Низомномаи Комиссияи миллӣ оид ба ирригатсия ва дренаж дар назди Агентии беҳдошти замин ва обёрии назди Ҳукумати Ҷумҳурии Тоҷикистон

1. Муқаррароти умумӣ

1. Комиссияи миллӣ оид ба ирригатсия ва дренаж дар назди Агентии беҳдошти замин ва обёрии назди Ҳукумати Ҷумҳурии Тоҷикистон (минбаъд - КМИД) аз тарафи Ҳукумати Ҷумҳурии Тоҷикистон таъсис дода мешавад.

2. Мақсади асосии таъсиси КМИД ин мусоидат ба рушд ва истифодаи дастовардҳои илму техника дар соҳаи ирригатсия ва дренаж, идоракунии оби обёрикунанда ва захираҳои замин, мубориза бо бодлесии замин ва обхезиҳо, мустаҳкам намудани соҳилҳо ва маҷрои дарёҳо, гузаронидани тадқиқоти маҷмӯӣ дар соҳаи беҳдошти замин ва обёрӣ, истифодаи маҷмӯӣ ва ҳифзи захираҳои обӣ ва заминҳои обёршдаванда бо истифода аз усулҳо ва технологияҳои муосир мебошад.

3. Фаъолияти КМИД - ро Агентии беҳдошти замин ва обёрии назди Ҳукумати Ҷумҳурии Тоҷикистон ҳамоҳанг месозад.

4. КМИД мақоми машваратӣ буда, ба ҳайати он намояндагони вазорату идораҳои ҷумҳуриявӣ, олимон ва мутахассисони соҳаи беҳдошти замин ва обёрӣ, ҳифзи муҳити зист ва ҳолатҳои фавқулодда вобаста ба об шомил мебошанд. Аъзои КМИД метавонанд олимони варзида, намояндагони ташкилотҳои ғайриҳукуматӣ, донишҷӯёну аспирантҳо, кормандони вазорату идораҳои соҳавӣ бошанд. Тибқи тартиби муқарраргардида шарикони КМИД метавонанд, созмонҳои байналмилалӣ ва ғайриҳукуматӣ бошанд.

5. КМИД манфиатҳои миллии Ҷумҳурии Тоҷикистонро дар Комиссияи байналмилалии ирригатсия ва дренаж (минбаъд - КБИД) намояндагӣ мекунад.

6. Суроғаи КМИД: 734064, Ҷумҳурии Точикистон, шаҳри Душанбе, кӯчаи Шамсӣ, 5/1.

2. Мақсадҳои КМИД

7. Мақсади асосии КМИД самаранок мусоидат намудан ҷиҳати дар амал татбиқ намудани сиёсати ягонаи давлатии хоҷагии об, ки ба рушди соҳаи беҳдошти замин ва обёрӣ, истифодаи оқилона ва ҳифзи захираҳои об, беҳтар намудани ҳолати мелиоративии заминҳо, баланд бардоштани ҳосилхезии заминҳои обёришаванда, ҷорӣ намудани технологияҳои пешқадами обёрии таъминкунандаи рушди устувори истеҳсолоти кишоварзӣ бо таҳияву татбиқи чораҳо оид ба беҳтар намудани идоракунии захираҳои об бо дарназардошти ислоҳоти бахши об, мубориза бо обхезӣ, танзими маҷрои дарёҳо ва солимгардонии иқтисодии муҳити табиӣ равона шудааст, мебошад.

