Низомномаи бақайдгирии ҳарбии шаҳрвандони Ҷумҳурии Тоҷикистон

1. МУҚАРРАРОТИ УМУМӢ

1. Низомномаи бақайдгирии ҳарбии шаҳрвандони Ҷумҳурии Тоҷикистон (минбаъд - Низомнома) тартиб ва ташкили бақайдгирии ҳарбии шаҳрвандон, уҳдадориҳои роҳбарони мақомоти иҷроияи маҳаллии ҳокимияти давлатӣ, мақомоти дигари давлатӣ, мақомоти худидоракунии шаҳрак ва деҳот, корхона, муассиса ва ташкилотҳои дигар, сарфи назар аз шакли моликият ва ташкилию ҳуқуқӣ, инчунин таъмини иҷрои уҳдадории ҳарбии шаҳрвандон, ташкили комиссияи ба қайди ҳарбӣ гузоштани шаҳрвандон, уҳдадориҳои он ва уҳдадориҳои шаҳрвандонро доир ба қайди ҳарбӣ ба танзим медарорад.

2. ТАРТИБ ВА ТАШКИЛИ БАҚАЙДГИРИИ ҲАРБИИ ШАҲРВАНДОН

2. Роҳбарии умумӣ дар кори ташкил ва ба қайди ибтидоии ҳарбӣ гузоштани шаҳрвандон ва пешбурди бақайдгирии ҳарбии шаҳрвандоне, ки дар эҳтиёт қарор доранд, инчунин шаҳрвандоне, ки бояд ба хизмати ҳарбӣ даъват карда шаванд ва назорати кори мазкур дар мақомоти худидоракунии шаҳрак ва деҳот, корхонаҳо, муассисаҳо, ташкилотҳо, сарфи назар аз шакли моликият ва тобеияти идоравии онҳо, аз тарафи Вазорати мудофиаи Ҷумҳурии Тоҷикистон ба роҳ монда мешавад.

3. Низоми бақайдгирии ҳарбии шаҳрвандоне, ки дар эҳтиёт қарор доранд, инчунин шаҳрвандоне, ки ба хизмати ҳарбӣ даъват карда мешаванд, бо низоми шиносномадиҳии дар Ҷумҳурии Тоҷикистон амалкунанда ҳамоҳанг сохта мешавад ва иҷрои он аз тарафи Вазорати мудофиаи Ҷумҳурии Тоҷикистон ва Вазорати корҳои дохилии Ҷумҳурии Тоҷикистон амалӣ карда мешавад.

4. Бақайдгирии ҳарбии шаҳрвандоне, ки дар эҳтиёти Кумитаи давлатии амнияти миллии Ҷумҳурии Тоҷикистон қарор доранд, тибқи тартиби аз тарафи раиси Кумитаи давлатии амнияти миллии Ҷумҳурии Тоҷикистон муқарраргардида амалӣ карда мешавад. Шаҳрвандоне, ки дар мақомоти Кумитаи давлатии амнияти миллии Ҷумҳурии Тоҷикистон ба вазифаҳои штатӣ таъин шудаанд, мутобиқан дар қайди ҳарбии мақомоти мазкур мебошанд.

5. Бақайдгирии ҳарбӣ ба умумӣ ва махсус ҷудо мешавад:

- дар қайди умумии ҳарбӣ шаҳрвандоне мебошанд, ки дар эҳтиёт қарор дошта, вале дар корхонаҳо, муассисаҳо, ташкилотҳо, сарфи назар аз шакли моликият ва тобеияти идоравии онҳо, ва муассисаҳои таълимӣ дар давраи сафарбарӣ ва замони ҷанг захира (брон) карда нашудаанд, инчунин шаҳрвандоне, ки бояд ба хизмати ҳарбӣ даъват карда шаванд;

- дар қайди махсуси ҳарбӣ шаҳрвандоне мебошанд, ки дар эҳтиёт қарор дошта, тибқи тартиби муқарраргардида дар корхонаҳо, муассисаҳо, ташкилотҳо, сарфи назар аз шакли моликият ва тобеияти идоравиашон, ва муассисаҳои таълимӣ дар давраи сафарбарӣ ва замони ҷанг захира (брон) карда мешаванд.

