Низомномаи Комиссияи доимамалкунанда оид ба тақвияти истеҳсолоти воридотивазкунанда ва рушди содирот

1. МУҚАРРАРОТИ УМУМӢ

1. Комиссияи доимамалкунанда оид ба таҳкими истеҳсолоти воридотивазкунанда ва рушди содирот (минбаъд - Комиссия) бо мақсади мукаммал намудани сиёсати давлатии тақвияти истеҳсолоти воридотивазкунанда ва рушди содирот, татбиқи сиёсати давлат оид ба ҳавасмандгардонии истеҳсоли ватанӣ, кам намудани вобастагии иқтисодиёти миллӣ аз воридоти молу маҳсулоти хориҷӣ таъсис дода шудааст.

2. Комиссия мақоми ҳамоҳангсоз буда, барои таъмини фаъолияти мувофиқашудаи вазорату идораҳо, мақомоти иҷроияи маҳаллии ҳокимияти давлатӣ ва субъектҳои соҳибкорӣ вобаста ба масъалаҳои тақвияти истеҳсолоти воридотивазкунада ва рушди содирот созмон дода шудааст.

3. Комиссия дар фаъолияти худ Конститутсияи (Сарқонуни) Ҷумҳурии Тоҷикистон, санадҳои меъёрии ҳуқуқии Ҷумҳурии Тоҷикистон ва Низомномаи мазкурро ба роҳбарӣ мегирад.

2. ВАЗИФАҲОИ АСОСИИ КОМИССИЯ

4. Вазифаҳои асосии Комиссия:

- мусоидат ҷиҳати татбиқи сиёсати давлатӣ оид ба тақвияти истеҳсолоти воридотивазкунанда ва рушди содирот, муайян намудани чораҳое, ки барои қонеъ гардонидани талаботи бозори истеъмолӣ ва эҳтиёҷоти дигар ба молҳои истеҳсолии ватанӣ равона гардидаанд;

- баррасии таклифу пешниҳодҳо ва мусоидат ба иҷрои чорабиниҳое, ки барои муҳайё намудани шароит ҷиҳати татбиқи самараноки сиёсати давлатӣ дар соҳаи воридотивазкунанда ва рушди содирот равона гардидаанд;

- муайян намудани самтҳои афзалиятнок ва тадбирҳои асосӣ оид ба баланд бардоштани ҷолибияти лоиҳаҳои сармоягузорӣ дар бахши воридотивазкунӣ ва рушди содирот;

- такмили самтҳои ҳуқуқии фаъолият вобаста ба масъалаҳои тақвияти истеҳсолоти воридотивазкунанда ва рушди содирот;

- таъмини ҳамоҳангсозии фаъолияти мақомоти идоракунии давлатӣ ва соҳибкорӣ барои фароҳам овардани шароити мусоид барои истеҳсоли молҳои рақобатпазири воридивазкунанда ва рушди содирот;

- дастгирӣ ва ташаккули инфрасохтори маҳсулоти содиротие, ки ба гурӯҳи ашёи хом дохил намешавад;

- ташкили чорабиниҳои таълимию омӯзишӣ барои истеҳсолкунадагони маҳсулоти воридотивазкунанда ва содиротӣ;

- ҳамоҳангсозии фаъолияти вазорату идораҳо, мақомоти иҷроияи маҳаллии ҳокимияти давлатӣ ва соҳибкорон дар татбиқи самтҳои асосии сиёсати давлатӣ оид ба тақвияти истеҳсолоти воридотивазкунанда ва рушди содирот;

- баррасии лоиҳаҳо оид ба истеҳсоли маҳсулоти воридотивазкунанда ва рушди содирот, ки дастгирии давлатиро талаб менамоянд, аз ҷумла тавассути барномаҳои давлатӣ ва фонди дастгирии соҳибкорӣ;

- таҳлили хариди давлатӣ ва тайёр намудани тавсияҳо оид ба иштироки васеи истеҳсолкунандагони ватанӣ дар хариди давлатӣ;

- фароҳам овардани заминаҳои ҳуқуқӣ оид ба чорабиниҳои дастгирии давлатии истеҳсолоти воридотивазкунанда ва рушди содирот.

3. ВАКОЛАТҲОИ КОМИССИЯ

5. Барои иҷрои вазифаҳои худ Комиссия дорои ваколатҳои зерин мебошад:

- дастур ва нақшаи кори Комиссияро тасдиқ намояд;

- бо мақомоти ҳокимияти иҷроия ва қонунгузор, мақомоти иҷроияи маҳаллии ҳокимияти давлатӣ, мақомоти худидоракунии шаҳраку деҳот, инчунин иттиҳодияҳои соҳибкорон дар иҷрои вазифаҳои дар назди Комиссия гузошташуда ҳамкорӣ намояд;

- тибқи тартиби муқарраргардида аз мақомоти ҳокимияти иҷроия ва қонунгузор, мақомоти иҷроияи маҳаллии ҳокимияти давлатӣ, мақомоти худидоракунии шаҳраку деҳот, инчунин иттиҳодияҳои соҳибкорон, коршиносону мутахассисон маълумоти оморию таҳлилӣ ва ҳисоботи давравӣ доир ба иҷрои чорабиниҳои қаблан ба нақша гирифташударо дар доираи ваколатҳои Комиссия талаб намояд;

