ТАРТИБИ БАҚАЙДГИРИИ ОГОҲИНОМАҲОИ ГАРАВ ВА ПЕШБУРДИ ФЕҲРИСТИ ЯГОНАИ ДАВЛАТИИ УҲДАДОРИҲОИ ТАЪМИНШУДА

1. МУҚАРРАРОТИ УМУМӢ

1. Тартиби бақайдгирии огоҳиномаҳои гарав ва пешбурди Феҳристи ягонаи давлатии уҳдадориҳои таъминшуда (минбаъд -Тартиби мазкур) дар асоси қисми 8 моддаи 19, қисми 2 моддаи 22 Қонуни Ҷумҳурии Тоҷикистон "Дар бораи гарави молу мулки манқул ва бақайдгирии уҳдадориҳои таъминшуда" ва қисми 8 моддаи 116 Кодекси мурофиавии ҷиноятии Ҷумҳурии Тоҷикистон таҳия шуда, низоми ба қайди давлатӣ гирифтани огоҳиномаҳои гарав ва пешбурди Феҳристи ягонаи давлатии уҳдадориҳои таъминшуда (минбаъд - Феҳристи ягонаи давлатӣ), инчунин тартиби ворид намудани маълумот ба онро муайян мекунад.

2. Тартиби мазкур расмиёте мебошад, ки аз тарафи давлат бо мақсади ба танзим даровардани ҷараёни бақайдгирии огоҳиномаҳои гарав ва бақайдгирии уҳдадориҳои таъминшуда, муқаррар намудани вазъи ҳуқуқии иштирокчиёни бақайдгирии огоҳиномаҳои гарав ва бақайдгирии уҳдадориҳои таъминшуда, инчунин ташаккули манбаи озоди иттилоот оид ба огоҳиномаҳои гарав ва уҳдадориҳои таъминшуда муқаррар карда шудааст.

2. БАҚАЙДГИРИИ УҲДАДОРИҲОИ ТАЪМИНШУДА

3. Уҳдадориҳои таъминшуда уҳдадориҳое эътироф карда мешаванд, ки мутобиқи онҳо ҳуқуқи талабнамоии кредитор нисбат ба қарздор бо усулҳои гуногуни таъмини иҷрои уҳдадориҳо муқаррар карда шудаанд.

4. Тартиби мазкур нисбат ба уҳдадориҳое, ки дар онҳо ҳуқуқи талабнамоии кредитор нисбат ба қарздор бо пешниҳоди молу мулки манқул ба усулҳои гуногун таъмин карда шудаанд, татбиқ карда мешавад (минбаъд - уҳдадориҳои таъминшуда).

5. Уҳдадориҳои таъминшуда бо роҳи бақайдгирии огоҳиномаи гарав тибқи Тартиби мазкур ба қайд гирифта мешаванд.

3. ОГОҲИНОМАИ ГАРАВ ВА ҚОИДАҲОИ УМУМИИ БАҚАЙДГИРИИ ОН

6. Огоҳиномаи гарав - хабари кредитор оид ба ҳуқуқи ӯ ба молу мулки манқули қарздор ё шахсони сеюм, ки мутобиқи Тартиби мазкур ба Феҳристи ягонаи давлатӣ ворид карда мешавад.

7. Бақайдгирии огоҳиномаи гарав бо роҳи ворид намудани маълумот ба Феҳристи ягонаи давлатӣ тавассути пур кардани шакли дахлдори бақайдгирӣ дар сомонаи интернетии Феҳристи ягонаи давлатӣ амалӣ карда мешавад.

8. Огоҳиномаи гарав дар се шакл метавонад ба расмият дароварда шавад:

- огоҳиномаи гарав дар бораи бақайдгирии гарави молу мулки манқул;

-огоҳиномаи гарав дар бораи ворид намудани тағйиру илова ба уҳдадориҳои таъминшудаи бақайдгирифташуда;

- огоҳиномаи гарав дар бораи эътирозҳо.

