ТАРТИБИ ТАЪСИС ВА БАРҲАМДИҲИИ ВОҲИДҲОИ СОХТОРИИ АУДИТИ ДОХИЛӢ ДАР ТАШКИЛОТҲОИ БАХШИ ДАВЛАТӢ

1. МУҚАРРАРОТИ УМУМӢ

1. Тартиби таъсис ва барҳамдиҳии воҳидҳои сохтории аудити дохилӣ дар ташкилотҳои бахши давлатӣ (минбаъд - Тартиб), расмиёти мушаххаси таъсисдиҳӣ ва барҳамдиҳии воҳидҳои сохтории аудити дохилии вазорату идораҳо ва дигар ташкилотҳои бахши давлатиро муқаррар менамояд.

2. Тартиби мазкур нисбат ба вазорату идораҳо ва дигар ташкилотҳои бахши давлатие, ки аз буҷети ҷумҳуриявӣ маблағгузорӣ мешавад, амалӣ мегардад.

3. Воҳидҳои сохтории аудити дохилӣ дар ташкилотҳои бахши давлатӣ тибқи санадҳои меъёрии ҳуқуқии Ҷумҳурии Тоҷикистон ва меъёрҳои Тартиби мазкур таъсис ва барҳам дода мешаванд.

4. Воҳиди сохтории аудити дохилӣ ба роҳбари аввали ташкилоти бахши давлатӣ тобеъ ва ҳисоботдиҳанда буда, таҳти роҳбарии бевоситаи ӯ фаъолият менамояд.

2. ТАРТИБИ ТАЪСИСДИҲӢ ВА БАРҲАМДИҲИИ ВОҲИДИ СОХТОРИИ АУДИТИ ДОХИЛӢ

5. Воҳиди сохтории аудити дохилӣ дар ташкилоти бахши давлатӣ танҳо дар сохтори дастгоҳи марказии ташкилот (ба истиснои мақоми ваколатдори давлатӣ) таъсис дода мешавад.

6. Воҳидҳои сохтории аудити дохилӣ вобаста ба вазъи ҳуқуқӣ, функсияҳо, ваколатҳо, ҳаҷм ва мураккабии вазифаҳо метавонанд дар шаклҳои зерин ба таври мустақил таъсис дода шаванд:

- сарраёсат;

- раёсат;

- шуъба;

- бахш.

7. Ташкилотҳои бахши давлатие, ки бояд воҳиди сохтории аудити дохилӣ дошта бошанд, мувофиқи меъёрҳои зерин муайян карда мешаванд:

- ҳаҷми маблағгузорӣ аз буҷети ҷумҳуриявӣ дар соли молиявӣ аз якуним миллион нишондиҳанда барои ҳисобҳо зиёд бошад;

- шумораи миёнаи кормандон дар соли тақвимӣ зиёда аз 800 (ҳаштсад) нафар бошад.

8. Барҳамдиҳии воҳидҳои сохтории аудити дохилии вазорату идораҳо ва дигар ташкилотҳои бахши давлатӣ дар ҳолатҳои зерин амалӣ карда мешавад:

- дар сурати ба яке аз талаботи меъёрҳои пешбининамудаи банди 7 Тартиби мазкур мутобиқ нагардидан;

- бо дарназардошти самаранок набудани фаъолият;

- дар ҳолатҳои дигари пешбининамудаи қонунгузории Ҷумҳурии Тоҷикистон.

3. МУҚАРРАРОТИ ХОТИМАВӢ

9. Назорати иҷрои меъёрҳои Тартиби мазкур аз ҷониби Вазорати молияи Ҷумҳурии Тоҷикистон амалӣ карда мешавад.

10. Шахсони мансабдор ва шахсони ҳуқуқӣ барои риоя накардани муқаррароти Тартиби мазкур тибқи қонунгузории Ҷумҳурии Тоҷикистон масъул мебошанд.