Низомномаи шӯрои нозирон оид ба назорати амалисозӣ ва идоракунии ҷараёнҳои молиявии суратҳисоби махсус барои идоракунии воситаҳои молиявие, ки аз фурӯши неруи барқ дар дохили шабакаи энергетикии Ҷумҳурии Тоҷикистон ворид мегарданд

1. МУҚАРРАРОТИ УМУМӢ

1. Низомномаи шӯрои нозирон оид ба назорати амалисозӣ ва идоракунии ҷараёнҳои молиявии суратҳисоби махсус барои идоракунии воситаҳои молиявие, ки аз фурӯши неруи барқ дар дохили шабакаи энергетикии Ҷумҳурии Тоҷикистон ворид мегарданд (минбаъд - Низомнома), мақом, тартиби даъват, ташкил ва баргузории маҷлисҳои шӯрои нозирон, ҳуқуқу уҳдадориҳои аъзои шӯрои нозирон, инчунин тартиби пеш аз муҳлат қатъ намудани ваколатҳои аъзои шӯрои нозиронро муайян менамояд.

2. Шӯрои нозирон оид ба назорати амалисозӣ ва идоракунии ҷараёнҳои молиявии суратҳисоби махсус барои идоракунии воситаҳои молиявие, ки аз фурӯши неруи барқ дар дохили шабакаи энергетикии Ҷумҳурии Тоҷикистон ворид мегарданд (минбаъд - шӯрои нозирон), мақоми назоратӣ буда, амалисозии талаботи Низомнома ва идоракунии ҳаракатҳои молиявии суратҳисоби махсусро, ки низомномаи он бо қарори Ҳукумати Ҷумҳурии Тоҷикистон аз 25 ноябри соли 2021, №500 тасдиқ шудааст, таъмин менамояд.

2. ТАЪСИСИ ШӯРОИ НОЗИРОН

3. Шӯрои нозирон аз тарафи Ҳукумати Ҷумҳурии Тоҷикистон дар ҳайати 13 (сенздаҳ) нафар тасдиқ карда мешавад.

4. Узви шӯрои нозирон метавонад танҳо шахси воқеӣ бошад.

3. РАИСИ ШӯРОИ НОЗИРОН

5. Раиси шӯрои нозирон ташкили фаъолияти шӯрои нозиронро роҳбарӣ мекунад.

6. Раиси шӯрои нозирон ваколатҳои зерин дорад:

- кори шӯрои нозиронро ташкил карда, барои озодона изҳор намудани андешаҳо аз тарафи аъзои шӯрои нозирон ва муҳокимаи озоди масъалаҳои рӯзнома шароит фароҳам меорад;

- ҷаласаҳои шӯрои нозиронро даъват менамояд, рӯзномаи ҷаласаҳоро тасдиқ мекунад, шакли гузаронидани ҷаласаҳои шӯрои нозиронро муайян месозад;

- қабули қарорҳои дахлдорро оид ба масъалаҳои рӯзномаи ҷаласаҳои шӯрои нозирон таъмин менамояд.

7. Дар ҳолати набудани раиси шӯрои нозирон, уҳдадориҳои ӯро муовини раиси шӯрои нозирон иҷро менамояд.

4. ВАКОЛАТҲОИ ШӯРОИ НОЗИРОН

8. Ба ваколатҳои шӯрои нозирон масъалаҳои зерин дохил мешаванд:

- дар асоси пешниҳодҳои Ҷамъияти саҳомии кушодаи "Барқи Тоҷик", Ҷамъияти саҳомии кушодаи "Шабакаҳои интиқоли барқ" ва Ҷамъияти саҳомии кушодаи "Шабакаҳои тақсимоти барқ" ҳар семоҳа пеш аз оғози моҳи чоруми ҳисоботӣ баррасӣ ва тасдиқи нақшаи молиявии истифодаи маблағҳои пулии суратҳисоби махсус (қарори Ҳукумати ҶТ аз 26.10.2023 № 497);

- тасдиқи ҳаҷми пардохтҳои ҳатмӣ, ҳадди ақал ва уҳдадориҳои молиявӣ барои Ҷамъияти саҳомии кушодаи "Барқи Тоҷик", Ҷамъияти саҳомии кушодаи "Шабакаҳои интиқоли барқ" ва Ҷамъияти саҳомии кушодаи "Шабакаҳои тақсимоти барқ" (қарори Ҳукумати ҶТ аз 26.10.2023 № 497);

