НИЗОМНОМАИ КОМИССИЯИ БАЙНИИДОРАВИИ ДАВЛАТӢ ОИД БА МАЪРИФАТИ ЭКОЛОГИИ АҲОЛӢ

БОБИ 1. МУҚАРРАРОТИ УМУМИ

1. Низомномаи Комиссияи байниидоравии давлатӣ оид ба маърифати экологии аҳолӣ (минбаъд - Низомнома) мақсад, вазифа, ҳуқуқ, уҳдадорӣ, ҳайат ва ташкили фаъолияти Комиссияи байниидоравии давлатӣ оид ба маърифати экологии аҳолӣ (минбаъд - Комиссия)-ро муайян менамояд.

2. Комиссия бо мақсади ҳамоҳангсозии фаъолияти вазорату идораҳо, мақомоти иҷроияи маҳаллии ҳокимияти давлатӣ, инчунин ташкилотҳои манфиатдор оид ба маърифати экологии аҳолии Ҷумҳурии Тоҷикистон таъсис дода мешавад.

3. Комиссия мақоми ҳамоҳангсоз ва дастаҷамъӣ буда, фаъолияти он доимоамалкунанда мебошад.

4. Комиссия дар фаъолияти худ Конститутсияи Ҷумҳурии Тоҷикистон, Қонуни Ҷумҳурии Тоҷикистон "Дар бораи маърифати экологии аҳолӣ", дигар санадҳои меъёрии ҳуқуқии Ҷумҳурии Тоҷикистон, санадҳои ҳуқуқии байналмилалӣ, ки Тоҷикистон онҳоро эътироф кардааст, инчунин Низомномаи мазкурро ба роҳбарӣ мегирад.

БОБИ 2. ВАЗИФАҲОИ КОМИССИЯ

Комиссия дорои вазифаҳои зерин мебошад:

- ҳамоҳангсозии фаъолияти мақомоти давлатӣ ва ташкилотҳо оид ба маърифати экологии аҳолӣ;

- пешниҳоди таклифҳо ҷиҳати такмили қонунгузории Ҷумҳурии Тоҷикистон оид ба масъалаҳои маърифати экологии аҳолӣ;

- ташкили кумаки дастурӣ барои муассисаҳои таълимӣ ва дигар ташкилотҳо оид ба маърифати экологии аҳолӣ;

- баррасии пешниҳодҳо оид ба ташкили низоми таъминоти иттилоотии маърифати экологӣ ва паҳн кардани донишҳои экологӣ байни табақаҳои гуногуни ахолӣ.

БОБИ 3. ҲУҚУҚҲОИ КОМИССИЯ

6. Комиссия дорои ҳуқуқҳои зерин мебошад:

- баррасӣ намудани масъалаҳои марбут ба маърифати экологии аҳолӣ, аз ҷумла масъалаҳо оид ба амалисозии шартномаҳои байналмилалӣ дар ин соҳа;

- шунидани ҳисоботи комиссияҳои байниидоравии минтақавӣ;

- бо тартиби муқарраргардида таъсис додани гурӯҳҳои муваққатии корӣ аз ҳисоби олимон ва мутахассисони соҳаи мазкур барои коркарди пешниҳодҳо оид ба масъалаҳои алоҳидаи маърифати экологии аҳолӣ;

- дар доираи ваколати худ ба Ҳукумати Ҷумҳурии Тоҷикистон пешниҳод намудани таклифҳо оид ба фаъолгардонии корҳои тарбиявию фаҳмондадиҳӣ дар доираи лоиҳаҳои аз ҷониби Комиссия таҳияшаванда;

- гузаронидани машваратҳо, конференсияҳо ва дигар чорабиниҳо оид ба масъалаҳои марбут ба маърифати экологии аҳолӣ;

- аз ҳамаи мақомоти иҷроияи марказии ҳокимияти давлатӣ, инчунин корхона, муассиса ва ташкилотҳо талаб намудани мавод ва иттилоот оид ба масъалаҳои ба ваколатҳои Комиссия дохилбуда.

