Низомномаи Шӯрои ҳамоҳангсозӣ оид ба ҳунармандии назди Ҳукумати Ҷумҳурии Тоҷикистон

1. МУҚАРРАРОТИ УМУМӢ

1. Шӯрои ҳамоҳангсозӣ оид ба ҳунармандии назди Ҳукумати Ҷумҳурии Тоҷикистон (минбаъд - Шӯро) мақоми машваратии назди Ҳукумати Ҷумҳурии Тоҷикистон буда, бо мақсади ҳамоҳангсозӣ ва мониторинги раванди амалисозии сиёсати давлатӣ оид ба ҳунармандӣ таъсис дода шудааст.

2. Ҳайати Шӯро аз ҳисоби намояндагони вазорату идораҳое, ки дар батанзимдарорӣ ва рушди соҳаи ҳунармандӣ иштирок мекунанд, инчунин ташкилотҳое, ки фаъолияти онҳо ба соҳаи ҳунармандӣ равона шудааст, ташкил карда мешавад.

3. Шӯро дар фаъолияти худ Конститутсияи Ҷумҳурии Тоҷикистон, Қонуни Ҷумҳурии Тоҷикистон "Дар бораи ҳунармандӣ", санадҳои дигари меъёрии ҳуқуқии Ҷумҳурии Тоҷикистон, инчунин Низомномаи Шӯрои ҳамоҳангсозӣ оид ба ҳунармандии назди Ҳукумати Ҷумҳурии Тоҷикистон (минбаъд - Низомнома)-ро ба роҳбарӣ мегирад.

2. ВАЗИФАҲОИ АСОСИИ ШӯРО

4. Вазифаҳои асосии Шӯро аз инҳо иборат аст:

- таъмини ҳамкории байниидоравии вазорату идораҳо ва ташкилотҳои дахлдор оид ба масъалаҳои рушди соҳаи ҳунармандӣ;

- таҳияи пешниҳодҳои мувофиқашуда бо вазорату идораҳои дахлдор оид ба масъалаҳои рушди соҳаи ҳунармандӣ;

- таҳлили санадҳои меъёрии ҳуқуқии соҳаи ҳунармандӣ ва ба вазорату идораҳо манзур намудани пешниҳодҳо оид ба масъалаҳои такмил додани санадҳои меъёрии ҳуқуқӣ дар ин самт;

- ба Ҳукумати Ҷумҳурии Тоҷикистон манзур намудани пешниҳодҳо оид ба роҳҳои таҳкими фаъолияти мақомоту сохторҳое, ки дар соҳаи ҳунармандӣ ваколатдоранд;

- амалигардонии дигар вазифаҳо мутобиқи санадҳои меъёрии ҳуқуқии Ҷумҳурии Тоҷикистон.

3. ҲУҚУҚ ВА УҲДАДОРИҲОИ ШӯРО

5. Шӯро барои иҷрои вазифаҳои худ ҳуқуқ дорад:

- фаъолияти вазорату идораҳо ва ташкилотҳоро оид ба масъалаҳои рушди соҳаи ҳунармандӣ- ҳамоҳанг созад;

- аз вазорату идораҳо, мақомоти иҷроияи маҳаллии ҳокимияти давлатӣ ва ташкилотҳои дахлдор маводи заруриро барои иҷрои вазифаҳои Шӯро дархост намояд;

- дар маҷлисҳо ҳисоботи роҳбарони вазорату идораҳои дахлдорро оид ба масъалаҳои рушди соҳаи ҳунармандӣ баррасӣ намояд;

- ҳангоми зарурат гурӯҳҳои кориро ҷиҳати омӯхтани масъалаҳои рушди соҳаи ҳунармандӣ таъсис диҳад;

- натиҷаҳои фаъолияти гурӯҳҳои кориро муҳокима ва баррасӣ намояд.