- ҳамасола пеш аз оғози соли навбатии ҳисоботӣ тасдиқи нақшаи тақсимоти маблағҳо барои Ҷамъияти саҳомии кушодаи "Барқи Тоҷик", Ҷамъияти саҳомии кушодаи "Шабакаҳои интиқоли барқ" ва ҶСК "Шабакаҳои тақсимоти барқ" (қарори Ҳукумати ҶТ аз 26.10.2023 № 497);

- тасдиқи нақшаи молиявии истифодаи маблағҳои пулӣ аз суратҳисоби махсус;

- маъқул донистани шартномаи суратҳисоби махсус байни Ҷамъияти саҳомии кушодаи "Барқи Тоҷик", Ҷамъияти саҳомии кушодаи "Шабакаҳои интиқоли барқ", Ҷамъияти саҳомии кушодаи "Шабакаҳои тақсимоти барқ" ва бонки хизматрасон (қарори Ҳукумати ҶТ аз 26.10.2023 № 497);

- мувофиқасозии даромади талабшаванда барои Ҷамъияти саҳомии кушодаи "Барқи Тоҷик", Ҷамъияти саҳомии кушодаи "Шабакаҳои интиқоли барқ", Ҷамъияти саҳомии кушодаи "Шабакаҳои тақсимоти барқ" (қарори Ҳукумати ҶТ аз 26.10.2023 № 497);

- бекор кардан ва дар ҳолатҳои зарурӣ дар асоси озмун тағйир додан ва муайян намудани бонки нави хизматрасони суратҳисоби махсус;

- муқоиса намудани нишондиҳандаҳои воқеии даромади талабшаванда, пардохтҳои ҳатмӣ ва ҳадди ақал аз суратҳисоби махсус аз тарафи иштирокчиёни шабака гирифташуда;

- қабули қарор оид ба истифодаи бақияи маблағҳо дар суратҳисоби махсус аз рӯи натиҷаҳои ҳар семоҳа;

- таъмини мониторинги доимии гардиши маблағҳои пулӣ (воридот ва интиқол) аз суратҳисоби махсус ва мутобиқати он бо шартҳои Низомнома;

- ваколатдор намудани Вазорати энергетика ва захираҳои оби Ҷумҳурии Тоҷикистон барои мониторинги истифодаи суратҳисоби махсус ва пешниҳоди маълумот ба шӯрои нозирон;

- боздоштани амалиётҳо аз рӯи суратҳисоби махсус;

- шунидан ва баррасӣ намудани ҳисоботи роҳбарони ҷамъиятҳои системаи энергетикии Ҷумҳурии Тоҷикистон оид ба фаъолияти онҳо (аз ҷумла оид ба нишондиҳандаҳои молиявӣ ва техникӣ);

- масъалаҳои дигаре, ки ҳалли онҳо тибқи қонунгузории Ҷумҳурии Тоҷикистон ба ваколати шӯрои нозирон дохил мебошанд.

9. Шӯроҳои нозирони Ҷамъияти саҳомии кушодаи "Барқи Тоҷик", Ҷамъияти саҳомии кушодаи "Шабакаҳои интиқоли барқ" ва ҶСК "Шабакаҳои тақсимоти барқ" уҳдадоранд, ки қарорҳоро оид ба масъалаҳои молиявии худ дар доираи қарорҳои шӯрои нозирон қабул намоянд (қарори Ҳукумати ҶТ аз 26.10.2023 № 497).

5. УҲДАДОРИҲО ВА МАСЪУЛИЯТИ АЪЗОИ ШӯРОИ НОЗИРОН

10. Аъзои шӯрои нозирон барои фаъолияти самараноки тақсимоти маблағҳо аз суратҳисоби махсус масъулият доранд.

11. Аъзои шӯрои нозирон ҳангоми татбиқи ҳуқуқҳои худ ва иҷрои уҳдадориҳои вазифавӣ бояд:

- ҳангоми қабули қарорҳои худ тибқи Низомнома амал карда, ҳуқуқу уҳдадориҳои худро софдилона иҷро намоянд;

- дар маҷлисҳои шӯрои нозирон иштирок намоянд;

- тавзеҳот талаб намоянд ва саволҳои аниқкунанда диҳанд;

- шӯрои нозиронро пешакӣ дар хусуси набудани имконияти иштирок дар маҷлиси шӯрои нозирон огоҳ намуда, сабаби иштирок накардани худро зикр намоянд;

- қоидаву талаботи марбут ба бархӯрди манфиатҳоро риоя намоянд.