6. Бланкҳои дахлдор ва шаклҳои ҳисоботдиҳӣ вобаста ба масъалаҳои ташкил ва тартиби пешбурди бақайдгирии ҳарбии шаҳрвандони Ҷумҳурии Тоҷикистон тибқи тартиби муқарраргардида аз тарафи Вазорати мудофиаи Ҷумҳурии Тоҷикистон таҳия гардида, ба раисони вилоятҳо ва шаҳру ноҳияҳои ҷумҳурӣ фиристода мешаванд.

7. Бланкҳои шаҳодатномаи бақайдгирии ҳарбӣ, билетҳои ҳарбӣ, маълумотномаҳо бар ивази билети ҳарбӣ ва хабарномаҳое, ки дар қайди махсуси ҳарбӣ қарор доштани шаҳрвандонро муайян мекунанд, бо фармоиши Вазорати мудофиаи Ҷумҳурии Тоҷикистон тибқи тартиби муқаррагардида тайёр карда, ба шаҳрвандон ройгон дода мешаванд.

8. Бақайдгирии шаҳрвандоне, ки дар эҳтиёт қарор доранд ва бояд ба хизмати ҳарбӣ даъват карда шаванд, дар корхонаҳо, муассисаҳо, ташкилотҳо, сарфи назар аз шакли моликияташон, бо мақсадҳои зерин пеш бурда мешавад:

- таъмини назорати аз тарафи шаҳрвандони Ҷумҳурии Тоҷикистон ба иҷро расидани уҳдадориҳои ҳарбӣ ва қоидаҳои бо Қонуни Ҷумҳурии Тоҷикистон "Дар бораи уҳдадории ҳарбӣ ва хизмати ҳарбӣ" муқарраршудаи бақайдгирии ҳарбӣ;

- дар давраи сафарбарӣ ва замони ҷанг сари вақт захира (брон) кардани кормандони муҳандисию техникӣ ва коргарони баландихтисос;

- тарбияи саривақтии кадрҳо барои иваз кардани мутахассисоне, ки ҳангоми сафарбарӣ даъват карда мешаванд;

- расонидани кумак ба комиссариатҳои ҳарбӣ дар гузаронидани чорабиниҳои мудофиавӣ ва сафарбарӣ.

9. Дар комиссариатҳои ҳарбӣ, ҷамоатҳо, корхонаҳо, муассисаҳо, ташкилотҳои дигар, сарфи назар аз шакли моликият, бо дарназардошти меъёри зерини сарборӣ ба як нафар корманд барои бақайдгирии ҳарбӣ нигоҳ дошта мешавад:

1) дар комиссариатҳои ҳарбии шаҳру ноҳияҳо:

- дар сурати дар қайди ҳарбӣ мавҷуд будани то 2500 шаҳрванд, - як корманди бақайдгирӣ ва захира (брон) кардани кадрҳо;

- дар сурати аз 2500 то 5000 нафар будани шаҳрвандон, - ду корманди бақайдгирӣ ва захира (брон) кардани кадрҳо;

- барои ҳар 2500 нафари минбаъдаи шаҳрвандон - як корманди бақайдгирӣ ва захира (брон) кардани кадрҳо;

2) дар ҷамоатҳое, ки пешбурди бақайдгирии аввалияи ҳарбии шаҳрвандон ба зиммаи онҳо гузошта шудааст:

- дар сурати дар қайди ҳарбӣ будани аз 500 то 1000 шаҳрванд,1 нафар корманд барои пешбурди бақайдгирии ҳарбӣ;

- дар сурати аз 1000 то 3000 нафар будани шаҳрванд, - 2 корманд барои пешбурди бақайдгирии ҳарбӣ;

- барои ҳар 500 нафари минбаъдаи шаҳрвандон - як корманд барои пешбурди бақайдгирии ҳарбӣ;

