Тартиби мустақилона барои истифода қабул намудани бино ва иншоот

1. МУҚАРРАРОТИ УМУМӢ

1. Тартиби мустақилона барои истифода қабул намудани бино ва иншоот (минбаъд - Тартиб) дар асоси талаботи қисми 2 моддаи 73 Кодекси шаҳрсозии Ҷумҳурии Тоҷикистон таҳия шуда, тартиби аз тарафи соҳибмулк (фармоишгар, сармоягузор ё иморатсоз) мустақилона барои истифода қабул намудани бино ва иншооти сохташударо муқаррар менамояд.

2. Дар Тартиби мазкур мафҳумҳои асосии зерин истифода мешаванд:

- бино - объекти фаъолияти шаҳрсозӣ ва низоми сохтмоние, ки аз конструксияҳои борбардор, панҷарагирӣ ё якҷояшуда иборат буда, ҳаҷми сарбастаро ба вуҷуд меоранд ва вобаста ба таъиноти вазифавӣ барои зист ва будубоши одамон, иҷрои намудҳои гуногуни равандҳои истеҳсолӣ таъин гардидаанд;

- иншоот - объектҳои фаъолияти шаҳрсозӣ, низоми ҳаҷмӣ, сатҳӣ ё хаттии сохтмонӣ, ки аз конструксияҳои борбардор, панҷарагирӣ ё якҷояшуда таркиб ёфта, барои иҷрои намудҳои гуногуни равандҳои истеҳсолӣ, нигоҳдории мавод, маснуот, таҷҳизот, инчунин барои будубоши муваққатии одамон, аз як ҷой ба ҷойи дигар гузаронидани одамон, бор ва ғайра таъин гардидаанд;

- таҷдид - маҷмӯи корҳои сохтмонӣ ва чорабиниҳои ташкилию техникӣ вобаста ба тағйир додани нишондодҳои асосии техникию иқтисодии ҳаҷм (шумора, масоҳат ва ё дигар нишондодҳо) - и бино ва иншоот ва ё таъиноти онҳо бо мақсади беҳтар намудани шароити зиндагӣ, сифати хизматрасонӣ ва зиёд намудани андозаи хизматрасонӣ дар онҳо;

- санад - ҳуҷҷати махсуси ибтидоӣ дар бақайдгирии ҳуқуқи соҳибмулкӣ ба бино ва иншооти сохтмонаш анҷомёфта мебошад, ки аз ҷониби соҳибмулк (фармоишгар, сармоягузор ё иморатсоз) ҳангоми ба истифода қабул намудани бино ва иншоот мустақилона тартиб дода мешавад.

2. БИНО ВА ИНШООТЕ, КИ СОҲИБМУЛК МУСТАҚИЛОНА БАРОИ ИСТИФОДА ҚАБУЛ МЕНАМОЯД

3. Соҳибмулк (фармоишгар, сармоягузор ё иморатсоз) ҳуқуқ дорад бино ва иншооти сохтмонашон анҷомёфтаи зерини дар ҳудуди қитъаи замини барои чунин таъинот ҷудошударо, ки тибқи қонунгузорӣ ба қайди давлатӣ гирифта шудааст, мустақилона барои истифода қабул намояд:

- таҷдиди (азнавтарҳрезии, азнавтаҷҳизонидани) бинои истиқоматӣ ва ғайриистиқоматӣ (ба истиснои биноҳои бисёрҳуҷра), ки бо тағйир додани конструксияи борбардор (асосӣ) ва деворҳои бино, системаҳои муҳандисӣ ва таҷҳизот, инчунин азнавбашаклдарории (тағйир додани таъиноти вазифавии) бино вобаста намебошанд;

- иншооти (биноҳои) муваққатӣ;

- иморатҳои хоҷагию маишӣ дар ҳудуди қитъаҳои замини наздиҳавлигӣ, хонаҳои шахсӣ, иморатҳо дар қитъаҳои замини ҷамъиятҳои боғу токпарварӣ ва сабзавоткорӣ;

- азнавтарҳрезии (азнавтаҷҳизонидани) биноҳои таъиноташон ғайриистеҳсолӣ, ки дар биноҳои мавҷудбуда анҷом дода мешавад ва тағйир додани конструксияи (асосии) биноро талаб наменамояд;

- шаклҳои хурди меъморӣ, майдончаҳои варзишии кушода, роҳравҳо, ободонӣ, сангфарш кардани ҳудуди атрофи биноҳо (иншоот) ва тавора кашидани ҳудуди қитъаи замини тибқи ҳуҷҷатҳои тасдиқкунандаи ҳуқуқ, ки ба номи соҳибҳуқуқ ба қайди давлатӣ гирифта шудааст;