6. ҶАЛАСАҲОИ ШӯРОИ НОЗИРОН

12. Ҷаласаҳои шӯрои нозирон аз рӯи зарурат, вале на камтар дар ҳар семоҳа гузаронида мешаванд.

13. Ҷаласаҳои шӯрои нозирон аз тарафи раиси шӯрои нозирон (ё муовини раиси шӯрои нозирон) бо ташаббуси ӯ ё бо дархости узви шӯрои нозирон даъват карда мешаванд.

14. Дархост аз ҷониби узви шӯрои нозирон - ташаббускори даъвати ҷаласа имзо карда мешавад.

15. Дар дархост бояд чунин маълумот зикр карда шавад:

- дар бораи ташаббускори даъвати ҷаласа;

- оид ба мақсади гузаронидани ҷаласа.

16. Раиси шӯрои нозирон дар давоми 10 (даҳ) рӯзи корӣ аз санаи гирифтани дархост бояд ҷаласаи шӯрои нозиронро даъват намояд.

17. Дар ҳолати беасос рад кардан ё имконияти даъвати ҷаласа шӯрои нозиронро надоштани раис, ҷаласа метавонад аз тарафи муовини раиси шӯрои нозирон даъват карда шавад.

18. Огоҳинома дар бораи сана, маҳал ва вақти баргузории ҷаласаи шӯрои нозирон бо зикри рӯзномаи маҷлис ва тартиби шиносшавӣ бо маълумоте, ки барои омодагӣ ба ҷаласа зарур аст, ба ҳар узви шӯрои нозирон ва ташаббускори гузаронидани ҷаласа супорида мешавад.

19. Ҷаласаи якуми шӯрои нозирон набояд дертар аз 10 (даҳ) рӯзи корӣ баъди таъсиси шӯрои нозирон гузаронида шавад. Барои гузаронидани ҷаласаи шӯрои нозирон котиби шӯрои нозирон бояд маълумоти пурра омода намоянд.

20. Иттилооти зарурӣ барои гузаронидани ҷаласаи шӯрои нозирон бояд дорои ҳадди ақал аз чунин маълумот бошад:

- нишондиҳандаҳои асосии фаъолияти Ҷамъияти саҳомии кушодаи "Барқи Тоҷик", Ҷамъияти саҳомии кушодаи "Шабакаҳои интиқоли барқ" ва Ҷамъияти саҳомии кушодаи "Шабакаҳои тақсимоти барқ" (қарори Ҳукумати ҶТ аз 26.10.2023 № 497);

- маълумоти пурра оид ба иҷрои нақшаи молиявии истифодаи маблағҳои пулии суратҳисоби махсус;

- маълумоти пурраи молиявӣ оид ба суратҳисоби махсус;

- пешниҳодҳо барои тасдиқи нақшаи молиявии истифодаи маблағҳои пулии суратҳисоби махсус дар давраи навбатӣ;

- протокол ва тавсияҳои ҷаласаи пешинаи шӯрои нозирон.

21. Шумораи зарурии иштироккунандагон барои гузаронидани ҷаласаи шӯрои нозирон (кворум) бояд на камтар аз нисфи аъзои шӯрои нозиронро ташкил диҳад.

22. Аз тарафи узви шӯрои нозирон ба шахси дигар, аз ҷумла ба узви дигари шӯрои нозирон додани ҳуқуқи овоз манъ аст.

23. Ҳангоми ҳалли масъалаҳо дар ҷаласаи шӯрои нозирон ҳар узви шӯрои нозирон танҳо як овоз дорад. Дар ҳолати баробарии овозҳо зимни гузаронидани овоздиҳӣ, овози раисикунандаи ҷаласа ҳалкунанда мебошад.

24. Қарорҳои шӯрои нозирон, ба истиснои ҳолатҳои пешбининамудаи қонунгузории Ҷумҳурии Тоҷикистон ва Низомнома, бо аксари овозҳои аъзои шӯрои нозирон, ки дар овоздиҳӣ, аз ҷумла ҳангоми овоздиҳии ғоибона иштирок мекунанд, қабул карда мешаванд.

25. Қарорҳои шӯрои нозирон метавонанд дар ҷаласаҳо дар шакли иштироки якҷоя бо дарназардошти мавқеъ ва таклифҳои узви ҳузурнадоштаи шӯрои нозирон, ки дар шакли хаттӣ пешниҳод шудаанд, ҳангоми муайян намудани кворум ва натиҷаҳои овоздиҳӣ, инчунин бо роҳи гузаронидани овоздиҳии ғоибона қабул карда шаванд.

