Тартиби пешбурди Феҳристи давлатии субъектҳои хизматрасонии сайёҳии Ҷумҳурии Тоҷикистон

1. МУҚАРРАРОТИ УМУМӢ

1. Тартиби пешбурди Феҳристи давлатии субъектҳои хизматрасонии сайёҳӣ (минбаъд - Тартиб) раванди пешбурд ва воридсозии иттилоот ба Феҳристи давлатии субъектҳои хизматрасонии сайёҳии Ҷумҳурии Тоҷикистон (минъбад - Феҳрист) ва хориҷ намудани иттилоот аз онро муайян намуда, барои танзими низоми хизматрасонӣ дар соҳаи сайёҳӣ нигаронида мешавад.

2. Мақоми ваколатдори давлатӣ дар соҳаи сайёҳӣ оид ба пешбурди Феҳристи давлатии субъектҳои хизматрасонии сайёҳӣ Кумитаи рушди сайёҳии назди Ҳукумати Ҷумҳурии Тоҷикистон (минбаъд - мақоми ваколатдори давлатӣ дар соҳаи сайёҳӣ) мебошад.

3. Ба Феҳрист шахсони воқеӣ, ҳуқуқӣ ва соҳибкорони инфиродие, ки бо тартиби муқаррарнамудаи қонунгузории Ҷумҳурии Тоҷикистон дар дохили мамлакат ба хизматрасонии сайёҳӣ машғул мебошанд, дохил карда мешаванд.

2. ТАРТИБИ ПЕШБУРД ВА ВОРИДСОЗИИ ИТТИЛООТ БА ФЕҲРИСТ

4. Феҳрист дар шакли чопӣ ва электронӣ мутобиқи шакли замимагардида пеш бурда мешавад (замима мегардад).

5. Дар ҳолати номутобиқатии иттилооти чопӣ бо электронӣ, шакли чопии он афзалият дорад.

6. Ворид намудани субъекти хизматрасонии сайёҳӣ ба Феҳрист дар асоси аризаи пешниҳоднамудаи он ва қабули қарор аз ҷониби мақомоти ваколатдори давлатӣ дар соҳаи сайёҳӣ ба амал бароварда мешавад.

7. Феҳрист дорои иттилоот дар бораи субъектҳои хизматрасонии сайёҳӣ мебошад. Иттилоот дар бораи субъектҳои хизматрасонии сайёҳӣ аз инҳо иборат аст:

1) рақами тартибӣ;

2) номи пурраи субъекти хизматрасонии сайёҳӣ;

3) рақами мушаххаси андозсупоранда

4) суроғаи маҳалли ҷойгиршавии субъекти хизматрасонии сайёҳӣ;

5) рақами иҷозатнома барои фаъолияти сайёҳӣ;

6) муҳлати амали иҷозатнома барои фаъолияти сайёҳӣ (оғоз, анҷом);

7) шаҳодатнома дар бораи бақайдгирӣ дар мақомоти андоз;

8) иқтибос аз мақомоти андоз;

9) дастовардҳои касбӣ ва мукофотҳо дар соҳаи сайёҳӣ;

10) санаи ворид намудани субъекти хизматрасонии сайёҳӣ ба Феҳрист.

8. Мақоми ваколатдори давлатӣ дар соҳаи сайёҳӣ маълумоти пешниҳодгардидаро баррасӣ намуда, дар сурати ҷавобгӯ будан ё набудан ба Тартиби мазкур, дар муҳлати на дертар аз 10 рӯзи корӣ хулосаи худро ба муроҷиаткунанда ба таври хаттӣ ирсол менамояд.

9. Мақоми ваколатдори давлатӣ дар соҳаи сайёҳӣ бо дархости мақомоти дахлдори давлатӣ иттилооти заруриро аз Феҳрист пешниҳод менамояд.

10. Мақоми ваколатдори давлатӣ дар соҳаи сайёҳӣ ҳар сол иттилоотро оид ба субъектҳои хизматрасонии сайёҳӣ таҳия карда, дар сомонаи худ ҷойгир менамояд.

3. ТАРТИБИ ВОРИД НАМУДАНИ ТАҒЙИРОТ БА ФЕҲРИСТ ВА ХОРИҶ НАМУДАНИ ИТТИЛООТ АЗ ОН

11. Ба Феҳрист дар ҳолатҳои зерин метавонад бо қарори мақомоти ваколатдор тағйирот ворид карда шавад:

- тағйир ёфтани шакли ташкилию ҳуқуқӣ;

- тағйир ёфтани номи шахси ҳуқуқӣ;

- тағйир ёфтани суроға;

- тағйир ёфтани номи субъекти хизматрасонии сайёҳӣ.

12. Субъекти хизматрасонии сайёҳӣ дар ҳолатҳои зерин бо қарори мақомоти ваколатдор аз Феҳрист хориҷ карда мешавад:

- тибқи муроҷиати хаттии субъекти хизматрасонии сайёҳӣ;

- ба анҷом расидани муҳлати иҷозатнома субъекти хизматрасонии сайёҳӣ барои фаъолияти сайёҳӣ;

- аз рӯзи эътибори қонунӣ пайдо намудани қарори суд оид ба қатъи фаъолият;

- ҳангоми қатъ гардидани фаъолият.

13. Мақоми ваколатдори давлатӣ дар соҳаи сайёҳӣ тибқи талаботи бандҳои 11 ва 12 Тартиби мазкур барои тағйир додан ва ё хориҷ намудани субъекти хизматрасонии сайёҳӣ аз Феҳрист чораҷӯӣ менамояд.

14. Субъекти хизматрасонии сайёҳӣ мақоми ваколатдори давлатӣ дар соҳаи сайёҳиро дар муҳлати на дертар аз 10 рӯзи корӣ аз санаи тағйир ёфтани маълумот ва ё қатъ гардидани фаъолияти субъект ба таври хаттӣ огоҳ менамояд.

4 . МУҚАРРАРОТИ ХОТИМАВӢ

15. Феҳрист дар сомонаи расмии мақоми ваколатдори давлатӣ дар соҳаи сайёҳӣ ҷойгир карда шуда, мунтазам нав карда мешавад.

Ниг. ба Замима