Низомномаи гурӯҳи роҳбарикунандаи байниидоравӣ оид ба амалигардонии лоиҳаи "Тақвияти таҳсилоти касбӣ-техникӣ ва омӯзиш"-и назди Ҳукумати Ҷумҳурии Тоҷикистон

1. МУҚАРРАРОТИ УМУМӢ

1. Гурӯҳи роҳбарикунандаи байниидоравӣ оид ба татбиқи лоиҳаи "Тақвияти таҳсилоти касбӣ-техникӣ ва омӯзиш"-и назди Ҳукумати Ҷумҳурии Тоҷикистон (минбаъд - гурӯҳ) мақоми олии машваратӣ ҳамоҳангсоз дар соҳаи рушди таҳсилоти касбии техникӣ ва омӯзиш дар Ҷумҳурии Тоҷикистон ба ҳисоб меравад.

2. Гурӯҳ фаъолияти худро дар асоси Конститутсияи Ҷумҳурии Тоҷикистон, қонунҳои Ҷумҳурии Тоҷикистон "Дар бораи маориф", "Дар бораи таҳсилоти ибтидоии касбӣ", "Дар бораи таҳсилоти олии касбӣ ва таҳсилоти касбии баъди муассисаи олии таълимӣ", "Дар бораи таҳсилоти калонсолон", Стратегияи миллии рушди маориф дар Ҷумҳурии Тоҷикистон то соли 2020, дигар санадҳои меъёрии ҳуқуқии Ҷумҳурии Тоҷикистон, инчунин санадҳои ҳуқуқии байналмилалӣ, ки онҳоро Тоҷикистон эътироф кардааст ва низомномаи мазкур амалӣ менамояд.

3. Фаъолияти ташкилию техникӣ ва иттилоотии гурӯҳ дар якҷоягӣ бо мақоми ваколатдори давлатӣ дар соҳаи таҳсилоти касбии техникӣ ва омӯзиш амалӣ мегардад.

4. Дар кори гурӯҳ бо ҳуқуқи машваратӣ метавонанд намояндагони мақомоти иҷроияи маҳаллии ҳокимияти давлатӣ ва созмонҳое, ки дар соҳаи рушди соҳаи таҳсилоти касбии техникӣ ва омӯзиш фаъолият доранд, иштирок намоянд.

2. ВАЗИФАҲОИ АСОСИИ ГУРӯҲ

5. Вазифаҳои асосии гурӯҳ, аз инҳо иборатанд:

- таъмини ҳамкории мутақобилаи мақомоти давлатӣ, ташкилотҳои ҷамъиятӣ, корхонаҳо, дигар шахсони воқеӣ ва ҳуқуқӣ дар соҳаи таҳсилоти касбии техникӣ ва омӯзиш;

- таҳияи пешниҳодҳо оид ба амалигардонии самтҳои асосии сиёсати давлатӣ дар соҳаи таҳсилоти касбии техникӣ ва омӯзиш, ҷалби сармоягузорӣ ва истифодаи самараноки иқтидори соҳаи таҳсилоти касбии техникӣ ва омӯзиш дар Ҷумҳурии Тоҷикистон;

- муайян намудани самтҳои афзалиятноки сиёсати давлатӣ дар соҳаи таҳсилоти касбии техникӣ ва омӯзиш, ташаккул ва рушди он дар Ҷумҳурии Тоҷикистон;

- омӯзиш ва таҳлили вазъи ҳуқуқӣ, иқтисодӣ ва иҷтимоӣ дар самти рушди таҳсилоти касбии техникӣ ва омӯзиш, таҳияи пешниҳодҳо доир ба ташкили он дар Ҷумҳурии Тоҷикистон;

- ҳамоҳангсозии фаъолияти мақомоти иҷроияи маҳаллии ҳокимияти давлатӣ ва ташкилотҳои тиҷоратӣ дар соҳаи таҳсилоти касбии техникӣ ва омӯзиш;

- ташкили мониторинг ва арзёбии ҳолати рушди соҳаи таҳсилоти касбии техникӣ ва омӯзиш дар Ҷумҳурии Тоҷикистон;

- ташкили ҳамкории мақомоти иҷроияи маҳаллии ҳокимияти давлатӣ ва ташкилотҳои тиҷоратӣ, инчунин созмонҳои байналмилалӣ дар соҳаи таҳсилоти касбии техникӣ ва омӯзиш;

