Тартиби пешбурди феҳристи ҳунармандӣ

1. МУҚАРРАРОТИ УМУМӢ

1. Тартиби пешбурди феҳристи ҳунармандӣ (минбаъд - Тартиб) раванди пешбурд ва воридсозии иттилоот ба феҳрист ва хориҷ намудани иттилоотро аз он муайян намуда, бо мақсади инъикоси минбаъдаи рушди фаъолияти ҳунармандӣ, иштироки шахсони воқеӣ дар истеҳсоли маҳсулоти ҳунармандӣ ва шуғли аҳолӣ аз рӯи намудҳои он таҳия гардидааст.

2. Мақоми ваколатдори давлатӣ дар соҳаи ҳунармандӣ оид ба пешбурди феҳристи ҳунармандӣ Вазорати меҳнат, муҳоҷират ва шуғли аҳолии Ҷумҳурии Тоҷикистон (минбаъд - мақоми ваколатдори давлатӣ дар соҳаи ҳунармандӣ) мебошад.

2. ТАРТИБИ ПЕШБУРД ВА ВОРИДСОЗИИ ИТТИЛООТ БА ФЕҲРИСТ ВА ХОРИҶ НАМУДАНИ ИТТИЛООТ A3 ОН

3. Таҳия ва пешбурди феҳрист мутобиқи ҳамин Тартиб дар шаклҳои коғазӣ ва электронӣ амалӣ гардида, дар ҳолати номутобиқатии иттилооти коғазӣ бо электронӣ, шакли коғазии он афзалият дорад.

4. Ворид ва хориҷ кардани иттилоот дар бораи субъектҳои ҳунармандӣ аз феҳрист (новобаста аз ҷойи бақайдгирии он) дар асоси қарори мақоми ваколатдори давлатӣ дар соҳаи ҳунармандӣ амалӣ карда мешавад, агар субъектҳои ҳунармандӣ ҳиссаи дар маҷмӯъ муқаррарнамудаи қонунгузории соҳаи ҳунармандиро дар раванди истеҳсоли маҳсулоти ҳунармандӣ ва шуғли аҳолӣ доро бошад.

5. Ҳангоми тартиб додани феҳрист мақоми ваколатдори давлатӣ дар соҳаи ҳунармандӣ иттилооти зерини тасдиқкунанда оид ба мавҷудият ё надоштани ҳиссаи субъектҳои ҳунармандӣ дар раванди истеҳсоли маҳсулоти ҳунармандӣ ва шуғли аҳолиро, ки бо қонунгузории соҳаи ҳунармандии Ҷумҳурии Тоҷикистон муқаррар гардидааст, истифода намояд:

- натиҷаҳои таҳлил ва баҳодиҳии ҳолати ҳунармандӣ дар раванди истеҳсоли маҳсулоти ҳунармандӣ ва шуғл, ки мақоми ваколатдори давлатӣ дар соҳаи ҳунармандӣ гузаронидааст;

 - натиҷаҳои таҳлили фаъолияти субъектҳои ҳунармандӣ аз тарафи мақоми ваколатдори давлатӣ дар соҳаи ҳунармандӣ, ки бо қонунвайронкунии соҳаи ҳунармандӣ алоқаманд мебошанд, инчунин дархостҳо, огоҳиномаҳо ва маълумот, ки ба мақоми ваколатдори давлатӣ дар соҳаи ҳунармандӣ пешниҳод мешаванд;

- иттилооти давлатии ҳисоботҳои оморӣ, ки фаъолияти субъектҳои ҳунармандиро тавсиф менамояд;

- иттилооте, ки аз мақомоти андоз, омор, фарҳанг ва дигар мақомоти ҳокимияти давлатӣ, мақомоти иҷроияи маҳаллии ҳокимияти давлатӣ гирифта шудааст;

- иттилооте, ки аз шахсони ҳуқуқӣ ва воқеӣ гирифта шудааст;

натиҷаҳои ташхиси молшиносӣ, хулосаҳои ташкилотҳои махсусгардонидашуда, инчунин мутахассисон ва коршиносон;

- иттилооти идоравӣ, марказҳо ва хадамоти иттилоотии мустақил; иттилооти ассотсиатсияҳои истеъмолкунандагон ва истеҳсолкунандагон;

- иттилооти воситаҳои ахбори омма;

- пурсишҳои сотсиологӣ, пурсишҳои интихобӣ ва саволномаҳои субъектҳои ҳунармандӣ, шаҳрвандон ва ташкилотҳои ҷамъиятӣ;

- шартҳои техникӣ ва меъёрҳои дигар;

- муроҷиати шахсони ҳуқуқӣ ва воқеӣ ба мақоми ваколатдори давлатӣ дар соҳаи ҳунармандӣ.

6. Иттилооти истифодашаванда ҳангоми ташкили феҳрист метавонад ҳам чун нишондоди аслӣ ва ҳам чун арзишӣ ифода ёбад.

7. Мақомоти ваколатдор дар соҳаҳои андоз, омор ва фарҳанг ба мақоми ваколатдори давлатӣ дар соҳаи ҳунармандӣ ҳар сол на дертар аз 2 феврали баъди соли ҳисоботӣ рӯйхати субъектҳои ҳунармандиро дар шакли коғазӣ ва электронӣ пешниҳод менамоянд.

8. Мақоми ваколатдори давлатӣ дар соҳаи ҳунармандӣ дар давоми сол метавонад ба феҳрист бо мушаххас намудани номгӯйи субъектҳои ҳунармандие, ки дар раванди истеҳсоли маҳсулоти ҳунармандӣ ва шуғл мавқеи муайян доранд, тағйирот ворид намояд.

9. Феҳрист ба ҳама дастрас буда, иттилооти дар феҳрист мавҷудбуда бо дархости шахсони ҳуқуқӣ ва воқеӣ тибқи тартиби муқарраргардида пешниҳод мегардад.

10. Мақоми ваколатдори давлатӣ дар соҳаи ҳунармандӣ ҳуқуқ дорад дархости мақомоти ваколатдор дар соҳаҳои андоз, омор ва фарҳангро оид ба ворид намудани иттилоот дар бораи субъектҳои ҳунармандӣ ба феҳрист (хориҷ намудан аз феҳрист), ки қонунгузории амалкунандаро вайрон мекунад, ба инобат нагирад.

11. Асосҳои хориҷ намудани субъектҳои ҳунармандӣ аз феҳрист чунин аст:

- аз байн рафтани касбҳои ҳунармандӣ ва ҳунарҳои мардумӣ;

- эътибори қонунӣ пайдо намудани қарори суд оид ба аз феҳрист хориҷ намудани субъекти ҳунармандӣ.

3. МУҚАРРАРОТИ ХОТИМАВӢ

12. Феҳрист дар сомонаҳои расмии мақоми ваколатдори давлатӣ дар соҳаи ҳунармандӣ ва омор ҷойгир карда шуда, мунтазам нав карда мешавад.

13. Мақоми ваколатдори давлатӣ дар соҳаи ҳунармандӣ барои муайян намудани сабабҳо оид ба аз ҷониби мақомоти андоз, омор ва фарҳанг ва мақомоти дигари дахлдори давлатӣ дар бораи ворид ё хориҷ гардидани иттилоот дар бораи ҳунармандӣ, ки дар банди 4 Тартиби мазкур зикр гардидааст, бо мақомоти номбурда ҳамкорӣ менамояд.