Низомномаи Комиссияи эвакуатсионии Ҷумҳурии Тоҷикистон

1. МУҚАРРАРОТИ УМУМӢ

1. Комиссияи эвакуатсионии Ҷумҳурии Тоҷикистон (минбаъд - Комиссия) мақоми Ҳукумати Ҷумҳурии Тоҷикистон ва мақоми идора дар низоми мудофиаи граждании Ҷумҳурии Тоҷикистон мебошад.

2. Комиссия бо мақсади ташкили омодагӣ ва гузаронидани ҷойгаркунонӣ, эвакуатсияи аҳолӣ ва арзишҳои моддӣ ҳангоми ба амал омадани ҳолатҳои фавқулоддаи дорои хусусияти табиӣ ва техногенӣ, инчунин ҳангоми таҳдиди истифодаи воситаҳои ҳозиразамони зарбазананда аз тарафи душман таъсис дода мешавад.

3. Комиссия дар фаъолияти худ Конститутсияи Ҷумҳурии Тоҷикистон, Қонуни Ҷумҳурии Тоҷикистон "Дар бораи мудофиаи гражданӣ", дигар санадҳои меъёрии ҳуқуқии Ҷумҳурии Тоҷикистон оид ба масъалаҳои мудофиаи гражданӣ, санадҳои ҳуқуқии байналмилалие, ки Тоҷикистон онҳоро эътироф кардааст, инчунин Низомномаи мазкурро ба роҳбарӣ мегирад.

4. Комиссия дар доираи ваколатҳои худ бо вазорату идораҳо, мақомоти иҷроияи маҳаллии ҳокимияти давлатӣ, мақомоти худидоракунии шаҳрак ва деҳот, корхонаю муассисаҳо новобаста аз шакли моликият ҳамкорӣ мекунад.

2. ҲУҚУҚ ВА ВАЗИФАҲОИ АСОСИИ КОМИССИЯ

5. Вазифаҳои асосии Комиссия аз инҳо иборатанд:

- ташкил ва ба роҳ мондани сиёсати ягонаи давлатӣ дар соҳаи эвакуатсияи аҳолӣ ва арзишҳои моддӣ;

- ҳамоҳангсозии фаъолияти мақомоти ҳокимияти давлатӣ, вазорату идораҳо дар таҳияи санадҳои меъёрии ҳуқуқӣ оид ба масъалаҳои эвакуатсия;

- муайян намудани самтҳои асосӣ, такмили ва рушди минбаъдаи барномаҳо оид ба эвакуатсия аз минтақаҳои хавфнок ҳангоми рӯй додани ҳолатҳои фавқулодда;

- таҳияи лоиҳаи барномаҳои мақсаднок ва илмию техникие, ки барои эвакуатсияи аҳолӣ аз минтақаҳои хавфнок дар ҳолати таҳдиди бавуҷудоии ҳолатҳои фавқулодда равона гардидаанд;

- ҳамоҳангсозии фаъолияти мақомоти эвакуатсионӣ дар ҳолатҳои шадид;

- муайян намудани самтҳои асосии ҳамкориҳои байналмилалӣ дар соҳаи эвакуатсияи аҳолӣ.

6. Комиссия ҳуқуқ дорад:

- бо супориши Ҳукумати Ҷумҳурии Тоҷикистон бевосита роҳбарии гузаронидани чорабиниҳои эвакуатсиониро анҷом диҳад;

- мувофиқи тартиби муқарраргардида лоиҳаи санадҳои меъёрии ҳуқуқиро оид ба чорабиниҳои эвакуатсионӣ ҷиҳати баррасӣ ва тасдиқ ба Ҳукумати Ҷумҳурии Тоҷикистон пешниҳод намояд;

- ахбори шахсони мансабдори вазорату идораҳо, мақомоти иҷроияи ҳокимияти давлатӣ ва масъалаи марбут ба ваколати онҳоро дар мавриди ҳолатҳои фавқулоддаи дорои хусусияти табиӣ ва техногенӣ шунавад;

