Низомномаи шӯрои нозирони корхонаи воҳиди давлатии "Хоҷагии манзилию коммуналӣ"

1. МУҚАРРАРОТИ УМУМӢ

1. Низомномаи шӯрои нозирони корхонаи воҳиди давлатии "Хоҷагии манзилию коммуналӣ" (минбаъд - низомнома) мутобиқи моддаи 11 Қонуни Ҷумҳурии Тоҷикистон "Дар бораи корхонаҳои давлатӣ" таҳия шудааст.

2. Низомнома мақом, тартиби даъват, ташкил ва баргузории маҷлисҳои шӯрои нозирони корхонаи воҳиди давлатии "Хоҷагии манзилию коммуналӣ" (минбаъд - корхона), ҳуқуқу уҳдадориҳои аъзои шӯрои нозирони корхона, ҳамкорӣ бо дигар мақомоти идоракунии корхона, инчунин тартиби пеш аз муҳлат қатъ намудани ваколатҳои аъзои шӯрои нозирони корхонаро муайян менамояд.

3. Шӯрои нозирони корхона (минбаъд - шӯрои нозирон) мақоми идоракунии корхона буда, роҳбарии умумии фаъолияти корхонаро амалӣ менамояд ва иҷрои қарорҳои муассиси корхона ва мақоми ваколатдори онро тибқи талаботи қонунгузории Ҷумҳурии Тоҷикистон таъмин мекунад.

4. Шӯрои нозирон бо мақсади ҳифзи манфиатҳои давлат, ҷорӣ намудани идоракунӣ ва таъмини фаъолияти самараноки корхона таъсис дода шудааст.

5. Шӯрои нозирон дар фаъолияти худ қонунгузории Ҷумҳурии Тоҷикистон ва низомномаи мазкурро ба роҳбарӣ мегирад.

6. Корхона дар доираи салоҳияти худ пешбурди сиёсати ягонаи истифода, рушд ва ҳамоҳангсозии соҳаи хоҷагии манзилию коммуналиро амалӣ менамояд.

2. ТАШКИЛИ ШӯРОИ НОЗИРОН

7. Шумораи аъзои шӯрои нозирони корхона дар ҳайати на камтар аз 5 (панҷ) нафар тасдиқ карда мешавад.

8. Бо қарори муассиси корхона ваколатҳои аъзои шӯрои нозирон метавонад пеш аз муҳлат қатъ карда шавад.

9. Аъзои шӯрои нозирон метавонад танҳо шахси воқеӣ бошад.

10. Роҳбар ва ё корманди корхона наметавонад ҳамзамон аъзои шӯрои нозирони ҳамин корхона бошад.

11. Шахсоне, ки дар ҳайати шӯрои нозирон тасдиқ шудаанд, метавонанд ба таври номаҳдуд якчанд маротиба ба ҳайати шӯрои нозирон интихоб шаванд.

12. Шахсе, ки дар содир намудани ҷиноятҳои иқтисодию молиявӣ ё ҷиноятҳои муқобили ҳокимияти давлатӣ, манфиатҳои хизмати давлатӣ ва хизмат дар мақомоти идоракунии маҳаллӣ гунаҳкор дониста шудааст ё нисбати вай ҷазоҳои маъмурӣ барои ҳуқуқвайронкунӣ дар соҳаи фаъолияти соҳибкорӣ ё дар соҳаи молия, андозу хироҷ ва бозори коғазҳои қиматнок татбиқ шудаанд, аъзои шӯрои нозирон тасдиқ шуда наметавонад.

13. Дар сурати ба тариқи яктарафа даст кашидан аз ваколатҳо, аъзои шӯрои нозирон мутобиқи қонунгузории амалкунанда масъулият бар дӯш дорад. Аъзои шӯрои нозирон доир ба пеш аз муҳлат даст кашиданаш аз ваколатҳои аъзои шӯрои нозирон бояд ба таври хаттӣ раиси шӯрои нозиронро огоҳ намояд.

3. РАИСИ ШӯРОИ НОЗИРОН

14. Раиси шӯрои нозирон аз ҷониби Ҳукумати Ҷумҳурии Тоҷикистон таъин гардида, ба фаъолияти шӯрои нозирон роҳбарӣ мекунад.

