Низомномаи намояндагии Хадамоти гумруки назди Ҳукумати Ҷумҳурии Тоҷикистон дар Федератсияи Россия

Муқаррароти умумӣ

1. Намояндагии Хадамоти гумруки назди Ҳукумати Ҷумҳурии Тоҷикистон дар Федератсияи Россия (минбаъд - Намояндагӣ) бо мақсади иҷрои вазифаҳои дар Созишнома байни Ҳукумати Ҷумҳурии Тоҷикистон ва Ҳукумати Федератсияи Россия дар бораи кушодани намояндагиҳои хадамоти гумруки Ҷумҳурии Тоҷикистон ва Федератсияи Россия муайяншуда таъсис дода шудааст:

2. Асоси ҳуқуқии фаъолияти Намояндагиро Конститутсияи Ҷумҳурии Тоҷикистон, қонунҳои конститутсионии Ҷумҳурии Тоҷикистон, қонунҳои Ҷумҳурии Тоҷикистон, фармонҳо ва амрҳои Президенти Ҷумҳурии Тоҷикистон, қарорҳо ва фармоишҳои Ҳукумати Ҷумҳурии Тоҷикистон, фармоишҳои сардори Хадамоти гумруки назди Ҳукумати Ҷумҳурии Тоҷикистон, дигар санадҳои меъёрии ҳуқуқӣ, инчунин санадҳои меъёрии ҳуқуқии байналмилалии эътирофнамудаи Ҷумҳурии Тоҷикистон ва Низомномаи мазкур ташкил медиҳанд.

3. Намояндагӣ чораҳоро оид ба масъалаҳои танзими гумрукӣ, мусоидат ҷиҳати рушди ҳамкориҳои гумрукӣ ва мубодилаи иттилоот оид ба масъалаҳои фаъолияти гумрукӣ амалӣ месозад.

4. Намояндагӣ дар доираи ваколатҳои худ ба субъектҳои фаъолияти иқтисодии хориҷии Ҷумҳурии Тоҷикистон, ки дар Федератсияи Россия амалиёти савдои беруна анҷом медиҳанд, ёрии маслиҳатдиҳӣ ва ҳуқуқӣ мерасонад.

5. Намояндагӣ бо воҳидҳои сохтории Хадамоги гумруки назди Ҳукумати Ҷумҳурии Тоҷикистон, ташкилотҳои ҷамъиятӣ, байналмилалӣ ва дигар муассисаю идораҳо ҳамкорӣ менамояд.

6. Намояндагӣ шахси ҳуқуқӣ буда, дорои тавозуни мустақил, суратҳисоб, бланк ва муҳри худ мебошад.

7. Намояндагӣ метавонад парчам ва аломати Хадамоти назди Ҳукумати Ҷумҳурии Тоҷикистонро дар бинои ишғолнамуда истифода барад.

8. Намояндагии Хадамоти гумруки назди Ҳукумати Ҷумҳурии Тоҷикистон дар Федератсияи Россия қонунгузории Федератсияи Россияро риоя менамояд.

9. Рӯйхати вазифаҳо, андозаи маоши моҳона ва солонаи роҳбар ва кормандони Намояндагиро Ҳукумати Ҷумҳурии Тоҷикистон бо пешниҳоди Хадамоти гумруки назди Ҳукумати Ҷумҳурии Тоҷикистон дар мувофиқа бо Вазорати молияи Ҷумҳурии Тоҷикистон тасдиқ мекунад.

10. Дар доираи имкониятҳои молиявии буҷети давлатӣ ва дар мувофиқа бо вазорату идораҳои дахлдор Намояндагӣ метавонад дар ҳавзаҳои федералии Россия кормандони худро дошта бошад.

11. Кормандони Намояндагӣ фаъолияти худро мутобиқи қонунгузории Ҷумҳурии Тоҷикистон ва созишномаҳои байналмилалии эътирофнамудаи Ҷумҳурии Тоҷикистон амалӣ менамоянд.

2. Вазифаҳои асосии Намояндагӣ

12. Вазифаҳои асосии Намояндагӣ инҳо мебошанд:

- дар ҳамкорӣ бо Сафорати Ҷумҳурии Тоҷикистон дар Федератсияи Россия (минбаьд - Сафорат) муаррифӣ ва ҳимоя намудани манфиатҳои Ҷумҳурии Тоҷикистон дар соҳаи фаъолияти гумрукӣ дар Федератсияи Россия;

- андешидани чораҳо оид ба амалисозии шартномаҳои байналмилалии Ҷумҳурии Тоҷикистои дар соҳаи фаъолияти гумрукӣ;

- якҷо бо Сафорат ва муассисаҳои консулии Ҷумҳурии Тоҷикистон дар Федератсияи Россия таъмин намудани ҳифзи ҳуқуқ ва манфиатҳои қонунии субъектҳои фаъолияти иқтисодии хориҷии Ҷумҳурии Тоҷикистон дар Федератскши Россия;

- таҳлили савдои берунаи Федератсияи Россия;

