Низомномаи Кумитаи бехатарии озуқавории назди Ҳукумати Ҷумҳурии Тоҷикистон

БОБИ 1. МУҚАРРАРОТИ УМУМӢ

1. Кумитаи бехатарии озуқавории назди Ҳукумати Ҷумҳурии Тоҷикистон (минбаъд - Кумита) мақоми иҷроияи марказии ҳокимияти давлатӣ буда, функсияҳои махсуси иҷроиявӣ, назоратӣ, иҷозатдиҳӣ ва функсияҳои дигари дар соҳаҳои байторӣ, фитосанитарӣ ва карантини растаниҳо, ҳимояи растаниҳо, тухмӣ ва зотпарварӣ муқарраргардидаро анҷом медиҳад.

2. Кумита фаъолияти худро дар асоси Конститутсияи Ҷумҳурии Тоҷикистон, санадҳои меъёрии ҳуқуқии Ҷумҳурии Тоҷикистон ва санадҳои ҳуқуқии байналмилалии эътирофнамудаи Ҷумҳурии Тоҷикистон, инчунин Низомномаи мазкур ба роҳ мемонад.

3. Кумита фаъолияти худро дар ҳамкорӣ бо мақомоти иҷроияи марказии ҳокимияти давлатӣ, мақомоти иҷроияи маҳаллии ҳокимияти давлатӣ, ташкилотҳо, идораҳо, ташкилотҳои ҷамъиятӣ ва байналмилалӣ анҷом медиҳад.

4. Кумита шахси ҳуқуқӣ буда, дорои муҳр бо тасвири Нишони давлатии Ҷумҳурии Тоҷикистон ва сабти номи худ бо забони давлатӣ, муҳру штампҳо ва бланкҳои намунаи муқарраргардида, бланкҳои нишондор, инчунин суратҳисоби дар асоси қонунгузории Ҷумҳурии Тоҷикистон кушодашуда мебошад.

БОБИ 2. ВАКОЛАТҲОИ КУМИТА

5. Дар соҳаи байторӣ:

- таҳия ва тасдиқи стандартҳо, муқаррарот, дастурамалҳо ва тавсияҳо оид ба масъалаҳои байторӣ;

- ҳифзи ҳудуди мамлакат аз воридшавии барангезандаҳои бемориҳои карантинии ҳайвонот;

- муайян намудани тартиби гузаронидани экспертизаи байторию санитарӣ, сертификатсиякунонии маҳсулоти чорводорӣ ва ҳайвонот, воситаҳои биологӣ ва дорувории байторӣ;

- назорати ҳолати байторию санитарии нуқтаҳои савдои ҳайвонот дар бозорҳо, ярмаркаҳо, музоядаҳо ва намоишгоҳҳои ҳайвонот;

- ташкил намудани назорати воридот, содирот, истеҳсол, истифода, коркард, нигоҳдорӣ, хариду фурӯш, транзити маҳсулот ва ашёи хоми чорводорӣ, бо мақсади пешгирии пайдоишу паҳншавии бемориҳои махсусан хатарноки ҳайвонот ва зооантропонозҳо;

- дар амал ҷорӣ намудани комёбиҳои илмию техникии соҳаи байторӣ;

- ривоҷ додани ҳамкории байналмилалӣ дар соҳаи байторӣ;

- риояи талаботу меъёрҳои экспертизаи байторию санитарии маҳсулоти чорводорӣ ва ашёи хоми ҳайвонот, маҳсулоти хӯрокворӣ;

- бақайдгирӣ ва назорати сифати маводи ташхисӣ, профилактикӣ ва табобатии байтории воридшаванда;

- дар ҳолати зарурӣ бемонеа ворид шудан ба ҳудуди иттиҳодияҳо, корхонаҳо, муассисаҳо, ташкилотҳо ва ҷамъиятҳо, новобаста аз шакли моликияташон, инчунин ташкилотҳои байналмилалӣ ва маҳалли зисти шаҳрваидон, дар доираи ваколатҳои худ гирифтани маълумоти зарурӣ аз онҳо мутобиқи қонунҳои амалкунанда;

- ба субъектҳои байторӣ, чорводорӣ, коркарди маҳсулот ва ашёи хоми чорводорӣ, новобаста аз шакли моликияташон, инчунин шаҳрвандон додани супориши дахлдор доир ба бартараф намудани вайронкунии ошкоргардидаи қонунгузории байторӣ;

- манъ кардани фурӯш ва истифодаи маводи биологӣ ва дорувории байтории пастсифат ва ба номгӯи феҳристи давлатӣ дохилнагардида;

- мувофиқи тартиби муқаррарнамудаи қонунгузорӣ боздошт ва мусодира кардани чорво ва маҳсулоти чорвое, ки аз минтақаи карантинӣ бе иҷозат бароварда мешаванд;

- тибқи тартиби муқаррарнамудаи қонунгузорӣ дар ҳолатҳои эпизоотӣ, офатҳои табиӣ бо пешниҳоди сертификат ва шаҳодатномаи бақайдгирии мамлакати истеҳсолкунанда додани иҷозат ба воридкунандагони дорувории байторӣ, иловаҳои хӯроки ҳайвонот;

