Низомномаи кумитаи роҳбарикунандаи байниидоравӣ оид ба амалигардонии лоиҳаи "Хизматрасониҳои маҷмӯӣ барои модар ва кӯдак"

1. МУҚАРРАРОТИ УМУМӢ

1. Кумитаи роҳбарикунандаи байниидоравӣ оид ба амалигардонии лоиҳаи "Хизматрасониҳои маҷмӯӣ барои модар ва кӯдак" (минбаъд - кумита) мақоми олии машваратии ҳамоҳангсози фаъолияти лоиҳаи "Хизматрасониҳои маҷмӯӣ барои модар ва кӯдак" ба ҳисоб меравад.

2. Кумита фаъолияти худро дар асоси Конститутсияи Ҷумҳурии Тоҷикистон, Кодекси тандурустии Ҷумҳурии Тоҷикистон, санадҳои меъёрии ҳуқуқии дигари Ҷумҳурии Тоҷикистон, инчунин санадҳои меъёрии ҳуқуқии байналмилалӣ, ки онҳоро Тоҷикистон эътироф кардааст ва низомномаи мазкур амалӣ менамояд.

3. Фаъолияти ташкилию техникӣ ва иттилоотии кумита дар якҷоягӣ бо мақсади ваколатдори давлатӣ дар соҳаи тандурустӣ ва ҳифзи иҷтимоии аҳолӣ амалӣ мегардад.

4. Дар кори кумита бо ҳукуқи машваратӣ метавонанд намояндагони мақомоти иҷроияи маҳаллии ҳокимияти давлатӣ ва созмонҳое, ки дар самти рушди хизматрасониҳои маҷмӯӣ барои модар ва кӯдак фаъолият доранд, иштирок намоянд.

2. ВАЗИФАҲОИ АСОСИИ КУМИТА

5. Вазифаҳои асосии кумита аз инҳо иборатанд:

- таъмини ҳамкории мутақобилаи мақомоти давлатӣ, ташкилотҳои ҷамъиятӣ, шахсони воқеӣ ва ҳуқуқии дигар дар самти рушди хизматрасониҳои маҷмӯӣ барои модар ва кӯдак;

- таҳияи пешниҳодҳо оид ба амалигардонии самтҳои асосии сиёсати давлатӣ дар самти рушди хизматрасониҳои маҷмӯӣ барои модар ва кӯдак;

- ташкили мониторинг ва арзёбии ҳолати рушди хизматрасонии маҷмӯӣ барои модар ва кӯдак дар муассисаҳои тандурустии ноҳияҳои таҷрибавии Ҷумҳурии Тоҷикистон;

- ташкили ҳамкории мақомоти иҷроияи маҳаллии ҳокимияти давлатӣ ва ташкилотҳои тиҷоратӣ, инчунин созмонҳои байналмилалӣ дар самти рушди хизматрасониҳои маҷмӯӣ барои модар ва кӯдак;

- таҳияи тавсия ва пешниҳодҳо ҷиҳати ҷорӣ намудани таҷрибаи кишварҳои дигар барои такмили низоми рушди хизматрасониҳои маҷмӯӣ барои модар ва кӯдак;

- мусоидат дар ҳамоҳангсозии фаъолияти вазорату идораҳо, ташкилотҳои ҷамъиятӣ барои таъмини муносибати мувофиқашуда дар самти рушди хизматрасониҳои маҷмӯӣ барои модар ва кӯдак;

- арзёбии фаъолиятҳои лоиҳа ва натиҷаҳои фосилавӣ дар ҳисоботи семоҳа;

- омӯзиш ва таҳлили вазъи ҳуқуқӣ, иқтисодӣ ва иҷтимоӣ дар самти рушди хизматрасониҳои маҷмӯӣ барои модар ва кӯдак, таҳияи пешниҳодҳо доир ба беҳтар намудани он дар муассисаҳои тандурустии ноҳияҳои таҷрибавии Ҷумҳурии Тоҷикистон;

- баррасӣ ва тасдиқи нақшаҳои корӣ, харид ва молиявии лоиҳа;

- шунидани ҳисоботи агентии иҷрокунанда оид ба раванди амалисозии лоиҳа;

- мусоидат намудан ба ҳалли саривақтии мушкилот ва монеаҳои дар доираи лоиҳа бамиёномада;

- ҳалли масъалаҳои дигари марбут ба самти рушди хизматрасониҳои маҷмӯӣ барои модар ва кӯдак.