- ҳамкорӣ бо мақомоти ваколатдори Федератсияи Россия дар соҳаи фаъолияти гумрукӣ;

- мусоидат ҷиҳати рушди ҳамкориҳои гумрукӣ байни Ҷумҳурии Тоҷикистон ва Федератсияи Россия;

- ташкили мубодилаи иттилоот оид ба масъалаҳои фаъолияти гумрукӣ;

- ҳамкорӣ бо мақомоти дахлдори Федератсияи Россия дар самти ҳифзи ҳуқуқу манфиатҳои субъектҳои фаъолияти иқтисодии хориҷии Ҷумҳурии Тоҷикистон дар Федератсияи Россия;

- анҷоми коргузорӣ ва иҷрои чорабиниҳо оид ба таъмини низоми махфият дар Намояндагӣ бо тартиби муқарраргардидаи қонунгузории Ҷумҳурии Тоҷикистон;

- иҷрои дигар вазифаҳо мутобиқи қонунгузории Ҷумҳурии Тоҷикистон.

3. Ваколатҳои асосии Намояндагӣ

13. Намояндагӣ дорои ваколатҳои зерин мебошад:

- таҳияи пешниҳодҳо оид ба инкишоф ва вусъати ҳамкорӣ бо давлати қабулкунанда доир ба масъалаҳои фаъолияти гумрукӣ;

- иштирок дар мувофиқа намудани қарорҳои хадамоти гумруки Ҷумҳурии Тоҷикистон ва Федератсияи Россия дар соҳаи фаъолияти гумрукӣ, аз ҷумла қарорҳое, ки ба рушдн инфрасохтори гумрук дахл доранд ва қарорҳои фаврӣ оид ба баланд бардоштани самаранокии назорати гумрукӣ;

- иштирок дар чорабиниҳо оид ба амалисозии шартномаҳои байналмилалии Ҷумҳурии Тоҷикистон ва Федератсияи Россия дар соҳаи фаъолияти гумрукӣ;

- таҳияи пешниҳодот оид ба ҳамоҳангсозии заминаи меъёрии ҳуҳуқӣ дар соҳаи фаъолияти гумрукии Ҷумҳурии Тоҷикистон ва Федератсияи Россия;

- иштирок дар мувофиқасозии масъалаҳои ташкили таълими касбӣ ва такмили ихтисоси шахсони мансабдори мақомоти гумруки Ҷумҳурии Тоҷикистон дар муассисаҳои таълимии Федератсияи Россия;

- таҳлил ва пешгӯии вазъи савдои беруна дар Федератсияи Россия вобаста ба таъсири эҳтимолии он ба раванди савдои беруна дар Ҷумҳурии Тоҷикистон ва аз натиҷаҳои он сари вақт огоҳ сохтани Хадамоти гумруки назди Ҳукумати Ҷумҳурии Тоҷикистон ва Сафорат;

- дар доираи салоҳияти худ дар мувофиқа бо Сафорат ба роҳ мондани ҳамкорӣ бо воситаҳои ахбори оммаи Ҷумҳурии Тоҷикистон ва Федератсияи Россия оид ба инъикоси масъалаҳои фаъолияти гумрукӣ;

- ҷамъоварӣ ва таҳлили маълумот дар бораи сиёсати савдои беруна ва танзими гумрукӣ дар Федератсияи Россия;

- баҳогузории воқеии вазъи иқтисодӣ ва сиёсӣ дар кишвари будубош аз нуқтаи назари таъсири эҳтимолии он ба раванди савдои беруна;

- қабул ва баррасии арзу шикоятҳои субъектҳои фаъолияти иқтисодии хориҷӣ дар доираи аз ҷониби онҳо амалӣ намудани амалиёти савдои беруна дар Федератсияи Россия;

- иштирок дар семинару конференсияҳо ва дигар чорабиниҳо оид ба масъалаҳои фаъолияти гумрукӣ дар ҳудуди Федератсияи Россия ва пешниҳод намудани маълумот ба Хадамоти гумруки назди Ҳукумати Ҷумҳурии Тоҷикистон ва Сафорат;

- дар доираи салоҳияти худ гузаронидани суҳбату вохӯриҳо ва машваратҳо, инчунин амалӣ намудани мубодилаи афкор бо намояндагони ташкилотҳои давлатӣ ва ҷамъиятии Федератсияи Россия оид ба масъалаҳои фаъолияти гумрукӣ;

- дархости маълумоти оморӣ ва дигар иттилоот аз вазорату идораҳои дахлдори Федератсияи Россия оид ба масъалаҳои фаъолияти гумрукӣ, ки барои амалисозии фаъолияти Намояндагӣ заруранд;

- тибқи тартиби муқаррагардидаи ҳисоботдиҳӣ пешниҳод намудани маълумоти муфассал ва оморӣ оид ба фаъолияти Намояндагӣ ба Хадамоти гумруки назди Ҳукумати Ҷумҳурии Тоҷикистон;

- таъмини иҷрои дигар супоришҳои Ҳукумати Ҷумҳурии Тоҷикистон, Хадамоти гумруки назди Ҳукумати Ҷумҳурии Тоҷикистон дар соҳаи муқаррагардида;

- амалӣ гамудани ваколатҳои дигар мутобиқи қонунгузории Ҷумҳурии Тоҷикистон.

