Тартиби баҳисобгирии давлатии фаъолияти ноширӣ, корхонаҳои полиграфӣ ва пешбурди Феҳристи ягонаи давлатӣ

1. Муқаррароти умумӣ

1. Тартиби баҳисобгирии давлатии фаъолияти ноширӣ, корхонаҳои полиграфӣ ва пешбурди Феҳристи ягонаи давлатӣ (минбаъд - Тартиб) барои амалӣ намудани баҳисобгирии омории субъектҳои фаъолияти ноширӣ, корхонаҳои полиграфӣ, фурӯшандагони маҳсулоти чопӣ ва нашрияҳои даврӣ, инчунин таҳлили фаъолияти субъектҳои табъу нашр, ва полиграфӣ, ноширон, корхонаҳои полиграфӣ, фурӯшандагони маҳсулоти чопӣ ва нашрияҳои даврӣ дар Ҷумҳурии Тоҷикистон таҳия гардидааст.

2. Баҳисобгирии субъектҳои фаъолияти ноширӣ, корхонаҳои полиграфӣ, фурӯшандагони маҳсулоти чопӣ ва нашрияҳои даврӣ аз ҷониби мақоми ваколатдори давлатӣ дар соҳаи фарҳанг амалӣ карда мешавад.

2. Объектҳои баҳисобгирӣ

3. Ба ҳисоб гирифта мешаванд:

- фаъолияти ноширӣ - фаъолият оид ба омодасозии дастнависҳои маҳсулоти чопӣ барои чоп;

- фаъолияти полиграфӣ - фаъолият оид ба истеҳсоли маҳсулоти чопӣ;

- фурӯшандагон ва паҳнкунандагони маҳсулоти чопӣ - шахсони ҳуқуқӣ ё воқеие, ки бо фурӯш ё паҳн кардани маҳсулоти чопӣ машғуланд;

- матбуоти даврӣ - рӯзнома, ҳафтанома, моҳнома, солнома, маҷалла, бюллетен, тақвим, ахбори агентиҳои иттилоотӣ, замимаҳои онҳо, ки ном ва рақами ҷорӣ доранд.

4. Меъёрҳои пешбининамудаи банди 3 Тартиби мазкур дар вазоратҳои мудофиа, корҳои дохилӣ ва Кумитаи давлатии амнияти миллии Ҷумҳурии Тоҷикистон татбиқ намегарданд.

5. Ба объектҳои баҳисобгирӣ дохил намешаванд:

- нуқтаҳои нусхабардории ҳуҷҷатҳо ва рекламавӣ (нашри лавҳаю овеза ва шиорҳо);

- марказҳои омӯзишӣ ва фароғатии компютерӣ;

- студияҳои аксгирӣ ва дизайн, ки маҳсулотл чопӣ нашр намекунанд;

- матбуоти чопии даврӣ бо шумораи камтар аз сад нусха.

3. Тартиби баҳисобгирӣ

6. Баҳисобгирии субъектҳои фаъолияти ноширӣ ва полиграфӣ дар сурати мавҷуд будани ҳуҷҷатҳои зерин амалӣ карда мешавад:

- ариза дар бораи баҳисобгирии субъектҳои фаъолияти ноширӣ ва полиграфӣ бо нишон додани номи пурраи фаъолияти ноширӣ ва полиграфӣ, мавзӯъ, самт ва соҳаи фаъолият, мақсаду вазифаҳо (замимаи 2);

- нусхаи шаҳодатнома дар бораи бақайдгирии давлатии шахси ҳуқуқӣ;

- нусхаи иқтибос аз Феҳристи ягонаи давлатии шахсони ҳуқуқӣ ва соҳибкорони инфиродӣ;

- нусхаи оинномаи (низомномаи) шахси ҳуқуқӣ, ки фаъолияти ноширӣ ва полиграфиро амалӣ месозад;

- номгӯи таҷҳизоти полиграфӣ ва техникии дигар бо нишон додани ном, тамға, навъ, рақами корхона, соли барориш, маҳалли харид, миқдор ва ҳолати ҷорӣ (замимаи 3). Ба номгӯи таҷҳизоти полиграфӣ дохил намешаванд: дастгоҳи чопкунӣ (ризограф), тасвиргар (плоттер), компютер, принтер, асбобҳои нусхаафзоӣ, абзори коғазбурӣ (резакҳои офисӣ);

- тавсифномаи корхонаҳои (коргоҳҳои) истеҳсолӣ;

- маълумотнома дар бораи маҳалли ҷойгиршавии субъектҳои фаъолияти ноширӣ ва полиграфӣ;

- маълумотнома дар бораи надоштани доғи судӣ;

- хулосаи Агентии стандартизатсия, метрология ва нозироти савдои назди Ҳукумати Ҷумҳурии Тоҷикистон;

- хулосаи Хадамоти давлатии назорати санитарию эпидемиологии Вазорати тандурустӣ ва ҳифзи иҷтимоии Ҷумҳурии Тоҷикистон;

- хулосаи Хадамоти давлатии оташнишонии Вазорати корҳои дохилии Ҷумҳурии Тоҷикистон дар маҳалли ҷойгиршавии муассиса;

- маълумотномаи Кумитаи давлатии амнияти миллии Ҷумҳурии Тоҷикистон;

- нусхаи маълумотномаи тиббӣ.