9. Бақайдгирии огоҳиномаи гарав дар асоси принсипҳои зерин сурат мегирад:

- ихтиёрӣ будани бақайдгирии огоҳиномаи гарав;

- бақайдгирии огоҳиномаи гарав аз ҷониби субъектҳои дар Тартиби мазкур муқарраргардида (минбаъд - кредиторони бақайдгиранда, кредиторони қарздор);

- ба даст овардани ҳуқуқи афзалиятнок аз ҷониби кредитор барои қонеъ гардонидани манфиатҳои худ дар назди кредиторони дигар аз арзиши молу мулки манқули қарздор;

- таъсир нарасонидани бақайдгирии огоҳиномаи гарав ба эътиборнокии аҳде, ки ҳуқуқи кредитор нисбат ба қарздор оид ба қонеъ гардонидани манфиатҳои худ аз молу мулки манқули қарздор асос мегирад;

- хусусияти мустақил доштани қисматҳои огоҳиномаи гарав;

- огоҳиномаи гарав, шакли аҳди муқаррарнамудаи қонунро тағйир намедиҳад, аз ҷумла дар ҳолати бақайдгирии давлатии аҳд.

10. Бақайдгирии огоҳиномаи гарав аз тарафи кредиторони қарздор мустақилона амалӣ карда мешавад.

11. Ба сифати кредиторони қарздор, ки тибқи Тартиби мазкур бақайдгирии огоҳиномаи гаравро метавонанд амалӣ намоянд, субъектони зерин баромад менамоянд:

- гаравгирон;

- кредиторони дигаре, ки ба онҳо молу мулки қарздор барои таъмини иҷрои уҳдадориҳо дода мешавад;

- моликони молу мулки ба ихтиёри қарздор додашуда (минбаъд - кредиторони хусусӣ).

12. Тибқи Тартиби мазкур ба сифати кредиторон инчунин субъектоне эътироф карда мешаванд, ки иштирокчии муносибатҳои дахлдори оммавӣ-ҳуқуқӣ буда, нисбат ба қарздор ҳуқуқи талаб намудани қонеъгардонии манфиатҳои худро, ки аз талаботи хусусияти оммавӣ- ҳуқуқидошта бармеоянд, аз арзиши молу мулки манқули ба қарздор тааллуқдошта доро мебошанд.

Ба сифати чунин кредиторон эътироф карда мешаванд (минбаъд - кредиторони оммавӣ):

- идоракунандагони аз тарафи суд нисбат ба шахсони воқеӣ ва ҳуқуқӣ муфлис таъйиншуда;

- даъвогароне, ки ба фоидаи онҳо ҳалномаи эътибори қонунӣ пайдонамудаи суд дар бораи рӯёнидани молу мулки манқул аз ҳисоби қарздор вуҷуд дорад;

- мақомоти андоз ва гумрук дар ҳолати талаб кардани иҷрои уҳдадориҳои пардохти андозҳо ва дигар пардохтҳои ҳатмӣ ба буҷет;

- мақомоти таҳқиқ ва тафтишот дар ҳолати гузоштани ҳабс ва маҳдудиятҳои дигари ҳуқуқ ба молу мулки қарздор.

13. Огоҳиномаи гарав дар бораи уҳдадориҳои таъминшуда бояд маълумоти зеринро дар бар гирад:

1) нисбат ба шахсони воқеӣ (ҳам кредитор ва ҳам қарздор);

- ном (насаб, ном ва номи падар) ва маҳалли ҷойгиршавии (маҳалли зисти) кредитор ва идоракунандаи гарав, агар чунин шахс таъйин шуда бошад, рақами мушаххаси андозсупоранда;

- ном (насаб, ном ва номи падар), маҳалли ҷойгиршавӣ (маҳалли зист) ва рақами мушаххаси андозсупорандаи қарздор;

2) нисбат ба шахсони ҳуқуқӣ (ҳам кредитор ва ҳам қарздор):

- номи шахси ҳуқуқӣ, маҳалли бақайдгирӣ ва маҳалли ҳақиқии ҷойгиршавии шахси ҳуқуқӣ - кредитор, рақами мушаххаси андозсупоранда;