15. Шахсе, ки вазифаи директори генералии корхонаро иҷро мекунад, ҳамзамон раиси шӯрои нозирон буда наметавонад.

16. Муовини раиси шӯрои нозирон тариқи овоздиҳии пинҳонии аъзои шӯрои нозирон бо аксарияти овози шумораи умумии аъзои шӯрои нозирон интихоб мегардад.

17. Дар ҳолати набудани раиси шӯрои нозирон вазифаҳои ӯро муовини раиси шӯрои нозирон иҷро мекунад.

18. Раиси шӯрои нозирон:

- кори шӯрои нозиронро ташкил карда, барои изҳори озодонаи андешаҳо аз тарафи аъзои шӯрои нозирон ва муҳокимаи озоди масъалаҳои рӯзнома шароит фароҳам меорад;

- маҷлисҳои шӯрои нозиронро даъват менамояд, рӯзномаи маҷлисҳоро тасдиқ мекунад, шакли гузаронидани маҷлисҳои шӯрои нозиронро муайян месозад ва дар онҳо раисӣ мекунад;

- дар маҷлисҳо пешбурди протоколҳоро ташкил менамояд ва онҳоро ба имзо мерасонад;

- аз номи корхона шартномаи меҳнатиро бо аъзои мақоми иҷроияи корхона ва муовинонаш имзо мекунад;

- қабули қарорҳои дахлдорро оид ба масъалаҳои рӯзномаи маҷлисҳои шӯрои нозирон таъмин менамояд;

- на дертар аз 10 (даҳ) рӯз ба аъзои шӯрои нозирон маълумоти заруриро барои баррасӣ дар маҷлисҳо пешниҳод менамояд;

- бо дигар мақомот ва шахсони мансабдори корхона ҳамкории доимиро ба роҳ мемонад;

- ҳисоботи баҳодиҳии фаъолияти солонаи шӯрои нозиронро барои дохил намудани он ба ҳисоботи солонаи корхона таҳия менамояд.

19. Дар ҳолати набудани раиси шӯрои нозирон ва муовини раиси шӯрои нозирон, вазифаҳои раисиро мувофиқи қарори шӯрои нозирон, ки бо аксари овозҳои аъзои дар маҷлис иштирокдоштаи он қабул мегардад, яке аз аъзои шӯрои нозирон иҷро менамояд.

4. САЛОҲИЯТИ ШӯРОИ НОЗИРОН

20. Шӯрои нозирон мақоми идоракунӣ буда, роҳбарии умумии фаъолияти корхонаро амалӣ менамояд, ба истиснои ҳалли масъалаҳое, ки тибқи Қонуни Ҷумҳурии Тоҷикистон "Дар бораи корхонаҳои давлатӣ" ба салоҳияти муассиси корхона ва мақомоти ваколатдори он вогузор шудаанд.

21. Ба салоҳияти шӯрои нозирон масъалаҳои зерин дохил мешаванд:

- муайян намудани самтҳои афзалиятноки фаъолияти корхона;

- баррасии масъалаҳои рушди соҳаи хоҷагии манзилию коммуналӣ дар ҷумҳурӣ;

- баррасӣ намудани пешниҳодҳо вобаста ба беҳтар намудани хизматрасониҳои манзилию коммуналӣ;

- ташкили корҳо ҷиҳати баланд бардоштани сатҳи истифодаи иншооти ободонӣ, фонди манзил ва системаи таъминот бо об;

- тасдиқи буҷети солона, хароҷоти амалиётию ғайриамалиётӣ ва нақшаи фаъолияти молиявӣ-хоҷагидории корхона дар мувофиқа бо мақомоти ваколатдори давлатӣ дар соҳаи молия;

- маъқул донистани аҳдҳои калоне, ки 30 фоиз ё бештари арзиши тавозунии дороии корхонаро ташкил дода, мутобиқи маълумоти муҳосибавии он дар санаи охирини ҳисоботӣ муайян гардидаанд, ба истиснои аҳдҳо нисбати молу мулке, ки розигии муассисро талаб мекунанд;