8. Усулҳои амалӣ намудани мақсадҳои КМИД иборатанд аз:

- иштирок дар кори Комиссияи байналмилалии ирригатсия ва дренаж ва гурӯҳҳои кории доимии он бо роҳи намояндагии мутахассисон ва олимон дар ҳайати онҳо;

- мусоидат намудан ба рушди соҳаи беҳдошти замин ва обёрӣ бо истифода аз дастовардҳои пешқадами илмию техникӣ;

- мусоидат намудан дар тартиб ва таҳия намудани лоиҳаҳо вобаста ба сиёсат, стратегияҳо, барномаҳо ва нақшаҳои рушди соҳаи хоҷагии об;

- ошкор ва баррасӣ намудани мушкилоти хоҷагии об ва таҷдиди иншооти мавҷудаи хоҷагии об ва системаҳои обёрӣ;

- мусоидат намудан ба беҳтар гардонидани системаҳои идоракунии беҳдошти замин ва обёрӣ, такмили асосҳои техникию иқтисодии фаъолияти устувори соҳа;

- ҳамоҳангсозии манфиатҳои умумии соҳаҳои иқтисодиёт дар соҳаи ирригатсия ва дренаж, беҳтар намудани идоракунии захираҳои об дар минтақаҳои обёришаванда, танзим ва дастгирии давлатии ассотсиатсияҳои истифодабарандагони об ва паст кардани таъсири зарарноки об ба муҳити зист;

- баланд бардоштани сатҳи дониши мутахассисон ва истифодабарандагони об дар соҳаи беҳдошти замин ва обёрӣ, оқилона ва самаранок истифода бурдани захираҳои обу замин дар минтақаҳои обёришаванда;

- мусоидат намудан ба ташкил ва гузаронидани конгрессҳои байналмилалӣ, конференсияҳо, семинарҳо, симпозиумҳои минтақавӣ ва дигар форумҳои Комиссияи байналмилалии ирригатсия ва дренаж ва КМИД;

- ҷалб намудани грантҳо ва кредитҳо барои беҳтар намудани соҳаи беҳдошти замин ва обёрӣ, инчунин татбиқи чорабиниҳои КМИД.

3. ӯҳдадориҳои КМИД

9. КМИД барои ноил гардидан ба ҳадафҳои гузошташуда тибқи тартиби муқарраргардида бо тамоми ташкилотҳои манфиатдори давлатӣ ва ғайриҳукуматӣ ҳамкорӣ менамояд ва ба чунин корҳо мусоидат менамояд:

- кӯмак расонидан ба ташкили мунтазами ҷаласаҳои миллӣ, байналмилалӣ ва минтақавӣ, семинарҳо ва конференсияҳо оид ба мушкилоти беҳдошти замин ва обёрӣ, идоракунии оқилона ва

самараноки захираҳои об, истифода ва ҳифзи захираҳои об дар системаҳои беҳдошти замин ва обёрӣ;

- такмили системаҳои беҳдошти замин ва обёрӣ, беҳтар намудани ҳолати мелиоративии заминҳои обёришаванда, ба танзим даровардани маҷрои дарёҳо, беҳтар намудани идоракунии захираҳои обӣ ва ҳифзи захираҳои об дар системаҳои беҳдошти замин ва обёрӣ;

- таҳияи дастуру воситаҳои иқтисодӣ оид ба беҳтар намудан ва фоиданок будани соҳаи беҳдошти замин ва обёрӣ;

- баланд бардоштани тахассуси мутахассисон ва кормандони роҳбарикунанда, ки дар соҳаи беҳдошти замин ва обёрӣ, захираҳои об ва танзими обхезиҳо фаъолият менамоянд;

- мусоидат намудан ба иштироки аъзо ва намояндагони КМИД дар чорабиниҳои байналмилалии КБИД ва дар мақомоти кории он;

- таҳия ва паҳн намудани нашрияҳои чопии КМИД, ташкили мубодилаи иттилооти илмию техникӣ дар байни давлатҳои аъзои КБИД;

- иштирок дар чорабиниҳои вобаста ба ташаккули афкори ҷамъиятӣ оид ба беҳтар намудани системаҳои беҳдошти замин ва обёрӣ ва муносибати сарфакорона ва эҳтиёткорона ба захираҳои об;

- ҳамоҳангсозии корҳои мутахассисони ҷавон дар назди КМИД;

- қабул намудани аъзои коллективӣ ва инфиродӣ ба ҳайати худ;

- андешидани тадбирҳо оид ба сари вақт пардохт намудани ҳаққи аъзогӣ ба Комиссияи байналмилалии ирригатсия ва дренаж;

- тартиб додани ҳисоботи солонаи КМИД ба Ҳукумати Ҷумҳурии Тоҷикистон ва Комиссияи байналмилалии ирригатсия ва дренаж.