3. РОҲБАРИ КУМИТА

6. Ваколатҳои роҳбари кумита:

- даъват ва гузаронидани ҷаласаҳои кумита;

- тасдиқи нақшаи кории кумита;

- шунидани ҳисоботи агентии иҷрокунандаи лоиҳа аз натиҷаҳои тадбирҳои андешидашуда ва вазъияти ҷорӣ вобаста ба ҷараёни амалигардонии лоиҳаи "Хизматрасониҳои маҷмӯӣ барои модар ва кӯдак";

- иҷрои ваколатҳои дигари пешбининамудаи қонунгузории Ҷумҳурии Тоҷикистон.

4. МУОВИНИ РОҲБАРИ КУМИТА

7. Ваколатҳои муовини роҳбари кумита:

- дар мавриди набудани роҳбар маҷлиси кумитаро раисӣ менамояд;

- дар ташкили кори кумита ва омода намудани нақшаи кори он иштирок менамояд;

- иҷрои супоришҳои дигари роҳбари кумитаро таъмин менамояд;

- ҷараёни иҷрои қарорҳои роҳбар ва нақшаи кори кумитаро назорат менамояд;

- ҷиҳати тақвият бахшидан ба амалигардояи дар самти хизматрасониҳои маҷмӯӣ барои модар ва кӯдак чораҳо пешниҳод мекунад.

5. АЪЗОИ КУМИТА

8. Ваколатҳои аъзои кумита:

- иштироки фаъол дар ҷаласаҳон кумита;

- иҷрои саривақтии нақшаи кори кумита ва вазифаҳои аз ҷониби роҳбар гузошташуда;

- омода намудани гузориш мутобиқи нақшаи кори кумита оид ба фаъолияти вазорат, идора ва ташкилот, ки онҳо намояндагӣ мекунанд;

- пешниҳоди таклифҳои мушаххас барои ворид намудан ба нақшаи кори кумита;

- иҷрои супоришҳои дигари алоқаманд ба роҳбари кумита.

5. КОТИБОТИ КУМИТА

9. Барои ҳалли масъалаҳои ҷории фаъолияти кумита дар назди кумита котибот фаъолият менамояд.

10. Ваколатҳои котиботи кумита:

- тартиб додани рӯзнома ва протоколҳои ҷаласаҳои кумита;

- пешниҳоди масъалаҳо барои баррасӣ дар ҷаласаҳои кумита;

- баррасии масъалаҳои вобаста ба амалигардонии қарорҳои кумита, аз ҷумла масъалаҳои ташкили фаъолияти гурӯҳҳои кории соҳавӣ;

- ҳамоҳанг намудани фаъолияти кумитаҳои машваратӣ ва гурӯҳҳои кории соҳавӣ оид ба масъалаҳои рушди хизматрасониҳои маҷмӯӣ барои модар ва кӯдак;

- назорати ҷараёни иҷрои қарорҳои роҳбар ва нақшаҳои кори кумита;

- омода намудани маълумот оид ба натиҷаҳои мониторинг ва арзёбии ҳолати татбиқи рушди хизматрасониҳои маҷмӯӣ барои модар ва кӯдак;

- иҷрои супоришҳои дигари алоқаманд ба роҳбари кумита.

11. Қарорҳои кумита дар шакли протокол ба расмият дароварда, аз ҷониби роҳбар ва ҳамоҳангсози миллии котиботи кумита имзо карда мешаванд.

7. ТАШКИЛИ КОРИ КУМИТА

12. Мақомоти кории кумита котиботи кумита, ҳамоҳангсози миллии котиботи кумита, мақоми ваколатдори давлатӣ дар самти хизматрасониҳои маҷмӯӣ барои модар ва кӯдак мебошанд, ки ба кумита оид ба масъалаҳои рушди хизматрасониҳои маҷмӯӣ барои модар ва кӯдак маълумоти зарурӣ пешниҳод менамоянд.

