ФАРМОНИ ПРЕЗИДЕНТИ ҶУМҲУРИИ ТОҶИКИСТОН

Дар бораи тартиби ба хизматчиёни давлатӣ додани рутбаҳои тахассусӣ ва иловапулӣ барои онҳо

Мутобиқи моддаи 14 Қонуни Ҷумҳурии Тоҷикистон "Дар бораи хизмати давлатӣ" ва бо мақсади таъмини мувофиқати сатҳи тайёрии касбии хизматчиёни давлатӣ ба талаботи тахассусӣ, ки барои мансабҳои давлатии хизмати давлатӣ муқаррар гардидааст, фармон медиҳам:

1. Низомнома дар бораи тартиби ба хизматчиёни давлатӣ додани рутбаҳои тахассусӣ ва иловапулӣ барои онҳо тасдиқ карда шавад (замима мегардад),

2. Муқаррар карда шавад, ки:

ба хизматчиёни давлати додани рутбаҳои тахассусӣ мутобиқи Қонуни Ҷумҳурии Тоҷикистон "Дар бораи хизмати давлатӣ", ин Низомнома ва талаботи тахассусӣ, ки барои мансабҳои давлатии хизмати давлатӣ мукаррар гардидааст, аз 1 январи соли 2004 ҷорӣ карда мешавад;

ба хизматчиёни давлатие, ки то қабули фармони мазкур ба мансабҳои давлатии хизмати давлатӣ таъин карда шудаанд, рутбаҳои тахассусӣ тибқи тартиби муқарраргардида ва мувофиқ ба мансаби ишғолкардаашон дода мешавад; иловапулӣ барои рутбаҳои тахассусӣ аз рӯзи дода шудани рутбаҳои тахассусӣ пардохта мешавад.

3. Ҳукумати Ҷумҳурии Тоҷикистон маблағгузории хароҷоти пардохти иловапулиҳоро барои рутбаҳои тахассусӣ хизматчиёни давлатӣ дар Буҷети давлатии Ҷумҳурии Тоҷикистон барои соли 2004 ва солҳои минбаъда пешбинӣ намояд.