Низомномаи Комиссияи байниидоравӣ оид ба муқовимат ба савдои одамон

1. Низомномаи Комиссияи байниидоравӣ оид ба муқовимат ба савдои одамон тартиби ташкил ва фаъолияти Комиссияи байниидоравӣ оид ба муқовимат ба савдои одамонро (минбаъд - Комиссияи байниидоравӣ), ки дар Қонуни Ҷумҳурии Тоҷикистон "Дар бораи муқовимат ба савдои одамон ва расонидани кумак ба қурбониёни савдои одамон" пешбинӣ шудааст, муайян менамояд.

2. Комиссияи байниидоравӣ мақоми доимоамалкунандаи машваратии байниидоравие мебошад, ки бо мақсади таъмини фаъолияти самараноки субъектҳои системаи муқовимат ба савдои одамон ва ташкили ҳамкории онҳо, ҳамоҳангсозии фаъолияти ҳамаи субъектҳои системаи муқовимат ба савдои одамон, татбиқи уҳдадориҳои байналмилалии ҳуқуқии Ҷумҳурии Тоҷикистон дар самти муқовимат ба савдои одамон таъсис дода шудааст.

3. Комиссияи байниидоравӣ ваколатҳои ҳамоҳангсозандаи миллиро дар самти муқовимат ба савдои одамон иҷро менамояд.

4. Комиссияи байниидоравӣ дар фаъолияти худ Конститутсияи Ҷумҳурии Тоҷикистон, Қонуни Ҷумҳурии Тоҷикистон "Дар бораи муқовимат ба савдои одамон ва расонидани кумак ба қурбониёни савдои одамон", дигар санадҳои меъёрии ҳуқуқии Ҷумҳурии Тоҷикистон, санадҳои ҳуқуқии байналмилалии аз тарафи Ҷумҳурии Тоҷикистон эътирофшуда ва Низомномаи мазкурро ба роҳбарӣ мегирад.

5. Комиссияи байниидоравӣ ваколатҳоеро, ки қисмҳои 2 ва 4 моддаи 16 Қонуни Ҷумҳурии Тоҷикистон "Дар бораи муқовимат ба савдои одамон ва расонидани кумак ба қурбониёни савдои одамон" пешбинӣ намудааст, амалӣ менамояд.

6. Комиссияи байниидоравӣ бо мақсади амалӣ намудани ваколатҳои ба зиммааш гузошташуда корҳои муайяннамудаи қисми 5 моддаи 16 Қонуни Ҷумҳурии Тоҷикистон "Дар бораи муқовимат ба савдои одамон ва расонидани кумак ба қурбониёни савдои одамон"-ро иҷро менамояд.

7. Комиссияи байниидоравӣ бо мақсади татбиқи ваколатҳо дар самти муқарраргардидаи фаъолият дорои ҳуқуқҳое мебошад, ки қисми 6 моддаи 16 Қонуни Ҷумҳурии Тоҷикистон "Дар бораи муқовимат ба савдои одамон ва расонидани кумак ба қурбониёни савдои одамон" муқаррар намудааст.

8. Раиси Комиссияи байниидоравӣ:

- роҳбарии фаъолияти Комиссияи байниидоравиро ба амал мебарорад;

- дар байни аъзои Комиссияи байниидоравӣ вазифаҳоро тақсим намуда, онро барои тасдиқ ба Комиссияи байниидоравӣ пешниҳод менамояд;

- дар мувофиқа бо аъзои Комиссияи байниидоравӣ рӯзномаи маҷлиси Комиссияи байниидоравиро муайян менамояд;

- маҷлиси Комиссияи байниидоравиро даъват менамояд ва ба ҷараёни он раисӣ мекунад;

- ба протоколҳо ва қарорҳо имзо мегузорад;

- барои иҷрои вазифаҳои ба зиммаи ӯ вогузоршуда масъулияти шахсӣ дорад.