- тасдиқи ҳисоботи солона ва ҳисоботи солонаи муҳосибавии корхона;

- тасдиқи аудитори корхона ва муайян намудани андозаи пардохти хизматрасонии он;

- назорати татбиқи стандартҳои байналмилалии ҳисоботи молиявӣ дар корхона;

- назорати ҳамасола гузаштани корхона аз аудити ҳатмии беруна ва пешниҳоди хулосаи аудит ба муассис ва вазорату идораҳои соҳавӣ;

- ҳар нимсола баррасӣ ва арзёбии ҳисоботи роҳбари корхона;

- дар мувофиқа бо муассис ё мақомоти ваколатдори он тасдиқ намудани тақсимоти фоидае, ки баъд аз интиқоли пардохти ғайриандозӣ ба буҷет дар ихтиёри корхона боқӣ мондааст;

- муайян намудани шартҳои шартномаи меҳнатӣ, ҳаҷми маоши вазифавӣ, шартҳои пардохти музди меҳнат ва ҳавасмандгардонии кормандони мақоми иҷроияи корхона;

- муайян намудани маълумоти ба корхона ё фаъолияти он дахлдошта, ки дорои сирри хизматӣ, тиҷоратӣ ё дигар сирри бо қонунгузорӣ ҳифзшаванда мебошад, инчунин муайян намудани тартиби кушодани он ба шахсони сеюм аз ҷониби корхона;

- таъсиси филиалҳо ва кушодани намояндагиҳои корхона;

- тасдиқи ҳуҷҷатҳои дохилии корхона, ки тартиби ташкил ва истифодаи фондҳои корхонаро муайян менамоянд;

- муайян намудани сиёсати қарзии корхона дар бобати гирифтани қарзҳо, бастани шартномаҳои қарзӣ, барориши вомбаргҳо, додани замонатҳо, ҳамаи намудҳои кафолатҳо ва аккредитивҳо;

- қабули қарор дар бораи иштироки корхона дар фаъолияти дигар ташкилотҳои тиҷоратӣ ва ғайритиҷоратӣ, тағйири ҳиссаи иштирок ва қатъ намудани иштироки корхона дар фаъолияти ташкилотҳои дигар;

- муайян намудани ҳамкории корхона бо ташкилотҳое, ки корхона дар фаъолияти онҳо иштирок менамояд;

- пешакӣ маъқул донистани шартномаи коллективӣ ва созишномаҳое, ки аз тарафи корхона дар доираи танзими муносибатҳои иҷтимоию меҳнатӣ баста мешаванд;

- муайян намудани сиёсати харид дар корхона ва қабули қарорҳо мутобиқи ҳуҷҷатҳои дар корхона тасдиқшуда, ки фаъолияти хариди корхонаро ба танзим медароранд;

- манзур намудани пешниҳод дар бораи таъин ва қатъ намудани ваколатҳои мақоми иҷроияи корхона;

- қабули қарор дар бораи пешбарии номзадии мақоми иҷроия ва кормандони корхона барои гирифтани мукофотҳои давлатӣ;

- қабули қарор дар бораи истифодаи фонди захиравӣ ва фондҳои дигари корхона;

- таъин ва озод намудани котиб;

- тасдиқи низомномаи котиби шӯрои нозирон ва ворид намудани тағйиру иловаҳо ба он.

22. Масъалаҳое, ки ба салоҳияти шӯрои нозирон тааллуқ доранд, барои ҳал намудан ба мақоми иҷроияи корхона супорида шуда наметавонанд.

5. МАҶЛИСҲОИ ШӯРОИ НОЗИРОН

23. Маҷлисҳои шӯрои нозирон аз рӯи зарурат, вале на камтар аз ду маротиба дар як сол гузаронида мешаванд.

24. Маҷлисҳои шӯрои нозирон аз тарафи раиси шӯрои нозирон (ё муовини раиси шӯрои нозирон) бо ташаббуси ӯ ё бо дархости аъзои шӯрои нозирон, аудитори корхона ва мақоми иҷроияи корхона даъват карда мешаванд.

