Низомномаи тартиби додани рутбаҳои дараҷавӣ ба кормандоии Дастгоҳи иҷроияи Президенти Ҷумҳурии Тоҷикистон, ки таҳсилоти олии ҳуқуқӣ доранд

1. МУҚАРРАРОТИ УМУМӢ

1. Низомномаи тартиби додани рутбаҳои дараҷавӣ ба кормандони Дастгоҳи иҷроияи Президенти Ҷумҳурии Тоҷикистон, ки таҳсилоти олии ҳуқуқӣ доранд, тартиби ба кормандони Дастгоҳи иҷроияи Президенти Ҷумҳурии Тоҷикистон (минбаъд - Дастгоҳи иҷроияи Президент) додани рутбаҳои дараҷавӣ ва масъалаҳои дигари вобаста ба рутбаҳои дараҷавиро муайян мекунад.

2. Бо қарори Маҷлиси намояндагони Маҷлиси Олии Ҷумҳурии Тоҷикистон аз 13 апрели соли 2011, №385 "Дар бораи муқаррар намудани рутбаҳои дараҷавӣ ба кормандони мақомоти адлияи Ҷумҳурии Тоҷикистон", ба кормандони Дастгоҳи иҷроияи Президент рутбаҳои дараҷавии зерин муқаррар карда шудааст:

- Мушовири давлатии адлияи Ҷумҳурии Тоҷикистон;

- Мушовири давлатии адлияи дараҷаи 1;

- Мушовири давлатии адлияи дараҷаи 2;

- Мушовири давлатии адлияи дараҷаи 3;

- Мушовири адлияи дараҷаи 1;

- Мушовири адлияи дараҷаи 2;

- Мушовири адлияи дараҷаи 3;

- Ҳуқуқшиноси дараҷаи 1;

- Ҳуқуқшиноси дараҷаи 2;

- Ҳуқуқшиноси дараҷаи 3.

3. Рутбаҳои дараҷавӣ бо тартиби пай дар пай дар сурати мавҷуд будани таҳсилоти олии ҳуқуқшиносӣ тибқи ихтисоси корманд, мансаб ва собиқаи кор, инчунин бо дар назар доштани рутбаи дараҷавӣ, дараҷаи тахассусӣ, унвонҳои дахлдор, ки ӯ ба онҳо дар ҷои кор ва ё хизмати пешинааш соҳиб шудааст, дода мешаванд.

4. Рутбаҳои дараҷавӣ ба кормандони Дастгоҳи иҷроияи Президент якумрӣ дода мешаванд.

5. Ба мансабҳои пасттар гузаронидан ё гузаштани корманди Дастгоҳи иҷроияи Президент барои паст кардани рутбаи дараҷавии ба ӯ пештар додашуда асос намегардад.

6. Дар бораи рутбаҳои дараҷавии ба кормандони Дастгоҳи иҷроияи Президент додашуда дар шаҳодатномаи хизматӣ ва дафтарчаи меҳнатии хизматчии давлатӣ қайд карда мешаванд. Қайди дахлдор дар фасли "Маълумот дар бораи кор"-и дафтарчаи меҳнатии кормандони Дастгоҳи иҷроияи Президент гузошта мешавад.

2. ТАРТИБИ БА КОРМАНДОНИ ДАСТГОҲИ ИҶРОИЯИ ПРЕЗИДЕНТ ДОДАНИ РУТБАҲОИ ДАРАҶАВӢ

7. Рутбаҳои дараҷавӣ ба кормандони Дастгоҳи иҷроияи Президент вобаста ба ишғоли мансабҳои хизмати давлатии зерин дода мешаванд:

1) ба хизматчиёни давлатии сиёсӣ - Мушовири давлатии адлияи Ҷумҳурии Тоҷикистон;

2) ба хизматчиёни давлатии маъмурӣ, аз ҷумла:

- категорияи олӣ - Мушовири давлатии адлияи дараҷаҳои 1 ва 2;

- категорияи якум - Мушовири давлатии адлияи дараҷаи 3, Мушовири адлияи дараҷаи 1;

- категорияи дуюм - Мушовири адлияи дараҷаҳои 1 ва 2;

- категорияи сеюм - Мушовири адлияи дараҷаи 3, Ҳуқуқшиноси дараҷаи 1;

- категорияи чорум - Ҳуқуқшиноси дараҷаҳои 2 ва 3.