26. Қарор дар бораи гузаронидани ҷаласаи шӯрои нозирон дар шакли овоздиҳии ғоибона аз ҷониби раиси шӯрои нозирон ё муовини раиси шӯрои нозирон қабул карда мешвад.

7. ПРОТОКОЛИ ҶАЛАСАҲОИ ШӯРОИ НОЗИРОН

27. Дар ҷаласаҳои шӯрои нозирон протокол тартиб дода мешавад.

28. Протоколи ҷаласаи шӯрои нозиронро котиби шӯрои нозирон омода менамояд ва он на дертар аз 5 (панҷ) рӯзи корӣ баъди гузаронидани ҷаласа ба имзо расонида мешавад.

29. Протоколи ҷаласа бояд чунин маълумотро дар бар гирад:

- маҳал ва вақти гузаронидани он;

- рӯйхати шахсони дар ҷаласа иштирокдошта;

- рӯзномаи ҷаласа;

- масъалаҳои ба овоздиҳӣ гузошташуда ва натиҷаҳои овоздиҳӣ;

- қарорҳои қабулшуда.

30. Ба протокол ҳамаи маводи дахлдор оид ба масъалаҳои рӯзномаи ҷаласа ва ҳуҷҷатҳои тасдиқнамудаи шӯрои нозирон замима мегарданд.

31. Протоколи маҷлиси шӯрои нозирон дар ҳолати якдилона қабул гардидани қарорҳо аз тарафи раискунандаи маҷлис ва котиб ва дар ҳолати дигар дар мувофиқа бо қисми зиёди аъзои шӯро ба имзо расонида мешавад.

32. Дар сурати аз тарафи шӯрои нозирон тариқи овоздиҳии ғоибона қабул намудани қарорҳо, ба протокол варақаи пурсиш барои овоздиҳӣ, ки аз ҷониби узви шӯрои нозирон имзо шудааст, замима карда мешавад.

33. Нусхаҳои аслии протоколҳои ҷаласаҳои шӯрои нозирон аз ҷониби котиби шӯрои нозирон нигоҳдорӣ карда мешаванд.

8. МУҚАРРАРОТИ ХОТИМАВӢ

34. Дар кори шӯрои нозирон намояндагони вазорату идораҳо ва бахши хусусӣ бо даъватнома иштирок мекунанд.

35. Шӯрои нозирон дар назди Хукумати Ҷумҳурии Тоҷикистон ҳисоботдиҳанда буда, дар як сол ду маротиба ба Ҳукумати Ҷумҳурии Тоҷикистон оид ба натиҷаҳои фаъолияти шӯро ҳисобот пешниҳод менамояд.

Ҳайати Шӯрои нозирон оид ба назорати амалисозӣ ва идоракунии ҷараёнҳои молиявии суратҳисоби махсус барои идоракунии воситаҳои молиявие, ки аз фурӯши неруи барқ дар дохили шабакаи энергетикии Ҷумҳурии Тоҷикистон ворид мегарданд:

- Сарвазири Ҷумҳурии Тоҷикистон - раиси шӯрои нозирон;

- муовини якуми Сарвазири Ҷумҳурии Тоҷикистон - муовини раиси шӯрои нозирон;

Аъзои шӯрои нозирон:

- муовини Сарвазири Ҷумҳурии Тоҷикистон (сарпарасти соҳа);

- муовини Роҳбари Дастгоҳи иҷроияи Президенти Ҷумҳурии Тоҷикистон;

- ёрдамчии Президенти Ҷумҳурии Тоҷикистон оид ба масъалаҳои иқтисодӣ;

- вазири энергетика ва захираҳои оби Ҷумҳурии Тоҷикистон;

- вазири адлияи Ҷумҳурии Тоҷикистон;

- вазири молияи Ҷумҳурии Тоҷикистон;

- раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон;

- сардори раёсати молияи Дастгоҳи иҷроияи Президенти Ҷумҳурии Тоҷикистон;

- раиси Ҷамъияти саҳомии кушодаи "Барқи Тоҷик" (қарори Ҳукумати ҶТ аз 26.10.2023 № 497);

- директори генералии Ҷамъияти саҳомии кушодаи "Шабакаҳои интиқоли барқ";

- директори генералии Ҷамъияти саҳомии кушодаи "Шабакаҳои тақсимоти барқ";

- сардори раёсати рушди инфрасохтори Дастгоҳи иҷроияи Президенти Ҷумҳурии Тоҷикистон (котиби шӯро).