6. Ба ухдадориҳои Шӯро дохил мешавад:

- ҳамоҳангсозӣ ва мониторинги раванди амалисозии сиёсати давлатӣ оид ба ҳунармандӣ;

- тасдиқи нақшаи чорабиниҳои дахлдор оид ба таъмини барномаҳои давлатӣ дар соҳаи ҳунармандӣ;

- тасдиқи нақшаи кори ҳарсолаи Шӯро;

- пешниҳоди ҳисобот ба Ҳукумати Ҷумҳурии Тоҷикистон аз рӯи натиҷаҳои баҳодиҳӣ ва мониторинг дар соҳаи ҳунармандӣ;

- дигар уҳдадориҳое, ки мутобиқи санадҳои меъёрии ҳуқуқии Ҷумҳурии Тоҷикистон ба уҳдадории Шӯро дохил мешаванд.

4. ҲАЙАТИ ШӯРОИ ҲАМОҲАНГСОЗӢ

7. Ба ҳайати Шӯрои ҳамоҳангсозӣ раис, муовини раис, котиб ва аъзои Шӯрои ҳамоҳангсозӣ дохил мешаванд.

8. Раиси Шӯро:

- ҳамоҳангсозии фаъолияти Шӯроро амалӣ менамояд;

- маҷлисҳои Шӯроро даъват мекунад ва мегузаронад; нақшаи кори Шӯроро дар асоси нақшаҳои кории пешниҳоднамудаи вазорату идораҳо тасдиқ мекунад;

- протоколҳои маҷлисҳо ва дигар ҳуҷҷатҳоро барои иҷро имзо мекунад;

- вазифаҳои аъзои Шӯроро муайян мекунад;

- тибқи тартиби муқарраргардида аз вазорату идораҳо, мақомоти иҷроияи маҳаллиии ҳокимияти давлатӣ ва ташкилотҳои дигар маълумот (мавод) оид ба масъалаҳое, ки ба ваколати Шӯро мансубанд, талаб мекунад;

- ҷиҳати иҷрои қарорҳои Шӯро ба вазорату идораҳои дахлдор, мақомоти иҷроияи маҳаллии ҳокимияти давлатӣ ва дигар ташкилотҳо таклифу пешниҳодҳо манзур менамояд;

- ҳисоботи аъзои Шӯро, намояндагони вазорату идораҳо, мақомоти иҷроияи маҳаллии ҳокимияти давлатӣ ва ташкилотҳоро мешунавад;

- дигар ваколатҳоеро, ки ба фаъолияти Шӯро дахл дошта, дар санадҳои меъёрии ҳуқуқии Ҷумҳурии Тоҷикистон пешбинӣ гардидаанд, амалӣ менамояд.

9. Муовини раиси Шӯро:

- вазифаҳои раиси Шӯроро дар вақти набудани ӯ иҷро менамояд;

- дигар супоришҳои раиси Шӯроро иҷро мекунад.

10. Котиби Шӯро:

- коргузории Шӯроро таъмин менамояд;

- муроҷиатҳо ва дигар ҳуҷҷатҳои ба Шӯро воридшударо омода ва ҷамъбаст намуда, ба раиси Шӯро пешниҳод менамояд;

- якҷо бо аъзои Шӯро ҳуҷҷатҳои заруриро оид ба масъалаҳои баррасишаванда таҳия намуда, лоиҳаи қарорҳоро ба раис ва аъзои Шӯро пешниҳод менамояд;

- протоколҳои маҷлисҳо ва қарорҳои Шӯроро тартиб дода, ҷиҳати амалишавии онҳо ба вазорату идораҳои дахлдор, мақомоти иҷроияи маҳаллии ҳокимияти давлатӣ ва ташкилотҳо пешниҳод менамояд;

- супоришҳои раиси Шӯро ва дигар вазифаҳоро вобаста ба фаъолияти Шӯро тибқи санадҳои меъёрии ҳуқуқии Ҷумҳурии Тоҷикистон иҷро менамояд.

