ҲУКУМАТИ ҶУМҲУРИИ ТОҶИКИСТОН

ҚАРОР

Дар бораи масъалаҳои ҷорӣ намудани механизми маблағгузорӣ аз рӯйи натиҷаи табобат дар сохтори беморхонавӣ

Мутобиқи моддаи 17 Қонуни конститутсионии Ҷумҳурии Тоҷикистон "Дар бораи Ҳукумати Ҷумҳурии Тоҷикистон" ва моддаи 5 Кодекси тандурустии Ҷумҳурии Тоҷикистон бо мақсади такмил додани механизми маблағгузории сохтори беморхонавӣ ва истифодаи самараноки маблағҳои буҷетӣ, Ҳукумати Ҷумҳурии Тоҷикистон қарор мекунад:

1. Аз 1 январи соли 2022 татбиқи таҷрибавии механизми маблағгузорӣ аз рӯйи натиҷаи табобат дар сохтори беморхонавӣ ҷорӣ карда шавад.

2. Тартиби маблағгузории муассисаҳои давлатии тандурустии сохтори беморхонавӣ дар асоси механизми маблағгузорӣ аз рӯйи натиҷаи табобат тасдиқ карда шавад (замима мегардад).

3. Вазорати тандурустӣ ва ҳифзи иҷтимоии аҳолии Ҷумҳурии Тоҷикистон:

1) дар якҷоягӣ бо Вазорати молияи Ҷумҳурии Тоҷикистон то 30 ноябри соли 2021 таҳия ва тасдиқ намоянд:

- ҳаҷми меъёрҳои заминавӣ ва коэффитсиентҳои махсуси маблағгузорӣ аз рӯйи натиҷаи табобат дар муассисаҳои давлатии тандурустии сохтори беморхонавӣ барои соли 2022;

- қоидаҳои маблағгузории сохтори беморхонавӣ ҳангоми гузариш ба механизми маблағгузорӣ аз рӯйи натиҷаи табобат дар сохтори беморхонавӣ;

- рӯйхати ноҳияҳои таҷрибавӣ ва ҷадвали гузариш ба механизми маблағгузорӣ аз рӯйи натиҷаи табобат дар сохтори беморхонавӣ;

2) ҳамасола то 1 июн дар доираи корҳо оид ба таҳияи лоиҳаи буҷет барои соли навбатии молиявӣ ба Вазорати молияи Ҷумҳурии Тоҷикистон оид ба ҳаҷми меъёри заминавӣ вобаста ба механизми маблағгузорӣ аз рӯйи натиҷаи табобат дар сохтори беморхонавиро пешниҳод намояд;

3) то 15 январи соли 2022 бо мақсади такмили минбаъдаи маблағгузории воҳидҳои сохтории беморхонаҳои марказии ноҳиявию шаҳрӣ дар мувофиқа бо Вазорати молияи Ҷумҳурии Тоҷикистон тартиби тақсимоти меъёрии буҷетиро дар асоси принсипҳои механизми маблағгузорӣ аз рӯйи натиҷаи табобат дар сохтори беморхонавӣ таҳия ва қабул намояд;

4) дар якҷоягӣ бо мақомоти иҷроияи маҳаллии ҳокимияти давлатии дахлдор, таҳия ва тасдиқи ҷадвали марҳила ба марҳила гузариши маблағгузории беморхонаҳои минтақавии деҳотӣ ва марказҳои дигари махсусро ба механизми нави маблағгузорӣ таъмин намояд.

4. Маблағҳои буҷетӣ барои ҳар як муассисаи давлатии тандурустии сохтори беморхонавӣ, ки ба механизми маблағгузорӣ аз рӯйи натиҷаи табобат дар сохтори беморхонавӣ гузаронида шудаанд, дар давоми соли буҷетӣ ба истиснои ҳолатҳои ворид намудани тағйирот ба санадҳои меъёрии ҳуқуқии танзимкунандаи соли молиявии дахлдор кам карда намешаванд.

5. Назорати иҷрои қарори мазкур ба зиммаи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон гузошта шавад.