25. Омода ва баргузор намудани маҷлисҳои шӯрои нозирон аз ҷониби котиби шӯрои нозирони корхона (минбаъд - котиб), ки шахси мансабдори корхона мебошад, таъмин карда мешавад.

26. Котиб дар асоси низомномаи шӯрои нозирон, низомнома дар бораи котиби шӯрои нозирони корхонаи давлатӣ ва шартномаи байни котиб ва корхона басташуда фаъолият менамояд.

27. Таклифи даъвати маҷлиси шӯрои нозирон дар шакли хаттӣ бо роҳи ирсоли мактуби фармоишӣ ба суроғаи корхона ё супоридани чунин дархост ба котиб пешниҳод мегардад.

28. Санаи пешниҳоди дархост дар хусуси даъвати маҷлиси ғайринавбатии шӯрои нозирон аз рӯи муҳри почта ё санаи супоридани он ба котиб муайян карда мешавад.

29. Дархост аз ҷониби аъзои шӯрои нозиронташаббускори даъвати маҷлис, мақоми иҷроияи корхона ё аудитори корхона, ки даъвати маҷлисро талаб менамоянд, имзо карда мешавад.

30. Дар дархост бояд чунин маълумот зикр карда шавад:

- дар бораи ташаббускори даъвати маҷлис;

- оид ба мақсади гузаронидани маҷлис;

- оид ба рӯзномаи маҷлис.

31. Раиси шӯрои нозирон дар давоми 10 (даҳ) рӯзи тақвимӣ аз санаи пешниҳоди дархост бояд маҷлиси шӯрои нозиронро даъват намояд.

32. Дар ҳолати бе асос рад кардан ё имконияти даъвати маҷлиси шӯрои нозиронро надоштани раис, маҷлис метавонад аз тарафи ҳар аъзои шӯрои нозирон даъват карда шавад.

33. Огоҳинома дар бораи рӯз, маҳал ва вақти гузаронидани маҷлиси шӯрои нозирон бо зикри рӯзномаи маҷлис ва тартиби шиносшавӣ бо маълумоте, ки барои омодагӣ ба маҷлис зарур аст, бо мактуби фармоишӣ ирсол мегардад ё ба ҳар аъзои шӯрои нозирон ва ташаббускори гузаронидани маҷлис супорида мешавад, агар маҷлис бо дархости шахсони дар банди 24 низомномаи мазкур номбаршуда на дертар аз 10 (даҳ) рӯзи тақвимӣ то санаи гузаронидани маҷлис баргузор шавад. Санаи ирсоли огоҳинома аз рӯи муҳри почта ё санаи супоридани огоҳинома муайян карда мешавад.

34. Маҷлиси якуми шӯрои нозирон бояд дар давоми на дертар аз 1 (як) моҳи баъди ташкили шӯрои нозирон гузаронида шавад.

35. Ба рӯзномаи маҷлиси якуми шӯрои нозирон ҳатман бояд масъалаҳои зерин дохил карда шаванд:

- интихоби муовини раиси шӯрои нозирон;

- интихоби котиб;

- муайян намудани самтҳои афзалиятноки фаъолияти корхона.

36. Барои гузаронидани маҷлиси шӯрои нозирон котиб ва мақоми иҷроияи корхона бояд маълумоти пурра омода намоянд.

37. Иттилооти зарурӣ барои гузаронидани маҷлиси шӯрои нозирон бояд дорои чунин маълумот бошад:

- нишондиҳандаҳои асосии фаъолияти корхона, ки аз тарафи мақоми иҷроияи корхона таҳия ва тасдиқ шудаанд;

- иттилооти пурраи молиявӣ;

- протокол ва тавсияҳои маҷлиси қаблангузаштаи шӯрои нозирон;

- маълумот дар бораи самаранокии истеҳсолот дар корхона.

38. Шумораи зарурии иштирокчиён (кворум) барои гузаронидани маҷлиси шӯрои нозирон бояд на камтар аз нисфи аъзои шӯрои нозиронро ташкил диҳад.

39. Аз тарафи аъзои шӯрои нозирон ба шахси дигар, аз ҷумла ба аъзои дигари шӯрои нозирон додани ҳуқуқи овоз манъ аст.

