Тартиби ташкил ва пешбурди Феҳристи кӯмаки башардӯстона ба иттиҳодияҳои ҷамъиятии Ҷумҳурии Тоҷикистон

1. Тартиби мазкур дар асоси қисми 2 моддаи 27 Қонуни Ҷумҳурии Тоҷикистон "Дар бораи иттиҳодияҳои ҷамъиятӣ" таҳия гардида, қоидаҳои ташкил ва пешбурди Феҳристи иттиҳодияҳои ҷамъиятиеро, ки бо иштироки давлатҳои хориҷӣ, шахсони ҳуқуқии хориҷӣ, субъектҳои хориҷӣ, ташкилотҳои байналмилалӣ ва ҳаракатҳои ҷамъиятии байналмилалӣ, инчунин аз ҳисоби пардохтҳои ихтиёрӣ, хайрияҳо, грантҳо ё молу мулки аз дигар шахсони воқеӣ ва ҳуқуқӣ гирифташуда таъсис ёфтаанд (минбаъд - Феҳрист), бо мақсади амалӣ намудани танзими давлатӣ ва назорат оид ба риояи қонунгузории амалкунанда аз ҷониби онҳо муқаррар менамояд.

2. Ташкил ва пешбурди Феҳристро мақомоти бақайдгирандаи иттиҳодияҳои ҷамъиятӣ - Вазорати адлияи Ҷумхурии Тоҷикистон, раёсатҳои адлияи Вилояти Мухтори Кӯҳистони Бадахшон, вилоятҳои Хатлон ва Суғд (минбаъд - мақоми бақайдгиранда) амалӣ менамоянд.

3. Дар сурати гирифтани пардохтҳои ихтиёрӣ, хайрияҳо, грантҳо ё молу мулк тибқи кисми 2 моддаи 27 Қонуни Ҷумҳурии Тоҷикистон "Дар бораи иттиҳодияҳои ҷамъиятӣ" (минбаъд - манбаъҳои хориҷӣ) иттиҳодияҳои ҷамъиятӣ ӯҳдадоранд, мақоми бақайдгирандаро дар давоми 10 рӯз огоҳ намоянд.

4. Огоҳинома ба тарзи мувофиқ пешниҳодгардида ҳисоб мешавад, агар он бевосита ба мақоми бақайдгиранда супорида шуда бошад ва (ё) тавассути почта ба воситаи мактуби фармоишӣ бо огоҳонидан оид ба супоридани он, ба воситаи телеграмма, факс ё ба воситаҳои дигари алоқа ва дастраскунӣ, ки супоридани огоҳиномаро сабт мекунад, ба мақоми бақайдгиранда дастрас шуда бошад. Огоҳиномаи ташкилоти ҷамъиятӣ метавонад, дар шакли электронӣ пешниҳод карда шавад. Шакли огоҳинома ва тартиби пешниҳоди огоҳинома дар шакли электрониро Вазорати адлияи Ҷумҳурии Тоҷикистон муайян менамояд.

5. Дар огоҳинома бояд маълумоти зерин дарҷ карда шавад:

- ном ва рақами бақайдгирии иттиҳодияи ҷамъиятӣ;

- суроғаи ҳуқуқӣ;

- рақами мушаххаси андозсупоранда;

- насаб, ном, номи падари роҳбари иттиҳодияи ҷамъиятӣ;

- шакл ва намуди пардохт (хайриявӣ ё мақсаднок);

- маблағгузорӣ бо нишон додани бевосита аз субъекти хориҷӣ ё ба воситаи ташкилоти дигар (маблағгирандагони фаръӣ);

- ном ва мақсади лоиҳа;

- минтақаи фаъолияти лоиҳавӣ;

- давраи амалигардонии лоиҳа (тақсимоти солонаи маблағҳо, агар лоиҳа зиёда аз як сол татбиқ гардад);

- миқдори кӯмакгирандагон (гурӯҳи аҳолии ба кӯмак эҳтиёҷманд);

- номгӯи ташкилоте, ки дар татбиқи лоиҳа бевосита ҷалб карда мешавад.