- ба Ҳукумати Ҷумҳурии Тоҷикистон манзур намудани пешниҳодот оид ба ислоҳот ва рушди низоми таҳсилоти ибтидоии касби техникӣ, тавсия ва пешниҳодҳои вазорату идораҳо ва ташкилотҳои ҷамъиятӣ оид ба ислоҳот ва рушди соҳаи таҳсилоти ибтидоии касби техникӣ, тавсияҳо нисбати навкунии заминаи ҳуқуқии соҳаи таҳсилоти ибтидоии касбии техникӣ, тавсияҳо ҷиҳати беҳтар намудани инфрасохтори таҳсилоти ибтидоии касбию техникии мутобиқи талаботи стандартҳои нав, пешниҳодот оид ба таҳияи низоми мувофиқашудаи таъмини сифати таҳсилоти касбӣ, аз ҷумла дастур оид ба гузаронидани аккредитатсия, аттестатсия, иҷозатномакунонӣ, ташкили менеҷменти сифат ва низоми самарабахши мониторинг ва арзёбӣ, тавсияҳо оид ба беҳтар намудани нишондиҳандаҳои сифатӣ ва миқдории таҳсилоти ибтидоии касбию техникӣ, тавсияҳо оид ба идоракунии сохтор ва пешбурди роҳбарии муассисаи таҳсилоти ибтидоии касбии техникӣ, пешниҳодот оид ба стандартҳои салоҳияти касбӣ;

- ҳамоҳангсозии ҷараёни самараноки ҳамкории марказҳои таълимӣ ва соҳаҳо, аз ҷумла таҷрибаомӯзии таълимӣ ва истеҳсолии хонандагону донишҷӯён;

- ҳамоҳангсозии ҷараёни судманди илм ва истеҳсолот, инчунин ҷараёни таъмини мутахассисони ҷавон бо ҷойи кор;

- таҳияи тавсия ва пешниҳодҳо ҷиҳати ҷорӣ намудани таҷрибаи дигар кишварҳо барои такмили низоми таҳсилоти ибтидоии касбии техникӣ;

- мусоидат дар ҳамоҳангсозии фаъолияти вазорату идораҳо, ташкилотҳои ҷамъиятӣ барои таъмини муносибати мувофиқашуда дар соҳаи таҳсилоти ибтидоии касбию техникии мутобиқ ба талаботи бозори меҳнат;

- ба Ҳукумати Ҷумҳурии Тоҷикистон манзур намудани пешниҳодҳо оид ба тақвият бахшидани масъулият ва ҷалби самараноки корфармоён дар таҳсилоти ибтидоии касби техникӣ;

- ҳалли дигар масъалаҳои марбут ба таҳсилоти ибтидоии касбии техникӣ.

3. РОҲБАРИ ГУРӯҲ

6. Ваколатҳои роҳбари гурӯҳ:

- даъват ва гузаронидани ҷаласаҳои гурӯҳ;

- тасдиқи нақшаи кории гурӯҳ;

- шунидани ҳисоботи аъзои гурӯҳ ва дигар ниҳодҳои дахлдор аз натиҷаи тадбирҳои андешида ва вазъияти ҷорӣ вобаста ба ҷараёни амалигардонии лоиҳаи "Тақвияти таҳсилоти касбӣ-техникӣ ва омӯзиш", стратегияҳо, консепсияҳо, барномаҳои соҳавӣ ва дигар санадҳои меъёрии ҳуқуқӣ ва қарорҳои гурӯҳ;

- иҷрои ваколатҳои дигари пешбининамудаи қонунгузории Ҷумҳурии Тоҷикистон.

4. МУОВИНИ РОҲБАРИ ГУРӯҲ

7. Муовини роҳбари гурӯҳ:

- дар мавриди набудани роҳбар маҷлиси гурӯҳро раисӣ менамояд;

- дар ташкили кори гурӯҳ ва омода намудани нақшаи кори он иштирок менамояд;

- иҷрои дигар супоришҳои роҳбари гурӯҳро таъмин менамояд;

- ҷараёни иҷрои қарорҳои роҳбар ва нақшаи кори гурӯҳро назорат менамояд;

- ҷиҳати беҳбуд бахшидан ба амалигардонии рушди соҳаи таҳсилоти касбии техникӣ ва омӯзиш дар Ҷумҳурии Тоҷикистон чораҳо пешниҳод мекунад.