- доир ба масъалаҳои омода ва амалӣ намудани чорабиниҳои эвакуатсионӣ маълумот талаб намояд;

- мутахассисони вазорату идораҳо, корхонаву муассисаҳоро новобаста аз шакли моликият (дар мувофиқа бо роҳбарони онҳо) барои иҷрои корҳои таҳлилӣ ва дигар корҳо оид ба масъалаҳои чорабиниҳои эвакуатсионӣ ҷалб намояд;

- дар ҳолати ҷалби сармоягузориҳо ва кумакҳои башардӯстона ба маҷлисҳои Комиссия намояндагони ташкилотҳои ҷамъиятӣ ва байналмилалиро даъват намояд;

- дар замони ҷанг оид ба масъалаҳои асосие, ки ба фаъолияти он марбут мебошанд, гурӯҳҳои корӣ таъсис диҳад ва тартиби кори онҳоро муайян намояд.

3. УҲДАДОРИҲОИ КОМИССИЯ

7. Раиси Комиссия:

- фаъолияти Комиссияро роҳбарӣ менамояд;

- маҷлисҳои Комиссияро даъват намуда, масъалаҳои рӯзномаи маҷлисро тартиб дода, оид ба иҷрои масъалаҳои баррасигардида ба аъзои Комиссия дастуру супориш медиҳад;

- сана, макон ва вақти гузаронидани маҷлиси Комиссияро муқаррар менамояд;

- бо дар назар доштани пешниҳодҳои аъзои Комиссия рӯзномаи маҷлиси Комиссияро тасдиқ менамояд;

- уҳдадориҳои вазифавии аъзои Комиссияро тасдиқ менамояд;

- дигар вазифаҳоро тибқи қонунгузории Ҷумҳурии Тоҷикистон иҷро менамояд.

8. Ҳангоми роҳбарии бевосита амалиёт ҳангоми гузаронидани чорабиниҳои эвакуатсионӣ дар ҳолатҳои зарурӣ ба раиси Комиссия ҳуқуқ дода мешавад:

- захираҳои зарурии одамон, воситаҳои нақлиётӣ, наҷотдиҳӣ, тиббӣ, қувваю воситаҳои вазорату идораҳо, корхонаю муассисаҳои Ҷумҳурии Тоҷикистонро ҷалб намояд;

- бо ин мақсад захираю манбаъҳои зарурии моддию техникӣ, тиббӣ, озуқаворӣ ва ғайраро истифода барад.

4. ТАРТИБИ ТАШКИЛ ВА ФАЪОЛИЯТИ КОРИ КОМИССИЯ

9. Комиссия фаъолияти худро мутобиқи нақшаи корие, ки дар маҷлиси Комиссия қабул ва аз ҷониби раиси он тасдиқ шудааст, ба анҷом мерасонад. Маҷлисҳои Комиссия аз рӯи зарурат, на камтар аз як маротиба дар як сол гузаронида мешаванд. Қарорҳои Комиссия протокол карда мешаванд ва ба шахсони масъул ба тариқи нусха (иқтибос) расонида мешаванд.

10. Иҷрои протоколҳои маҷлисҳои Комиссия, қарору фармоишҳое, ки аз рӯи натиҷаҳои баррасии масъалаҳо вобаста ба ҳолатҳои фавқулоддаи дорои хусусияти табиӣ ва техногенӣ дар доираи ваколатҳояш қабул намудааст, барои вазорату идораҳо, корхонаю муассисаҳои Ҷумҳурии Тоҷикистон, сарфи назар аз тобеияти идоравиашон, ҳатмӣ мебошад.

11. Ташкили фаъолияти маҷлисҳои Комиссияро котиби Комиссия амалӣ менамояд.