4. Ташкили фаъолияти Намояндагӣ

14. Намояндагии Хадамоти гумруки назди Ҳукумати Ҷумҳурии Тоҷикистон дар Федератсияи Россияро роҳбари он идора мекунад, ки бо пешниҳоди сардори Хадамоти гумруки назди Ҳукумати Ҷумҳурии Тоҷикистон аз ҷониби Ҳукумати Ҷумҳурии Тоҷикистон ба вазифа таъин ва аз вазифа озод карда мешавад.

15. Кормандони Намояндагӣ аз ҷониби сардори Хадамоти гумруки назди Ҳукумати Ҷумҳурии Тоҷикистон ба вазифа таъин ва аз вазифа озод карда мешаванд.

16. Роҳбари Намояндагӣ барои иҷрои вазифаҳои ба зиммаи Намояндагӣ гузошташуда ва татбиқи сиёсати давлатӣ дар соҳаи муқарраргардидаи фаъолият масъулияти шахсӣ дорад.

17. Роҳбари Намояндагӣ:

- фаъолияти Намояндагиро ташкил намуда, вазифаву уҳдадориҳои ба зиммаи ӯ гузошташударо иҷро мекунад, риояи қонунҳо ва интизомро дар фаъолияти Намояндагӣ таъмин менамояд;

- барои иҷрои вазифаҳои ба зиммаи Намояндагӣ гузошташуда шахсан масъул буда, ваколатҳои кормандони Намояндагиро муайян месозад;

- нақшаи кори Намояндагиро тартиб медиҳад;

- бо тартиби муқарраргардида бо шахсони ҳуқуқӣ ва воқеӣ шартномаҳои ҳуқуқии гражданӣ мебандад;

- дастурамали мансабии кормандонро мутобиқи Низомномаи мазкур таҳия ва тасдиқ мекунад;

- кормандони Намояндагиро ба сафари хизматӣ ба дигар минтақаҳо мефиристад;

- ба сардори Хадамоти гумруки назди Ҳукумати Ҷумҳурии Тоҷикистон дар бораи ба вазифа таъин ва аз вазифа озод намудани кормандони Намояндагӣ таклифҳо пешниҳод менамояд;

- тибқи ҷадвали рухсатии тасдиқнамудаи сардори Хадамоти гумруки назди Ҳукумати Ҷумҳурии Тоҷикистон ба кормандони Намояндагӣ рухсатии меҳнатӣ медиҳад;

- дар доираи салоҳияти худ оид ба ташкили фаъолияти Намояндагӣ фармоишҳоро ба имзо мерасонад;

- бо мақсади баланд бардоштани маҳсулнокии кори Намояндагӣ, оид ба ҳавасмандгардонии кормандони Намояндагӣ, аз ҷумла барои пешниҳоди кормандон ба мукофотҳои давлативу идоравӣ ба сардори Хадамоти гумруки назди Ҳукумати Ҷумҳурии Тоҷикистон таклифҳо пешниҳод менамояд.

5. Фаъолияти молиявию хоҷагидории Намояндагӣ

18. Маблағгузории хароҷоти нигоҳдории Намояндагӣ аз ҳисоби маблағҳои буҷети ҷумҳуриявӣ дар доираи маблағҳои тасдиқшуда амалӣ мегардад.

19. Намояндагӣ фаъолияти молиявию хоҷагидориро тибқи қонунгузории Ҷумҳурии Тоҷикистон амалӣ карда, истифодаи мақсадноки маблағҳои молиявии ҷудогардидаро таъмин менамояд.

20. Намояндагӣ тибқи тартиби муқарраргардида аз воситаҳои махфии алоқаи телефонӣ, телефаксӣ ва элекронӣ (рамзи байналмилалӣ ва ҳукуматӣ) истифода мебарад.

21. Ҳисобот оид ба фаъолияти молиявии Намояндагӣ тибқи тартиби муқарраршуда ба Вазорати молияи Ҷумҳурии Тоҷикистон пешниҳод карда мешавад.

22. Пардохти кумакпулию ҷубронпулиҳо ба кормандони Намояндагӣ ҳангоми рафтан ба ҷойи кор ва ҳангоми озод шуданашон аз мансаби ишғолнамуда тибқи тартиби пешбининамудаи қонунгузории Ҷумҳурии Тоҷикистон амалӣ карда мешавад.

23. Таъминоти нафақавӣ ва кумакпулию иловапулиҳо ба кормандони Намояндагӣ мутобиқи қонунгузории Ҷумҳурии Тоҷикистон муайян карда мешаванд.

24. Маҳалли ҷойгиршавии Намояндагӣ дар асоси шартнома муайян карда мешавад.

Замимаи 2 ва 3