Тартиби ҳифз ва нигоҳдории сарватҳои таърихию фарҳангии муваққатан ба Ҷумҳурии Тоҷикистон воридшаванда

1. МУҚАРРАРОТИ УМУМӢ

1. Тартиби ҳифз ва нигоҳдории сарватҳои таърихию фарҳангии муваққатан ба Ҷумҳурии Тоҷикистон воридшаванда (минбаъд - Тартиб) тартиби ҳифзи сарватҳои таърихию фарҳангӣ ва нигоҳдории онҳоро ба танзим медарорад.

2. Назорати ҳифз ва нигоҳдории сарватҳои таърихию фарҳангии муваққатан ба Ҷумҳурии Тоҷикистон воридшаванда аз ҷониби Вазорати фарҳанги Ҷумҳурии Тоҷикистон амалӣ карда мешавад.

2. КАФОЛАТИ ДАВЛАТИИ ҲИФЗ ВА НИГОҲДОРИИ САРВАТҲОИ ТАЪРИХИЮ ФАРҲАНГИИ МУВАҚҚАТАН БА ҶУМҲУРИИ ТОҶИКИСТОН ВОРИДШАВАНДА

3. Сарватҳои таърихию фарҳангие, ки муваққатан ба Ҷумҳурии Тоҷикистон ворид карда мешаванд, тибқи талаботи муқаррарнамудаи қонунгузории Ҷумҳурии Тоҷикистон ҳатман аз назорати гумрукӣ мегузаранд ва оид ба онҳо дар мӯҳлати се рӯз ба Вазорати фарҳанги Ҷумҳурии Тоҷикистон маълумот дода мешавад.

4. Сарватҳои таърихию фарҳангие, ки бо мақсади ҳамкориҳои фарҳангӣ муваққатан ба Ҷумҳурии Тоҷикистон ворид карда мешаванд, моликияти давлатҳо, шахсони ҳуқуқӣ ва воқеии хориҷӣ маҳсуб ёфта, зери ҳимояи Ҷумҳурии Тоҷикистон қарор доранд ва нисбат ба онҳо амали қонунгузории Ҷумҳурии Тоҷикистон дар бораи ҳифз ва истифодаи мероси таърихию фарҳангии Ҷумҳурии Тоҷикистон татбиқ карда мешавад.

5. Кафолати давлатии ҳифз ва нигоҳдории сарватҳои таърихию фарҳангие, ки муваққатан ворид карда мешаванд, тибқи шартномаҳои байналмилалии аз ҷониби Ҷумҳурии Тоҷикистон эътирофгардида, инчунин бо меъёрҳои қонунгузории Ҷумҳурии Тоҷикистон таъмин карда мешавад.

6. Ҷуброни молиявии зарари расонидашуда ба сарватҳои таърихию фарҳангие, ки муваққатан ба Ҷумҳурии Тоҷикистон ворид карда мешаванд, аз ҷониби давлат кафолат дода мешавад.

7. Риояи амнияти сарватҳои таърихию фарҳангии муваққатан ба Ҷумҳурии Тоҷикистон воридкардашуда ва баргардонидани онҳо ба давлати ирсолкунанда кафолат дода мешавад.

8. Ҳангоми муваққатан ворид намудани сарватҳои таърихию фарҳангӣ ба Ҷумҳурии Тоҷикистон боҷи гумрукӣ ситонида мешавад.

9. Тартиби муваққатан ворид намудани сарватҳои таърихию фарҳангӣ ба Ҷумҳурии Тоҷикистон, новобаста аз намуди моликият ба таври ягона ба роҳ монда мешавад.

10. Ҳаққи хизматрасонӣ оид ба гузаронидани ташхиси сарватҳои таърихию фарҳангие, ки муваққатан ба Ҷумҳурии Тоҷикистон ворид карда шудаанд, мувофиқи тартиби муайяннамудаи қонунгузории Ҷумҳурии Тоҷикистон пардохт карда мешавад.