5. АЪЗОИ ГУРӯҲ

8. Ваколатҳои аъзои гурӯҳ:

- иштироки фаъол дар ҷаласаҳои гурӯҳ;

- иҷрои саривақтии нақшаи кори гурӯҳ ва вазифаҳои аз ҷониби роҳбар гузошташуда;

- омода намудани гузориш мутобиқи нақшаи кори гурӯҳ оид ба фаъолияти вазорат, идора ва ташкилоту муассисаҳое, ки онҳо намояндагӣ мекунанд;

- пешниҳоди таклифҳои мушаххас барои ворид намудан ба нақшаи кори гурӯҳ;

- иҷрои дигар супоришҳои роҳбари гурӯҳ.

6. КОТИБОТИ ГУРӯҲ

9. Барои ҳалли масъалаҳои ҷории фаъолияти гурӯҳ Вазорати меҳнат, муҳоҷират ва шуғли аҳолии Ҷумҳурии Тоҷикистон ва Бонки Осиёии Рушд тибқи озмун ҳамоҳангсози миллии котиботи гурӯҳро интихоб мекунанд, ки рӯзномаро омода намуда, протоколҳои ҷаласаро тартиб медиҳад.

10. Ваколатҳои котиботи гурӯҳ:

- пешниҳоди масъалаҳо барои баррасӣ дар маҷлисҳои гурӯҳ;

- баррасии масъалаҳои вобаста ба амалигардонии қарорҳои гурӯҳ, аз ҷумла масъалаҳои ташкили фаъолияти гурӯҳҳои кории соҳавӣ;

- ҳамоҳанг намудани фаъолияти гурӯҳҳои машваратӣ ва гурӯҳҳои кории соҳавӣ оид ба масъалаҳои рушди соҳаи таҳсилоти касбии техникӣ ва омӯзшӣ дар Ҷумҳурии Тоҷикистон;

- назорати ҷараёни тҷрои қарорҳои роҳбар ва нақшаҳои кори гурӯҳ;

- омода намудани маълумот оид ба натиҷаҳои мониторинг ва арзёбии ҳолати татбиқи рушди соҳаи таҳсилоти касбии техникӣ ва омӯзиш дар Ҷумҳурии Тоҷикистон;

- иҷрои дигар супоришҳои роҳбари гурӯҳ.

11. Қарорҳои гурӯҳ дар шакли протокол ба расмият дароварда шуда, аз ҷониби роҳбар ва ҳамоҳангсози миллии котиботи гурӯҳ имзо карда мешавад.

7. ТАШКИЛИ КОРИ ГУРӯҲ

12. Мақомоти кории гурӯҳ котиботи гурӯҳ, ҳамоҳангсози миллии котиботи гурӯҳ, мақоми ваколатдори давлатӣ дар соҳаи таҳсилоти касбии техникӣ ва омӯзиш мебошанд, ки ба гурӯҳ оид ба масъалаҳои рушди таҳсилоти касбии техникӣ ва омӯзиш дар Ҷумҳурии Тоҷикистон маълумоти зарурӣ пешниҳод менамоянд.

13. Ҳамоҳангсози миллии котиботи гурӯҳ, мақоми ваколатдори давлатӣ дар соҳаи таҳсилоти касбии техникӣ ва омӯзиш ҳамоҳангсозӣ ва арзёбии фаъолияти сохторҳои дахлдорро оид ба амалигардонии қарорҳои гурӯҳ ва санадҳои меъёрии ҳуқуқии соҳаи таҳсилоти касбии техникӣ ва омӯзиш анҷом медиҳанд.

14. Гурӯҳ мутобиқи вазифаҳои асосии ба зиммааш гузошташуда аз ҳисоби аъзои худ, ҳамчунин аз ҳисоби намояндагони мақомоту ташкилотҳои ба ҳайати гурӯҳ дохилнашуда гурӯҳҳои кории соҳавиро оид ба самтҳои фаъолияти худ таъсис медиҳад.

15. Ҷаласаҳои гурӯҳ тибқи нақшаи тасдиқшуда на камтар аз ду маротиба дар як сол гузаронида мешаванд. Дар ҳолати зарурӣ ҷаласаи ғайринавбатӣ гузаронида мешавад.