- дар асоси баҳодиҳии хавфҳо дар ҳама объектҳои назоратӣ, гузаронидани санҷишу назорат ва баровардани амрномаҳои иҷрояшон ҳатмӣ. Дар ҳолати зарурӣ сафарбар намудани муассисаҳои давлатии тобеъ барои таъмини назорати давлатӣ;

- гузаронидани мониторинг ва баҳодиҳии хавфҳо ҳангоми муайян намудану банақшагирии амалҳо, тадбирҳо ва тақсимоти захираҳо;

- дар доираи салоҳияти худ таҳия намудани қоидаҳои фаъолият ва пешниҳоди таклифҳо дар бораи ташкил ва бекор кардани маҳдудиятҳои байторӣ (озод аз бемориҳои сироятӣ, таҳдидкунанда, таҳти назорат

қарордошта) дар ҳудуди Ҷумҳурии Тоҷикистон ва маҳдудиятҳои дигаре, ки ба пешгирии паҳншавӣ ва бартараф намудани манбаи бемориҳои сироятӣ ва омавии ҳайвонот равона гардидаанд. Таъмин ва ба роҳ мондани тартиби назорати молҳои дахолатнопазир ҳангоми интиқол;

- тартиб додани феҳристи ягонаи объектҳои назорати субъектҳои хоҷагидор, ки дар соҳаи таъминоти озуқаворӣ (корхонаҳои истеҳсолу коркарди гӯшту шир, маҳсулоти дигар аз ҳайвонот, коркарди хӯроки чорво, иловаҳои хӯроки ҳайвонот ва ғайра) фаъолият мекунанд;

- таҳия ва амалисозии барномаҳои маҷмӯавии давлатӣ, тадбирҳои илмӣ ва махсус оид ба пешгирӣ ва бартараф кардани манбаъҳои хатар;

- муайян намудани тартиби гузаронидани экспертизаи байторӣ ва байторию санитарӣ;

- назорати масъалаҳои босифат гузаронидани бордоркунии сунъӣ ва қобилияти такрористеҳсолкунии чорво. Сертификатсияи маҳсулоти чорводорӣ ва ашёи хоми ҳайвонот. Назорати сифат, бехатарии хӯроки чорво, маводи табобатӣ ва профилактикии ватанию хориҷӣ;

- ташкил ва гузаронидани санҷишҳо, ташхисҳо, таҳлил ва арзёбии зарурӣ, инчунин тадқиқотҳои илмӣ оид ба масъалаҳои назорат дар соҳаи муқарраргардидаи фаъолият;

- ҷорӣ намудани низоми ҳаммонандкунӣ, бақайдгирии ҳайвонот ва хоҷагиҳои чорводорӣ ва назорати ҷойивазкунии чорво;

- назорати боқимондаҳо ва контаминантҳо дар маҳсулоти озуқавории истеҳсоли ватанӣ ва воридотӣ, маҳсулоти чорводорӣ ва ашёи хоми ҳайвонот;

- гузаронидани ташхиси байторию санитарӣ пеш аз забҳи чорво, инчунин ташхиси сифати маҳсулоти чорво пас аз забҳ;

- таҳия ва тасдиқи нақшаи чорабиниҳо оид ба пешгирӣ ва бартарафсозии бемориҳои ҳайвонот дар ҳолатҳои фавқулодда;

- назорати нигоҳдорӣ ва фурӯши дорувориҳои байторӣ ва биологӣ;

- асосноккунӣ ва ҳамасола таҳия намудани пешниҳодот оид ба зарурати маблағгузории чорабиниҳои байторӣ аз ҳисоби маблағҳои буҷети давлатӣ;

- таъсис ва таъмини фаъолияти низоми иттилоотӣ;

- омода ва нашри бюллетенҳои ҳармоҳа ва солона оид ба пешгӯӣ ва таҳдиди паҳншавии бемориҳои махсусан хавфноки ҳайвонот, таҳияи саривақтии дастуру тавсияҳо дар соҳаи ҳимояи солимии ҳайвонот;

- таъмин намудани омодагии мобилизатсионӣ;

- ташкили омӯзиш, такмили ихтисоси кормандони соҳаи байторӣ, гузаронидани семинарҳо, намоишҳо ва муҳокима доир ба мавзӯъҳои касбӣ дар соҳаи байторӣ ва беҳдошти байторӣ;

- дар доираи фаъолияти худ таъсис додани марказҳои машваратӣ ва мақомоти экспертӣ (шӯроҳо, комиссияҳо, гурӯҳҳо);

- тибқи тартиби муқарраргардида ҷалб намудани муассисаҳои илмӣ, ташкилотҳои дигар, олимону мутахассисон барои таҳия ва такмили масъалаҳои марбут ба соҳаи муқарраргардидаи фаъолият;

- тибқи тартиби муқарраршуда намояндагӣ намудани Ҷумҳурии Тоҷикистон дар ташкилотҳои байналмилалӣ дар соҳаи таъмини амнияти озуқаворӣ;

