Тартиби тайёрӣ ва гузаронидани барӯйхатгирии аҳолӣ ва фонди манзили Ҷумҳурии Тоҷикистон дар соли 2020

1. Ҳамаи шаҳрвандони Ҷумҳурии Тоҷикистон, шаҳрвандони хориҷӣ ва шахсони бешаҳрванд, ки дар ҳудуди Тоҷикистон истиқомат доранд, сарфи назар аз он ки онҳо ҳангоми барӯйхатгирӣ дар ҷумҳурӣ қарор доранд ва ё муваққатан ба хориҷа рафтаанд, инчунин шаҳрвандони хориҷӣ, ки муваққатан дар Тоҷикистон қарор доранд, ба рӯйхат гирифта мешаванд;

2. Вазорати мудофиаи Ҷумҳурии Тоҷикистон, Вазорати корҳои дохилии Ҷумҳурии Тоҷикистон, Вазорати корҳои хориҷии Ҷумҳурии Тоҷикистон, Вазорати адлияи Ҷумҳурии Тоҷикистон, Кумитаи давлатии амнияти миллии Ҷумҳурии Тоҷикистон, Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон, Гвардияи миллии Ҷумҳурии Тоҷикистон ва дигар вазорату идораҳое, ки гурӯҳи шахсони махсус ва объектҳои пӯшида доранд, тайёрӣ дида, барӯйхатгирии хизматчиёни ҳарбӣ ва гурӯҳи шахсони махсуси аҳолиро тибқи тартиб ва муҳлатҳои муқаррарнамудаи Агентии омори назди Президенти Ҷумҳурии Тоҷикистон амалӣ менамояд.

3. Барӯйхатгирии шахсони барои табобат дар беморхонаҳо, дар истироҳат, дар осоишгоҳ, фароғатгоҳ ва истироҳатгоҳҳо қарордошта, модарону кӯдакони дар таваллудхонаҳо, дар хонаҳои модарону кӯдакон қарордошта, кӯдакони мактаб - интернатҳо ва хонаҳои кӯдакон, инчунин шахсони дар хонаҳои маъюбон, хонаҳои пиронсолон, меҳмонхонаҳо ва муассисаҳои ба онҳо монанд истиқоматкунандаро ҳисобчиёне, ки маъмурияти ин муассисаҳо ҷудо мекунанд, мегузаронанд.

4. Кумитаи давлатии идораи замин ва геодезии Ҷумҳурии Тоҷикистон дар кори ба тартиб даровардани номгӯи кӯчаҳо, маҳаллаҳо, рақамгузории хонаҳои истиқоматӣ ва манзилҳо дар ҳудуди Ҷумҳурии Тоҷикистон ба мақомоти иҷроияи маҳаллии ҳокимияти давлатӣ кумак мерасонад.

5. Вазорати корҳои дохилии Ҷумҳурии Тоҷикистон:

- ба мақомоти иҷроияи маҳаллии ҳокимияти давлатӣ кумак намуда, ҷараёни дуруст ва пурра ба ҳисоб гирифтани аҳолиеро, ки дар маҳалҳои шаҳрӣ зиндагӣ мекунад, зери назорат мегирад;

- дар вақти гузаронидани барӯйхатгирии аҳолӣ ва фонди манзили соли 2020 дар мавриди зарурӣ бехатарии кормандони муваққатии ҷалбгардидаи барӯйхатгириро таъмин менамояд;

- барои истифодаи нақлиёти хизматӣ дар рӯзҳои истироҳат ба Агентии омори назди Президенти Ҷумҳурии Тоҷикистон ва мақомоти зертобеи он барои давраи тайёрӣ ва гузаронидани барӯйхатгирии аҳолӣ ва фонди манзили соли 2020 мусоидат менамояд.

6. Кумитаи давлатии идораи замин ва геодезии Ҷумҳурии Тоҷикистон ва Кумитаи меъморӣ ва сохтмони назди Ҳукумати Ҷумҳурии Тоҷикистон роҳбарии методиро дар тайёр намудани маводи нақшаю харитасозӣ барои мақомоти иҷроияи маҳаллии ҳокимияти давлатии шаҳру ноҳияҳои ҷумҳурӣ анҷом дода, дар асоси дархостҳои онҳо нақшаи шаҳрҳо, шаҳракҳо ва деҳаҳои калон, иичунин харитаҳои ноҳияҳоро барои гузаронидани барӯйхатгирии аҳолӣ ва фонди манзил таъмин менамояд.