4. КМИД ва ташкилотҳои байналмилалӣ

10. КМИД тибқи тартиби муқарраргардида бо ташкилотҳои байналмилалӣ дар самтҳои зерин ҳамкорӣ менамояд:

- таҳия ва татбиқи лоиҳаҳои сармоягузорӣ, илмӣ ва ҳамкориҳои техникӣ барои рушди соҳаи беҳдошти замин ва обёрӣ;

- мусоидат ба ташкили махзани иттилоот дар бораи лоиҳаҳои натиҷадори ташкилотҳои байналмилалӣ, ки дар ҷумҳурӣ дар соҳаи беҳдошти замин ва объёрӣ татбиқ мегарданд, инчунин оид ба идоракунии захираҳои об дар минтақаҳои обёришаванда;

- паҳн намудани таҷрибаи пешқадами кишварҳои хориҷӣ дар соҳаи беҳдошти замин ва обёрӣ тавассути мубодилаи иттилооти илмию техникӣ;

- ҳамкорӣ бо ташкилотҳои байналмилалӣ ва ғайриҳукуматӣ оид ба фаъолияти КМИД.

5. Ташкили фаъолияти КМИД

11. Ба фаъолияти КМИД Раиси он, Директори Агентии беҳдошти замин ва обёрии назди Ҳукумати Ҷумҳурии Тоҷикистон роҳбарӣ менамояд.

12. Мутобиқи Низомномаи КБИД, Раиси Комиссияи миллии ирригатсия ва дренаж узви мақоми роҳбарикунандаи Шӯрои байналмилалии доимии КБИД мебошад.

13. Барои таъмини ҳалли таъҷилии вазифаҳои гузошташуда дар КМИД раёсати корӣ дар ҳайати 3 нафар фаъолият менамояд. Интихоби аъзои раёсати корӣ аз ҳисоби аъзои КМИД бо роҳи ҷойивазкунии онҳо баъди 3 сол сурат мегирад.

14. КМИД мутобиқи нақшаи корӣ ҳар семоҳа як маротиба ҷаласаи худро баргузор менамояд. Дар сурати зарурат, бо қарори раёсати корӣ ҷаласаи ғайринавбатӣ гузаронида мешавад. Масъалаҳое, ки ба нақшаи корӣ ворид карда мешаванд, аз ҷонаби раёсати кории КМИД ва такшкилотҳои дахлдор (вазорату идораҳо ва дигар муассисаҳои давлатӣ) тавсия карда мешаванд. Мавод барои ҷаласаҳои КМИД аз ҷониби раёсату шӯъбаҳои дахлдори вазорату идораҳое; ки масъалаҳоро барои ворид намудан ба рӯзномаи ҷаласаҳои КМИД пешниҳод менамоянд, таҳия карда мешаванд.

15. Вазифаҳои алоҳидаи муҳим дар соҳаи истифодаи захираҳои обу замин, беҳтар намудани ҳолати мелиоративии заминҳо, системаҳои ирригатсионӣ ва дигар масъалаҳое, ки бояд сари вақт баррасӣ карда шаванд, дар ҷаласаҳои ғайринавбатии КМИД метавонанд муҳокима карда шаванд.

16. Вазифаҳои ташкилию функсионалӣ ва ӯҳдадориҳо аз ҷониби гурӯҳи корӣ дар ҳайати муовини Раис, котиби илмӣ, тарҷумон ва котибреферент таъмин карда мешаванд.

17. Қарорҳои ҷаласаҳои КМИД бо роҳи овоздиҳии аксари аъзо қабул карда мешаванд. Дар сурати ихтилофи назар байни Раис ва аъзои КМИД, қарорҳо бо манфиати аксарияти овозҳо қабул карда мешаванд.

