Тартиби гузаронидани рузи истироҳат ба дигар рӯзи корӣ

1. Гузаронидани рӯзи истироҳат ба дигар рӯзи корӣ бо қарори Ҳукумати Ҷумҳурии Тоҷикистон дар сурати рост омадани як рӯзи корй дар байни рӯзи иди ғайрикорӣ ва рӯзҳои истироҳат амалӣ карда мешавад.

2. Зарурати гузаронидани рӯзҳои мушаххаси истироҳат ба дигар рӯзҳои корӣ дар охири ҳар соли тақвимӣ барои соли пешомад аз ҷониби Вазорати меҳнат, муҳоҷират ва шуғли аҳолии Ҷумҳурии Тоҷикистон дар мувофиқа бо Иттиҳодияи корфармоёни Ҷумҳурии Тоҷикистон ва Федератсияи иттифоқҳои касабаи мустақили Тоҷикистон асоснок гардида, лоиҳаи санади дахлдор ба баррасии Ҳукумати Ҷумҳурии Тоҷикистон пешниҳод карда мешавад.

3. Гузаронидани рӯзи истироҳат ба дигар рӯзи корӣ ба кормандоне татбиқ мегардад, ки вақти кории онҳо аз ҳафтаи панҷрӯзаи корӣ бо ду рӯзи истироҳат (шанбе ва якшанбе) иборат аст.

4. Ҳангоми гузаронидани рӯзи истироҳат ба дигар рӯзи корӣ давомнокии рӯзи кории гузаронидашуда ва меъёри миёнаи ҳисобшудаи вақти корӣ дар моҳ ё соли тақвимӣ, ки санадҳои меъёрии ҳуқуқии Ҷумҳурии Тоҷикистон муқаррар намудаанд, нигоҳ дошта мешавад.

5. Гузаронидани рӯзи истироҳат ба дигар рӯзи корӣ дар давоми соли тақвимӣ на дертар аз ду ҳафтаи пеш аз санаи муайяншуда тавассути воситаҳои ахбори омма эълон карда мешавад.