7. Вазорати фарҳанги Ҷумҳурии Тоҷикистон, Кумитаи телевизион ва радиои назди Ҳукумати Ҷумҳурии Тоҷикистон, Агентии миллии иттилоотии Тоҷикистон "Ховар" ба инъикоси ҷараёни тайёрӣ ва гузаронидани барӯйхатгирии аҳолӣ ва фонды манзил дар воситаҳои ахбори омма мусоидат менамоянд.

8. Вазорати нақлиёти Ҷумҳурии Тоҷикистон, корхонаи воҳиди давлатии "Роҳи оҳани Тоҷикистон", ҷамъияти саҳомии кушодаи "Тоҷик Эйр" мунтазам қабул ва ба масъулин расондани борҳоеро, ки барои тайёрӣ ва гузаронидани барӯйхатгирии аҳолӣ фиристода мешаванд, таъмин менамоянд.

9. Вазорати нақлиёти Ҷумҳурии Тоҷикистон ва мақомоти иҷроияи ҳокимияти давлатии шаҳри Душанбе дар давраи гузаронидани барӯйхатгирии аҳолӣ ва фонди манзили соли 2020 барои шахсоне, ки дар шаҳри Душанбе ба барӯйхатгирии аҳолӣ муваққатан ҷалб карда мешаванд, барои истифодаи ройгони троллейбусҳо ва автобусҳо бо пешниҳоди шаҳодатномаи барӯйхатгиранда мусоидат менамоянд.

10. Хадамоти алоқаи назди Ҳукумати Ҷумҳурии Тоҷикистон: дар навбати аввал ба масъулин расонидани муросилоти почтаю телеграф, фириставу бастаҳоеро, ки бинобар тайёрӣ ва гузаронидани барӯйхатгирии аҳолӣ ва фонди манзил ва коркарди маводи он фиристода мешаванд, таъмин менамояд;

- дар давраи гузаронидани барӯйхатгирии аҳолӣ ва фонди манзили соли 2020 дар доираи имкониятҳои мавҷудаи техникӣ ба муштариён фиристодани смс-паёмҳои ройгони хаттӣ ё овозӣ оид ба корҳои оммавӣ-ташвиқотии барӯйхатгирии аҳолӣ ва фонди манзил, ки мазмуни он аз тарафи Агентии омори назди Президенти Ҷумҳурии Тоҷикистои пешниҳод карда мешавад, таъмин менамояд;

- дар давраи солҳои 2017-2023 гуфтугӯҳои телефонии байнишаҳрии вобаста ба тайёрӣ ва гузаронидани барӯйхатгирии аҳолӣ ва фонди манзилро ба категорияи гуфтугӯҳои рамзӣ мансуб дониста, аз рӯи тарифи муқаррарӣ ҳисоб мекунад.

11. Мақомоти иҷроияи маҳаллии ҳокимияти давлатӣ:

- дар давраи барӯйхатгирии аҳолӣ ва фонди манзили соли 2020 шӯъбаҳои рӯйхатгирӣ ва қитьаҳои дастурдиҳиро бо биноҳои (утоқҳои) корӣ таъмин менамоянд;

- кормандони муваққатиро барои гузаронидани барӯйхатгирии аҳолӣ ва фонди манзили соли 2020 ҷалб менамоянд;

- дар ҷойҳои аҳолинишини зич дар давраи барӯйхатгирии аҳолӣ ва фонди манзил корҳои оммавӣ-ташвиқотӣ мегузаронанд, доир ба оғоз ва иштирок дар маъракаи барӯйхатгирии аҳолӣ ва фонди манзили соли 2020 овезаҳо ва маводи дигарро насб менамоянд.

12. Шахсоне, ки ба ҳайати кормандони муваққатии барӯйхатгирии аҳолӣ ва фонди манзил ҷалб карда мешаванд, аз ҷониби мақомоти омор омӯзонида мешаванд.

