Низомномаи Комиссияи давлатии мусоидати барӯйхатгирии аҳолӣ

1. Комиссияи давлатии мусоидати барӯйхатгирии аҳолӣ (минбаъд - комиссия) бо мақсади ҳамоҳангсозии фаъолияти вазорату идораҳо, мақомоти иҷроияи маҳаллии ҳокимияти давлатӣ ва назорати рафти иҷрои Қонуни Ҷумҳурии Тоҷикистон "Дар бораи барӯйхатгирии аҳолӣ", фармони Президенти Ҷумҳурии Тоҷикистон аз 12 октябри соли 2015, № 572 "Дар бораи тайёрӣ ва гузаронидани барӯйхатгирии аҳолӣ ва фонди манзили Ҷумҳурии Тоҷикистон дар соли 2020" ва қарори Ҳукумати Ҷумҳурии Тоҷикистон аз 2 декабри соли 2016, № 511 "Дар бораи чораҳои иловагӣ оид ба гузаронидани барӯйхатгирии аҳолӣ ва фонди манзили Ҷумҳурии Тоҷикистон дар соли 2020" таъсис дода мешавад.

2. Комиссия дар фаъолияти худ Конститутсияи Ҷумҳурии Тоҷикистон, қонунҳо ва дигар санадҳои меъёрии ҳуқуқии Ҷумҳурии Тоҷикистон, санадҳои меъёрии ҳуқуқии байналмиллалии эътирофнамудаи. Ҷумҳурии Тоҷикистон, инчунин Низомномаи мазкурро дастури амал қарор медиҳад.

3. Комиссия ҳуқуқ дорад:

- ба ҷаласаҳо роҳбарони вазоратҳо, кумитаҳои давлатӣ, мақомоти иҷроияи маҳаллии ҳокимияти давлатӣ, раисони комиссияҳои мусоидат ба гузаронидани барӯйхатгирии аҳолӣ вилоятҳо ва шаҳри Душанберо даъват намояд ва иттилооти онҳоро оид ба масъалаҳои тайёрӣ ва гузаронидани барӯйхатгирии аҳолӣ шунавад ва баррасӣ намояд;

- аз мақомоти давлатӣ ва шахсони воқеӣ маводи заруриро оид ба иҷрои масъалаҳое, ки ба салоҳияти комиссия дохил мешаванд, дархост ва қабул намояд;

- тибқи тартиби муқарраргардида ба Ҳукумати Ҷумҳурии Тоҷикистон оид ба масъалаҳои тайёрӣ ва гузаронидани барӯйхатгирии аҳолӣ, ки қабули қарори ниҳоиро талаб мекунанд, таклифҳо пешниҳод намояд.

4. Вазифаҳои асосии комиссия:

- ҳамоҳангсозии фаъолияти вазоратҳо, кумитаҳои давлатӣ, дигар мақомоти марказӣ, мақомоти иҷроияи маҳаллии ҳокимияти давлатӣ, иттиҳодияҳои ҷамъиятӣ, корхонаҳо, муассисаҳо ва дигар ташкилотҳо новобаста аз шакли моликият ва шакли ташкилию ҳуқуқиашон аз рӯи масъалаҳои баруйхатгирии аҳолӣ, иҷрои чорабиниҳо оид ба ташкил ва гузаронидани корҳои аввалиндараҷаи вобаста ба ташкил ва гузаронидани барӯйхатгирии аҳолӣ;

- расонидани ёрии амалӣ ба мақомоти иҷроияи маҳаллии ҳокимияти давлатӣ ва мақомоти маҳаллии омор дар тайёрӣ ва гузаронидани барӯйхатгирии аҳолӣ.

5. Дар ҷаласаҳои комиссия баррасӣ карда мешаванд: лоиҳаҳои таҳияшудаи варақаи барӯйхатгирии аҳолӣ, инчунин рӯйхати иловагии саволҳо барои варақаҳои барӯйхатгирӣ аз рӯи нишондиҳандаҳои асосии тавсифдиҳандаи вазъи иҷтимоию демографии аҳолӣ;

- чорабиниҳо ва нақшаи тақвимӣ оид ба тайёрӣ ва гузаронидани барӯйхатгирии аҳолӣ;

- муқаррароти асосии ташкилию методологии барномаи барӯйхатгирии аҳолӣ;

- лоиҳаҳои сметаи хароҷоти ҳарсола барои тайёрӣ ва гузаронидани барӯйхатгирии аҳолӣ ва коркарди маводи он.

6. Қарорҳои комиссия бо протоколҳо ба расмият дароварда шуда, ба мақомоти дахлдори ҳокимияти давлатӣ барои иҷро пешниҳод карда мешаванд.

7. Фаъолияти комиссия тибқи нақшаҳои кории тасдиқшуда амалӣ мегардад.