- номи шахси ҳуқуқӣ, маҳалли бақайдгирӣ ва маҳалли ҳақиқии ҷойгиршавии шахси ҳуқуқӣ - қарздор, рақами мушаххаси андозсупоранда;

3) тавсифи умумии молу мулки манқуле, ки ба сифати мавзӯи гарав ё таъминоти дигар баромад менамояд ва барои мушаххасгардонии он имконият медиҳад. Мушаххасгардонии воситаҳои нақлиёти автомобилӣ бо роҳи нишон додани рақами шахсии воситаи нақлиёт гузаронида мешавад;

4) талаботи дигаре, ки Тартиби мазкур ва санадҳои меъёрии ҳуқуқии Ҷумҳурии Тоҷикистон муқаррар кардаанд.

14. Дар баробари маълумоти дар банди 13 Тартиби мазкур нишондодашуда, огоҳиномаи гарав инчунин метавонад, маълумот дар бораи аҳд, ки асоси ба миён омадани уҳдадории таъминшуда мебошад, дар бар гирад.

15. Баъд аз нишон додани маълумоти дар банди 13 Тартиби мазкур пешбинишуда ҳар як огоҳиномаи гарав ба таври худкор (автоматӣ) дар Феҳристи ягонаи давлатӣ бо нишон додани сана, вақти бақайдгирӣ ва додани рақами махсуси бақайдгирӣ ба қайд гирифта мешавад. Дар бораи бақайдгирии огоҳиномаи гарав фавран ҳисоботи дахлдор дар шакли электронӣ пешниҳод карда мешавад.

4. ТАРТИБИ БАҚАЙДГИРИИ ОГОҲИНОМАИ ГАРАВ АЗ ҶОНИБИ КРЕДИТОРИ ХУСУСӢ

16. Бақайдгирии огоҳиномаи гарав аз ҷониби кредитори хусусӣ тибқи боби 3 Тартиби мазкур ба таври умумӣ сурат мегирад.

5. ТАРТИБИ БАҚАЙДГИРИИ ОГОҲИНОМАИ ГАРАВ АЗ ҶОНИБИ КРЕДИТОРИ ОММАВӢ

§ 1.Тартиби бақайдгирии огоҳиномаи гарав аз ҷониби идоракунандагони аз тарафи суд нисбат ба шахсони воқеӣ ва ҳуқуқии муфлис таъйиншуда

17. Дар ҳолати аз ҷониби суд муфлис эълон карда шудани соҳибкорони инфиродӣ ва шахсони ҳуқуқӣ (минбаъд - муфлис), инчунин аз ҷониби суд муқаррар карда шудани мудир (минбаъд - идоракунанда) барои гузаронидани расмиёти муфлисшавӣ нисбати шахси муфлисшуда идоракунанда метавонад тибқи муқаррароти Тартиби мазкур огоҳиномаи гаравро ба қайд гирад.

18. Бақайдгирии огоҳиномаи гарав аз ҷониби идоракунанда бо назар доштани талаботи боби 3 Тартиби мазкур ба таври зерин сурат мегирад:

- дар қисмати маълумот оид ба кредитор идоракунанда маълумотро оид ба тамоми кредиторони шахси муфлис, ки тибқи муқаррароти қонунгузории ҷории Ҷумҳурии Тоҷикистон муайян карда шудаанд, ворид менамояд;

- дар қисмати маълумот оид ба қарздор идоракунанда маълумотро оид ба муфлис бо дарҷи сана ва рақами санади судӣ оид ба муфлис эълон карда шудани ин шахс ва маълумот оид ба идоракунанда (насаб, ном ва номи падар, маҳалли зист (маҳалли ҷойгиршавӣ) ва рақами мушаххаси андозсупоранда) ворид менамояд;

- дар қисмати молу мулки манқул идоракунанда маълумотро оид ба молу мулке, ки қарздор доро буда, он барои қонеъ намудани манфиатҳои кредиторон равона карда мешавад, ворид менамояд.

