Ҳукумати Ҷумҳурии Тоҷикистон

ҚАРОР

Дар бораи чораҳои иловагӣ оид ба гузаронидани барӯйхатгирии аҳолӣ ва фонди манзили Ҷумҳурии Тоҷикистон дар соли 2020

Мутобиқи моддаи 4(1) Қонуни Ҷумҳурии Тоҷикистон "Дар бораи барӯйхатгирии аҳолӣ", бо мақсади муташаккилона, босифат ва сари вақт гузаронидани барӯйхатгирии аҳолӣ ва фонди манзили Ҷумҳурии Тоҷикистон дар соли 2020, Ҳукумати Ҷумҳурии Тоҷикистон қарор мекунад:

1. Бо мақсади ташкил ва гузаронидани барӯйхатгирии аҳолӣ ва фонди манзил дар соли 2020, ба Агентии омори назди Президенти Ҷумҳурии Тоҷикистон иҷозат дода шавад, ки дар асоси шартнома кормандонро ба:

- дастгоҳи марказии Агентии омори назди Президенти Ҷумҳурии Тоҷикистон - 10 воҳид аз 1 январи соли 2017 то 31 декабри соли 2023;

- сарраёсатҳои Агентии омор дар Вилояти Мухтори Кӯҳистони Бадахшон, вилоятҳо ва шаҳри Душанбе - 23 воҳид аз 1 январи соли 2017 то 31 декабри соли 2022;

- раёсатҳо, шӯъбаҳо ва бахшҳои омори шаҳру ноҳияҳои ҷумҳурӣ - 83 воҳид аз 1 июли соли 2017 то 31 декабри соли 2021 ҷалб намояд.

2. Хароҷоти нигоҳдории шумораи кормандони мазкур аз ҳисоби маблағҳои барои баруйхатгирии аҳолӣ ва фонди манзил ҷудогардида пардохт карда шавад.

3. Вазорати молияи Ҷумҳурии Тоҷикистон дар асоси пешниҳоди Агентии омори назди Президенти Ҷумҳурии Тоҷикистон маблағгузории корҳоро оид ба тайёрӣ, гузаронидан, ҷамъбаст ва нашри натиҷаҳои барӯйхатгирии аҳолӣ ва фонди манзили Ҷумҳурии Тоҷикистон дар соли 2020 аз ҳисоби маблағҳои буҷети давлатӣ барои солҳои 2017-2023 ва грантҳои ташкилотҳои байналмилалӣ амалӣ намояд.

4. Раисони Вилояти Мухтори Кӯҳистони Бадахшон, вилоятҳо, шаҳрҳо ва ноҳияҳои ҷумҳурӣ барои иҷрои корҳои тайёрӣ ва гузаронидани баруйхатгирии аҳолӣ ва фонди манзил:

- то 1 апрели соли 2019 номгӯи ноҳияҳо, маҳалҳои шаҳрӣ ва сарҳадҳои онҳоро аниқ намоянд, номи кучаҳо, рақами хонаҳо ва манзилҳои маҳалҳои шаҳрӣ ва деҳаҳои калонро ба тартиб дароварда, лавҳаю рақам гузоранд;

- то 1 июли соли 2019 нақшаҳои схематикии маҳалҳои шаҳрӣ, деҳаҳои калон ва харитаҳои ноҳияҳоро дар ҳамкорӣ ва мувофиқа бо Кумитаи давлатии идораи замин ва геодезии Ҷумҳурии Тоҷикистон тартиб диҳанд ва ба Агентии омори назди Президенти Ҷумҳурии Тоҷикистон пешниҳод намоянд;

- то 1 сентябри соли 2019 бо роҳи саросар гаштан дурустӣ ва пуррагии баҳисобгирии ҷории аҳолиеро, ки дар хонаҳои истиқоматӣ ва дигар биноҳои маҳалҳои шаҳрӣ ва деҳот зиндагӣ мекунанд, тафтиш кунанд ва тартиб додани рӯйхати деҳаҳоро дар асоси маълумоти муқоисашудаи дафтарҳои баҳисобгирии хоҷагиҳо таъмин намоянд.