12. Котиби Комиссия:

- тайёрии маҷлисҳои Комиссияро ташкил мекунад, таъминоти техникии кори онро амалӣ менамояд;

- лоиҳаи нақшаҳои кори Комиссияро таҳия намуда, бо аъзои Комиссия мувофиқа менамояд;

- коргузории Комиссияро ба роҳ монда, протоколи маҷлисро тартиб медиҳад;

- расонидани қарорҳои қабулшудаи Комиссияро то вазорату идораҳо, мақомоти иҷроияи маҳаллии ҳокимияти давлатӣ, ташкилотҳои ғайридавлатӣ, бахши хусусӣ ва ҷомеаи шаҳрвандӣ таъмин намуда, назорати татбиқи онҳоро ташкил менамояд;

- вазифаҳои дигарро тибқи қонунгузории Ҷумҳурии Тоҷикистон иҷро менамояд.

13. Таъминоти кори ташкилию техникии Комиссияро котиби Комиссия амалӣ менамояд.

14. Вазорату идораҳо, мақомоти иҷроияи маҳаллии ҳокимияти давлатӣ ва корхонаю муассисаҳо дар муҳлатҳои муқарраргардида ба раиси Комиссия маълумоти дахлдорро пешниҳод менамоянд.

15. Комиссия оид ба масъалаҳои вогузоршуда ҳар сол моҳи декабр ба Ҳукумати Ҷумҳурии Тоҷикистон маълумот пешниҳод менамояд.

16. Раисони комиссияҳои эвакуатсионии вазорату идораҳое, ки ба ҳайати Комиссия шомил нагардидаанд, инчунин мақомоти иҷроияи маҳаллии ҳокимияти давлатӣ дар маҷлисҳои Комиссия ҳангоми баррасии масъалаҳои дахлдор бо ҳуқуқи аъзои ин Комиссия иштирок менамоянд.

Ҳайати Комиссияи эвакуатсионии Ҷумҳурии Тоҷикистон

Раиси Комиссия - муовини Сарвазири Ҷумҳурии Тоҷикистон (сарпарасти соҳа);

муовини якуми раиси Комиссия - муовини якуми раиси Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон;

муовини раиси Комиссия - муовини вазири меҳнат, муҳоҷират ва шуғли аҳолии Ҷумҳурии Тоҷикистон;

котиби Комиссия - сармутахассиси раёсати мудофиа ва тартиботи ҳуқуқии Дастгоҳи иҷроияи Президенти Ҷумҳурии Тоҷикистон.

муовини вазири кишоварзии Ҷумҳурии Тоҷикистон;

муовини вазири корҳои дохилии Ҷумҳурии Тоҷикистон;

муовини вазири маориф ва илми Ҷумҳурии Тоҷикистон;

муовини вазири молияи Ҷумҳурии Тоҷикистон;

муовини вазири мудофиаи Ҷумҳурии Тоҷикистон;

муовини вазири нақлиёти Ҷумҳурии Тоҷикистон;

муовини вазири рушди иқтисод ва савдои Ҷумҳурии Тоҷикистон;

муовини вазири саноат ва технологияҳои нави Ҷумҳурии Тоҷикистон;

муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон;

муовини вазири энергетика ва захираҳои оби Ҷумҳурии Тоҷикистон

муовини вазири фарҳанги Ҷумҳурии Тоҷикистон;

муовини раиси Кумитаи меъморӣ ва сохтмони назди Ҳукумати Ҷумҳурии Тоҷикистон;

муовини раиси Кумитаи ҳифзи муҳити зисти назди Ҳукумати Ҷумҳурии Тоҷикистон;

муовини раиси Кумитаи давлатии идораи замин ва геодезии Ҷумҳурии Тоҷикистон;

сармутахассиси раёсати рушди иҷтимоии Дастгоҳи иҷроияи Президенти Ҷумҳурии Тоҷикистон;

муовини директори Агентии захираҳои моддии давлатии назди Ҳукумати Ҷумҳурии Тоҷикистон;

муовини директори Агентии беҳдошти замин ва обёрии назди Ҳукумати Ҷумҳурии Тоҷикистон;

муовини сардори Саридораи геологияи назди Ҳукумати Ҷумҳурии Тоҷикистон;

муовини сардори Хадамоти алоқаи назди Ҳукумати Ҷумҳурии Тоҷикистон;

муовини раиси Бонки миллии Тоҷикистон.