Тартиби бо роҳхати табобати истироҳатгоҳӣ ва курортӣ таъмин кардани кӯдакон

1. МУҚАРРАРОТИ УМУМӢ

1. Тартиби бо роҳхати табобати истироҳатгоҳӣ ва курортӣ таъмин кардани кӯдакон (минбаъд - Тартиб) раванди таъмин намудани кӯдаконро бо роҳхати табобати истироҳатгоҳӣ ва курортӣ (минбаъд - роҳхат) дар муассисаҳои давлатии табобатӣ ва курортии дахлдор (минбаъд - муассиса) муайян менамояд.

2. Таъмини роҳхат ба кӯдакон аз ҷониби шуъба ва бахшҳои ҳифзи иҷтимоии аҳолии шаҳр ва ноҳия (минбаъд - шуъба ва бахшҳои ҳифзи иҷтимоии аҳолӣ) амалӣ карда мешавад.

3. Роҳхат ба кӯдакони аз 7-сола то 18-сола дар як сол як маротиба ба муҳлатҳои зерин дода мешавад:

- осоишгоҳи дилу тарбодӣ -16 рӯз;

- осоишгоҳҳои зидди сил - аз 3 то 9 моҳ.

4. Роҳхат ба кӯдакон ройгон таъмин карда шуда, хароҷоти табобати онҳо аз ҳисоби маблағҳои буҷетии муассисаҳо амалӣ карда мешавад.

2. ТАРТИБИ ДАСТРАС КАРДАНИ РОҲХАТ БА КӯДАКОН

5. Барои гирифтани роҳхат ба шуъба ва бахшҳои ҳифзи иҷтимоии аҳолӣ дар ҷои истиқомат ҳуҷҷатҳои зерин пешниҳод карда мешаванд:

- ариза аз тарафи падару модар ё дигар намояндагони қонунии ноболиғон, инчунин шахсе, ки дар асоси шартнома кӯдакро тарбия мекунад;

- нусхаи шиносномаи аризадиҳанда (дар ҳолати намояндагони қонунии кӯдак будан ва шахсе, ки дар асоси шартнома кӯдакро тарбия мекунад, ҳуҷҷатҳои ҳуқуқмуайянкунанда пешниҳод мегардад);

- нусхаи шаҳодатномаи таваллуди кӯдак;

- хулосаи комиссияи дахлдоре, ки зарурати таъмин намудани кӯдакро бо роҳхат асоснок менамояд;

 - роҳхати муассисаи тиббӣ оид ба табобати истироҳатгоҳӣ ва курортӣ (шакли №069); - иқтибос аз таърихи беморӣ (шакли №070);

- таҳлили фазла барои гиҷҷа (шакли №126);

- маълумотнома оид ба надоштани бемориҳои сироятӣ дар 21 рӯзи охир;

- маълумотнома аз ҷои истиқомат.

6. Ҳуҷҷатҳои дар банди 5 пешбинишуда аз ҷониби шуъба ва бахшҳои ҳифзи иҷтимоии аҳолӣ қабул карда шуда, дар дафтари бақайдгирии дархостҳои қабулшуда (минбаъд - дафтар), ки шакли онро мақоми ваколатдори давлатӣ дар соҳаи тандурустӣ ва ҳифзи иҷтимоии аҳолӣ (минбаъд - мақоми ваколатдор) муайян менамояд, ба қайд гирифта мешаванд. Додани роҳхат бо навбат мутобиқи сабти ном дар дафтар амалӣ карда мешавад.

7. Падару модар ё дигар намояндагони қонунии ноболиғон пас аз гирифтани роҳхат дар дафтар имзо мегузоранд.

8. Супоридани роҳхати пурнашуда, фурӯхтан ва ба шахсони дигар супоридани онҳо, инчунин додани роҳхат бе риояи Тартиб манъ мебошад.

