ТАРТИБИ ПЕШБУРДИ ФЕҲРИСТИ ЯГОНАИ АДВОКАТҲОИ ҶУМҲУРИИ ТОҶИКИСТОН

1. Муқаррароти умумӣ

1. Тартиби мазкур тибқи қисми 2 моддаи 17 Қонуни Ҷумҳурии Тоҷикистон "Дар бораи адвокатура ва фаъолияти адвокатӣ" (минбаъд   Қонун) таҳия гардида, тартиби пешбурди Феҳристи ягонаи адвокатҳои Ҷумҳурии Тоҷикистонро муайян менамояд.

2. Феҳристи ягонаи адвокатҳои Ҷумҳурии Тоҷикистон (минбаъд Феҳрист) (замимаи 1 ба Тартиби мазкур) аз ҷониби Вазорати адлияи Ҷумҳурии Тоҷикиотон пеш бурда мешавад.

3. Феҳрист дар ҳомили коғазӣ ва дар намуди электронӣ бурда мешавад. Маълумот дар Феҳристи ҳомили коғазӣ буда ба маълумоти дар феҳристи ҳомили электронӣ мавҷудбуда мутобиқат менамояд.

Ҳангоми мутобиқ набудани байни қайдҳо дар ҳомили коғазӣ ва дар намуди электронӣ, қайдҳо дар ҳомили коғазӣ афзалият доранд.

Пешбурди Феҳрист тибқи Тартиби мазкур амалӣ карда мешавад.

4. Феҳрист бояд дорои маълумоти зерин бошад:

- рақами бақайдгирии адвокат;

- насаб, ном, номи падари (охирин - ҳангоми мавҷуд будан) адвокат;

- дар бораи додани мақоми адвокат (реквизитҳои қарори комиссияи тахассусии назди Вазорати адлияи Ҷумҳурии Тоҷикистон (минбаъд - комиссияи тахассусӣ) дар бораи додани мақоми адвокат);

- дар бораи боздоштани мақоми адвокат (реквизитҳои қарори комиссияи тахассусӣ дар бораи боздоштани мақоми адвокат);

- дар бораи барқарор кардани мақоми адвокат (реквизитҳои қарори комиссияи тахассусӣ дар бораи барқарор кардани мақоми адвокат);

- дар бораи қатъ кардани мақоми адвокат (реквизитҳои қарори комиссияи тахассусӣ дар бораи қатъ кардани мақоми адвокат);

- дар бораи аз нав барқарор кардани мақоми адвокат дар асоси ҳалномаи суд (реквизитҳои қарори комиссияи тахассусӣ дар бораи аз нав барқарор кардани мақоми адвокат дар асоси ҳалномаи эътибори қонунӣ пайдо кардаи суд);

- дар бораи ворид намудани тағйирот (мазмуни тағйирот ва реквизитҳои қарори комиссияи тахассусӣ дар бораи ба Феҳрист ворид намудани тағйирот).

5. Феҳрист дар ҳомили коғазӣ дӯхта мешавад, варақҳои он рақамгузорӣ карда мешаванд, маълумот дар бораи миқдори варақҳо бо имзои сардори раёсати дахлдори Вазорати адлияи Ҷумҳурии Тоҷикистон (шахсе, ки вазифаи ӯро иҷро мекунад) тасдиқ карда мешаванд.

6. Ба Феҳрист ворид намудани маълумот ройгон анҷом дода мешавад.

7. Маълумоти дар Феҳрист мавҷудбуда кушода ва дастраси умум мебошад. Феҳрист дар сомонаи расмии Вазорати адлияи Ҷумҳурии Тоҷикистон дар шабакаи Интернет ҷой дода мешавад.

8. Ворид намудани маълумот ба Феҳрист бо асосҳои зерин амалӣ карда мешавад:

- хабардоркунии комиссияи тахассусӣ дар ҳолати ба довталаб додани мақоми адвокат; боздоштан, барқарор кардан, қатъ кардан ва аз нав барқарор кардани мақоми адвокат дар асоси ҳалномаи суд;

- аризаи адвокат, дар ҳолати ба феҳрист ворид намудани маълумот дар бораи тағйир додани насаб, ном ва (ё) номи падар (охиринҳангоми мавҷуд будан).

9. Маълумот дар бораи адвокат танҳо ба як Феҳрист ворид карда мешавад.

10. Қайдҳо ба Феҳрист дар ҳомилҳои қоғазӣ ва электронӣ аз ҷониби мутахассисон ворид карда мешаванд. Қайдҳо ба Феҳрист дар ҳомили коғазӣ аз ҷониби мутахассисон бо даст, бо хати хоно ворид карда мешаванд. Ҳангоми пешбурди Феҳрист дар ҳомили коғазӣ ба пок кардан ва ислоҳи шарҳдоданашуда роҳ дода намешавад. Ҳар як ислоҳи ба Феҳрист ворид кардашуда бо имзои мутахассис тасдиқ карда мешавад.