§ 2. Тартиби бақайдгирии огоҳиномаи гарав аз ҷониби даъвогароне, ки ба фоидаи онҳо ҳалномаи эътибори қонунӣ пайдонамудаи суд дар бораи рӯёнидани молу мулки манқул аз ҳисоби қарздор вуҷуд дорад

19. Бақайдгирии огоҳиномаи гарав аз ҷониби даъвогаре (даъвогароне), ки ба фоидаи онҳо ҳалномаи эътибори қонунӣ пайдонамудаи суд дар бораи рӯёнидани мол мулки манқул аз ҳисоби қарздор вуҷуд дорад (минбаъд - даъвогар), бо дар назар доштани боби 3 Тартиби мазкур тариқи зайл сурат мегирад:

- дар қисмати маълумот оид ба кредитор даъвогар маълумоти дахлдорро вобаста ба худ ворид менамояд;

- дар қисмати маълумот оид ба қарздор даъвогар маълумотро оид ба қарздор бо дарҷи сана ва рақами ҳалномаи судӣ оид ба рӯёнидани қарз ворид менамояд;

- дар қисмати молу мулки манқул даъвогар маълумотро оид ба молу мулки қарздор, ки тибқи ҳалномаи судии эътибори қонунӣ пайдонамуда рӯёниш ба он равона карда мешавад, ворид менамояд.

20. Дар ҳолате ки тибқи қонунгузории ҷории Ҷумҳурии Тоҷикистон иҷрои ҳалномаи судӣ аз ҷониби иҷрочии мақомоти иҷро амалӣ карда мешавад, иҷрочии мақомоти иҷро бояд ба фоидаи даъвогар огоҳиномаи гаравро тибқи Тартиби мазкур ба қайд гирад.

21. Дар ҳолате ки огоҳиномаи гарав аз ҷониби иҷрочии мақомоти иҷро ба қайд гирифта мешавад. дар қисмати қарздор мушаххасоти ҳуҷҷати иҷро бар иловаи маълумоти дигар бояд дарҷ карда шавад.

§ 3. Тартиби бақайдгирии огоҳиномаи гарав аз ҷониби мақомоти андоз ва гумрук дар ҳолати талаб кардани иҷрои ухдадориҳои пардохти гумрукӣ, андозҳо ва пардохтҳои дигари ҳатмӣ ба буҷет

22. Дар ҳолатҳои пешбининамудаи қонунгузории Ҷумҳурии Тоҷикистон мақомоти андоз ва гумрук барои таъмини иҷрои уҳдадориҳо оид ба пардохти гумрукӣ, андоз ва пардохтҳои дигари ҳатмӣ ба буҷет, ки бе санади судӣ ва мустақилона аз ҷониби мақомоти дарҷгардида метавонанд дар доираи ваколатҳои онҳо амалӣ карда шаванд, огоҳиномаи гаравро метавонанд ба қайд гиранд.

23. Бақайдгирии огоҳиномаи гарав аз ҷониби мақомоти андоз ва гумрук тибқи муқаррароти боби 3 Тартиби мазкур инчунин дар қисмати маълумот дар бораи қарздор иловатан сана ва рақами санади дахлдори мақомоти андоз ва гумрук оид ба татбиқ намудани чораҳои маҷбуран ситонидани пардохтҳои гумрукӣ. андозҳо ва пардохтҳои дигари ҳатмӣ ба буҷет дарҷ карда мешавад.

24. Дар ҳолати аз ҷониби мақомоти андоз ва гумрук талаб кардани иҷрои уҳдадориҳои пардохти гумрукӣ, андозҳо ва пардохтҳои дигари ҳатмӣ ба буҷет дар асоси ҳалномаи судӣ дар қисмати маълумот оид ба қарздор бо дар назар доштани талаботи боби 3 Тартиби мазкур маълумот оид ба санади судӣ дарҷ карда мешавад.