7. Баҳисобгирии нашрияи даврии чопӣ дар сурати мавҷуд будани ҳуҷҷатҳои зерин амалӣ карда мешавад:

- ариза дар бораи баҳисобгирии нашрияи даврии чопӣ бо нишон додани номи пурраи субъект, мавзӯъ, мақсаду вазифаҳо, самти фаъолият, андоза ва ҳаҷм, забон, даврияти нашр, шумораи эҳтимолии хонандагони имконпазир, суроға ва рақами телефон (замимаи 2);

- нусхаи оиннома (барои шахсони ҳуқуқӣ);

- нусхаи шаҳодатнома дар бораи бақайдгирии давлатии шахси ҳуқуқӣ ва соҳибкори инфиродӣ;

- нусхаи иқтибос аз Феҳристи ягонаи давлатии шахсони ҳуқуқӣ ва соҳибкорони инфиродӣ;

- маълумотнома оид ба манбаъҳои маблағгузорӣ;

- маълумотнома аз Кумитаи давлатии амнияти миллии Ҷумҳурии Тоҷикистон.

8. Баҳисобгирии фурӯшандагон ва паҳнкунандагони маҳсулоти чопӣ дар сурати мавҷуд будани ҳуҷҷатҳои зерин амалӣ карда мешавад:

- ариза дар бораи баҳисобгирии корхонаи фурӯши китоб, дӯкони фурӯши рӯзномаву маҷалла, нуқтаи савдои китоб ва (ё) нашрияи даврӣ, фурӯшандагони маҳсулоти чопӣ бо нишон додани маҳалли ҷойгиршавӣ ва ҳудуди паҳнкунӣ (замимаи 2);

- нусхаи оиннома ё низомномаи муассис, ки ба сифати шахси ҳуқуқӣ фаъолият менамояд;

- нусхаи Шаҳодатнома дар бораи бақайдгирии давлатии шахси ҳуқуқӣ, нусхаи патент ё шаҳодатнома ҳангоми фаъолият ба сифати соҳибкори инфиродӣ;

- шартномаи байни идораи нашрияи даврии чопӣ, нашриёт бо фурӯшандагони маҳсулоти чопӣ;

- шартномаи байни дӯкони фурӯши рӯзномаву маҷалла, нуқтаи савдои китоб бо соҳибмулки бино (дар сурати иҷораи бино).

9. Пешниҳод кардани талаботи дигар ҳангоми баҳисобгирӣ манъ аст.

10. Баҳисобгирии фаъолияти ноширӣ, корхонаҳои полиграфӣ, фурӯшандагони маҳсулоти чопӣ ва нашрияи даврии чопии шахсони ҳуқуқӣ дар муддати як моҳ аз лаҳзаи пешниҳод намудани ариза анҷом дода мешавад.

4. Тартиби азнавбаҳисобгирӣ

11. Ташкилотҳои табъу нашр, корхонаҳои полиграфӣ, фурӯшандагон ва паҳнкунандагони маҳсулоти чопӣ ва нашрияи даврии чопии шахсони ҳуқуқӣ, дар ҳолати дар мақомоти дахлдор аз нав ба қайди давлатӣ гирифта шуданашон аз нав ба ҳисоб гирифта мешаванд.

12. Азнавбаҳисобгирии ташкилотҳои табъу нашр, корхонаҳои полиграфӣ, фурӯшандагон ва паҳнкунандагони маҳсулоти чопӣ ва нашрияи даврии чопии шахсони ҳуқуқӣ тибқи расмиёти пешбининамудаи Тартиби мазкур анҷом дода мешавад.

13. Дар ҳолати азнавбаҳисобгирӣ, шаҳодатномаи қаблан додашуда эътибори ҳуқуқии худро гум мекунад ва нусхаи асли он бояд ба Вазорати фарҳанги Ҷумҳурии Тоҷикистон баргардонда шавад.

14. Азнавбаҳисобгирии ташкилоти табъу нашр, корхонаи полиграфӣ, фурӯшандагони маҳсулоти чопӣ ва нашрияи даврии чопии шахсони ҳуқуқӣ дар ҳолатҳои тағйирёбии суроға, даврияти нашр, ҳаҷм, теъдоди нашр, ивазшавии роҳбар, харидани таҷҳизоти нав талаб карда намешавад.