8. Рутбаи дараҷавии Мушовири давлатии адлияи Ҷумҳурии Тоҷикистон, рутбаҳои дараҷавии Мушовири давлатии адлияи дараҷаҳои 3, 2, 1 бо пешниҳоди Роҳбари Дастгоҳи иҷроияи Президент аз тарафи Президенти Ҷумҳурии Тоҷикистон дода мешаванд. Рутбаҳои дараҷавии Мушовири адлияи дараҷаҳои 3, 2, 1, ҳуқуқшиноси дараҷаҳои 3, 2, 1 аз тарафи Роҳбари Дастгоҳи иҷроияи Президент бо пешниҳоди роҳбари воҳиди сохтории дахлдор дода мешаванд.

9. Ба корманде, ки бори аввал ба мансаб дар Дастгоҳи иҷроияи Президент таъин шудааст, рутбаи дараҷавӣ баъди шаш моҳи таъин шудан мутобиқ ба мансаби ишғолнамуда дода мешавад.

10. Ҳангоми додани рутбаи дараҷавӣ риояи интизоми меҳнат ва иҷро аз ҷониби корманд, дастовардҳои кории ӯ ба инобат гирифта мешаванд.

11. Ба кормандони Дастгоҳи иҷроияи Президент дар муҳлатҳои зерин рутбаи дараҷавии навбатӣ дода мешавад:

- Мушовири адлияи дараҷаи 1 - баъди чор соли додани рутбаи дараҷавии Мушовири адлияи дараҷаи 2;

- Мушовири адлияи дараҷаи 2 - баъди се соли додани рутбаи дараҷавии Мушовири адлияи дараҷаи 3;

- Мушовири адлияи дараҷаи 3 баъди се соли додани рутбаи дараҷавии Ҳукуқшиноси дараҷаи 1;

- Ҳуқуқшиноси дараҷаи 1 баъди ду соли додани рутбаи дараҷавии Ҳуқуқшиноси дараҷаи 2;

- Ҳуқуқшиноси дараҷаи 2 баъди ду соли додани рутбаи дараҷавии Ҳуқуқшиноси дараҷаи 3.

12. Мухдати додани рутбаҳои мушовири давлатии адлияи дараҷаи 3, 2,1 муқаррар карда намешавад.

13. Ба корманди Дастгоҳи иҷроияи Президент барои иҷрои супоришҳои махсусан масъулиятнок, натиҷаҳои баланди касбию хизматӣ, саҳми ӯ дар таҳкими мақомоти давлатӣ ва хизмати давлатӣ мумкин аст рутбаи дараҷавии навбатӣ пеш аз муҳлат ё як дараҷа баланд дода шавад.

14. Барои иҷро накардан ё ба таври дахлдор иҷро накардани уҳдадориҳои мансабӣ (содир намудани кирдори интизомӣ) нисбати корманди Дастгоҳи иҷроияи Президент ба сифати ҷазои интизомӣ ба муҳлати то як сол мавқуф гузоштани додани рутбаи дараҷавии навбатӣ татбиқ кардан мумкин аст.

3. ҚАБУЛИ ФАРМОН ОИД БА МАСЪАЛАҲОИ РУТБАИ ДАРАҶАВӢ

15. Президенти Ҷумҳурии Тоҷикистон дар асоси пешниҳоди Роҳбари Дастгоҳи иҷроияи Президент ва Роҳбари Дастгоҳи иҷроияи Президент дар асоси пешниҳоди роҳбари воҳиди сохторӣ дар хусуси ба корманд додани рутбаи дараҷавӣ ва дигар масъалаҳои вобаста ба рутбаи дараҷавӣ фармон қабул менамоянд.

16. Нусхаи фармони Президенти Ҷумҳурии Тоҷикистон ва фармони Роҳбари Дастгоҳи иҷроияи Президент дар бораи додани рутбаи дараҷавӣ дар парвандаи шахсии корманд нигоҳ дошта мешавад.

17. Корманди Дастгоҳи иҷроияи Президент бо фармони Президенти Ҷумҳурии Тоҷикистон ва фармони Роҳбари Дастгоҳи иҷроияи Президент дар бораи додани рутбаи дараҷавӣ ва дигар масъалаҳои вобаста ба рутбаи дараҷавӣ таҳти имзо шинос карда мешавад.