6. Маблағгузории фаъолияти КМИД

18. Маблағгузории фаъолияти КМИД, аз ҷумла пардохти ҳарсолаи ҳаққи аъзогӣ ба КБИД аз ҳисоби маблағҳои махсуси Агентии беҳдошти замин ва обёрии назди Ҳукумати Ҷумҳурии Тоҷикистон анҷом дода мешавад.

19. Маблағгузории фаъолияти КМИД, инчунин метавонад аз ҳисоби грантҳои байналмилалӣ, дастгирии молиявии ниҳодҳои молиявии байналмилалӣ, ташкилотҳои байналмилалӣ ва ғайриҳукуматӣ амалӣ мешавад.

Ҳайати Комиссияи миллӣ оид ба ирригатсия ва дренаж дар назди Агентии беҳдошти замин ва обёрии назди Ҳукумати Ҷумҳурии Тоҷикистон

- Раиси КМИД - Директори Агентии беҳдошти замин ва обёрии назди Ҳукумати Ҷумҳурии Тоҷикистон;

- муовини Раиси КМИД - муовини Директори Агентии беҳдошти замин ва обёрии назди Ҳукумати Ҷумҳурии Тоҷикистон.

Аъзои КМИД:

- намояндаи Вазорати кишоварзии Ҷумҳурии Тоҷикистон;

- намояндаи Вазорати энергетика ва захираҳои оби Ҷумҳурии Тоҷикистон;

- намояндаи Вазорати маориф ва илми Ҷумҳурии Тоҷикистон;

- намояндаи Кумитаи давлатии идораи замин ва геодезии Ҷумҳурии Тоҷикистон;

- намояндаи Кумитаи ҳифзи муҳити зисти назди Ҳукумати Ҷумҳурии Тоҷикистон;

- намояндаи Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон;

- намояндаи Хадамоти назорати давлатии бехатарии корҳо дар саноат ва соҳаи кӯҳкории назди Ҳукумати Ҷумҳурии Тоҷикистон;

- намояндаи Агентии хоҷагии ҷангали назди Ҳукумати Ҷумҳурии Тоҷикистон;

- намояндаи Саридораи геологияи назди Ҳукумати Ҷумҳурии Тоҷикистон;

- намояндаи Академияи илмҳои Ҷумҳурии Тоҷикистон;

- намояндаи Академияи илмҳои кишоварзии Ҷумҳурии Тоҷикистон;

- намояндаи Донишгоҳи аграрии Тоҷикистон ба номи Шириншоҳ Шоҳтемур;

- намояндаи Институти масъалаҳои об, гидроэнергетика ва экологияи Академияи илмҳои Ҷумҳурии Тоҷикистон;

- намояндаи Институти хокшиносии Академияи илмҳои кишоварзии Ҷумҳурии Тоҷикистон;

- намояндаи Институти зироаткории Академияи илмҳои кишоварзии Ҷумҳурии Тоҷикистон;

- намояндаи Муасиссаи давлатии "ТоҷикНИИГиМ"(Пажӯҳишгоҳи илмии тадқиқотии гидротехника ва мелиоратсия) Вазорати энергетика ва захираҳои оби Ҷумҳурии Тоҷикистон;

- намояндаи Муасиссаи давлатии "Назорати ҳолати мелиоративии заминҳо ва истифодаи об"-и Агентии беҳдошти замин ва обёрии назди Ҳукумати Ҷумҳурии Тоҷикистон;

- намояндаи Корхонаи воҳиди давлатии Институти лоиҳакашии "Тоҷикгипроводхоз" -и Агентии беҳдошти замин ва обёрии назди Ҳукумати Ҷумҳурии Тоҷикистон;

- Котиботи КМИД.

Эзоҳ: Ҳангоми ба вазифаи дигар гузаштани аъзои Комиссияи миллӣ оид ба ирригатсия ва дренаж ба ҳайати он шахсони ба вазифаҳои дахлдор нав таъишдуда ворид карда мешаванд.