- бастани қарордодҳои давлатӣ ҷиҳати гузаронидани корҳои илмию тадқиқотӣ барои эҳтиёҷоти давлатӣ дар соҳаи муқарраргардидаи фаъолият;

- интихоб ва сафарбар намудани мутахассисон ба кишварҳои хориҷӣ барои аккредитатсияи байтории таҳвилгари эҳтимолӣ ҳангоми воридоти маҳсулот;

- бо мақсади пешгирӣ аз паҳншавии бемориҳои махсусан хавфноки ҳайвонот, дар мувофиқа бо мақомоти дахлдори давлатҳои ҳамсоя, хадамоти гумрукӣ ва сарҳадии Ҷумҳурии Тоҷикистон гузаронидани санҷиш ва иҷрои корҳои назоратӣ дар ҳудуди 3-километраи минтақаҳои наздисарҳадӣ ва ҳудудҳои назди дарёҳо, кӯлу обанборҳо, каналҳо, фурудгоҳҳо, толорҳо, истгоҳҳои роҳи оҳан;

- додани аттестати байторию санитарии шароити истеҳсолӣ ба шахсони воқеию ҳуқуқӣ, ки ба забҳ, истеҳсол, коркард, нигоҳдорӣ, фурӯши гӯшт, маҳсулоти гӯштӣ, ашёи хоми ҳайвонот, воридоту содироти он дар ҳудуди ҷумҳурӣ машғуланд;

- таҳияи низоми ягонаи стандартизатсия ва сертификатсияи маводи байтории ватанӣ ва назорати сертификатсиякунии давлатии маводи байтории хориҷӣ;

- дар мавриди зарурӣ ҷалб намудани мутахассисони байторӣ, кормандони муассисаҳои байторӣ, кормандони муассисаҳои илмӣ, илмию тадқиқотӣ ҷиҳати муайян намудани бемориҳои ҳайвонот ва сабабҳои пайдоиши онҳо;

- тақсимоти лимитҳои марказонидашуда дар буҷети давлатӣ барои сохтмон, таҷдид, барқарорсозии заминаи истеҳсолию техникӣ, хариди техника, асбобҳо ва таҷҳизотҳои махсусгардонидашудаи байторӣ пешбинигардида;

- амалӣ намудани дигар ваколатҳое, ки санадҳои меъёрии ҳуқуқӣ муқаррар намудаанд.

6. Дар соҳаи фитосанитарӣ ва карантини растанӣ:

- анҷом додани назорат ва танзими фаъолият дар соҳаи фитосанитарӣ ва карантини растанӣ;

- гузаронидани назорати карантинӣ, ташхиси лаборатории маҳсулоти растанӣ ва маводи дигари воридотӣ ва содиротӣ, аз ҷумла растанӣ ва маҳсулоти растанӣ, ки дар дохили бағоҷ, муросилоти почта ва борҳои дастии мусофирон ворид ё содир карда мешаванд;

- ташкили солимгардонӣ ва безарарсозии карантинии маҳсулоти растанӣ ва маводи дигар, инчунин воситаҳои нақлиёте, ки аз давлатҳои дигар ва аз минтақаҳои таҳти карантин эълоншудаи ҷумҳурӣ ворид мегарданд;

- сари вақт ошкор намудани зараррасонҳои карантинӣ, касалиҳои растанӣ ва алафҳои бегона, гузаронидани таҳқиқи назоратии киштзорҳо, ҷангалзорҳо ва ғайра, ҷойҳои нигоҳдорӣ ва коркарди маҳсулоти растанӣ;

- муқаррар намудани минтақаҳои карантинӣ дар ҳудуди ҷумҳурӣ;

- назорати фаъолияти парваришгоҳҳои карантинӣ, қитъаҳои навъсанҷӣ, гармхонаҳое, ки санҷиши ҳолати карантинии тухмӣ ва растаниҳои аз давлатҳои дигар, инчунин минтақаҳои дар ҳудуди ҷумҳурӣ таҳти карантин эълонгардида воридшавандаро анҷом медиҳанд;

- таҷдиди назар ва тасдиқ намудани номгӯи зараррасонҳои карантинӣ, барангезандаҳои касалиҳои карантинии растанӣ, алафҳои бегонаи карантинӣ, ки нисбат ба онҳо чорабиниҳои давлатӣ оид ба карантини растанӣ муқаррар ва амалӣ карда мешаванд;

- дар мувофиқа бо вазорату идораҳои дахлдор нашр намудани номгӯи объектҳои биологие, ки аз Ҷумҳурии Тоҷикистон баровардани онҳо манъ мебошад;

- таҳия ва тасдиқ намудани қоидаҳои карантини дохилӣ ва берунии растанӣ;

- назорати киштзорҳо ва ниҳолзорҳо дар парваришгоҳҳо, муассисаҳои илмию тадқиқотӣ, хоҷагиҳои тухмипарварӣ ва хоҷагиҳои парвариши гулҳои ороишӣ бо мақсади таъмини истеҳсоли тухмӣ ва кӯчати озод аз зараррасонҳои карантинӣ, касалиҳои растанӣ ва алафҳои бегонаи карантинӣ;

