Низомномаи Комиссия оид ба назорати содироти Ҷумҳурии Тоҷикистон

1. МУҚАРРАРОТИ УМУМӢ

1. Низомномаи Комиссия оид ба назорати содироти Ҷумҳурии Тоҷикистон (минбаъд - Низомнома) ваколатҳо, вазифаҳо, масъулият, фаъолият ва тартиби кори Комиссия оид ба назорати содироти Ҷумҳурии Тоҷикистон (минбаъд - Комиссия)-ро муайян мекунад.

2. Комиссия мақоми байниидоравии машваратӣ оид ба таъмини фаъолияти ҳамоҳангшуда ва ҳамкории мақомоти иҷроияи марказии ҳокимияти давлатӣ дар соҳаи назорати содирот мебошад.

3. Комиссия дар фаъолияти худ Конститутсияи Ҷумҳурии Тоҷикистон, санадҳои дигари меъёрии ҳуқукии Ҷумҳурии Тоҷикистон, санадҳои ҳуқуқии байналмилалие, ки Ҷумҳурии Тоҷикистон онҳоро эътироф намудааст, инчунин Низомномаи мазкурро ба роҳбарӣ мегирад.

2. МАҚСАД ВА ВАЗИФАҲОИ КОМИССИЯ

4. Мақсадҳои асосии Комиссия аз инҳо иборат аст:

- ҳамоҳангсозии умумии фаъолият ва таъмини ҳамкориҳои самарабахши мақомоти давлатие, ки дар амалисозии назорати содирот иштирок мекунанд;

- таъмини ҳифзи манфиатҳои давлатӣ ҳангоми амалисозии фаъолияти иқтисодии хориҷӣ нисбат ба молҳо, технологияҳо ва таъминоти барномавии назоратшаванда;

- омода намудани пешниҳодҳо оид ба самтҳои асосии сиёсати давлатӣ дар соҳаи назорати содирот бо мақсади таъмини амнияти миллии Ҷумҳурии Тоҷикистон дар самти паҳн накардани силоҳи қатли ом ва воситаҳои таҳвили он, амнияти минтақавӣ ва байналмилалӣ, мусоидат ба шаффофият ва масъулият дар интиқоли аслиҳаи одӣ ва техникаи ҳарбӣ, молҳо, технологияҳо ва таъминоти барномавии назоратшаванда, инчунин пешгирии ҷамъшавии тахрибкоронаи аслиҳа ва техникаи ҳарбӣ, омодагӣ ва (ё) содир намудани амалҳои террористӣ ва тахрибкорӣ ё ҷиноятҳои дигар;

- фароҳам овардани шароит барои ҳамгироии иқтисодиёти Ҷумҳурии Тоҷикистон ба иқтисодиёти ҷаҳонӣ.

5. Вазифаҳои асосии Комиссия инҳо мебошанд:

- таҳияи тадбирҳо оид ба рушд ва такмили низоми назорати содирот дар Ҷумҳурии Тоҷикистон;

- назорати иҷрои уҳдадориҳои байналмилалии Ҷумҳурии Тоҷикистон дар соҳаи назорати содирот;

- ҳамоҳангсозии корҳо оид ба таҳияи Номгӯйи молҳо, технологияҳо ва таъминоти барномавии назоратшаванда, вобаста ба зарурат омода намудани пешниҳодҳо оид ба таҳияи лоиҳаҳои санадҳои меъёрии ҳуқуқӣ, ки ба баланд бардоштани самаранокии назорати содирот равона карда мешаванд;

- баррасии масъалаҳои ҳамкории байналмилалӣ дар соҳаи назорати содирот;

- ташкили ҳамкории мақомоти давлатӣ оид ба масъалаҳои дурнамо ва ошкор кардани таҳдидҳои амнияти Ҷумҳурии Тоҷикистон, ки ба паҳн кардани силоҳи қатли ом, воситаҳои таҳвили он ва ҷамъшавии аслиҳаи одӣ ва техникаи ҳарбии тахрибкунанда алоқамандӣ доранд, инчунин вобаста ба омода намудани пешниҳодҳо, ки ба муқовимати ин таҳдидҳо дахл доранд;