11. Вазорати адлия ҳар сол на дертар аз 1 феврал ба Иттифоқи адвокатҳо нусхаи Феҳристро, ки дар ҳомили электронӣ бурда мешавад, равон мекунад. Вазорати адлияи Ҷумҳурии Тоҷикистон дар бораи ворид намудани тағйирот ба Феҳрист Иттифоқи адвокатҳоро дар давоми даҳ рӯз аз санаи ворид намудани тағйироти зикргардида хабардор менамояд.

12. Барасмиятдарории қарори комиссияи тахассусиро оид ба додани мақоми адвокатӣ раёсати дахлдори Вазорати адлия бо ворид намудани маълумоти дахлдор ба Феҳристи ягона амалӣ менамояд. Дар Феҳрист реквизитҳои қарори комиссияи тахассусӣ гузошта мешаванд. Нусхаи огоҳинома дар бораи ворид намудани маълумоти дахлдор, инчунин ҳуҷҷатҳои дар банди 21 Тартиби мазкур зикргардида (ба ғайр аз аксҳо), дар парвандаи феҳристии адвокат нигоҳ дошта мешаванд.

13. Парвандаҳои феҳристии адвокатҳо дар давоми 75 сол нигоҳ дошта мешаванд.

14. Рақами бақайдгирии адвокат дар Феҳрист рақами тартибии қайдро ҳангоми ворид намудани маълумот дар бораи адвокат ба Феҳрист тавассути рақамгузории пайдарҳамӣ, новобаста ба сол, дар бар мегирад. Рақами бақайдгирӣ дар ҷилди дахлдори парвандаи номенклатурӣ, ки "Парвандаи феҳристии адвокат" (минбаъд - парвандаи феҳристии адвокат) сарлавҳагузорӣ карда шудааст, гузошта мешавад.

Рақами бақайдгирӣ наметавонад ба дигар шахс дода шавад, аз он ҷумла ҳангоми хориҷ кардани маълумот аз Феҳрист дар ҳолати аз ҷониби адвокат тағйир додани узвият дар Иттифоқи адвокатҳо ё ба Феҳрист ворид намудани маълумот дар ҳолати қатъ гаштани мақоми адвокат.

2. Додани иқтибос аз Феҳрист

15. Аз рӯи аризаи (дархости) хаттии ҳар шахси воқеӣ ё ҳуқуқии манфиатдор (минбаъд - аризадиҳанда) Вазорати адлияи Ҷумҳурии Тоҷикистон маълумоти дар Феҳрист бударо ба истиснои ҷои зисти адвокат дар намуди иқтибос аз феҳрист (минбаъд - иқтибос) медиҳад (замимаи 2 ба Тартиби мазкур). Иқтибос дар мӯҳлати то даҳ рӯз аз рӯзи бақайдгирии ариза (дархост) дода мешавад. Барои додани иқтибос мутобиқи Қонуни Ҷумҳурии Тоҷикистон "Дар бораи боҷи давлатӣ" маблағ рӯёнида мешавад. Иттилооте, ки ба ворид намудани маълумот ба Феҳрист дар бораи боздоштан, аз нав сар кардан, қатъ кардани мақоми адвокат дахл доранд, ба иқтибос ҳангоми мавҷуд будани маълумоти дахлдор дар Феҳрист дохил карда мешаванд. Дар ҳолати дар Феҳрист мавҷуд набудани маълумоти дархостшаванда ба иқтибос қайди дахлдор ворид карда мешавад, зимнан номгӯи Феҳрист, насаб, ном, номи падари (охирин - ҳангоми мавҷуд будан) шахсе, ки маълумот дар бораи он дархост карда мешаванд, нишон дода мешавад. Иқтибос ба аризадиҳанда ба воситаи муросилоти почтавӣ аз рӯи суроға, фиристониш дар шакли ҳуҷҷати электронӣ (тасвири электронӣ, ки дар асоси ҳуҷҷати ҳомили коғазӣ омода карда шудааст) ва ё ҳангоми муроҷиати шахсӣ дода мешавад.

16. Барои гирифтани иқтибос аризадиҳанда ҳуҷҷатҳои зеринро пешниҳод менамояд:

- аризаи аслӣ (дархост) дар бораи додани иқтибос (замимаи 3 ба Тартиби мазкур);

- нусхаи ҳуҷҷати тасдиқкунандаи шахсият (барои аризадиҳанда

- шахси воқеӣ, барои намояндаи шахси воқеӣ ё ҳуқуқӣ);

- нусхаи квитансия дар бораи супоридани боҷи давлатӣ;

- нусхаи ҳуҷҷате, ки ваколати намояндаи шахси воқеӣ ё ҳуқуқиро тасдиқ мекунад.