40. Ҳангоми ҳалли масъалаҳо дар маҷлиси шӯрои нозирон ҳар аъзои шӯрои нозирон танҳо як овоз дорад. Дар ҳолати баробар будани овозҳо зимни гузаронидани овоздиҳӣ, овози раисикунандаи маҷлис ҳалкунанда мебошад.

41. Қарорҳои шӯрои нозирон бо аксари овозҳои аъзои шӯрои нозирон, ки дар овоздиҳӣ, аз ҷумла ҳангоми овоздиҳии ғоибона иштирок мекунанд, қабул карда мешаванд.

42. Қарорҳои шӯрои нозирон метавонанд дар маҷлисҳо дар шакли иштироки якҷоя ё иштироки якҷоя бо дарназардошти андешаҳои аъзои ҳузурнадоштаи шӯрои нозирон, ки дар шакли хаттӣ пешниҳод намудаанд, ҳангоми муайян намудани кворум ва натиҷаҳои овоздиҳӣ, инчунин бо роҳи гузаронидани овоздиҳии ғоибона қабул карда шаванд.

43. Огоҳкунӣ дар бораи гузаронидани маҷлиси шӯрои нозирон бо тартиби пешбининамудаи банди 33 низомномаи мазкур сурат мегирад.

44. Огоҳинома дар бораи гузаронидани маҷлис аз ду қисм иборат аст:

1) дар қисми якуми огоҳинома бояд чунин маълумот зикр карда шавад:

- номи пурраи расмии корхона ва маҳалли ҷойгиршавии он;

- сана, маҳал ва вақти гузаронидани маҷлис;

- рӯзномаи маҷлис;

- маълумот оид ба тартиби шиносшавӣ бо мавод ва маълумоте, ки барои омодагӣ ба маҷлис зарур мебошад ё рӯйхати маводи ба огоҳинома замимашаванда.

2) қисми дуюми огоҳинома бояд чунин маълумотро дар бар гирад:

- суроғаи почтавие, ки ба он андешаи хаттиро фиристодан мумкин аст;

- санаи анҷоми қабули андешаҳо, ки дар шакли хаттӣ баён шудаанд;

- мазмуни қарорҳо аз рӯи ҳар масъалаи рӯзномаи маҷлис;

- намудҳои овоздиҳӣ оид ба ҳар масъала: "тарафдор", "зид", "бетараф";

- ҷой барои баёни андешаи хаттии аъзои шӯрои нозирон оид ба ҳар масъалаи рӯзномаи маҷлис;

- ҷой барои имзои аъзои шӯрои нозирон бо зикри ҳатмӣ будани ин имзо.

45. Қисми дуюми огоҳинома мумкин аст бо мактуби фармоишӣ ё тавассути номарасон ба шӯрои нозирон ирсол карда шавад.

46. Қарор дар бораи гузаронидани маҷлиси шӯрои нозирон дар шакли овоздиҳии ғоибона аз ҷониби раиси шӯрои нозирон ё ташаббускорони гузаронидани маҷлиси ғайринавбатӣ қабул мегардад.

47. Овоздиҳии ғоибона оид ба масъалаҳои зерин гузаронида намешавад:

- тасдиқи самтҳои афзалиятноки фаъолият ва нақшаи молиявию хоҷагии корхона;

- тасдиқи ҳисоботи солонаи корхона;

- интихоб ва аз нав интихоб кардани муовини раиси шӯрои нозирон.

48. Бюллетенҳо барои овоздиҳии ғоибона аз ҷониби раиси шӯрои нозирон имзо карда мешавад. Иттилооти зарурӣ барои омодагӣ ба маҷлис бо мактуби фармоишӣ ирсол мегардад ё шахсан ба аъзои шӯрои нозирон бо гирифтани имзои онҳо на дертар аз 10 (даҳ) рӯзи тақвимӣ то санаи баргузоршавии маҷлис супорида мешавад.

49. Санаи аз тарафи аъзои шӯрои нозирон гирифтани бюллетен аз рӯи муҳри почта ё санаи супоридани ин бюллетен муайян карда мешавад.

