Тартиби истифодаи ҳудудҳои минтақаҳои объектҳои ҳарбӣ ва дигар ҳудудҳои реҷавӣ дар доираи ҳудудҳои шаҳр ва шаҳракҳо бо дарназардошти қоидаҳои сохтмонӣ, меъёру қоидаҳои шаҳрсозӣ

1. МУҚАРРАРОТИ УМУМӢ

1. Тартиби истифодаи ҳудудҳои минтақаҳои объектҳои ҳарбӣ ва дигар ҳудудҳои реҷавӣ дар доираи ҳудудҳои шаҳр ва шаҳракҳо бо дарназардошти қоидаҳои сохтмонӣ, меъёру қоидаҳои шаҳрсозӣ (минбаъд - Тартиб) тибқи моддаи 39 Кодекси шаҳрсозии Ҷумҳурии Тоҷикистон таҳия гардида, тартиби истифодабарии ҳудудҳои минтақаҳои объектҳои ҳарбӣ ва дигар ҳудудҳои реҷавиро дар доираи ҳудудҳои шаҳр ва шаҳракҳо бо дарназардошти қоидаҳои сохтмонӣ, меъёру қоидаҳои шаҳрсозӣ дар Ҷумҳурии Тоҷикистон муайян менамояд.

2. Дар Тартиби мазкур мафҳумҳои асосии зерин истифода карда мешаванд:

- объектҳои махсус - нуқтаҳои идоракунии давлат ва Қувваҳои Мусаллаҳи Ҷумҳурии Тоҷикистон, инчунин дигар объектҳое, ки фаъолияти мақомоти давлатиро дар замони осоишта ва ҷанг таъмин менамоянд;

- объектҳои ҳарбӣ - қисмҳои ҳарбӣ, мавзеъҳои ҷангии қӯшунҳо, нуқтаҳои идоракунӣ, полигонҳо, шӯъбаҳои алоқа, пойгоҳҳо, анборҳо ва дигар иншооти таъиноти ҳарбӣ;

- объектҳои таҳти низом - объектҳои махсус ва ҳарбӣ, ташкилотҳое, ки барои фаъолияти онҳо чораҳои иловагии амниятӣ муқаррар гардидаанд;

- сервитут - ҳуқуқи маҳдудшудаи (гарони) истифодабарии молу мулки шахси дигар ё маҳдудияти қисмани ҳуқуқи соҳибмулк дар муносибатҳои муайяни тибқи қонун муқарраршуда;

- хати сурх - сарҳади бо ҳуҷҷатҳои шаҳрсозӣ муқарраршуда, ки ҳудуди бинову маҳаллаҳо ва дигар қисмати сохтори банақшагириро аз кӯчаву майдон ва хиёбонҳои маҳалҳои аҳолинишин ҷудо мекунад;

- хатҳои танзими иморатсозӣ - сарҳадҳои сохтмонӣ, ки ҳангоми ҷойгиркунии бино ва иншоот бо фосила аз хатҳои сурх ё аз сарҳади қитъаи замин бо ҳуҷҷатҳои шаҳрсозӣ муқаррар мешаванд;

- ҳудудҳои минтақаҳои объектҳои ҳарбӣ ва дигар ҳудудҳои реҷавӣ объектҳои ҳудудии фаъолияти шаҳрсозии низоми махсус мебошанд, ки аз минтақаҳои махсус бо ҷойгиронии объектҳои таҳти низом, инчунин объектҳои дигари бо меъёрҳои давлати пешбинишуда барои ҳудудҳои низоми махсус дар маҳалҳои аҳолинишин ва ё берун аз ҳудуди онҳо минтақаҳои беҳдоштӣ, муҳофизатӣ ва посбонии атрофи объектҳои низоми махсус, қитъаву минтақаҳои муҳофизатии обҳо иборат аст.

3. Тартиби мазкур тартиби банақшагирӣ ва ҷойгиронии минтақаҳои таъиноти дигарро дар ҳудудҳои минтақаҳои объектҳои махсус, ҳарбӣ ва объектҳои таҳти низом, ки нисбати онҳо низоми махсус муқаррар мегардад (минбаъд - объектҳои таҳти низом), муайян менамояд, агар бо Қонуни Ҷумҳурии Тоҷикистон "Дар бораи сирри давлатӣ" тартиби дигаре пешбинӣ нагардида бошад.

4. Таҳияи лоиҳа, сохтмон ва таҷдиди объектҳои таҳти низом дар асоси талаботи меъёру қоидаҳои муқарраршуда нисбат ба мақомоту ташкилотҳои низоми махсус ва объектҳои ҳифзи махсуси Ҷумҳурии Тоҷикистон, анҷом дода мешаванд,

5. Риояи Тартиби мазкур барои тамоми субъектҳои фаъолияти шаҳрсозӣ дар Ҷумҳурии Тоҷикистон, новобаста аз шакли ташкилию ҳуқуқӣ ва тобеияти идоравии онҳо ҳатмӣ мебошад.