17. Ариза (дархост) дар бораи додани иқтибос бояд маълумоти зеринро дар бар гирад:

а) барои аризадиҳанда - шахси воқеӣ:

- насаб, ном, номи падари (охирин - ҳангоми мавҷуд будан) аризадиҳанда ва намояндаи ваколатдори вай (агар манфиатҳои аризадиҳандаро намояндаӣ ваколатдор намояндагӣ кунад);

- мӯҳтавои ариза;

- реквизитҳои ҳуҷҷати тасдиқкунандаи шахсияти шахси воқеӣ ва намояндаи ваколатдори вай (агар манфиатҳои аризадиҳандаро намояндаи ваколатдор намояндагӣ кунад);

- реквизитҳои ҳуҷҷате, ки ваколати намояндаи аризадиҳандаро тасдиқ мекунад (агар манфиатҳои аризадиҳандаро намояндаи ваколатдор намояндагӣ кунад);

- суроғаи истиқомати аризадиҳанда;

- имзои аризадиҳанда ё намояндаи ваколатдори вай (агар манфиатҳои аризадиҳандаро намояндаи ваколатдор намояндагӣ кунад);

б) барои аризадиҳанда - шахси ҳуқуқӣ:

- номи пурраи шахси ҳуқуқӣ ва насаб, ном, номи падари (охиринҳангоми мавҷуд будан) намояндаи ваколатдори вай; - мӯҳтавои дархост;

- реквизитҳои ҳуҷҷати тасдиқкунандаи шахсияти намояндаи ваколатдори шахси ҳуқуқӣ;

- реквизитҳои ҳуҷҷате, ки ваколати намояндаи ваколатдори шахси ҳуқуқиро тасдиқ мекунад;

- маҳалли ҷойгиршавии шахси ҳуқуқӣ (маҳали бақайдгирии давлатии он); - имзои намояндаи ваколатдори шахси ҳуқуқӣ;

в) маълумоти ҳатмӣ:

- насаб, ном, номи падари (охирин - ҳангоми мавҷуд будан) адвокат (дигар маълумот), ки имконият медаҳанд вай дар феҳрист муайян карда шавад;

- усули гирифтани иқтибос (ирсоли почтавӣ, ҳангоми муроҷиати шахсӣ, ирсол дар шакли ҳуҷҷати электронӣ);

- усули равон кардани хабарномаи иттилоотӣ барои шахсан гирифтани иқтибос (муросилоти почтавӣ, алоқаи электронӣ ё факсимилӣ, ахборотдиҳӣ дар бораи омода будани натиҷаҳо ба воситаи телефон).

18. Рад кардани қабули ҳуҷҷатҳо барои додани иқтибос манъ аст.

19. Барои рад кардани додани иқтибос ҳолатҳои зерин асос шуда метавонанд:

- ариза (дархост) дар бораи додани иқтибос маълумоти дар банди 17 Тартиби мазкур зикргардидаро надошта бошад;

- ба ариза (дархост) дар бораи додани иқтибос ҳуҷҷатҳои дар банди 16 Тартиби мазкур зикргардида замима карда нашуда бошанд. Ҳангоми бартараф намудани сабабҳое, ки тибқи сархатҳои якум ва дуюми банди мазкур асос барои равон кардани огоҳинома дар бораи рад кардани додани иқтибос шудаанд, аризадиҳанда ҳуқуқ дорад, ки ҳуҷҷатҳоро такроран пешниҳод намояд.

3. Мӯҳлати ба Феҳрист ворид намудани маълумот

20. Мӯҳлати ба Феҳрист ворид намудани маълумот на бояд аз инҳо зиёдтар бошад:

- барои ба Феҳрист ворид намудани маълумот дар бораи додани мақоми адвокат - се рӯз аз рӯзи ворид шудани огоҳиномаи комиссияи тахассусӣ дар бораи ба довталаб додани мақоми адвокат;

- барои ба Феҳрист ворид намудани маълумот дар бораи боздоштани мақоми адвокат, дар бораи барқарор кардани мақоми адвокат ва қатъ кардани мақоми адвокат - даҳ рӯз аз лаҳзаи ворид шудани огоҳиномаи дахлдори комиссияи тахассусӣ;

- барои ба Феҳрист ворид намудани маълумот дар бораи аз нав барқарор кардани мақоми адвокат дар асоси ҳалномаи суд - даҳ рӯз аз лаҳзаи ворид шудани ҳалномаи дахлдори суд;

- барои ба Феҳрист ворид намудани маълумот дар бораи тағйир додани насаб, ном ва (ё) номи падари (охирин - ҳангоми мавҷуд будан) адвокат - даҳ рӯз аз рӯзи ворид шудани аризаи адвокат.