11. Вазорати фарҳанги Ҷумҳурии Тоҷикистон ва Хадамоти гумруки назди Ҳукумати Ҷумҳурии Тоҷикистон дар доираи ваколатҳои худ вазифаҳои мақомоти танзими давлатӣ ва назоратро оид ба ворид намудан ва берун баровардани сарватҳои таърихию фарҳангӣ иҷро менамоянд.

12. Нигоҳдории сарватҳои таърихию фарҳангии муваққатан ба Ҷумҳурии Тоҷикистон воридкардашуда бо дарназардошти хусусияти онҳо ба роҳ монда мешавад.

13. Бе иҷозати соҳибмулк ё намояндаи воридкунандаи сарватҳои таърихию фарҳангӣ гирифтани акс, нусхабардорӣ, банаворгирии сарватҳои таърихию фарҳангии муваққатан ба Ҷумҳурии Тоҷикистон воридшаванда манъ аст.

14. Дигаргун кардан ё аз як ҷой ба ҷойи дигар гузаронидани сарватҳои таърихию фарҳангӣ, ки муваққатан ба Ҷумҳурии Тоҷикистон ворид карда мешаванд, манъ аст.

15. Дар ҳолатҳои фавқуллода ё дигар ҳолатҳои аз як ҷой ба ҷойи дигар гузаронидани сарватҳои таърихию фарҳангии муваққатан ба Ҷумҳурии Тоҷикистон воридшаванда танҳо бо розигии соҳибмулк сурат мегирад. Дар ҳолатҳои истисноӣ оид ба ҷойи дигар гузаронидани сарватҳои таърихию фарҳангӣ ба соҳибмулк расман хабар дода мешавад.

16. Дар ҳолати аз як ҷой ба ҷойи дигар гузаронидани сарватҳои таърихию фарҳангии муваққатан ба Ҷумҳурии Тоҷикистон воридшаванда воситаҳои нақлиёти махсус истифода мешаванд.

17. Сарватҳои таърихию фарҳангие, ки муваққатан ба Ҷумҳурии Тоҷикистон ворид карда мешаванд, моликияти давлати хориҷа ё шаҳрванди хориҷӣ ба ҳисоб рафта, дар асоси созишномаҳои байни ду тараф, ки Ҷумҳурии Тоҷикистон эътироф намудааст, ҳифз мешаванд.

18. Бо мақсади иҷрои тартиби муқарраргардида оид ба нигоҳдошти сарватҳои таърихию фарҳангие, ки муваққатан ба Ҷумҳурии Тоҷикистон ворид карда шудаанд, бояд ҳуҷраҳои хушки алоҳидаи муҷаҳҳаз бо миқдори кофии таҷҳизоти равшандиҳанда ва таҷҳизоти бехатарии зидди сӯхтор ҷудо карда шаванд.

19. Нигоҳдории сарватҳои таърихию фарҳангии муваққатан ба Ҷумҳурии Тоҷикистон воридшаванда дар шароите амалӣ мегардад, ки бехатарӣ ва эҳтимолияти ба онҳо роҳ надодани шахсони бегона таъмин бошад.

20. Дар утоқҳое, ки сарватҳои таърихию фарҳангии муваққатан ба Ҷумҳурии Тоҷикистон воридкардашуда нигоҳ дошта мешаванд, бояд намӣ ва реҷаи ҳарорат, инчунин таъмини сифатноки нигоҳдошти онҳо риоя карда шавад.

21. Ҷойҳои нигоҳдории сарватҳои таърихию фарҳангии муваққатан ба Ҷумҳурии Тоҷикистон воридшаванда, бояд бо камераҳои мушоҳидавӣ ва воситаҳои огоҳкунанда муҷаҳҳаз гардида бошанд,

22. Шаҳодатнома барои нигоҳдошти муваққатии сарватҳои таърихию фарҳангии муваққатан ба Ҷумҳурии Тоҷикистон воридшаванда тибқи тартиби муқаррарнамудаи Вазорати фарҳанги Ҷумҳурии Тоҷикистон сурат мегирад (замима мегардад).