§ 4. Тартиби бақайдгирии огоҳиномаи гарав аз ҷониби мақомоти таҳқиқ ва тафтишот дар ҳолати гузоштани ҳабс ва маҳдудиятҳои дигари ҳуқуқӣ ба молу мулке, ки қарздор эътироф карда мешаванд

25. Дар ҳолатҳои пешбининамудаи қонунгузории Ҷумҳурии Тоҷикистон мақомоти таҳқиқ ва тафтишот дар асоси қарори суд дар бораи ҳабси молу мулки гумонбаршуда, айбдоршаванда ё шахсоне, ки мувофиқи қонун барои кирдорашон аз ҷиҳати моддӣ ҷавобгаранд, барои бақайдгирии огоҳиномаи гарав ваколатдор мебошанд.

26. Мақомоти таҳқиқ ва тафтишот дар муддати то се рӯзи корӣ баъд аз қабул кардани қарори суд ба Вазорати адлияи Ҷумҳурии Тоҷикистон нусхаи санади судиро барои бақайдгирии огоҳиномаи гарав ирсол менамоянд.

27. Вазорати адлияи Ҷумҳурии Тоҷикистон дар асоси муқаррароти боби 3 Тартиби мазкур бо дар назар доштани қоидаҳои зерин огоҳиномаи гаравро дар муддати 3 рӯзи корӣ ба қайд мегирад:

1) дар қисмати маълумот дар бораи кредитор;

- дар ҳолати ба фоидаи давлат минбаъд мусодира карда шудани молу мулки гумонбаршуда, айбдоршаванда ё шахсоне, ки мувофиқи қонун барои кирдорашон аз ҷиҳати моддӣ ҷавобгаранд, маълумот дар бораи мақомоти таҳқиқ ва тафтишот бо нишон додани сана ва рақами қарори суд дарҷ карда мешавад;

- дар ҳолати ба фоидаи ҷабрдида (шахсони воқеӣ ва ҳуқуқӣ) ситонидани молу мулки гумонбаршуда, айбдоршаванда ё шахсоне, ки мувофиқи қонун барои кирдорашон аз ҷиҳати моддӣ ҷавобгаранд, маълумот дар бораи ҷабрдида бо нишон додани сана ва рақами қарори суд дарҷ карда мешавад;

2) дар қисмати маълумот дар бораи қарздор маълумоти дар боби 3 Тартиби мазкур дарҷгардида нисбат ба гумонбаршуда, айбдоршаванда ё шахсоне, ки мувофиқи қонун барои кирдорашон аз ҷиҳати моддӣ ҷавобгаранд, дарҷ карда мешавад.

6. БАҚАЙДГИРИИ ТАҒЙИРОТ БА ОГОҲИНОМАИ ГАРАВ

28. Дар ҳолати иваз шудани маълумоте, ки дар асоси он огоҳиномаи гарав тибқи боби 3 Тартиби мазкур ба қайд гирифта шудааст, аз ҷумла иваз шудани маълумот оид ба қарздор, кредитор, иваз шудани мавзӯи гарав (молу мулк), таъйин, озод ва ё иваз кардани идоракунандаи гарав, ба огоҳиномаи гарави бақайдгирифташуда тағйирот ворид карда мешавад.

29. Бақайдгирии тағйирот ба огоҳиномаи гарав дар асоси муқаррароти банди 13 Тартиби мазкур бо тартиби умумӣ аз ҷониби кредиторони бақайдгирандаи огоҳиномаи гарав амалӣ карда мешавад.

7. БАҚАЙДГИРИИ НОРОЗИГӢ БА ОГОҲИНОМАИ ГАРАВ ВА ТАРТИБИ ХОРИҶ НАМУДАНИ ОГОҲИНОМАИ ГАРАВ АЗ ФЕҲРИСТИ ЯГОНАИ ДАВЛАТӢ

30. Бақайдгирии норозигӣ ба огоҳиномаи гарав ва тартиби хориҷ намудани огоҳиномаи гарав аз Феҳристи ягонаи давлатӣ тибқи муқаррароти пешбининамудаи қонунгузории ҷорӣ сурат мегирад.