50. Дар бюллетен бояд чунин маълумот нишон дода шавад:

- номи пурраи расмии корхона ва маҳалли воқеъгардидаи он;

- мазмуни масъалаҳои ба овоздиҳӣ гузошташуда ва қарорҳо аз рӯи ҳар як масъала;

- намудҳои овоздиҳӣ оид ба ҳар масъала: "тарафдор", "зид", "бетараф";

- маълумот оид ба тартиби шиносшавӣ бо мавод ва иттилооте, ки барои омодагӣ ба маҷлис зарур мебошанд ё рӯйхати маводи ба бюллетен замимашаванда;

- суроғаи почтавие, ки бюллетенҳои пуркардашуда бояд ба он ирсол гарданд;

- санаи анҷоми қабули бюллетенҳо.

51. Аъзои шӯрои нозирон, ки бюллетенҳояшон на дертар аз санаи муқарраршудаи анҷоми қабули бюллетенҳо гирифта шудаанд, дар овоздиҳӣ иштирокнамуда шуморида мешаванд.

52. Ҳисобот оид ба натиҷаҳои овоздиҳӣ ба аъзои шӯрои нозирон дар муҳлати на дертар аз рӯзи таҳияи протокол оид ба натиҷаҳои овоздиҳӣ бо мактуби фармоишӣ ирсол мегардад ё шахсан ба аъзои шӯрои нозирон бо гирифтани имзо супорида мешавад.

53. Андешаҳои хаттие, ки ҳангоми муайян намудани кворум ва натиҷаҳои овоздиҳӣ ба назар гирифта мешаванд, дар мавриди қабули қарорҳо дар бораи маъқул донистани аҳдҳои калон ва аҳдҳое, ки анҷом додани онҳо боманфиатанд, ба ҳисоб гирифта намешаванд.

6. ПРОТОКОЛИ МАҶЛИСҲОИ ШӯРОИ НОЗИРОН

54. Дар маҷлисҳои шӯрои нозирон протокол бурда мешавад. Протоколи маҷлиси шӯрои нозиронро котиб пеш мебарад ва он на дертар аз 3 (се) рӯзи баъди гузаронидани маҷлис тартиб дода мешавад. Ба протокол ҳамаи маводи дахлдор оид ба масъалаҳои рӯзномаи маҷлис ва ҳуҷҷатҳои тасдиқнамудаи шӯрои нозирон замима мегарданд ва нусхаи протокол аз ҷониби корхона на дертар аз 5 рӯзи баргузории маҷлис бо маълумоти дахлдор ба Кумитаи давлатии сармоягузорӣ ва идораи амволи давлатии Ҷумҳурии Тоҷикистон, Вазорати молияи Ҷумҳурии Тоҷикистон ва мақомоти соҳавии корхона тариқи мактуби расмӣ ирсол карда мешавад.

55. Дар сурати аз тарафи шӯрои нозирон тариқи овоздиҳии ғоибона қабул намудани қарорҳо, ба протокол варақаҳои пурсишнома барои овоздиҳӣ, ки аз ҷониби аъзои шӯрои нозирон имзо шудаанд, замима карда мешаванд.

56. Дар протоколи маҷлиси шӯрои нозирон маълумоти зерин нишон дода мешавад:

- маҳал ва вақти гузаронидани маҷлис;

- руйхати шахсони дар маҷлис иштирокнамуда;

- рӯзномаи маҷлис;

- масъалаҳои ба овоздиҳӣ гузошташуда ва натиҷаҳои овоздиҳӣ;

- қарорҳои қабулшуда.

57. Протоколи маҷлиси шӯрои нозирони корхона аз тарафи раисикунандаи маҷлис ва котиб имзо карда мешавад.

58. Корхона протоколҳои маҷлисҳои шӯрои нозиронро ба аудитори корхона тибқи дархост пешниҳод менамояд.

59. Корхона протоколҳои маҷлисҳои шӯрои нозиронро дар ҷойи воқеъгаштаи мақоми иҷроияи он нигоҳ медорад.