- бунёди иморатҳои муваққатӣ дар қитъаҳои замини наздиҳавлигии манзилҳои шахсӣ ё қитъаҳои замини ҷамъиятҳои боғу токпарварӣ ва сабзавоткорӣ, инчунин биноҳои истиқоматӣ ва (ё) хоҷагию маишӣ барои корҳои мавсимӣ ва чаронидани чорво дар чарогоҳ;

- дигаргунсозии биноҳои аз ҷиҳати техникӣ номураккаб, ки барои истифодаи шахсии шаҳрвандон пешбинӣ шудаанд;

- сохтмони биноҳои хоҷагию маишии иловагӣ ба иморатҳои мавҷуда дар заминҳои наздиҳавлигии шахсӣ ё қитъаҳои замини ҷамъиятҳои боғу токпарварӣ ва сабзавоткорӣ, ободонии онҳо, инчунин васли иншооти муваққатии таркибию оҳанин дар ин қитъаҳо метавонад бе мувофиқа бо мақомоти маҳаллии меъморӣ ва шаҳрсозӣ амалӣ карда шавад, агар иншооти зикргардида ба манфиати шахсони дигар ё манфиати давлат дахл накунад.

4. Ҳангоми аз ҷониби соҳибмулк (фармоишгар, сармоягузор ё иморатсоз) мустақилона барои истифода қабул намудани бино ва иншооти сохташуда ҳуҷҷатҳои зерин ҳатмӣ мебошанд:

- ҳуҷҷати тасдиқкунандаи ҳуқуқи истифодаи қитъаи замин, ки аз бақайдгирии давлатӣ гузаштаст;

- ҳуҷҷатҳои лоиҳавӣ ё ангоравӣ, ба истиснои сархатҳои шашум, ҳафтум ва ҳаштуми банди 3 Тартиби мазкур пешбинишуда. 5. Ҳангоми ба анҷом расидани корҳои сохтмонӣ, пас аз гирифтани огоҳиномаи пудратчӣ (агар бино ва иншоот бо усули пудратӣ сохта шавад) оид ба омодагии бино ва иншоот, соҳибмулк (фармоишгар, сармоягузор ё иморатсоз) ба расмиёти мустақилона барои истифода қабул намудани бино ва иншоот шурӯъ менамояд.

6. Соҳибмулк (фармоишгар, сармоягузор ё иморатсоз) ҳангоми мустақилона барои истифода қабул намудани бино ва иншоот уҳдадор аст:

- талаботи ҳуҷҷатҳои лоиҳавӣ ё ангоравӣ ва ҳуҷҷатгузории меъёрию техникиро риоя намояд;

- мутобиқати корҳои сохтмонию васлкунии иҷрошуда, масолеҳи сохтмонии истифодашуда (маснуот, конструксия) ва таҷҳизотро ба ҳуҷҷатҳои лоиҳавӣ ва меъёрҳои давлатӣ таъмин намояд.

7. Бино ва иншооти сохтмонашон анҷомёфта, ки аз ҷониби соҳибмулк (фармоишгар, сармоягузор ё иморатсоз) мустақилона барои истифода қабул карда мешаванд, бояд ба ҳуҷҷатҳои шаҳрсозии тасдиқшуда ва меъёру қоидаҳои шаҳрсозӣ ҷавобгӯ бошанд.

8. Соҳибмулк (фармоишгар, сармоягузор ё иморатсоз) қабули бино ва иншооти дар банди 3 Тартиби мазкур пешбинишударо бо барасмиётдарории санад дар бораи аз ҷониби соҳибмулк мустақилона барои истифода қабул намудани бино ва иншоот (минбаъд - санад) анҷом медиҳад (замима мегардад).

9. Санаи аз ҷониби соҳибмулк (фармоишгар, сармоягузор ё иморатсоз) мустақилона барои истифода қабул намудани бино ва иншоот санаи имзогузории санад ба ҳисоб меравад.

10. Соҳибмулк (фармоишгар, сармоягузор ё иморатсоз) нусхаи санади имзошударо ба мақомоти иҷроияи маҳаллии ҳокимияти давлатӣ ва ё сохторҳои дигари дахлдор барои маълумот ва корбарӣ дар ҳолати дархост шудан, пешниҳод менамояд.

3. МУҚАРРАРОТИ ХОТИМАВӢ

11. Баҳсҳо дар бораи аз ҷониби соҳибмулк (фармоишгар, сармоягузор ё иморатсоз) мустақилона барои истифода қабул намудани бино ва иншоот тибқи санадҳои қонунгузорӣ бо тартиби судӣ ҳал карда мешаванд.

Замима