БОБИ 4. ҲАЙАТИ КОМИССИЯ

7. Комиссия аз ҳисоби намояндагони вазорату идораҳо, воситаҳои ахбори омма, ташкилотҳои ҷамъиятӣ ва олимони соҳаи экология таъсис дода шуда, аз раис, муовини раис, котиби масъул ва дигар аъзои Комиссия иборат мебошад.

8. Раиси Комиссия ба фаъолияти умумии Комиссия роҳбарӣ намуда, барои иҷрои вазифаҳои ба зиммаи ӯ вогузоршуда шахсан масъул мебошад.

9. Раиси Комиссия дорои ваколатҳои зерин мебошад:

- роҳбарии фаъолияти Комиссияро амалӣ мекунад;

- вазифаҳоро дар байни аъзои Комиссия тақсим менамояд;

- иҷрои вазифаҳои дар назди Комиссия гузошташударо таъмин менамояд;

- оид ба баргузории ҷаласаҳои Комиссия қарор қабул менамояд;

- қарорҳои қабулкардаи Комиссияро тасдиқ менамояд.

10. Муовини раиси Комиссия дорои ваколатҳои зерин мебошад:

- супоришҳои раиси Комиссияро иҷро менамояд;

- оид ба самтҳои асосии фаъолияти Комиссия пешниҳодҳо омода менамояд;

- бо супориши раис дар набудани ӯ ба ҷаласаҳои Комиссия роҳбарӣ менамояд;

- иҷрои қарорҳои қабулкардаи Комиссияро таъмин менамояд.

11. Аъзои Комиссия ҳуқуқ доранд:

- дар доираи масъалаҳои марбут ба фаъолияти худ ба Комиссия таклифҳо пешниҳод намоянд;

- дар муҳокимаи пешниҳодҳо ва қабули қарорҳо оид ба масъалаҳои аз ҷониби Комиссия баррасишаванда иштирок намоянд;

- оид ба фаъолияти Комиссия ва рафти амалисозии қарорҳои он иттилоъ гиранд.

12. Уҳдадориҳои аъзои Комиссия:

- дар доираи уҳдадориҳои худ оид ба амалигардонии қарорҳои Комиссия чораҳои заруриро андешанд;

- дар ҷаласаҳои Комиссия, дар муҳокимаи масъалаҳои баррасишаванда ва қабули қарорҳо аз рӯйи онҳо иштирок намоянд;

- ҳангоми имконнопазир будани иштирок, ба котиби Комиссия оид ба масъалаҳои рӯзнома пешниҳодҳои хаттии худро ирсол намоянд.

13. Котиби Комиссия:

- лоиҳаи рӯзномаи ҷаласаи Комиссияро таҳия карда, ба раиси Комиссия пешниҳод мекунад;

- супоришҳои раиси Комиссияро оид ба масъалаҳои ташкили фаъолияти Комиссия иҷро менамояд;

- омодагии ҷаласаҳои Комиссия ва таҳияи лоиҳаи қарорҳои онро таъмин месозад;

- таъмини фаъолияти иттилоотию таҳлилии Комиссияро бо ҷалби мақомоти марказии ҳокимияти давлатӣ, ки дар Комиссия намояндагӣ мекунад, амалӣ менамояд;

- ҳуҷҷатҳо ва муроҷиатҳои шахсони воқеӣ ва ҳуқуқиро барои баррасӣ ба Комиссия омода ва пешниҳод мекунад;

- ваколатҳои дигарро мутобиқи қарорҳои Комиссия ва супориши раиси Комиссия иҷро менамояд.

БОБИ 5. ТАШКИЛИ ФАЪОЛИЯТИ КОМИССИЯ

14. Ҷаласаҳои Комиссия дар асоси нақшаи кори ҳарсола тасдиқшаванда, вале на камтар аз як маротиба дар шаш моҳ гузаронида мешаванд.

15. Дар ҷаласаҳои Комиссия бо ризоияти раиси Комиссия намояндагони мақомоти давлатии дигар, созмонҳои байналмилалӣ ва дигар шахсони манфиатдор метавонанд иштирок намоянд.