7. ВАЗИФАҲО ВА МАСЪУЛИЯТИ АЪЗОИ ШӯРОИ НОЗИРОН

60. Аъзои шӯрои нозирон ҳангоми татбиқи ҳуқуқҳои худ ва иҷрои уҳдадориҳо бояд ба манфиати корхона ва давлат амал кунанд, ҳуқуқу уҳдадориҳои худро нисбат ба корхона софдилона татбиқ намоянд.

61. Аъзои шӯрои нозирон барои фаъолияти самараноки корхона масъулият доранд.

62. Аъзои шӯрои нозирон, ки зидди қарори ба корхона ва муассиси он зарароварда овоз додаанд, ҷавобгар нестанд.

63. Аъзои шӯрои нозирон ҳангоми татбиқи ҳуқуқҳои худ ва иҷрои уҳдадориҳо бояд:

- ҳамаи қарорҳои худро софдилона ба манфиати корхона қабул кунанд;

- дар маҷлисҳои шӯрои нозирон иштирок намоянд;

- тавзеҳот талаб намоянд ва саволҳои аниқкунанда диҳанд;

- пешакӣ шӯрои нозиронро дар хусуси набудани имконияти иштирок дар маҷлиси шӯрои нозирон хаттӣ огоҳ намуда, дар он сабаби иштирок карда натавонистани худро зикр намояд;

- аз шахсони воқеӣ ё ҳуқуқӣ туҳфаҳо, хизматҳо ё афзалиятҳоеро, ки ҳамчун подош барои қарорҳо ё амалҳои аз тарафи аъзои шӯрои нозирон дар доираи ваколатҳои хизматии вай қабулшуда ё иҷрошуда дониста мешаванд, ба ғайр аз нишонаҳои рамзии ҳусни таваҷҷуҳ мутобиқи қоидаҳои пазируфташудаи одобу эҳтиром ё туҳфаҳои хотиравӣ ҳангоми гузаронидани чорабиниҳои расмӣ қабул накунанд;

- иттилооти махфӣ, инсайдерӣ ва дигар иттилооти хизматиро, ки ба аъзои шӯрои нозирон ҳангоми фаъолият дар шӯро маълум гаштааст, ба шахсони ба чунин иттилоот дастрасинадошта ифшо нанамоянд, инчунин онҳоро ҳам дар давраи иҷрои вазифаҳои аъзои шӯрои нозирон ва ҳам дар муддати 5 (панҷ) соли баъди анҷоми ваколатҳои аъзои шӯрои нозирон ба манфиати худ ё манфиати шахсони сеюм истифода набаранд;

- ҳамаи қоидаҳои дар ҳуҷҷатҳои дохилии корхона пешбинишударо вобаста ба таъмини амният ва ҳифзи иттилооти махфии корхона риоя намоянд;

- сари вақт ба шӯрои нозирон дар бораи фаъолият ва вазъи молиявии корхона маълумоти пурра ва дақиқ пешниҳод намоянд.

64. Шӯрои нозирон дар назди муассиси корхона ва мақоми ваколатдори он ҳисоботдиҳанда буда, ҳамасола ба муассиси корхона ва мақоми ваколатдори он аз рӯи натиҷаҳои фаъолияти солонаи корхона ҳисобот пешниҳод менамояд.

Ҳайати Шӯрои нозирони Корхонаи воҳиди давлатии "Хоҷагии манзилию коммуналӣ"

Раиси Шӯрои нозирон:

1. Муовини Сарвазири Ҷумҳурии Тоҷикистон (сарпарасти соҳа)

Аъзои Шӯрои нозирон:

2. Муовини Роҳбари Дастгоҳи иҷроияи Президенти Ҷумҳурии Тоҷикистон

3. Муовини вазири адлияи Ҷумҳурии Тоҷикистон

4. Муовини вазири молияи Ҷумҳурии Тоҷикистон

5. Муовини вазири рушди иқтисод ва савдои Ҷумҳурии Тоҷикистон

6. Муовини раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон

7. Муовини раиси Кумитаи андози назди Ҳукумати Ҷумҳурии Тоҷикистон

8. Муовини сардори раёсати рушди инфрасохтори Дастгоҳи иҷроияи Президенти Ҷумҳурии Тоҷикистон.