2. МЕЪЁРҲО ОИД БА АСОСНОККУНИИ ИСТИФОДАИ ҲУДУДҲОИ МИНТАҚАҲОИ ОБЪЕКТҲОИ ҲАРБӢ ВА ДИГАР ҲУДУДҲОИ РЕҶАВӢ

6. Вобаста ба таъиноти объектҳои таҳти низом бо меъёрҳои муқарраршуда сарҳадҳои минтақаҳои беҳдоштӣ, муҳофизатӣ ва посбонӣ, нишондиҳандаҳои хоси фосилаҳои байни объектҳои таҳти низом ва объектҳои минтақаи дигари фаъолияткунанда муайян мегарданд, ҳамчунин талабот (маҳдудкунӣ, шартҳо) ба онҳо муқаррар карда мешаванд, агар дар қонунгузорӣ тартиби дигар пешбинӣ нашуда бошад.

7. Минтақаҳои муҳофизатии об барои ҳар як обанбори мушаххас аз ҷониби мақомоти иҷроияи маҳаллии ҳокимияти давлатӣ бо пешниҳоди мақоми ваколатдори давлатӣ оид ба идоракунии захираҳои об муқаррар карда мешавад.

8. Барои объектҳои дар ҳудуди мавҷудаи минтақаҳои объектҳои таҳти низом ҷойгиршаванда аз лаҳзаи тасдиқи супориш ҷиҳати лоиҳакашии онҳо ва оғози таҳияи ҳуҷҷатҳои лоиҳавӣ то ба истифодадиҳии объектҳои сохташуда мақоми объектҳои таҳти низоми махсус муқаррар карда мешавад.

9. Объекти сохташуда ё қисми дар ҳудуди объектҳои таҳти низом сохташудаи он, ки то баистифодадиҳӣ мақоми объекти таҳти низоми махсусро доро буд, метавонад ин мақомро пас аз ба истифода додани объект низ нигоҳ дорад.

10. Ҳангоми банақшагирии истифодабарии ҳудудҳои минтақаҳои объектҳои таҳти низом барои ҷойгир кардани объектҳои сохтмонӣ, ҳамчунин истифодабарии минбаъдаи объектҳои сохташуда бояд талаботи зерин таъмин гардад:

- ҳифзи ҳаёт ва саломатии инсон;

- нигоҳ доштани мувозинати экологӣ ва беҳтар намудани вазъи экологӣ;

- истифодаи оқилонаи ҳудудҳои об ва дигар захираҳои табиӣ;

- мусоидат ба ташаккул ёфтани муҳити мусоиди зист ва ҳаёти инсон;

- ҳифзи объектҳои манзаравии (ландшафтии) посбонишаванда ва дигар объектҳои фонди давлатии табиию мамнӯъгоҳӣ;

- ҳифзи ёдгориҳои таърихию фарҳангӣ ва маҷмӯаи онҳо;

- таъмини низоми махфият бо тартиби муқаррарнамудаи Қонуни Ҷумҳурии Тоҷикистон "Дар бораи сирри давлатӣ".

11. Истифодабарии ҳудудҳои минтақаҳои объектҳои таҳти низом аз тарафи субъектҳои фаъолияти шаҳрсозӣ танҳо тибқи ҳуҷҷатҳои лоиҳавии бо Тартиби мазкур тасдиқшуда ва риояи таъиноти мақсаднок ё сервитути қитъаи замини пешниҳодшуда, минтақабандии ҳудуд, қоидаҳои минтақавии бинокорӣ ва дар шаҳрҳо ва шаҳракҳои типи шаҳрӣ бошад, бо риояи хатҳои сурх ва хатҳои банизомдарории бинокорӣ амалӣ карда мешавад.

12. Супориш барои лоиҳакашии дилхоҳ объекти дар ҳудудҳои минтақаи объектҳои таҳти низом ҷойгиршаванда бояд пеш аз тасдиқ шуданаш бо мақомоти амният ва дигар мақомоти давлатии дахлдор мувофиқа карда шавад.

13. Супориши меъморию банақшагирии мақомоти маҳаллии меъморӣ ва шаҳрсозӣ оид ба объекти дар ҳудуди минтақаи объекти таҳти низом ҷойгиршаванда бояд бо дарназардошти дастури шаҳрсозие, ки мувофиқи таъиноти мақсадноки қитъаи замини барои сохтмон ҷудошуда муқаррар гардидааст, инчунин талаботи Тартиби мазкур дода шавад.

3. МУҚАРРАРОТИ ХОТИМАВӢ

14. Баҳсҳо оид ба масъалаҳои мувофиқаи ҷойгиркунии объектҳо дар ҳудуди объектҳои таҳти низом бо тартиби муқаррарнамудаи қонунгузории Ҷумҳурии Тоҷикистон аз ҷониби мақомоти давлатӣ ё бо тартиби судӣ ҳал карда мешаванд.

15. Шахсони воқеӣ ва ҳуқуқӣ, инчунин мақомоти давлатӣ ҳангоми банақшагирӣ ва бо мақсадҳои сохтмонӣ истифодабарӣ шудани ҳудудҳои минтақаҳои объектҳои таҳти низом, барои вайрон кардан ва ё бархилофи талаботи меъёрҳои давлатӣ амал намудан, инчунин зараррасонӣ ба объектҳое, ки нисбати онҳо низоми махсус муқаррар шудааст, мутобиқи қонунгузории Ҷумҳурии Тоҷикистон ба ҷавобгарӣ кашида мешаванд.