- амалӣ намудани назорати доимии риояи ҳатмии маҳдудиятҳо ва гузаронидани чорабиниҳои карантинӣ аз ҷониби роҳбарони корхонаҳо, ташкилоту муассисаҳо, хоҷагиҳо, инчунин шаҳрвандон;

- тибқи тартиби муқарраргардида ташкил ва гузаронидани конференсияҳо, семинару намоишгоҳҳо ва чорабиниҳои дигар;

- мувофиқи тартиби муқарраргардида дар асоси шартнома ҷалб намудани мутахассисон барои гузаронидани чорабиниҳо;

- дар ҳолати зарурӣ тибқи тартиби муқарраргардида аз ҳисоби маблағҳои буҷети давлатӣ харидорӣ намудани фумигантҳо ва пеститсидҳои дигар;

- таъсис додани дастаҳои махсуси фумигатсионӣ, дастаҳои сайёри бо техника, дастгоҳҳо ва воситаҳои ҳифзи растанӣ ҷиҳозонидашуда оид ба рафъ ва пешгирии паҳншавии зараррасонҳои карантинӣ, касалиҳои растанӣ ва алафҳои бегонаи карантинӣ;

- интихоб ва роҳбарӣ намудан ба фаъолияти мутахассисони карантини растанӣ, ки тибқи тартиби муқарраргардида ба мамлакатҳои хориҷӣ барои анҷом додани санҷиши карантинии ҳаҷми калони борҳои карантинии воридотӣ фиристонида мешаванд;

- дар доираи маблағҳои пешбинигардида ташкил ва гузаронидани курсҳои махсус барои кормандон;

- ҳангоми иҷрои вазифаҳои хизматӣ бемонеа ворид шудан ба ҳудуди истгоҳҳои роҳи оҳан, саристгоҳҳои (вокзалҳои) автобусҳо, фурудгоҳҳо, бандарҳои дарёӣ, почтамтҳо, анборҳо, элеваторҳо, вагонҳои мусофирбар ва боркаш, ҳавопаймоҳо, ба ҳудуди намоишгоҳҳо, боғҳои ботаникӣ, пажӯҳишгоҳҳо, стансияҳои таҷрибавӣ, хоҷагиҳо, бозорҳо, корхонаҳо, муассисаю ташкилотҳо, инчунин ба корхонаҳое, ки ба захиракунӣ, коркард ва фурӯши тухмӣ, растанӣ ва маҳсулоти растанӣ, новобаста аз шакли моликияташон, машғул мебошанд ва қитъаҳои наздиҳавлигии шаҳрвандон;

- тартиб додани протоколҳо, санадҳо, амрномаҳо оид ба вайронкунии қоидаҳои карантини растанӣ нисбат ба вайронкунандагони қонуну қоидаҳо;

- мувофиқи тартиби муқаррарнамудаи қонун аз шахсони ҳуқуқӣ ва воқеӣ ситонидани зиёне, ки онҳо дар натиҷаи вайрон кардани қоидаҳои карантини растанӣ расонидаанд;

- муайян намудани манбаъ ва минтақаи бо объектҳои карантинӣ олудашуда бо мақсади эълон намудани карантин;

- пешниҳод намудани дархост ба мақомоти ҳокимияти маҳаллӣ дар бораи эълон ё бардоштани минтақаи карантинӣ дар хоҷагиҳо, ҳудуд ё қисми ҳудуди корхонаҳо, муассисаҳо ё ташкилот, маҳалҳои аҳолинишин ё ноҳияҳо;

- тибқи тартиби муқаррарнамудаи қонунгузорӣ боздошт ё мусодира намудани тухмӣ, растанӣ ва маҳсулоти растанӣ, ки аз минтақаи карантин эълонгардида бе иҷозат бароварда шудаанд;

- додани иҷозатномаи воридоти карантинӣ барои воридоти маҳсулоти таҳти карантин қарордошта;

- дар сурати ба миён омадани таҳдиди воридшавию паҳншавии объектҳои карантинӣ аз давлатҳои ҳамсоя, дар мувофиқа бо мақомоти сарҳадот ва гумрук ҷорӣ намудани тартиботи иловагии маҳдудкунии воридоти маҳсулоти таҳти карантин;

- додани иҷозат барои воридоти маҳсулоти таҳти карантин тавассути нуқтаҳои сарҳадӣ, гумрукӣ, почтамтҳо ва ғайра пас аз санҷиши карантин, дар сурати мавҷуд будани сертификатҳои фитосанитарию карантинӣ ё мавҷуд будани муҳр дар ҳуҷҷатҳои воридотӣ ё содиротӣ;

- ҳангоми ошкор намудани объектҳои карантинӣ дар маҳсулоти воридотӣ, онро ҳатман безарар (фумигатсия) карда, бо мақсади ошкор

намудани олудагии ниҳонӣ ва солимгардонии маҳсулоти мазкур онро ба парваришгоҳҳои интродуксионӣ - карантинӣ фиристонанд ё дар ҳолати зарурӣ ба коркарди техникӣ равона намоянд;

