якум бо тартиби муқаррарнамудаи Комиссияи ҷумҳуриявӣ довталабоне, ки ба талаботи озмун ҷавобгӯ мебошанд, дар доираи низоми марказонидашудаи қабули имтиҳонот тавассути Маркази миллии тестии назди Президенти Ҷумҳурии Тоҷикистон имтиҳон месупоранд.

11. Марҳилаи дуюм аз ҷониби аъзои Комиссияи ҷумҳуриявӣ бо мақсади муайян намудани сатҳи забондонӣ, донишҳои соҳавӣ ва омодагии психологии довталаб бо ҷалби мутахассисон сурат мегирад.

12. Аъзои Комиссияи ҷумҳуриявӣ бо довталабони Стипендияи Дурахшандагон, ки бо пешниҳоди мақомот ва ташкилотҳои дархосткунанда барои таҳсил дар зинаи магистратура, аспирантура, ординатура, интернатура, доктори фалсафа (РhО), доктор аз рӯйи ихтисос, докторантура, постдокторантура ва коромӯзӣ ба давлатҳои хориҷӣ равон карда мешаванд, суҳбат мегузаронанд. Зимни суҳбат сатҳи донистани забонҳои хориҷӣ, донишҳои соҳавӣ ва омодагии психологии довталабро муайян мекунанд.

13. Ғолибони озмун номгӯйи ҳуҷҷатҳоро барои зинаҳои таҳсилот ва коромӯзӣ мутобиқ ба талаботи муассисаҳои таълимии давлатҳои хориҷӣ ва ташкилотҳои дахлдори давлатҳои хориҷӣ таъмин менамоянд.

3. ҲАМОҲАНГСОЗИИ ФАЪОЛИЯТ ВОБАСТА БА ИНТИХОБ ВА ТАЙЁР НАМУДАНИ МУТАХАССИСОН ДАР ДАВЛАТҲОИ ХОРИҶӢ

14. Ҳамоҳангсозии фаъолият вобаста ба интихоб ва тайёр намудани мутахассисон дар давлатҳои хориҷӣ аз ҷониби Комиссияи ҷумҳуриявӣ ва мақоми ваколатдор амалӣ мегардад.

15. Мақоми ваколатдор барои аз ҷониби муассисаҳои таълимии давлатҳои хориҷӣ ва ташкилотҳо, сарфи назар аз мансубият, ба таҳсил фаро гирифтани шаҳрвандони Ҷумҳурии Тоҷикистон тибқи Тартиби мазкур мусоидат карда, бақайдгирии довталабонро амалӣ менамояд.

16. Мақомоти давлатӣ, муассисаҳои таҳсилоти миёна ва олии касбӣ, касбии баъд аз муассисаҳои таҳсилоти олии таълимӣ ва ташкилотҳои дигар, новобаста аз шакли ташкилию ҳуқуқӣ, таҳсили шаҳрвандонро дар давлатҳои хориҷӣ ба воситаи Муассисаи давлатии "Маркази барномаҳои байналмилалӣ" роҳандозӣ менамоянд.

4. МУҚАРРАРОТИ ХОТИМАВӢ

17. Вазорату идораҳо, мақомоти иҷроияи маҳаллии ҳокимияти давлатӣ ва ташкилотҳо, новобаста аз шакли ташкилию ҳуқуқӣ, барои риояи Тартиби мазкур масъул мебошанд.

18. Мақоми ваколатдор аз натиҷаи иҷрои Тартиби мазкур ба Комиссияи ҷумҳуриявӣ ҳамасола маълумоти муфассал пешниҳод менамояд.