16. Ҷаласаҳои гурӯҳ дар сурати ширкат доштани на камтар аз се як ҳиссаи ҳайати он эътибор пайдо мекунанд.

17. Қарорҳои гурӯҳ оид ба масъалаҳои баррасишаванда бо аксарияти овозҳо аз шумораи ҳайати иштироккунанда дар шакли протокол қабул карда мешаванд.

18. Қарорҳои гурӯҳ хусусияти тавсиявӣ дошта, ба вазорату идораҳо, мақомоти иҷроияи маҳаллии ҳокимияти давлатӣ ва ташкилотҳо новобаста аз шакли ташкилию ҳуқуқии онҳо пешниҳод мешаванд.

19. Лоиҳаи ҳуҷҷатҳо оид ба масъалае, ки дар ҷаласаи гурӯҳ баррасӣ мегардад, аз тарафи вазорат, идора, ташкилот ва ё муассисаи дахлдор, ки бо ташаббуси он масъалаи мазкур пешниҳод гардидааст ё гурӯҳи кории бо ин мақсад ташкилёфта, таҳия карда мешавад.

8. ВАКОЛАТИ ҲАМОҲАНГСОЗИ МИЛЛИИ КОТИБОТИ ГУРӯҲ

20. Ваколатҳои ҳамоҳангсози миллии котиботи гурӯҳ:

- таъмини иттилоотию таҳлилӣ ва ташкилию техникии фаъолияти гурӯҳи роҳбарикунандаи байниидоравӣ;

- тартиб додани лоиҳаҳои нақшаҳои корӣ ва барои мувофиқа ба аъзои гурӯҳ ва дигар ташкилотҳои дахлдор пешниҳод намудани онҳо;

- ташкили таҳия ва ворид намудани пешниҳодҳо ба нақшаи кории гурӯҳ;

- таҳия ва барои имзо ба роҳбари гурӯҳ пешниҳод намудани қарорҳои қабулнамудаи гурӯҳ;

- таҳлил ва назорати рафти иҷрои нақшаҳо ва қарорҳои гурӯҳ ва пешниҳоди маълумот ба роҳбари гурӯҳ аз натиҷаи онҳо;

- иҷрои дигар супоришҳои роҳбари гурӯҳ.

Ҳайати гурӯҳи роҳбарикунандаи байниидоравӣ оид ба татбиқи лоиҳаи "Тақвияти таҳсилоти касбӣ-техникӣ ва омӯзиш"-и назди Ҳукумати Ҷумҳурии Тоҷикистон

Муовини Сарвазири Ҷумҳурии Тоҷикистон - роҳбари гурӯҳ;

вазири меҳнат, муҳоҷират ва шуғли аҳолии Ҷумҳурии Тоҷикистон - муовини роҳбари гурӯҳ;

ҳамоҳангсози миллии котиботи гурӯҳ - котиби масъули гурӯҳ.

Аъзои гурӯҳ:

муовини якуми вазири саноат ва технологияҳои нави Ҷумҳурии Тоҷикистон;

муовини якуми вазири энергетика ва захираҳои оби Ҷумҳурии Тоҷикистон;

муовини якуми вазири тандурустӣ ва ҳифзи иҷтимоии аҳолии Ҷумҳурии Тоҷикистон;

муовини вазири рушди иқтисод ва савдои Ҷумҳурии Тоҷикистон;

муовини вазири маориф ва илми Ҷумҳурии Тоҷикистон;

муовини вазири кишоварзии Ҷумҳурии Тоҷикистон;

муовини вазири меҳнат, муҳоҷират ва шуғли аҳолии Ҷумҳурии Тоҷикистон;

муовини вазири молияи Ҷумҳурии Тоҷикистон;

муовини вазири нақлиёти Ҷумҳурии Тоҷикистон;

муовини якуми раиси Кумитаи давлатии сармоягузорӣ ва идораи амволи давлатӣ;

муовини якуми раиси Кумитаи кор бо занон ва оилаи назди Ҳукумати Ҷумҳурии Тоҷикистон;

муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон;

муовини раиси Федератсияи иттифоқҳои касабаи мустақили Тоҷикистон;

муовини раиси Иттиҳодияи корфармоёни Ҷумҳурии Тоҷикистон.