- аз ташкилотҳо ва шахсони алоҳидаи содиркунанда талаб намудани хабари расмӣ на дертар аз 30 рӯз то муҳлати интиқоли маҳсулоти таҳти карантинӣ ва на дертар аз 15 рӯз то бор карда фиристодан барои санҷиш пешниҳод намудани маҳсулот;

- бо мақсади сари вақт иҷро намудани чорабиниҳои карантинӣ аз роҳбарони хоҷагиҳо, корхонаҳо, муассисаҳо ва ташкилотҳо, новобаста аз шакли моликияташон, талаб кардани ҷудо намудани кормандони ваколатдор;

- мувофиқи тартиби муқарраргардида аз маъмурияти истгоҳҳои роҳи оҳан, саристгоҳҳои (вокзалҳои) автобусҳо, фурудгоҳҳо, бандарҳои дарёӣ, почтамтҳо, хоҷагиҳо, муассисаҳо ва ғайра аз ҳисоби соҳибони бор талаб намудани ҷудо кардани воситаҳои нақлиёт, анбор, бинои хизматӣ, маводи ёрирасон ва коргарони ёрирасон;

- назорати ҳамаи мошинҳо, таҷҳизот ва техникаи кишоварзӣ, тухмӣ, растаниҳо ва маҳсулоти дигари растанӣ, ки аз хориҷа ворид ё ба хориҷа содир карда мешаванд, нақлиёт (ҳавопаймоҳо, вагонҳо, контейнерҳо, мошинҳо, автобусҳо ва ғайра), ки аз хориҷа ворид мегардад ё аз ҷумҳурӣ хориҷ мешавад, инчунин аз ҳудуди ҷумҳурӣ ба тариқи транзит мегузарад, дар минтақаи секилометраи ҳамҳудуди сарҳади давлатӣ, минтақаҳои ҳамҳудуди дарёҳо, кӯлҳо, обанборҳо, каналҳо, бандарҳо, фурудгоҳҳо, роҳҳои оҳан, вокзалҳо, роҳҳои мошингард;

- назорати воситаҳои бастабандӣ, зарфҳо, ки аз растанӣ ё аз пӯсту пашм тайёр карда шудаанду ба ҷумҳурӣ ворид ва ё аз ҷумҳурӣ содир мешаванд, бағоҷ, зарф, борҷома, борхалтаи дастии мусофирон, ки ба хориҷа содир ва ё аз хориҷа ворид карда мешаванд, инчунин муросилоти почтавӣ, ки растанӣ, маҳсулоти растанӣ, маҳсулоти чарму пашм доранд;

- назорати таъмини ҳифзи ҳудуди Ҷумҳурии Тоҷикистон аз воридоти касалию ҳашароти зараррасон аз кишварҳои дагар ва паҳншавии онҳо (касалию зараррасонҳои карантинӣ ва ғайрикарантинӣ), инчунин организмҳо, растаниҳо, воридот, интиқол ва содироти молҳои хавфноки соҳаи ба маводи. таҳти назорати фитосанитарӣ буда, организмҳо ва растаниҳои аз ҷиҳати генетикӣ тағйирдодашуда;

- таҳия ва амалисозии барномаҳои маҷмӯавии давлатӣ, тадбирҳои илман асоснок ва махсус оид ба пешгирӣ ва бартараф кардани хатари нуқтаҳои пайдоишу паҳншавии воситаҳои таҳдидкунанда;

- ташкил намудани гузаронидани санҷишҳо, экспертиза, таҳлил ва арзёбии зарурӣ, инчунин тадқиқотҳои илмӣ оид ба амалӣ намудани назорат дар соҳаи муқарраргардидаи фаъолият;

- назорати ҳолати фитосанитарии ҳосили зироат пеш аз ҷамъоварӣ, ҳангоми нигоҳдорӣ, тамғагузорӣ ва ба фурӯш баровардани он;

- омода ва нашри бюлетенҳои ҳармоҳа, солона оид ба пешгӯӣ ва таҳдиди паҳншавии организмҳои зараррасони карантинию ғайрикарантинӣ ва касалиҳои зироатҳои кишоварзӣ;

- амалӣ намудани ваколатҳои дигаре, ки санадҳои меъёрии ҳуқуқӣ муқаррар намудаанд.

7. Дар соҳаи тухмӣ:

- назорати навъҳо, тухмӣ ва ниҳолҳо;

- назорат ва танзими фаъолият дар соҳаи тухмипарварӣ;

- сертификатсияи тухмӣ ва ниҳолҳо;

- ташкил ва амалӣ намудани назорати навъҳо ва тухмии гурӯҳҳои алоҳидаи тухмӣ;

- назорати сифати ҳар як маҷмӯи тухмӣ ва ниҳоли барои фурӯш пешбинишуда;

- гузаронидани таҳлилҳои назоратӣ, муқоисавӣ, мураккаби тухмӣ, инчунин экспертизаи он;

- назорати фаъолияти хоҷагиҳои тухмипарварӣ ва ниҳолпарварӣ бо мақсади таъмини истеҳсоли тухмӣ ва ниҳолҳо;