9. Аъзои Комиссияи байниидоравӣ:

- бо даъвати раис ва котиби масъули Комиссияи байниидоравӣ ҳозир шуда, дар кори Комиссияи байниидоравӣ, маҷлисҳои он ва ҳангоми муҳокимаи масъалаҳо ширкат меварзанд;

- талаботи санадҳои меъёрии ҳуқуқии Ҷумҳурии Тоҷикистон дар самти муқовимат ба савдои одамон ва расонидани кумак ба қурбониёни савдои одамон ва қарорҳои Комиссияи байниидоравиро дар фаъолияти вазорату идораҳои намояндагишаванда татбиқ менамоянд ва дар ин хусус ба Комиссияи байниидоравӣ маълумот пешниҳод менамоянд;

- дар таҳияи лоиҳаи санадҳои меъёрии ҳуқуқӣ, нақшаи миллии амали Ҳукумати Ҷумҳурии Тоҷикистон ҷиҳати муқовимат ба савдои одамон, ҳисоботу маърӯзаҳо, дар омода ва баргузории семинару конференсияҳо, мизҳои муддавар ҷиҳати муқовимат ба савдои одамон ва расонидани кумак ба қурбониёни савдои одамон иштирок менамоянд;

- дигар вазифаҳоро мувофиқи қонунгузорӣ ва тақсимоти вазифаҳо иҷро менамоянд.

10. Котиби масъули Комиссияи байниидоравӣ:

- корҳои тайёрӣ ба маҷлиси Комиссияи байниидоравиро анҷом медиҳад;

- назорати бевоситаи иҷрои қарорҳои Комиссияи байниидоравиро ба амал мебарорад;

- ҳамкориҳоро бо мақомоти дахлдори дигар давлатҳо ва созмонҳои байналмилалии дар соҳаи ҳимояи ҳуқуқи инсон дар самти муқовимат ба савдои одамон фаъолияткунанда ба роҳ мемонад;

- супоришҳои дигари раиси Комиссияи байниидоравиро иҷро менамояд.

11. Коргузорӣ, таҳияи мавод барои маҷлиси Комиссияи байниидоравӣ, ташкили фаъолияти гурӯҳҳои корӣ ва комиссияҳои коршиносонро котиби масъули Комиссияи байниидоравӣ ба амал мебарорад. Муросилот доир ба масъалаҳои мансуб ба доираи ваколати Комиссияи байниидоравӣ тавассути котиби масъули Комиссияи байниидоравӣ ба амал бароварда мешавад. Ба котиби масъули Комиссияи байниидоравӣ кормандони воҳидҳои сохтории Дастгоҳи иҷроияи Президенти Ҷумҳурии Тоҷикистон кумак мерасонанд.

12. Маҷлисҳои Комиссияи байниидоравӣ аз рӯи зарурат, вале на камтар аз як маротиба дар як сол гузаронида мешаванд. Комиссияи байниидоравӣ метавонад маҷлисҳои худро дар маҳалҳо гузаронад.

13. Комиссияи байниидоравӣ ҳуқуқи қабули қарорҳоро дар ҳолате дорад, ки дар маҷлиси он на камтар аз се ду ҳиссаи аъзои Комиссияи байниидоравӣ иштирок дошта бошанд.

14. Қарорҳо оид ба масъалаҳои мансуб ба ваколатҳои он бо аксарияти оддии овозҳои аъзои дар ҷаласа иштирокдоштаи Комиссияи байниидоравӣ қабул карда мешаванд.

15. Қарор, талабот, муроҷиат, дархост, пешниҳод ва тавсияҳои Комиссияи байниидоравӣ оид ба масъалаҳое, ки ба ваколати он дохил мешаванд, бояд аз ҷониби мақомоти дахлдор баррасӣ ва иҷро гардида, аз натиҷаи он Комиссияи байниидоравӣ ҳатман огоҳонида шавад.

16. Дар кори Комиссияи байниидоравӣ бо ҳуқуқи овоздиҳӣ метавонанд намояндагони мақомоти қонунгузор, иҷроия ва судӣ, инчунин комиссияҳои назди Ҳукумати Ҷумҳурии Тоҷикистон ва созмонҳое, ки дар соҳаи ҳимояи ҳуқуқи инсон фаъолият доранд, иштирок намоянд. Ваколатдор оид ба ҳукуқи инсон дар Ҷумҳурии Тоҷикистон ё муовини ӯ - Ваколатдор оид ба ҳуқуқи кӯдак дар Ҷумҳурии Тоҷикистон метавонанд дар маҷлисҳои Комиссияи байниидоравӣ иштирок намоянд.