15. Пас аз бақайдгирии давлатӣ ташкилоти табъу вашр, корхонаи полиграфӣ, фурӯшандагони маҳсулоти чопӣ ва нашрияи даврии чопии шахсони ҳуқуқӣ ё воқеӣ бояд мутобиқи тартиби муқарраршуда аз расмиёти азнавбаҳисобгирӣ гузаранд. Дар ҳолатҳои дигар муассисон, ташкилоти табъу нашр, корхонаи полиграфӣ, фурӯшандагони маҳсулоти чопӣ ва нашрияи даврии чопии шахсони ҳуқуқӣ уҳдадоранд, ки дар муддати як моҳ мақомоти дахлдори давлатии бақайдгирии воситаҳои ахбори оммаро дар бораи тағйироти мазкур ба таври хаттӣ огоҳ созанд. Дар баробари ин муассис ё роҳбари ташкилот вазифадоранд, ки дар муҳлати як моҳ ба Вазорати фарҳанги Ҷумҳурии Тоҷикистон дар ин хусус маълумот пешниҳод намоянд.

5. Рад кардани баҳисобгирӣ (азнавбаҳисобгирӣ)

16. Вазорати фарҳанги Ҷумҳурии Тоҷикистон дар ҳолатҳои зерин ҳуқуқи рад кардани баҳисобгириро (азнавбаҳисобгириро) дорад:

- агар қаблан аз ҷониби Вазорати фарҳанги Ҷумҳурии Тоҷикистон ба дигар шахси ҳуқуқӣ ё воқеӣ бо ҳамон ном ё номгӯй барои баҳисобгирӣ шаҳодатнома дода шуда бошад;

- агар муҳтавои ариза ба муқаррароти моддаи 6 Қонуни Ҷумҳурии Тоҷикистон "Дар фаъолияти ноширӣ ва полиграфӣ" ва моддаи 6 Қонуни Ҷумҳурии Тоҷикистон "Дар бораи матбуот ва дигар воситаҳои ахбори омма" мутобиқат накунад;

- агар шахс ба синни ҳаждаҳсолагӣ нарасида бошад ва ё бо ҳукми суд ҷазоро дар намуди маҳрум сохтан аз озодӣ дар муассисаҳои ислоҳӣ адо кунад ё аз ҳуқуқи машғул шудан бо фаъолияти мазкур маҳрум гардида бошад ва ё бо ҳалномаи суд ғайри қобили амал ё қобилияти амалаш маҳдуд эътироф шуда бошад.

17. Агар ҳизбҳои сиёсӣ, иттиҳодияҳои ҷамъиятӣ, иттиҳодияҳои динӣ, ташкилотҳо ва шахсони ҳуқуқӣ ё воқеие, ки доираи амалашон тибқи қонунгузории Ҷумҳурии Тоҷикисгон ё бо қарори суд манъ ва ё маҳдуд шуда бошад, фаъолияти ноширӣ ва полиграфии онҳо ба ҳисоб гирифта намешаванд.

18. Огоҳинома дар хусуси рад кардани баҳисобгирӣ (азнавбаҳисобгирӣ) ба аризадиҳанда бо нишон додани асоси радкунӣ ба таври хаттӣ ирсол карда мешавад.

6. Додани шаҳодатнома

19. Дар ҳолати баҳисобгирии ташкилотҳои фаъолияти ноширӣ, корхонаҳои полиграфӣ, фурӯшандагон ва паҳнкунандагони маҳсулоти чопӣ ва нашрияи даврии чопӣ ба шахсони ҳуқуқӣ ва соҳибкорони инфиродӣ Шаҳодатномаи дахлдор дода мешавад (замимаи 1).

20. Шаҳодатнома ба роҳбари шахси ҳуқуқӣ ё тибқи ваколатнома ба намояндаи ӯ дода мешавад.

21. Дар сурати гум шудани Шаҳодатнома Вазорати фарҳанги Ҷумҳурии Тоҷикистон нусхаи (дубликати) онро медиҳад. Барои гирифтани нусхаи Шаҳодатнома ба Вазорати фарҳанги Ҷумҳурии Тоҷикистон ариза бо нишон додани сабаб ва нусхаи эълони дар рӯзномаи расмӣ чопшуда пешниҳод карда мешавад.

22. Нусхаи Шаҳодатнома бо рақами Шаҳодатномаи аввала бо чопи калимаи "Нусха" аз тарафи Вазорати фарҳанги Ҷумҳурии Тоҷикистон дода мешавад.

7. Муқаррароти хотимавӣ

23. Барои вайрон кардани талаботи Тартиби мазкур шахсони ҳуқуқӣ ва воқеӣ тибқи муқаррароти қонунгузории Ҷумҳурии Тоҷикистон ба ҷавобгарӣ кашида мешаванд.

***Ниг. ба Замимаҳои 1, 2, 3