13. Ҳамоҳангсози миллии котиботи кумита, мақоми ваколатдори давлатӣ дар самти хизматрасониҳои маҷмӯӣ барои модар ва кӯдак ҳамоҳангсозӣ ва арзёбии фаъолияти сохторҳои дахлдорро оид ба амалигардонии қарорҳои кумита ва санадҳои меъёрии ҳуқуқии дар самти хизматрасониҳои маҷмӯӣ барои модар ва кӯдак қабулгардидаро анҷом медиҳанд.

14. Кумита мутобиқи вазифаҳои асосии ба зиммааш гузошташуда аз ҳисоби аъзои худ, ҳамчунин аз ҳисоби намояндагони мақомоту ташкилотҳои ба ҳайати кумита дохилнашуда гурӯҳҳои кории соҳавиро оид ба самтҳои фаъолияти худ таъсис медиҳад.

15. Ҷаласаҳои кумита тибқи нақшаи тасдиқшуда на камтар аз ду маротиба дар як сол гузаронида мешаванд. Дар ҳолати зарурӣ ҷаласаи ғайринавбатӣ гузаронида мешавад.

16. Ҷаласаҳои кумита дар сурати иштирок доштани на камтар аз ду як ҳиссаи ҳайати он эътибор пайдо мекунанд.

17. Қарорҳои кумита оид ба масъалаҳои баррасишаванда бо аксарияти овозҳо аз шумораи ҳайати иштироккунанда дар шакли протокол қабул карда мешаванд.

18. Қарорҳои кумита хусусияти тавсиявӣ дошта, ба вазорату идораҳо, мақомоти иҷроияи маҳаллии ҳокимияти давлатӣ ва ташкилотҳо, новобаста аз шакли ташкилию ҳуқуқии онҳо пешниҳод карда мешаванд.

19. Лоиҳаи ҳуҷҷатҳо оид ба масъалае, ки дар ҷаласаи кумита баррасӣ мегардад, аз тарафи вазорат, идора, ташкилоти дахлдор, ки бо ташаббуси он масъалаи мазкур пешниҳод гардидааст, таҳия карда мешавад.

8. ВАКОЛАТИ ҲАМОҲАНГСОЗИ МИЛЛИИ КОТИБОТИ КУМИТА

20. Ваколатҳои ҳамоҳангсози миллии котиботи кумита:

- таъмини иттилоотию таҳлилӣ ва ташкилию техникии фаъолияти кумитаи роҳбарикунандаи байниидоравӣ;

- тартиб додани лоиҳаҳои нақшаҳои корӣ ва барои мувофиқа ба аъзои кумита ва дигар ташкилотҳои дахлдор пешниҳод намудани онҳо;

- ташкили заминаи таҳия ва ворид намудани пешниҳодҳо ба нақшаи кори кумита;

- таҳияи лоиҳаҳои мувофиқашудаи қарорҳои кумита ва ба роҳбари кумита пешниҳод намудани онҳо;

- назорат, таҳлили рафти иҷрои нақшаҳо ва қарорҳои кумита ва пешниҳоди маълумот ба роҳбари кумита аз натиҷаи онҳо;

- иҷрои супоришҳои дигари роҳбари кумита.

Ҳайати кумитаи роҳбарикунандаи байниидоравӣ оид ба амалигардонии лоиҳаи "Хизматрасониҳои маҷмӯӣ барои модар ва кӯдак"

- муовини Сарвазири Ҷумҳурии Тоҷикистон, сарпарасти соҳа роҳбари кумита;

- вазири тандурустӣ ва ҳифзи иҷтимоии аҳолии Тоҷикистон - муовини роҳбари кумита;

- муовини якуми вазири тандурустӣ ва ҳифзи иҷтимоии аҳолии Ҷумҳурии Тоҷикистон - котиби масъули кумита.

Аъзои кумита:

- сардори раёсати рушди иҷтимоии Дастгоҳи иҷроияи Президенти Ҷумҳурии Тоҷикистон;

- муовини вазири молияи Ҷумҳурии Тоҷикистон;

- муовини вазири рушди иқтисод ва савдои Ҷумҳурии Тоҷикистон;

- муовини вазири маориф ва илми Ҷумҳурии Тоҷикистон;

- муовини якуми раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон;

- муовини раиси Кумитаи кор бо занон ва оилаи назди Ҳукумати Ҷумҳурии Тоҷикистон.