9. Ҳангоми овардани кӯдак ба муассиса бояд шаҳодатномаи кӯдак ва шиносномаи падар ё модари кӯдак (дар ҳолати намояндагони қонунии кӯдак будан ва шахсе, ки дар асоси шартнома кӯдакро тарбия мекунад, ҳуҷҷатҳои ҳуқуқмуайянкунандаи онҳо), инчунин роҳхат аз ҷониби шуъба ва бахшҳои ҳифзи иҷтимоии аҳолӣ додашуда пешниҳод карда шавад.

10. Пас аз ба охир расидани давраи табобат ва ҷавоб шудан аз муассиса аз ҷониби муассиса маълумотнома оид ба табобати кӯдак бо қайд намудани муҳлати табобат ба падару модар ё дигар намояндагони қонунии ноболиғон, инчунин шахсе, ки дар асоси шартнома кӯдакро тарбия мекунад, дода мешавад, ки онҳо уҳдадоранд маълумотномаи мазкурро ба шуъба ва бахшҳои ҳифзи иҷтимоии аҳолии маҳалли истиқомат дастрас намоянд.

11. Барои роҳхати истифоданашуда ҳеҷ гуна ҷуброн пардохт карда намешавад.

3. ТАРТИБИ БА ДАСТ ОВАРДАН ВА ТАҚСИМ КАРДАНИ РОҲХАТ

12. Шакл ва намуди роҳхат аз ҷониби мақоми ваколатдор тасдиқ карда мешавад.

13. Шуъба ва бахшҳои ҳифзи иҷтимоии аҳолӣ охири ҳар нимсола дар асоси аризаҳои воридшуда ва навбати ҷории эҳтиёҷмандон ба мақоми ваколатдор оид ба гирифтани роҳхат дархост пешниҳод менамоянд.

14. Мақоми ваколатдор дархости шуъба ва бахшҳои ҳифзи иҷтимоии аҳолиро дар муҳлати на дертар аз понздаҳ рӯз баррасӣ карда, якҷо бо муассиса роҳхатро омода карда, ба шуъба ва бахшҳои ҳифзи иҷтимоии аҳолӣ дархосткунанда тақсим менамояд. Дар ин бора ба дафтарҳои дахлдор оид ба шумораи роҳхати тақсимкардашуда қайдҳои махсус ворид карда мешаванд.

15. Шуъба ва бахшҳои ҳифзи иҷтимоии аҳолӣ ҳар сол дар шакли муқаррарнамудаи мақоми ваколатдор ҳисоботҳои дахлдорро оид ба истифода гардидан ё нагардидани роҳхати табобатӣ ба мақоми ваколатдор пешниҳод менамоянд.

16. Шуъба ва бахшҳои ҳифзи иҷтимоии аҳолӣ, ки аз тарафи онҳо роҳхат дода шудааст, тавассути ҷамъ овардани маълумотнома оид ба табобати кӯдак истифода гардидан ё нагардидани роҳхатро месанҷанд. Ҳангоми дар асоси роҳхат сари вақт ва дар муҳлати муайянгардида ҳозир нагардидани кӯдакон ба муассиса, шуъба ва бахшҳои ҳифзи иҷтимоии аҳолӣ сабаби онро месанҷанд. Агар барои табобат овардани кӯдак ғайриимкон бошад, роҳхат бозпас гирифта шуда, ба кӯдакони дар навбатбуда супорида мешавад.

4. ТАРТИБИ МАБЛАҒГУЗОРИИ РОҲХАТ

17. Мақоми ваколатдор дар асоси эҳтиёҷоти кӯдакон ба табобати истироҳатгоҳӣ ва курортӣ ҳар сол талаботи маблағгузориро муайян намуда, онро дар буҷети соли молиявии дахлдор пешбинӣ менамояд.

5. МУҚАРРАРОТИ ХОТИМАВӢ

18. Кӯдакон ба табобати истироҳатгоҳӣ ва курортӣ танҳо ҷойгир карда шуда, масъулияти нигоҳубини пурраи онҳо ба зиммаи роҳбарияти муассиса гузошта мешавад.

19. Роҳбарони шуъба ва бахшҳои ҳифзи иҷтимоии аҳолӣ барои бо тартиби дуруст таъмин кардани кӯдакон бо роҳхат масъулияти шахсӣ доранд.