- омода намудани меъёрҳои илман асоснокшудаи сифати тухмӣ ва таҷҳизоти техникии ташхиси сифати тухмӣ барои истифода дар ҳудуди Ҷумҳурии Тоҷикистон;

- амалӣ намудани фаъолияти ташкилӣ ва методӣ барои таъмини риояи стандартҳои давлатӣ ва қоидаҳои байналмилалӣ ҳангоми ташхиси сифати тухмӣ;

- ташкил ва назорати стандартикунонии дохилӣ ва байналмилалии тухмӣ, ниҳолҳо ва усулҳои ҳаммонандкунии онҳо, банақшагирӣ ва идоракунии ин фаъолият;

- назорати риояи стандартҳои давлатии тухмӣ ва ниҳолҳо аз ҷониби хоҷагиҳо, ташкилотҳо ва шахсони воқеие, ки бо истеҳсол, такрористеҳсол, коркард, воридот, содирот, фурӯши тухмӣ ва ниҳол машғуланд;

- тибқи тартиби муқарраргардида ташкил намудани семинарҳо, намоишҳо ва дигар чорабиниҳо дар соҳаи фаъолият;

- дар доираи маблағҳои пешбинигардида барои кормандони худ ташкил намудани курсҳои махсус дар дохили кишвар ва берун аз он;

- банақшагирӣ ва амалӣ намудани назорати мутамаркази сифати тухмӣ ва ниҳолҳо, инчунин ташкил ва гузаронидани сертификатсияи тухмӣ ва ниҳолҳо;

- назорати навъ дар саҳро, назорати навъ дар қитъаҳои санҷишӣ ва ташхиси лаборатории навъу сифати тухмӣ бо мақсади сертификатсияи маҷмӯи тухмии ба фурӯш пешниҳодшуда;

- таҳияи усулҳо ва меъёрҳои интихоби намунаи тухмӣ ва арзёбии сифати он;

- таҳияи стандартҳои давлатӣ ва соҳавӣ, усулҳои назорати навъ дар саҳро, назорати навъ дар қитъаҳои санҷишӣ ва ташхисҳои лаборатории навъҳо;

- санҷиши стандартҳои нави соҳавӣ ва таҷҳизоти нави барои ташхиси тухмӣ пешбинишуда ва барои истифода дар истеҳсолот пешниҳод намудани онҳо;

- ҷамъоварии маълумот дар бораи назорати сифати тухмӣ, ниҳолҳо, сертификатсия ва ташкили маҳзани маълумот;

- тибқи тартиби муқарраргардида интихоб ва ташхиси намунаҳои тухмӣ, инчунин ташкил намудани нигоҳдории онҳо;

- пешниҳоди таклифҳо барои беҳтар намудани сифати тухмӣ;

- тибқи тартиби муқарарнамудани қонун назорат кардани фаъолияти шахсони ҳуқуқӣ ва воқеие, ки бо истеҳсол, такрористеҳсол, коркард, воридот, содирот ва фурӯши тухмӣ машғуланд ва аз онҳо ба таври ройгон гирифтани маълумоти зарурӣ;

- ҳангоми ошкор шудани ҳолатҳои вайрон гардидани қонунгузории Ҷумҳурии Тоҷикистон дар соҳаи тухмипарварӣ, манъ кардани фурӯш ё истифодаи тухмӣ, инчунин ниҳолҳо ва андешидани чораҳои зарурӣ тибқи қонунгузорӣ;

- тартиб додани протоколҳо, санадҳо ва амрномаҳо нисбат ба вайронкунандагони қоидаҳо ва тартиби истеҳсол ва такрористеҳсол, коркард, воридот, содирот ва фурӯши тухмию ниҳолҳо;

- додани сертификатҳои сифат дар асоси натиҷаи сертификатсия ба маҷмӯи тухмӣ ва ниҳолҳо;

- додани шаҳодатномаи навъ ва сифат дар асоси ташхиси лабораторӣ ба тухмии аслӣ, элита ва репродуксионӣ;

- додани тамғакоғаз ва тамғаҳои муқарраршуда ба борҷомаю воситаҳои борбандии ҳар як маҷмӯи тухмии сертификатсияшуда;

- додани дастуру пешниҳодҳо ба шахсони воқеӣ ва ҳуқуқие, ки дар соҳаи тухмипарварӣ фаъолият менамоянд, ҷиҳати бартараф намудани камбудиҳои ҷойдошта оид ба риоя нагардидани қонунгузории Ҷумҳурии Тоҷикистон дар соҳаи тухмипарварӣ;

- додани тавсияҳо ба шахсони воқеӣ ва ҳуқуқӣ нисбати сертификатсияи тухмӣ, тартиби ҳуҷҷатҳои меъёрӣ, усулҳои нав ва таҷҳизоти ташхиси сифати тухмӣ;

- ҳамкорӣ бо ташкилотҳои байналмилалии соҳа оид ба сертификатсияи тухмӣ;

- амалӣ намудани ваколатҳои дигари муқаррарнамудаи санадҳои меъёрии ҳуқуқӣ.