6. Дар сурати давомнокии лоиҳаи татбиқшаванда зиёда аз як сол, пешннҳоди огоҳиномаи такрорӣ лозим нест.

7. Ворид намудани маълумот ба Феҳрист аз тарафи мутахассисони соҳавии мақоми бақайдгиранда амалӣ карда мешавад. Дар сурати норасоии маълумот, мақоми бақайдгиранда метавонад, иттилооти иловагиро аз роҳбарияти иттиҳодияҳои ҷамъиятӣ талаб карда гирад.

8. Феҳрист ошкоро мебошад ва он дар сомонаи Вазорати адлияи Ҷумҳурии Тоҷикистон ё дигар манбаъҳо дастраси омма гардонида мешавад.

9. Ворид намудани иттилооти иттиҳодияҳои ҷамъиятӣ оид ба манбаъҳои хориҷӣ ба Феҳрист дар шакли хаттӣ ва электронӣ ба расмият дароварда мешавад.

10. Дар Феҳрист чунин маълумот сабт карда мешавад:

- ном ва рақами бақайдгирии иттиҳодияи ҷамъиятӣ;

- суроғаи ҳуқуқӣ;

- насаб, ном, номи падари роҳбари иттиҳодияи ҷамьиятӣ;

- шакл ва намуди пардохт (хайриявӣ ё мақсаднок);

- сана ва тарзи пешниҳод намудани огоҳинома аз ҷониби иттиҳодияи ҷамъиятӣ;

- санаи оғози лоиҳа ва мӯҳлати анҷомёбии он;

- маблағгузорӣ.

11. Барои аз ҷониби иттиҳодияи ҷамъиятӣ дар мӯҳлати муқарраршуда пешниҳод намудани огоҳинома роҳбари иттиҳодияи ҷамъиятӣ масъул мебошад. Пешниҳоди огоҳиномаи ташкилоти ҷамъиятӣ вобаста ба гирифтани пардохтҳо аз манбаъҳои хориҷӣ онҳоро аз иҷрои вазифаҳое, ки тибқи моддаи 25 Қонуни Ҷумҳурии Тоҷикистон "Дар бораи иттиҳодияҳои ҷамъиятӣ" муайян шудаанд, озод намекунад.

12. Мақоми бақайдгиранда ҳангоми ташкили Феҳрист маълумоти зерини тасдиқкунандаи гирифтани пардохтҳои ихтиёрӣ, хайрияҳо, грантҳо ё молу мулк аз тарафи манбаъҳои хориҷиро истифода бурда метавонад:

- огоҳиномаи ташкилоти ҷамъиятӣ;

- натиҷаҳои таҳлил ва баҳодиҳии ҳисоботи солонаи иттиҳодияи ҷамъиятӣ, ки онро мақоми бақайдгиранда (воҳиди минтақавии он) гузаронидааст;

- иштирок дар чорабиниҳои иттиҳодияҳои ҷамъиятӣ;

- гузаронидани санҷиши мувофиқати фаъолияти иттиҳодияҳои ҷамъиятӣ ба мақсадҳои оинномавии онҳо;

- маълумоти давлатии ҳисоботии оморӣ, ки фаъолияти субъектҳои хоҷагидорро тавсиф менамояд;

- маълумоте, ки аз мақомоти андоз, гумрук ва дигар мақомоти ҳокимияти давлатӣ, мақомоти иҷроияи маҳаллии ҳокимияти давлатӣ гирифта шудааст;

- маълумоте, ки аз шахсонн ҳуқуқӣ ва воқеӣ дастрас шудааст;

- маълумоти идоравӣ, марказҳо ва хадамоти иттилоотии мустақил;

- иттилооти воситаҳои ахбори омма;

- маълумоти дигар давлатҳо;

- маълумоти сарчашмаҳои дигар.