5. Корхонаи воҳиди давлатии "Хоҷагии манзилию коммуналӣ" барои ба тартиб даровардани номгӯи кӯчаҳо, рақамгузории маҳаллаҳо, хонаҳои истиқоматӣ ва манзилҳо дар ҳудуди Ҷумҳурии Тоҷикистон ба мақомоти иҷроияи маҳаллии ҳокимияти давлатӣ кӯмак расонад.

6. Вазорати корҳои дохилии Ҷумҳурии Тоҷикистон ба мақомоти иҷроияи маҳаллии ҳокимияти давлатӣ кӯмак расонида, ҷараёни дуруст ва пурра ба ҳисоб гирифтани аҳолиро дар маҳалҳои шаҳрӣ назорат кунад.

7. Кумитаи давлатии идораи замин ва геодезии Ҷумҳурии Тоҷикистон ва Кумитаи меъморӣ ва сохтмони назди Ҳукумати Ҷумҳурии Тоҷикистон роҳбарии методиро дар тайёр намудани маводи нақшаю харитасозӣ барои мақомоти иҷроияи маҳаллии ҳокимияти давлатии шаҳру ноҳияҳои ҷумҳурӣ анҷом дода, дар асоси дархостҳои онҳо нақшаҳои шаҳрҳо, шаҳракҳо ва деҳаҳои калон, инчунин харитаҳои ноҳияҳоро барои гузаронидани баруйхатгирии аҳолӣ ва фонди манзил ба миқдори зарурӣ нусхабардорӣ карда диҳанд.

8. Вазорати фарҳанги Ҷумҳурии Тоҷикистон, Кумитаи телевизион ва радиои назди Ҳукумати Ҷумҳурии Тоҷикистон, Агентии миллии иттилоотии "Ховар"-и назди Ҳукумати Ҷумҳурии Тоҷикистон ба инъикоси ҷараёни тайёрӣ ва гузаронидани барӯйхатгирии аҳолӣ ва фонди манзил дар воситаҳои ахбори омма мусоидат намоянд.

9. Хадамоти алоқаи назди Ҳукумати Ҷумҳурии Тоҷикистон:

- дар навбати аввал ба масъулон расонидани муросилоти почтаю телеграфӣ, муросила ва бастаҳои коғазиеро, ки бинобар тайёрӣ ва гузаронидани барӯйхатгирии аҳолӣ ва фонди манзил ва коркарди он фиристода мешаванд, таъмин намояд:

- дар давраи солҳои 2017-2023 гуфтугӯи телефони байнишаҳрии вобаста ба тайёрӣ ва гузаронидани барӯйхатгирии аҳолӣ ва фонди манзил ва коркарди маводи ҷамъбастии онро ба категорияи гуфтугӯҳои рамзӣ мансуб дониста, аз рӯи тарифи муқаррарӣ ҳисоб кунад.

10. Вазорати нақлиёти Ҷумҳурии Тоҷикистон, Корхонаи воҳиди давлатии "Роҳи оҳани Тоҷикистон", Ҷамъияти саҳомии кушодаи "Тоҷик Эйр". Ҷамъияти дорои масъулияти махдуди "Сомон Эйр" мунтазам қабул ва ба масъулон расонидани борҳоеро, ки барои тайёрӣ ва гузаронидани барӯйхатгирии аҳолӣ ва фонди манзил фиристода мешаванд, таъмин намоянд.

11. Вазорати мудофиаи Ҷумҳурии Тоҷикистон, Вазорати корҳои дохилии Ҷумҳурии Тоҷикистон, Вазорати корҳои хориҷии Ҷумҳурии Тоҷикистон, Вазорати адлияи Ҷумҳурии Тоҷикистон, Кумитаи давлатии амнияти миллии Ҷумҳурии Тоҷикистон, Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон, Гвардияи миллии Ҷумҳурии Тоҷикистон ва дигар вазорату идораҳое, ки контингенти махсус ва нншоотҳои пӯшида доранд, тайёрӣ дида, баруйхатгирии хизматчиёни ҳарбӣ ва контингенти махсуси аҳолиро тибқи тартиб ва муҳлати муқаррарнамудаи Агентии омори назди Президенти Ҷумҳурии Тоҷикистон таъмин намоянд.