8. Дар соҳаи зотпарварӣ:

- муайян намудани самтҳои асосӣ ва барномаҳои беҳтар кардани сифати зотҳо (чорво, паранда, моҳӣ ва занбӯри асал);

- ба вуҷуд овардани зотҳо, ҷинсҳо, хелҳо ва дурагаҳои нави сермаҳсул дар соҳаи чорводорӣ ва назорати давлатии онҳо;

- ҷорӣ намудани низоми ягонаи хушзотгардонӣ дар соҳаи чорводорӣ;

- ҳамкории байналмилалӣ дар соҳаи истифодаи фонди ирсӣ ва кори зотпарварӣ дар соҳаи чорводорӣ;

- гузаронидани аттестатсияи субъектҳои зотпарварӣ (ба онҳо додани мақоми заводи зотпарварӣ, хоҷагии зотпарварӣ ва фермаи зотпарварӣ);

- таъмини риояи истифодаи оқилонаи захираҳо дар соҳаи чорводорӣ, гузаронидани кори селексионӣ дар корхонаҳои зотпарварӣ, инчунин тиҷорати байнидавлатӣ дар соҳаи чорводорӣ;

- иҷрои санадҳои меъёрӣ оид ба кори зотпарварӣ ва бордоркунии сунъии ҳайвонот, истеҳсол ва фурӯши маҳсулоти зотӣ;

- таъмини риояи низомҳои қабулшудаи парвариш дар соҳаи чорводорӣ, барномаҳои кори зотпарварӣ, нақшаҳои парвариши маҳсулоти зотӣ, тақсимот ва истифодаи оқилонаи захираҳои маҳсулоти зотӣ;

- нигоҳ доштан ва такмил додани зотҳо дар соҳаи чорводорӣ дар минтақаҳои парвариши онҳо, инчунин дар хоҷагиҳое, ки барои нигоҳ доштани фонди ирсии ин зотҳо масъуланд;

- ворид намудани намудҳои нави зотҳои соҳаи чорводорӣ ба ҷумҳурӣ ва ташкил намудани санҷиши қиёсӣ аз рӯи арзиши истеҳсолӣ ва зотии онҳо;

- дар амал ҷорӣ намудани кашфиёти нисбатан муҳими илмию техникии соҳаи зотпарварӣ ва бордоркунии сунъии ҳайвоноти кишоварзӣ;

- бо тартиби муқаррарнамудаи қонунгузории Ҷумҳурии Тоҷикистон ворид шудан ба корхонаҳои зотпарварӣ ва дар доираи салоҳияти худ аз онҳо гирифтани маълумоти зарурӣ;

- додани дастурҳо ба субъектҳои зотпарварӣ ҷиҳати бартараф намудани вайронкунии ошкоргардидаи қонунгузорӣ дар кори зотпарварӣ;

- маҳдуд кардани содироти маҳсулоти махсусан пурарзиши зотӣ берун аз ҳудуди Ҷумҳурии Тоҷикистон;

- назорати ҷорӣ намудани усулҳои нави технологӣ, асбобу таҷҳизот, мавод, усулҳои биотехнологӣ дар истеҳсол, парвариш ва фурӯши маҳсулоти зотӣ;

- пешгирӣ намудани истифодаи ҳайвоноти наринаи наслдеҳ ва нутфаи онҳо, ки ба талаботи муқарраргардидаи сифат ҷавобгӯ нестанд;

- боздоштан ё манъ кардани фурӯши маҳсулоти зотӣ дар субъектҳои зотпарварие, ки дар ҳисобу китоби зоотехникӣ ва технологияи истеҳсоли онҳо камбудиҳои ҷиддӣ ошкор шудаанд;

- мувофиқи тартиби муқарраргардида пешниҳод намудани таклиф ҷиҳати паст ё баланд намудани мақоми хоҷагиҳои субъектҳои зотпарварӣ;

- муайян намудани самтҳои фаъолияти марказҳои селексионӣ, ассотсиатсияҳо ва шӯроҳои илмию техникии соҳаи зотпарварӣ боздоштани фаъолияти онҳо дар ҳолати таъмин накардани дараҷаи талаботи гузаронидани корҳои такмил ё нигоҳ доштани зот;

- манъ кардани истифодаи усулҳои технологӣ, асбоб, таҷҳизот, мавод, маҳсулоти зотӣ ва усулҳои биотехнологии бо тартиби муқарраргардида санҷиданашудаи парвариши маҳсулоти зотӣ;

- амалӣ намудани ваколатҳои дигари муқаррарнамудаи санадҳои меъёрии ҳуқуқӣ.

БОБИ 3. ТАРТИБИ ТАШКИЛИ ФАЪОЛИЯТИ КУМИТА

9. Ба кумита раис роҳбарӣ мекунад, ки аз ҷониби Ҳукумати Ҷумҳурии Тоҷикистон ба вазифа таъин ва аз вазифа озод карда мешавад.