- баррасии ихтилофоти байни мақомоти давлатӣ, ки зимни амалӣ намудани назорати содирот ба миён меоянд, инчунин таҳияи тавсияҳо барои бартараф намудани онҳо;

- мусоидат дар таҳияи гузориши солона оид ба назорати содирот;

- тибки тартиби мукарраргардида аз мақомоти давлатӣ ва (ё) ташкилотҳои дигари Ҷумҳурии Тоҷикистон дархост намудан (гирифтан)-и мавод ва маълумоте, ки барои амалӣ намудани фаъолияти худ зарур мебошад, инчунин дар ҷаласаҳои худ шунидани ҳисоботи роҳбарон (намояндагони ваколатдор)-и онҳо;

- таҳия ва қабули расмиёти дохилӣ оид ба ташкили кори худ;

- ҳамкорӣ ва ҳамоҳангсозии фаъолияти Комиссия бо Комиссияи доимоамалкунандаи байниидоравӣ оид ба муқовимат ба қонунигардонии (расмикунонии) даромадҳои бо роҳи ҷиноят бадастоварда, маблағгузории терроризм ва маблағгузории паҳнкунии силоҳи қатли ом;

- иҷрои вазифаҳои дигар дар доираи салоҳияти худ.

3. ВАКОЛАТҲОИ РАИС, МУОВИНИ РАИС ВА КОТИБ

6. Ба ҳайати Комиссия раис, муовини раис, котиб ва аъзои Комиссия аз ҳисоби намояндагони вазорату идораҳо шомил мешаванд. Ҳайати Комиссияро Ҳукумати Ҷумҳурии Тоҷикистон тасдиқ мекунад.

7. Комиссия метавонад намояндагони вазоратҳо, сохторҳои давлатӣ ё коршиносони дигарро вобаста ба масъалаҳои мушаххас ҷиҳати иҷрои вазифаҳои худ ҷалб намояд.

8. Раиси комиссия дорои ваколатҳои зерин мебошад:

- фаъолияти Комиссияро роҳбарӣ менамояд;

- макон, сана ва вақти баргузории ҷаласаи Комиссияро муайян мекунад;

- рӯзномаи ҷаласаи Комиссияро муайян ва протоколҳои ҷаласаҳоро имзо мекунад;

- ҷаласаҳои Комиссияро даъват карда, дар онҳо раисӣ менамояд;

- вазифаҳоро байни аъзои Комиссия тақсим мекунад;

- бо қарори худ роҳбарон (намояндагони ваколатдор)-и мақомоти давлатӣ ва (ё) ташкилотҳои дигари Ҷумҳурии Тоҷикистон, аз ҷумла ташкилотҳои ғайриҳукуматӣ ва коршиносони мустақилро ба ҷаласаҳои Комиссия даъват менамояд;

- вазифаҳои дигари марбут ба фаъолияти Комиссияро иҷро менамояд.

9. Дар сурати набудани раиси Комиссия ё бо супориши ӯ вазифаи ӯро муовини раиси Комиссия иҷро мекунад.

10. Котиби Комиссия дорои ваколатҳои зерин мебошад:

- маводи заруриро барои ҷаласаҳои Комиссия омода намуда, протоколҳои ҷаласаҳоро мебарад;

- назорати иҷрои қарорҳои қабулнамудаи Комиссияро амалӣ менамояд;

- дар мувофиқа бо раиси Комиссия рӯзномаи ҷаласаи Комиссияро таҳия менамояд;

- фаъолияти ҷориро ташкил мекунад ва вазифаҳои дигари вобаста ба фаъолияти Комиссия алоқамандро иҷро менамояд.

4. ТАШКИЛИ ФАЪОЛИЯТ

11. Функсияҳои котиботи Комиссия ба воҳиди сохтории марбутаи Вазорати рушди иқтисод ва савдо ҳамчун мақоми ваколатдор оид ба масъалаҳои назорати содирот вогузор мегардад.