- намояндагони мақомоти ҳокимияти иҷроия ва қонунгузор, мақомоти иҷроияи маҳаллии ҳокимияти давлатӣ, мақомоти худидоракунии шаҳраку деҳот, инчунин иттиҳодияҳои соҳибкорон, роҳбарону намояндагони ваколатдори ташкилотҳо, коршиносону мутахассисонро ба ҷаласаҳои Комиссия даъват карда, масъалаҳое, ки дар салоҳияти Комиссия мебошанд, зуд муҳокима намуда, қарори дахлдор қабул намояд;

- тибқи тартиби муқарраргардида ба баррасии Ҳукумати Ҷумҳурии Тоҷикистон оид ба масъалаҳои дар кори Комиссия баррасишуда таклифу пешниҳод манзур намояд;

- барои зоҳир намудани бемасъулиятӣ нисбат ба иҷрои қарорҳои Комиссия, намояндагони мақомоти марказӣ, мақомоти иҷроияи маҳалии ҳокимияти давлатӣ, мақомоти худидоракунии шаҳрак ва деҳот, роҳбарон ва намояндагони ваколатдори ташкилотҳо тибқи қонунгузории Ҷумҳурии Тоҷикистон чораҳои зарурӣ андешад.

4. ТАРТИБИ КОРИ КОМИССИЯ

6. Комиссия фаъолияти худро мувофиқи дастур ва нақшаи корӣ, ки дар ҷаласаи Комиссия қабул ва аз ҷониби раиси Комиссия тасдиқ карда мешаванд, ба роҳ мемонад.

7. Қарор оид ба баргузории ҷаласаи Комиссия аз ҷониби раиси Комиссия қабул карда мешавад (дар набудани ӯ муовини раиси Комиссия) ва ба маълумоти аъзои Комиссия аз ҷониби котиби масъули Комиссия на дертар аз се рӯзи корӣ то санаи гузаронидани ҷаласа расонида мешавад.

8. Ҷаласаи Комиссия дар ҳолате комилҳуқуқ ҳисоб карда мешавад, агар дар он на кам аз нисфи ҳайати аъзои Комиссия иштирок намоянд. Дар ҳолати ғайриимкон будани иштирок дар ҷаласа аъзои Комиссия ӯҳдадоранд дар мӯҳлати на кам аз ду рӯз то ҷаласаи навбатӣ котиби масъули Комиссияро оид ба ивази мувофиқ огоҳ намояд ё оид ба масъалаи дар ҷаласа муҳокимашаванда пешниҳоди хаттии худро расонад.

9. Қарорҳои Комиссия тавассути овоздиҳии кушод бо аксарияти овозҳои аъзои Комиссия, ки дар ҷаласа иштирок доранд, қабул карда мешаванд. Дар ҳолати баробар будани овозҳо, овози раиси Комиссия (дар ҳолати набудани ӯ, муовини раиси Комиссия) ҳалкунанда мебошад.

10. Барои қарорҳои дар ҷаласаи Комиссия қабулшуда протокол тартиб дода мешавад. Протоколи ҷаласаҳои Комиссия аз ҷониби раиси Комиссия (дар ҳолати набудани ӯ, муовини раиси Комиссия) ба имзо расонида мешаванд. Назорати рафти иҷрои муқаррароти протоколи ҷаласаҳои Комиссияро котиби масъули Комиссия амалӣ менамояд.

11. Иҷрои қарорҳои Комиссия, ки дар доираи ваколатҳояш қабул шудаанд, барои вазорату идораҳо, мақомоти иҷроияи ҳокимияти давлатӣ ва дигар субъектҳои дахлдор, инчунин ташкилотҳое, ки нисбат ба онҳо қарор қабул карда шудааст, ҳатмӣ мебошад.

12. Фаъолияти ташкилӣ-техникии Комиссия аз ҷониби Дастгоҳи иҷроияи Президенти Ҷумҳурии Тоҷикистон таъмин мегардад.

13. Бо мақсади дар сатҳи зарурӣ амалӣ намудани дастуру супоришҳои Комиссия ва пешниҳоди маводи таҳлилӣ дар ҷаласаҳо вобаста ба самтҳои алоҳидаи истеҳсолот комиссияҳои мақсадноки соҳавӣ ташкил карда мешаванд.

14. Коргузории Комиссия аз ҷониби котиби масъули Комиссия анҷом дода мешавад.

15. Маводи ҷаласаи навбатӣ аз ҷониби котиби масъули Комиссия дар мӯҳлати панҷ рӯз пеш аз баргузории ҷаласа ба Комиссия пешниҳод карда мешавад.

16. Комиссияҳои мақсадноки соҳавӣ дар ҳамкорӣ бо вазорату идораҳои дахлдор маводи вобаста ба рӯзномаи ҷаласаи навбатиро, дар мӯҳлати даҳ рӯз пеш аз баргузории ҷаласа ба Комиссия пешниҳод менамоянд.

5. ҚАТЪИ ФАЪОЛИЯТИ КОМИССИЯ

18. Қатъи фаъолияти Комиссия тибқи қонунгузории Ҷумҳурии Тоҷикистон амалӣ карда мешавад.