3) дар корхона, муассиса ва ташкилотҳои дигар:

- дар сурати дар қайди ҳарбӣ будани аз 500 то 2000 шаҳрванд,1 корманд барои пешбурди бақайдгирии ҳарбӣ;

- дар сурати дар қайди ҳарбӣ будани аз 2000 то 4000 шаҳрванд, - 2 корманд барои пешбурди бақайдгирии ҳарбӣ;

- дар сурати дар қайди ҳарбӣ будани аз 4000 то 7000 шаҳрванд, - 3 корманд барои пешбурди бақайдгирии ҳарбӣ;

- барои ҳар 3000 нафари минбаъдаи шаҳрвандон - як корманд барои пешбурди бақайдгирии ҳарбӣ.

10. Ҳангоми дар қайди ҳарбии ҷамоатҳо, корхонаҳо, муассисаҳо ва ташкилотҳои дигар, сарфи назар аз шакли моликияташон, будани камтар аз 500 шаҳрванд, кори бақайдгирии ҳарбӣ ва захира кардани онҳо бо тартиби муқарраршуда ҳамзамон ба зиммаи яке аз корманди дигари ҷамоат, корхона, муассиса ва ташкилот гузошта мешавад.

11. Таъин, ба кори дигар гузаронидан ва аз кор озод намудани кормандоне, ки бо бақайдгирии ҳарбӣ дар ҷамоатҳо, корхонаҳо, муассисаҳо, ташкилотҳои дигар, сарфи назар аз шакли моликияташон, муассисаҳои таълимӣ машғуланд, мутобиқан аз тарафи раисони ҷамоатҳо, роҳбарони корхонаҳо, муассисаҳо, ташкилотҳои дигар ва муассисаҳои таълимӣ дар мувофиқа бо комиссариати ҳарбии шаҳру ноҳия амалӣ карда мешаванд.

3. УҲДАДОРИҲОИ МАЪМУРИЯТИ КОРХОНА, МУАССИСА ВА ТАШКИЛОТҲОИ ДИГАР

12. Маъмурияти корхона, муассиса ва ташкилотҳои дигар, сарфи назар аз шакли моликияташон, уҳдадоранд:

- бақайдгирии ҳарбии пурраи ҳамаи шаҳрвандонеро, ки дар корхона, муассиса ва ташкилотҳои дигар кор мекунанд ва ё таҳсил менамоянд, дар сатҳи зарурӣ таъмин намоянд;

- варақаҳои шахсии шаҳрвандонро мунтазам бо сабтҳо дар шаҳодатномаи бақайдгирии ҳарбӣ, билети ҳарбӣ ва маълумотнома бар ивази билети ҳарбӣ муқоиса намуда, ба комиссариатҳои ҳарбии маҳалли ҷойгиршавӣ пешниҳод кунанд;

- бақайдгирии мунтазами тағйироти зиндагии шаҳрвандони дар қайди ҳарбӣ қарордошта, аз ҷумла вазъи оилавӣ, суроғаи маҳалли зист, вазъи хизматӣ, омодагии умумӣ ва техникии онҳоро амалӣ намояд ва ин тағйиротро дар муҳлати ҳафт рӯз ба варақаҳои шахсӣ дохил карда, минбаъд ба комиссариатҳои ҳарбии маҳалли ҷойгиршавӣ пешниҳод намоянд;

- дар давраи сафарбарӣ ва ҳолати ҷангӣ дар захира (брон) нигоҳ доштани шаҳрвандон, аз ҷумла кормандони муҳандисию техникӣ ва баландихтисосро, ки дар қайди ҳарбӣ қарор доранд, амалӣ намоянд;

- дар муҳлати ҳафт рӯзи корӣ ба комиссариатҳои ҳарбии маҳалли ҷойгиршавии шаҳрвандоне, ки дар қайди ҳарбӣ қарор доранд ё бояд қарор дошта бошанд, онҳое, ки нав ба кор (таҳсил) қабул шудаанд ё аз кор озод карда шудаанд (аз муассисаи таълимӣ хориҷ карда шудаанд), хабар диҳанд;

- ҳангоми қабули шаҳрвандон ба кор (таҳсил) мавҷудияти ҳуҷҷати бақайдгирии ҳарбӣ (шаҳодатномаи бақайдгирии ҳарбӣ, билети ҳарбӣ, инчунин маълумотнома бар ивази билети ҳарбӣ)-ро санҷанд ва дар қайди ҳарбӣ будани онҳоро муқаррар кунанд.