10. Раис муовинон, аз ҷумла муовини якум дорад, ки бо пешниҳоди ӯ аз ҷониби Ҳукумати Ҷумҳурии Тоҷикистон ба вазифа таъин ва аз вазифа озод карда мешавад. Шумораи муовинони раис аз ҷониби Ҳукумати Ҷумҳурии Тоҷикистон муқаррар карда мешавад.

11. Ваколатҳои раис:

- барои иҷрои вазифаҳои ба зиммаи кумита гузошташуда масъулияти шахсӣ дорад;

- роҳбарии умумии фаъолияти кумитаро ба амал бароварда, кори онро ташкил, ҷиҳати анҷоми фаъолият фармонҳо содир мекунад;

- доираи ваколатҳои муовинони худ ва роҳбарони воҳидҳои сохтории дастгоҳи марказиро ҷиҳати иҷрои вазифаҳои ба зиммаи кумита гузошташуда муайян менамояд;

- тибқи тартиби муқарраргардида ба Ҳукумати Ҷумҳурии Тоҷикистон барои тасдиқ намунаҳои муқарраршудаи либосҳо, аломатҳои фарқиятро пешниҳод менамояд;

- оид ба ворид намудани тағйирот ба қонун ва санадҳои меъёрии ҳуқуқии танзимкунандаи фаъолият дар соҳаҳои таъмини амнияти озуқаворӣ таклифҳо пешниҳод менамояд;

- дастурамали мансабӣ, низомномаҳои воҳидҳои сохтории дастгоҳи марказӣ ва низомномаю оинномаҳои ташкилотҳои тобеи кумитаро тасдиқ менамояд;

- тайёрии касбӣ, такмили ихтисос, бозомӯзии кормандони кумита ва ташкилотҳои тобеи онро ташкил менамояд;

- руйхати мансабҳо, сметаи даромад ва хароҷоти кумита ва ташкилотҳои тобеи онро таҳия ва тасдиқ менамояд;

- дар доираи қонунгузории Ҷумҳурии Тоҷикистон нисбат ба кормандон ҷазои интизомиро татбиқ менамояд;

- роҳбарони воҳидҳои сохторӣ ва кормандони дигари кумитаро бо риояи талаботи қонунгузории Ҷумҳурии Тоҷикистон ба вазифа таъин ва аз вазифа озод менамояд;

- кормандони шоистаро барои сарфароз гардонидан ба мукофотҳои давлатии Ҷумҳурии Тоҷикистон бо тартиби муқарраргардида пешниҳод менамояд;

- дигар ваколатҳои барои кумита муқарраргардидаро тибқи тартиби муқарраргардида анҷом медиҳад.

12. Роҳбарони раёсатҳои дастгоҳи марказӣ ҳамзамон сарнозири давлатии соҳавӣ буда, аз ҷониби раиси кумита ба вазифа таъин ва аз вазифа озод карда мешаванд.

13. Номи расмии кумита:

- бо забони тоҷикӣ - Кумитаи бехатарии озуқавории назди Ҳукумати Ҷумҳурии Тоҷикистон;

- бо забони русӣ - Комитет продовольственной безопасности при Правительстве Республики Таджикистан;

- бо забони англисӣ - Committee for food security under the Government of the Republic of Tajikistan.

14. Суроғаи ҳуқуқии Кумита: Ҷумҳурии Тоҷикистон, шаҳри Душанбе, кучаи

Сохтори дастгоҳи марказии Кумитаи бехатарии озуқавории назди Ҳукумати Ҷумҳурии Тоҷикистон

Роҳбарият

Раёсати назорати байторӣ ва зотпарварӣ

Раёсати назорати фитосанитарӣ, карантинӣ ва тухмӣ

Шуъбаи таъминоти ҳуқуқӣ ва кадр

Шуъбаи муҳосибот ва молия

Шуъбаи робитаҳои байналмилалӣ

Бахши иттилоот ва робита бо ҷомеа

Бахши умумӣ

Нақшаи идоракунии Кумитаи бехатарии озуқавории назди Ҳукумати Ҷумҳурии Тоҷикистон

Дастгоҳи марказӣ

Раёсати Кумита дар Вилояти Мухтори Кӯҳистони

Бадахшон

Раёсати Кумита дар вилояти Суғд

Раёсати Кумита дар вилояти Хатлон

Раёсати Кумита дар шаҳри Душанбе ва шаҳру ноҳияҳои тебеи ҷумҳурӣ

Раёсати Кумита дар сарҳади давлатӣ ва нақлиёт

Номгӯи муассисаю ташкилотҳои системаи Кумитаи бехатарии озуқавории назди Ҳукумати Ҷумҳурии Тоҷикистон

Марказҳои таъминоти бехатарии озуқаворӣ дар шаҳру ноҳияҳо

Маркази миллии ташхиси бехатарии озуқаворӣ

Маркази ҷумҳуриявии зидиэпизоотӣ

Нуқтаҳои назорати давлатии бехатарии озуқаворӣ дар сарҳад ва нақлиёт

Дастаи фумигатсионии ҷумҳуриявӣ

Корхонаи воҳиди давлатии "Тоҷикзооветсервис"

Муассисаи давлатии маҷаллаи "Амнияти озуқаворӣ"