12. Раиси Комиссия ҷаласаи Комиссияро дар ҳолати зарурӣ даъват мекунад ва аъзои Комиссияро дар муҳлати на дертар аз 3 (се) рӯзи корӣ то санаи баргузории ҷаласа огоҳ менамояд. Дар ҳолатҳои истисноӣ раиси Комиссия метавонад ҷаласаро дар муҳлати кӯтоҳтар даъват намояд. Маводе, ки дар ҷаласаи Комиссия баррасӣ карда мешаванд, ба огоҳинома оид ба даъвати ҷаласа замима мегарданд.

13. Ҷаласаи Комиссия на камтар аз ду маротиба дар як сол гузаронида мешавад. Дар ҳолатҳои зарурӣ, маҷлисҳои ғайринавбатиро баргузор кардан мумкин аст.

14. Даъвати ҷаласа метавонад аз ҷониби як ё якчанд аъзои дигари Комиссия ба раиси Комиссия пешниҳод карда шавад.

15. Ҷаласаҳо ҳамон вақт салоҳиятнок ҳисобида мешаванд, ки агар дар онҳо на кам аз нисфи аъзои Комиссия, аз ҷумла раис ё муовини раис дар он ҳузур дошта бошанд.

16. Намояндагони муассисаҳои дигар ё мутахассисони дигар бе хуқуқи овоздиҳӣ метавонанд бо даъвати раиси Комиссия дар ҷаласа иштирок намоянд.

17. Комиссия ба кори ҷаласа аз рӯйи рӯзномае, ки пештар аз ҷониби раис тасдиқ шудааст, оғоз мекунад.

18. Узви Комиссия, ки ба рӯзномаи пешниҳодшуда бандҳо манзур менамояд, барои баррасии масъалаҳои манзурнамудааш бояд асосноккуниро пешакӣ пешниҳод намояд.

19. Комиссия метавонад қарор қабул намояд, ки баррасии банди дилхоҳи рӯзнома то ҷаласаи оянда ба таъхир гузошта шавад.

20. Котиби Комиссия барои омода намудани протоколҳои ҷаласаҳои Комиссия масъул мебошад.

21. Протокол аз ҷониби раиси Комиссия ва котиби он ба имзо расонида мешавад.

22. Агар дар ҷаласа иттилооти махфӣ баррасӣ карда шавад, пас протоколи ҷаласа ё қисми он бояд махфӣ кунонида шавад ва тибқи талаботи қонунгузорӣ ҳифз карда шавад.

23. Комиссия пас аз шунидани мавқеи тамоми аъзои Комиссияи дар ҷаласа ҳузурдошта қарор қабул мекунад. Қарор бо аксари овозҳо қабул карда мешавад. Дар ҳолати норозӣ будан бо қарори Комиссия узви Комиссия ҳуқуқ дорад, ки фикри махсуси худро дар шакли хаттӣ пешниҳод намояд, ки он ба протоколи Комиссия замима карда мешавад.

24. Узви Комиссия, ки дар ҷаласа иштирок карда наметавонад, ҳуқуқ дорад, ки фикри худро оид ба масъалаҳои рӯзнома дар шакли хаттӣ пешниход намояд.

25. Узви Комиссия, ки дар муддати 3 (се) рӯзи корӣ фикри махсуси худро бо сабабҳои дарҷшаванда пешниҳод накардааст, ба қарори Комиссия эътироз надошта ҳисоб карда мешавад.

26. Агар аъзои Комиссия оид ба масъалаи баррасишаванда ба мувофиқа наоянд, раис ҳуқуқ дорад оид ба коркарди иловагӣ ва баррасии такрории он қарор қабул намояд.

27. Узви Комиссия, ки нисбат ба дархости аз ҷониби Комиссия баррасишаванда ихтилофи манфиатҳо дорад, уҳдадор аст, ки Комиссияро оид ба чунин ихтилоф ва дар баррасӣ иштирок накардан огоҳ намояд.