4. УҲДАДОРИҲОИ КОМИССИЯИ БА ҚАЙДИ ҲАРБӢ ГУЗОШТАНИ ШАҲРВАНДОН

13. Ба қайди ибтидоии ҳарбӣ гузоштани шаҳрвандони ҷинси мард аз ҷониби комиссияи шаҳрӣ ё ноҳиявии ба қайди ҳарбӣ гузоштани шаҳрвандон дар давраи аз 1 январ то 31 март дар соли ба синни 16-солагӣ расидани онҳо сурат мегирад.

14. Комиссияи ба қайди ҳарбӣ гузоштани шаҳрвандон бо қарори раиси шаҳр ё ноҳия таъсис дода шуда, уҳдадориҳои худро дар доираи ваколаташон иҷро менамояд.

15. Комиссияи ба қайди ҳарбӣ гузоштани шаҳрвандон уҳдадор аст, ки муоинаи тиббии шаҳрвандонро ташкил намуда, қобили адои хизмати ҳарбӣ будани онҳоро муайян карда, дар хусуси ба қайди ҳарбӣ гузоштани шаҳрванд ё озод намудани ӯ аз уҳдадории ҳарбӣ бинобар вазъи саломатӣ ҳамчун ғайриқобили хизмати ҳарбӣ будан қарор қабул кунад.

16. Раис ё котиби комиссияи ба қайди ҳарбӣ гузоштани шаҳрвандон уҳдадор аст, ки қарори комиссияро ба шаҳрвандон расонида, уҳдадориҳои онҳоро доир ба қайди ҳарбӣ фаҳмонад.

5. УҲДАДОРИҲОИ ШАҲРВАНДОН ОИД БА ГУЗОШТАН БА ҚАЙДИ ҲАРБӢ

17. Шаҳрвандон уҳдадоранд дар қайди ҳарбии комиссариати ҳарбии маҳалли истиқомат ё дар қайди ҳарбии ҳайати эҳтиётии мақомоти амнияти миллӣ бошанд, бо даъват дар вақти муқарраршуда ба маҳалли муайян ба комиссариати ҳарбӣ ҳозир шуда, ҳуҷҷатҳои заруриро мувофиқи номгӯйи дар даъватномаи комиссариати ҳарбӣ ё мақомоти худидоракунии шаҳрак ва деҳот нишондодашуда пешниҳод намоянд, инчунин уҳдадориҳои дигари тибқи қонун ва санадҳои меъёрии ҳуқуқӣ муқарраргардидаи қайди ҳарбиро иҷро намоянд.

18. Шаҳрвандоне, ки бояд ба хизмати ҳарбӣ даъват шаванд ва дар давраи даъват ба муҳлати зиёда аз 15 рӯз аз ҷойи истиқомат мераванд, уҳдадоранд дар ин бора ба комиссариати ҳарбии маҳалли истиқомат шахсан хабар расонанд.

6. МУҚАРРАРОТИ ХОТИМАВӢ

19. Бақайдгирии ҳарбии шаҳрвандон бевосита бо иштироки худи онҳо бо пешниҳоди ҳуҷҷати тасдиқкунандаи шахсият амалӣ карда мешавад.

20. Шахсони воқеӣ ва ҳуқуқӣ барои вайрон кардани талаботи Низомнома мутобиқи қонунгузории Ҷумҳурии Тоҷикистон ба ҷавобгарӣ кашида мешаванд.