3. ТАРТИБИ ДОДАНИ ИҶОЗАТ ВА НАЗОРАТИ МУВАҚҚАТАН ВОРИД НАМУДАНИ САРВАТҲОИ ТАЪРИХИЮ ФАРҲАНГӢ

23. Иҷозати муваққатан ворид намудани сарватҳои таърихию фарҳангӣ аз ҷониби Вазорати фарҳанги Ҷумҳурии Тоҷикистон дар асоси ҳуҷҷати мукарраргардида (бо ду забон) дода мешавад.

24. Намунаҳои аз ҷониби Вазорати фарҳанги Ҷумҳурии Тоҷикистон тасдиқгардидаи ҳуҷҷатҳо, мӯҳрҳо (тамғаҳо) ва имзои коршиносони босалоҳият ба мақомоти гумруки Ҷумҳурии Тоҷикистон пешниҳод мегардад.

25. Барои гирифтани иҷозат ҷиҳати муваққатан ворид намудани сарватҳои таърихию фарҳангӣ ба Ҷумҳурии Тоҷикистон бояд ба Вазорати фарҳанги Ҷумҳурии Тоҷикистон ариза ва ҳуҷҷатҳои зерин пешниҳод карда шаванд:

- шартномаи тарафайн бо ҷониби қабулкунанда оид ба мақсади муваққатан ворид намудани сарватҳои таърихию фарҳангӣ;

- рӯйхати осори муваққатан воридшаванда бо ду акс дар ҳаҷми 9х12см.

26. Назорат аз болои рафти сари вақт баргардонидани сарватҳои таърихию фарҳангии муваққатан ба Ҷумҳурии Тоҷикистон воридшударо дар доираи салоҳияти худ мақомоти ваколатдори давлатӣ тибқи Тартиби мазкур ба роҳ мемонад.

27. Иҷозати муваққатан ворид намудани сарватҳои таърихию фарҳангӣ ба Ҷумҳурии Тоҷикистон ба ҷониби аризадиҳанда дар давоми се рӯз дода мешавад.

4. ҲУҚУҚ ВА ӯҲДАДОРИИ КОРШИНОСОН ОИД БА ТАШХИСИ САРВАТҲОИ ТАЪРИХИЮ Ф АРҲАНГИЕ, КИ МУВАҚҚАТАН БА ҶУМҲУРИИ ТОҶИКИСТОН ВОРИД КАРДА ШУДААНД

28. Ҳуқуқ ва ӯҳдадории коршиносон оид ба ташхиси сарватҳои таърихию фарҳангии муваққатан ба Ҷумҳурии Тоҷикистон ворид карда шудаанд, аз инҳо иборатанд:

- арзиши сарватҳои таърихию фарҳангие, ки муваққатан ба Ҷумҳурии Тоҷикистон ворид карда шудаанд, муайян менамоянд;

- дар ҳолатҳои зарурӣ гузаронидани ташхиси сарватҳои таърихию фарҳангии муваққатан ба Ҷумҳурии Тоҷикистон воридкардашуда дар макони воқеъ буданашон ба роҳ монда, дархосткунанда омаду рафти коршиносро таъмин менамоянд;

- тибқи Тартиби мазкур ба расмият даровардани иҷозат барои муваққатан ворид намудани сарватҳои таърихию фарҳангиро ташкил менамоянд;

- тартиби гузаронидани ташхис ва назорати аз Ҷумҳурии Тоҷикистон берун баровардан ва ба Ҷумҳурии Тоҷикистон дохил кардани сарватҳои таърихию фарҳангиро танзим менамоянд;

29. Мураккабии корҳо, мӯҳлати гузаронидани ташхиси сарватҳои таърихию фарҳангии муваққатан ба Ҷумҳурии Тоҷикистон воридкардашуда аз ҷониби Вазорати фарҳанги Ҷумҳурии Тоҷикистон муайян карда мешавад.

5. МУҚАРРАРОТИ ХОТИМАВӢ

30. Барои вайрон кардани Тартиби мазкур шахсони воқеӣ ва ҳуқуқӣ мутобиқи қонунгузории Ҷумҳурии Тоҷикистон ба ҷавобгарӣ кашида мешаванд.

Ниг. ба Замима