13. Ҳайати кормандони муваққатӣ аз рӯи меъёри сарбории зерин муайян карда мешавад:

- меъёри миёнаи сарбории бақайдгирандагон барои тартиб додани рӯйхати хонаҳо дар маҳалҳои шаҳрӣ ва деҳаҳои калон - 45 хона дар як шабонарӯз;

- ба ҳисобчиён 380 нафар дар тамоми давраи барӯйхатгирӣ;

- дастурдиҳанда-назоратчии барӯйхатгирӣ ба кори 4-6 ҳисобчӣ роҳбарӣ мекунад;

- ба шӯъбаҳои барӯйхатгирии 7-9 қитъаи дастурдиҳӣ дохил карда мешавад;

- барои таҳияи маводи барӯйхатгирӣ ба коркарди компютерӣ ба ҳисоби миёна 120 нафар ба 1 млн аҳолни барӯйхатгирифташуда ҷалб карда мешаванд.

14. Шахсоне, ки ба тайёрӣ ва гузаронидаии барӯйхатгирии аҳолӣ ва фонди манзил ҷалб карда мешаванд, аз кори асосиашон дар корхонаҳо, муассисаҳо ва дигар ташкилотҳо муваққатан ба муҳлатҳои зерин озод карда мешаванд:

- бақайдгирандагон барои тартиб додани рӯйхатҳои хонаҳо дар маҳалҳои шаҳрӣ ва деҳаҳои калон - 15 рӯз;

- ҳисобчиён - 20 рӯз;

- дастурдиҳандаҳо-назоратчиён - 31 рӯз;

- мудирони шуъбаҳои барӯйхатгирӣ ва ёрдамчиёни онҳо - 58 рӯз;

- кормандоне, ки барои таҳияи маводи барӯйхатгирии аҳолӣ ва фонди манзил ва коркарди автоматикунонии маводи барӯйхатгирӣ ҷалб карда мешаванд - аз моҳи феврал то моҳи декабри соли 2021.

15. Муҳлати тақвимии аз кори асосӣ озод каркани кормандоне, ки ба гузаронидан ва коркарди натиҷаҳои барӯйхатгирӣ санҷишии аҳолӣ ва фонди манзил ҷалб карда мешаванд. Агентии омори назди Президенти Ҷумҳурии Тоҷикистон дар мувофиқа бо мақомоти иҷроияи маҳаллии ҳокимияти давлатии шаҳр (ноҳия) муқаррар менамояд.

16. Ба шахсоне, ки ба тайёрӣ ва гузаронидани барӯйхатгирии аҳолӣ ва фонди манзил ҷалб карда мешаванд, музди меҳнатии зерин муқаррар карда мешавад:

ба ҳисобчиён ва бақайдгирандагон аз рӯи музди миёнаи моҳонаи меҳнат дар соҳаҳои иқтисодиёт як сол пеш аз гузаронидани барӯйхатгирии аҳолӣ ва фонди манзил, бо назардошти рӯзҳои тақвимии корӣ дар тамоми давраи ҷалбгардида;

- ба дастурдиҳандагон - назоратчиён ва кормандони муваққатии коркарди маводи барӯйхатгирӣ ба андозаи 30 фоиз зиёдтар аз музди меҳнати ҳисобчиён ва бақайдгирандагон;

- ба ёрдамчиёни сардорони шӯъбаҳои барӯйхатгирӣ ба андозаи 60 фоиз зиёдтар аз музди меҳнати ҳисобчиён ва бақайдгирандагон;

- ба сардорони шӯъбаҳои барӯйхатгирӣ ба андозаи 80 фоиз зиёдтар аз музди меҳнати ҳисобчиён ва бақайдгирандагон.

17. Музди меҳнати миёнаи кормандони муваққатие, ки ба тайёрӣ ва гузаронидани барӯйхатгирии аҳолӣ ва фонди манзил ҷалб карда мешаванд (аз ҷумла мукофотпулиҳое, ки ба фонди музди меҳнат ва фонди ҳавасмандгардонии моддӣ дохил мешаванд) дар ҷои кори асосиашон нигоҳ дошта мешавад.