16. Ҷаласаи Комиссияро раиси он мегузаронад. Дар сурати набудани раиси Комиссия ё бо супориши ӯ вазифаи ӯро муовини раиси Комиссия иҷро мекунад.

17. Комиссия салоҳияти қабули қарорҳоро дар сурати дар ҷаласаҳои он иштирок намудани на камтар аз се ду ҳиссаи аъзои Комиссия дорад. Қарорҳои Комиссия бо ҷонибдории аксарияти овозҳои аъзои Комиссия, бо инобати ақидаи аъзои дар ҷаласа иштирокнадошта, ки ба котиби Комиссия тариқи хаттӣ фиристонида шуданд, қабул карда мешаванд.

18. Қарорҳои Комиссия бо протокол ба расмият дароварда шуда, ба он раис ва котиби Комиссия имзо мегузоранд.

19. Нусхаи протоколҳо ба аъзои Комиссия, инчунин мақомот ва ташкилотҳои дахлдор ирсол мегардад. Қарорҳое, ки Комиссия мувофиқи ваколаташ қабул менамояд, ҷиҳати иҷро барои мақомоти давлатӣ, инчунин ташкилотҳо, новобаста аз шакли моликият, ҳатмӣ мебошанд.

20. Таъминоти ташкилию техникии фаъолияти Комиссияро Кумитаи ҳифзи муҳити зисти назди Ҳукумати Ҷумҳурии Тоҷикистон амалӣ менамояд.

Ҳайати Комиссияи байниидоравии давлатӣ оид ба маърифати экологии аҳолӣ

Муовини Сарвазири Ҷумҳурии Тоҷикистон - раиси Комиссия

Раиси Кумитаи ҳифзи муҳити зисти назди Ҳукумати Ҷумҳурии Тоҷикистон - муовини раиси Комиссия

Сардори раёсати кишоварзӣ ва ҳифзи муҳити зисти Дастгоҳи иҷроияи Президенти Ҷумҳурии Тоҷикистон - котиби Комиссия

                                                 Аъзои комиссия:

Муовини вазири адлияи Ҷумҳурии Тоҷикистон

Муовини вазири молияи Ҷумҳурии Тоҷикистон

Муовини вазири рушди иқтисод ва савдои Ҷумҳурии Тоҷикистон

Муовини вазири мудофиаи Ҷумҳурии Тоҷикистон

Муовини вазири корҳои дохилии Ҷумҳурии Тоҷикистон

Муовини вазири корҳои хориҷии Ҷумҳурии Тоҷикистон

Муовини вазири кишоварзии Ҷумҳурии Тоҷикистон

Муовини вазири маориф ва илми Ҷумҳурии Тоҷикистон

Муовини вазири фарҳанги Ҷумҳурии Тоҷикистон

Муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон

Муовини вазири меҳнат, муҳоҷират ва шуғли аҳолии Ҷумҳурии Тоҷикистон

Муовини вазири энергетика ва захираҳои оби Ҷумҳурии Тоҷикистон

Муовини вазири саноат ва технологияҳои нави Ҷумҳурии Тоҷикистон

Муовини раиси Кумитаи кор бо занон ва оилаи назди Ҳукумати Ҷумҳурии Тоҷикистон

Муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон

Муовини раиси Кумитаи рушди сайёҳии назди Ҳукумати Ҷумҳурии Тоҷикистон

Муовини раиси Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон

Муовини раиси Кумитаи телевизион ва радиои назди Ҳукумати Ҷумҳурии Тоҷикистон

Сардори Хадамоти назорати давлатии санитарию эпидемиологӣ

Намояндаи Академияи миллии илмҳои Тоҷикистон (бо мувофиқа)

Намояндаи воситаҳои ахбори омма (дар мувофиқа)

Намояндаи ташкилотҳои ҷамъиятӣ (бо мувофиқа)

Олимони соҳаи экология (2 нафар бо мувофиқа)