8. ДАСТРАСӢ БА ФЕҲРИСТИ ЯГОНАИ ДАВЛАТӢ

31. Дастрасии маълумот дар Феҳристи ягонаи давлатӣ озод мебошад. Ҳар як шахс метавонад дар Феҳристи ягонаи давлатӣ ҷустуҷӯи огоҳиномаҳои гарави бақайдгирифташударо аз рӯи рақами мушаххаси андозсупоранда - қарздор ё рақами бақайдгирии огоҳиномаи гарав анҷом диҳад.

32. Аз рӯи натиҷаҳои ҷустуҷӯ мақоми бақайдгиранда метавонад аз Феҳристи ягонаи давлатӣ дар шакли ҳуҷҷати электронӣ ё дар ҳомили коғазӣ иқтибос пешниҳод намояд.

33. Бақайдгирии уҳдадориҳои таъминшуда тавассути шабакаи интернет амалӣ мегардад. Мақоми бақайдгиранда фаъолияти Феҳристи ягонаи давлатӣ бақайдгирӣ ва ҷустуҷӯии шабакавиро дар сомонаи интернет таъмин намуда, дастрасиро ба он бо нишонии электронӣ: minjust.tj ё www.fehrist.tj пешниҳод менамояд.

34. Муҳлати амали огоҳиномаи бақайдгирифташудаи гарав панҷ сол мебошад. Муҳлати амали огоҳиномаи гарав, ки дар ҳолати дохил кардани маълумот ба Феҳристи ягонаи давлатӣ нишон дода шудааст, то гузашти ин муҳлат тариқи тағйир додани огоҳиномаҳои дахлдор, ки дар Феҳристи ягонаи давлатӣ ҷой дорад, метавонад на дертар аз шаш моҳ то гузаштани муҳлати амали огоҳиномаи ибтидоӣ тамдид карда шавад.

9. МУҚАРРАРОТИ ХОТИМАВӢ

35. Вазорати адлияи Ҷумҳурии Тоҷикистон барои мундариҷа ва саҳеҳии огоҳиномаи гарав масъул намебошад. Чунин масъулият пурра ба кредиторони бақайдгирандаи огоҳиномаи дахлдор вогузор карда мешавад, ба истиснои он огохиномаи гарав, ки аз ҷониби Вазорати адлияи Ҷумҳурии Тоҷикистон мутобиқи талаботи §4 боби 5 Тартиби мазкур ба қайд гирифта мешаванд.

36. Тартиби пешбурди Феҳристи ягонаи давлатӣ ва уҳдадориҳои мақомоти бақайдгиранда бо дастурамали дахлдор, ки бо фармоиши вазири адлияи Ҷумҳурии Тоҷикистон тасдиқ карда мешавад, муқаррар мегардад.

Феҳристи объектҳое, ки бинобар арзиши таърихӣ, фарҳангӣ ё барои амнияти давлатӣ аҳамият доштанашон мавзӯи гарав шуда наметавонанд

1. Ҳуҷҷатҳои бойгоние, ки ба қисми ҷудонашавандаи давлатии Фонди бойгонии миллӣ, фондҳои муассисаҳои илмию тадқиқотӣ дохил карда шуданд.

2. Воситаҳои буҷети давлатии Ҷумҳурии Тоҷикистон, захираҳои байналмилалии Ҷумҳурии Тоҷикистон, Вазорати молия, Бонки миллии Тоҷикистон, фондҳои мақсадноки давлатӣ.

3. Захираҳои давлатии Ҷумҳурии Тоҷикистон.

4. Объектҳо ва молу мулки мудофиаи гражданӣ ва таъиноти сафарбарӣ.

5. Ашёе, ки аз муомилот бароварда шудааст, соҳибӣ ба онҳо манъ карда шудааст, инчунин талаботе. ки гузашти онҳо ба шахсони дигар бо қонун манъ шудааст.

6. Молу мулки дигаре, ки нисбати онҳо бо мақсади таъмини ҳифзи манфиати амнияти давлатӣ татбиқи гарав мувофиқи қонунҳои Ҷумҳурии Тоҷикистон, фармонҳои Президенти Ҷумҳурии Тоҷикистон ва қарорҳои Ҳукумати Ҷумҳурии Тоҷикистонро манъ аст.