11. Аъзои Шуро:

- дар маҷлисҳои Шӯро ширкат меварзанд;

- таклифҳои мушаххасро барои ворид намудан ба нақшаи корӣ ва рӯзномаи маҷлисҳои Шӯро манзур менамоянд;

- мавод ва лоиҳаҳои қарорҳоро ба маҷлисҳои Шӯро омода менамоянд;

- дар бораи кори анҷомдодаи вазорату идора ё ташкилоте, ки онро намояндагӣ мекунанд, ҳисобот пешниҳод менамоянд;

- ахбори заруриро бо дархости раиси Шӯро ё муовини ӯ пешниҳод мекунанд.

5. ТАШКИЛИ ФАЪОЛИЯТИ ШӯРО

12. Шакли фаъолияти Шӯро маҷлисҳои он мебошад, ки дар як сол на камтар аз ду маротиба гузаронида мешавад.

13. Маҷлисҳои ғайринавбатии Шӯро дар асоси супориши Ҳукумати Ҷумҳурии Тоҷикистон ё бо ташаббуси раиси Шӯро метавонад бо пешниҳоди аксари аъзои Шӯро гузаронида шаванд.

14. Рӯзномаи маҷлис ва маводи баррасишаванда ба аъзои Шӯро на дертар аз се рӯз пеш аз оғози маҷлис дастрас карда мешавад.

15. Раисӣ дар маҷлисҳои Шӯро аз ҷониби раиси Шӯро анҷом дода мешавад ва дар сурати ҳузур надоштани ӯ раисӣ аз ҷониби муовини раиси Шӯро анҷом дода мешавад.

16. Маҷлиси Шӯро ҳамон вақт салоҳиятнок ҳисобида мешавад, ки дар он аз нисф зиёди аъзои он иштирок дошта бошанд.

17. Қарорҳои Шӯро бо тариқи овоздиҳии кушод бо аксарияти овозҳои аъзое, ки дар маҷлиси Шӯро иштирок мекунанд, қабул карда мешаванд. Ҳангоми баробар будани овозҳо овози раис ҳалкунанда мебошад.

18. Вазорату идораҳо, мақомоти иҷроияи маҳаллии ҳокимияти давлатӣ ва дигар ташкилотҳои дахлдор нақшаҳои корӣ ва ҳисоботҳои худро оид ба иҷрои барномаҳои давлатӣ дар соҳаи ҳунармандӣ барои ҷамъбаст ва баррасӣ дар маҷлисҳои Шӯро ба котиби Шӯро ба таври расмӣ пешниҳод менамоянд.

19. Нақшаи кори Шӯро барои давраи муайян дар асоси нақшаҳои кори вазорату идораҳо, мақомоти иҷроияи маҳаллии ҳокимияти давлатӣ ва ташкилотҳои дигари дахлдор бо дар назар доштани пешниҳоди мақоми ваколатдор баъд аз баррасӣ дар маҷлисҳои Шӯро қабул ва тасдиқ карда мешавад.

20. Қарори Шӯро бо протокол ба расмият дароварда шуда, аз ҷониби раис ва котиби Шӯро ба имзо расонида мешавад.

21. Нусхаи протокол ва иттилооти дигари марбут ба фаъолияти Шӯро дар муддати даҳ рӯзи баъди гузаронидани маҷлис ба маълумоти ҳамаи аъзои Шӯро ва дигар шахсони манфиатдор расонида мешавад.

22. Шӯро барои шунидани ҳисобот метавонад ба маҷлисҳои худ роҳбарони вазорату идораҳо, мақомоти иҷроияи маҳаллии ҳокимияти давлатӣ, ташкилотҳо ва дигар шахсони мансабдорро даъват намояд.

23. Шӯро дар мавриди зарурӣ метавонад барои додани хулоса оид ба масъалаҳои дар маҷлисҳои худ баррасишаванда олимон, коршиносон ва мутахассисонро даъват намояд, вале шахсони мазкур дорои ҳуқуқи овоз намебошанд. б. ТАШКИЛИ ФАЪОЛИЯТИ ШӯРО ДАР МАҲАЛҲО

24. Шӯро оид ба ҳамоҳангсозӣ ва рушди ҳунармандӣ дар Вилояти Мухтори Кӯҳистони Бадахшон, вилоятҳо, шаҳри Душанбе ва шаҳру ноҳияҳои тобеи ҷумҳурӣ рушди ҳунармандиро дар маҳалҳо таъмин менамоянд.