8. Раиси комиссия фаъолияти комиссияро роҳбарӣ мекунад, дар ҷаласаҳби комиссия раисӣ менамояд, корҳои давраи тайёрӣ ба барӯйхатгирии аҳолиро ба нақша мегирад, аз рӯи иҷрои қарорҳо назорати умумӣ мебарад ва барои фаъолияти комиссия масъулият дорад.

9. Агентии омори назди Президенти Ҷумҳурии Тоҷикистон корҳои ташкилии комиссияро амалӣ менамояд.

10. Корҳои ташкилии комиссия, омода намудани ҳуҷҷату маводи дахлдор, инчунин ба расмият даровардани протоколҳои ҷаласаи комиссияро котиби комиссия амалӣ менамояд.

11. Ҷаласаҳои комиссия аз рӯи зарурат ва бо пешниҳоди Агентии омори назди Президенти Ҷумҳурии Тоҷикистон гузаронида мешаванд.

12. Ба ҷаласаҳои комиссия метавонанд кормандони масъули вазоратҳо, кумитаҳои давлатӣ, дигар мақомоти марказии ҳокимияти давлатӣ, муассисаҳои илмӣ ва дигар муассисаҳо доир ба масъалаҳои барӯйхатгирии аҳолӣ даъват шаванд.

13. Комиссия ба Ҳукумати Ҷумҳурии Тоҷикистон ҳисоботдиҳанда мебошад.

14. Коммисия дар давоми тамоми давраи тайёрӣ ва гузаронидани барӯйхатгирии аҳолӣ дар ҷумҳурӣ амал мекунад ва фаъолияти худро дар асоси қарори Ҳукумати Ҷумҳурии Тоҷикистон қатъ менамояд.

Ҳайати комиссияи давлатии мусоидати барӯйхатгирии аҳолӣ

- Сарвазири Ҷумҳурии Тоҷикистон - раиси комиссия;

- директори Агентии омори назди Президенти Ҷумҳурии Тоҷикистон - муовини раиси комиссия;

- муовини директори Агентии омори назди Президенти Ҷумҳурии Тоҷикистон - котиби комиссия;

Аъзои комиссия:

- вазири молияи Ҷумҳурии Тоҷикистон;

- вазири адлияи Ҷумҳурии Тоҷикистон;

- вазири маориф ва илми Ҷумҳурии Тоҷикистон;

- вазири фарҳанги Ҷумҳурии Тоҷикистон;

- вазири меҳнат, муҳоҷират ва шуғли аҳолии Ҷумҳурии Тоҷикистон;

- вазири нақлиёти Ҷумҳурии Тоҷикистон;

- вазири рушди иқтисод ва савдои Ҷумҳурии Тоҷикистон;

- вазири тандурустӣ ва ҳифзи иҷтимоии аҳолии Ҷумҳурии Тоҷикистон;

- муовини якуми вазири корҳои хориҷии Ҷумҳурии Тоҷикистон;

- муовини якуми вазири корҳои дохилии Ҷумҳурии Тоҷикистон;

- муовини якуми вазири мудофиаи Ҷумҳурии Тоҷикистон;

- раиси Кумитаи рушди маҳали назди Президенти Ҷумҳурии Тоҷикистон;

- муовини якуми раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон;

- муовини якуми раиси Кумитаи давлатии амнияти миллии Ҷумҳурии Тоҷикистон;

- раиси Кумитаи давлатии идораи замин ва геодезии Ҷумҳурии Тоҷикистон;

- раиси Кумитаи меъморӣ ва сохтмони назди Ҳукумати Ҷумҳурии Тоҷикистон;

- раиси Кумитаи телевизион ва радиои назди Ҳукумати Ҷумҳурии Тоҷикистон;

- раиси Кумитаи кор бо занон ва оилаи назди Ҳукумати Ҷумҳурии Тоҷикистон;

- муовини якуми раиси Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон;

- сардори Хадамоти алоқаи назди Ҳукумати Ҷумҳурии Тоҷикистон;

- фармондеҳи Гвардияи миллии Ҷумҳурии Тоҷикистон;

- раиси Федератсияи иттифоқҳои касабаи мустақили Ҷумҳурии Тоҷикистон;

- директори ҷамъияти саҳомии кушодаи "Тоҷик Эйр";

- директори Агентии миллии иттилоотии Тоҷикистон "Ховар"-и назди Ҳукумати Ҷумҳурии Тоҷикистон;

- директори Маркази тадқиқоти стратегии назди Президенти Ҷумҳурии Тоҷикистон;

- директори генералии корхонаи воҳиди давлатии "Хоҷагии манзилию коммуналӣ";

- директори институти иқтисодиёт ва демографияи Академияи илмҳои Ҷумҳурии Тоҷикистон;

- сардори корхонаи воҳиди давлатии "Роҳи оҳани Тоҷикистон";

- раиси Вилояти Мухтори Кӯҳистони Бадахшон;

- раиси вилояти Суғд;

- раиси вилояти Хатлон;

- муовини якуми раиси шаҳри Душанбе.