25. Вазорати фарҳанги Ҷумҳурии Тоҷикистон, Вазорати маориф ва илми Ҷумҳурии Тоҷикистон, Вазорати саноат ва технологияҳои нави Ҷумҳурии Тоҷикистон, Кумитаи рушди маҳали назди Президенти Ҷумҳурии Тоҷикистон, Кумитаи кор бо занон ва оилаи назди Ҳукумати Ҷумҳурии Тоҷикистон, Кумитаи рушди сайёҳии назди Ҳукумати Ҷумҳурии Тоҷикистон, Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва сохторҳои вилоятии он ба шӯроҳо оид ба ҳамоҳангсозӣ ва рушди ҳунармандии Вилояти Мухтори Кӯҳистони Бадахшон, вилоятҳо, шаҳри Душанбе ва шаҳру ноҳияҳои тобеи ҷумҳурӣ кумаки машваратӣ ва амалӣ мерасонанд.

26. Ҳайати шӯрои маҳаллӣ аз ҳисоби намояндагони сохторҳои вазорату идораҳо, ташкилотҳои дигари дахлдор, ки дар рушди соҳаи ҳунармандӣ иштирок мекунанд, таъсис дода мешавад. Ҳайати Шӯроҳои маҳаллӣ ва низомномаҳои онҳо бо қарори мақомоти иҷроияи маҳаллии ҳокимияти давлатии дахлдор дар мувофиқа бо Шӯро тасдиқ карда мешаванд.

27. Маҷлисҳои шӯроҳо дар Вилояти Мухтори Кӯҳистони Бадахшон, вилоятҳо, шаҳри Душанбе ва шаҳру ноҳияҳои тобеи ҷумҳурӣ на камтар аз як маротиба дар се моҳ гузаронида мешаванд.

Ҳайати Шӯрои ҳамоҳангсозӣ оид ба ҳунармандии назди Ҳукумати Ҷумҳурии Тоҷикистон

Муовини Сарвазири Ҷумҳурии Тоҷикистон (сарпарасти соҳа) - раиси Шӯро;

вазири меҳнат, муҳоҷират ва шуғли аҳолии Ҷумҳурии Тоҷикистон - муовини раиси Шӯро;

сардори раёсати таҳсилоти ибтидоии касбӣ ва таълими калонсолони Вазорати меҳнат, муҳоҷират ва шуғли аҳолии Ҷумҳурии Тоҷикистон - котиби Шӯро.

Аъзои Шӯро:

мушовири бахши ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа;

сардори раёсати рушди иҷтимоии Дастгоҳи иҷроияи Президенти Ҷумҳурии Тоҷикистон;

муовини вазири саноат ва технологияҳои нави Ҷумҳурии Тоҷикистон;

муовини вазири рушди иқтисод ва савдои Ҷумҳурии Тоҷикистон;

муовини вазири фарҳанги Ҷумҳурии Тоҷикистон;

муовини вазири маориф ва илми Ҷумҳурии Тоҷикистон;

муовини раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон;

муовини раиси Кумитаи телевизион ва радиои назди Ҳукумати Ҷумҳурии Тоҷикистон;

муовини раиси Кумитаи рушди маҳали назди Президенти Ҷумҳурии Тоҷикистон;

муовини раиси Кумитаи кор бо занон ва оилаи назди Ҳукумати Ҷумҳурии Тоҷикистон;

муовини раиси Кумитаи рушди сайёҳии назди Ҳукумати Ҷумҳурии Тоҷикистон;

муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон;

муовини раиси Палатаи савдо ва саноати Ҷумҳурии Тоҷикистон;

раиси Федератсияи иттифоқҳои касабаи мустақили Тоҷикистон; раиси Иттифоқи ҳунармандони Тоҷикистон.