21. Огоҳинома дар бораи ба Феҳрист ворид намудан (рад кардани воридкунӣ), аз феҳрист хориҷ намудани маълумот ба ташаббускори ба феҳрист ворид намудани маълумот (аз феҳрист хориҷ намудани маълумот) ва адвокат равон карда мешавад.

4. Номгӯи ҳуҷҷатҳое, ки тибқи санадҳои меъёрии ҳуқуқӣ барои ба Феҳрист ворид намудани маълумот (аз Феҳрист хориҷ намудани маълумот) заруранд

22. Барои ба Феҳрист ворид намудани маълумот дар ҳолати додани мақоми адвокат аз ҷониби комиссияи тахассусӣ ҳуҷҷатҳои зерин пешниҳод карда мешаванд:

- огоҳиномаи комиссияи тахассусӣ дар бораи ба довталаб додани мақоми адвокат;

- нусхаи протоколи маҷлиси комиссияи тахассусӣ;

- нусхаи ҳуҷҷати тасдиқкунандаи шахсияти адвокат;

- нусхаи саволнома (анкета), ки маълумоти тарҷумаи ҳоли адвокатро дорад;

- нусхаи дафтарчаи меҳнатӣ ё дигар ҳуҷҷатҳое, ки собиқаи кориро аз рӯи ихтисоси ҳуқуқӣ ва (ё) корро ба сифати коромӯзи адвокат тасдиқ менамоянд;

- нусхаи ҳуҷҷате, ки мавҷудияти маълумоти олии ҳуқуқшиносии дар муассисаи таълимии таҳсилоти олии касбии аккредитатсия ё нострификатсияи давлатидошта гирифта ва ё дараҷаи илмиро аз рӯи ихтисоси ҳуқуқӣ тасдиқ менамояд;

- расми адвокат, ки андоза ва шакли он дар банди 25 Тартиби мазкур пешбинӣ шудааст.

23. Огоҳиномаи комиссияи тахассусӣ дар бораи додани мақоми адвокат ба довталабе, ки бомуваффақият имтиҳони тахассусиро супоридааст, дар нусхаи аслӣ пешниҳод карда мешавад. Огоҳиномаи комиссияи тахассусӣ дар бораи додани мақоми адвокат ба довталабе, ки бомуваффақият имтиҳони тахассусиро супоридааст, бояд дар бланки комиссияи тахассусӣ бо усули чопӣ иҷро карда шавад ё ба воситаи дастгоҳҳои электронии чопкунанда чоп карда шуда, аз ҷониби раиси комиссияи тахассусӣ (шахсе, ки вазифаи ӯро иҷро мекунад) имзо карда шавад.

24. Дар огоҳиномаи комиссияи тахассусӣ дар бораи ба довталаб додани мақоми адвокатӣ, маълумоти зерин бояд зикр карда шавад:

- номи мақомоте, ки ба он огоҳинома равон карда мешавад;

- насаб, ном, номи падари (охирин - ҳангоми мавҷуд будан) адвокат;

- санаи маҷлиси комиссияи тахассусӣ, ки дар он қарор дар бораи додани мақоми адвокат ба довталабе, ки бомуваффақият имтиҳони тахассусиро супоридааст, қабул карда шудааст;

- суроғаи маҳалли зисти доимии адвокат;

- телефони пайваст, факс ва суроғаи почтаи электронии адвокат (дар сурати мавҷуд будани чунин маълумот).

25. Расми андозаи 3х4 см дар шакли ранга ё сиёҳу сафед, бе кунҷи равшан, дар коғази аксбардории беҷилои тунук пешниҳод карда мешавад. Пешниҳод намудани расмҳо бо каллапӯш, ки тарҳи рӯйро пинҳон намекунад, аз ҷониби шаҳрвандоне, ки эътиқоди динии онҳо имконият намедиҳад, дар назди шахсони бегона бе каллапӯш ба чашм намоянд, иҷозат дода мешавад. Барои шахсоне, ки доимо айнак мемонанд, расм гирифтан бо айнакҳои шишаашон рангкарданашуда ҳатмист.

26. Барои ба Феҳрист ворид намудани маълумот дар бораи боздоштани мақоми адвокат комиссияи тахассусӣ огоҳиномаро дар бораи боздоштани мақоми адвокат дар нусхаи аслӣ пешниҳод менамояд. Огоҳинома дар бораи боздоштани мақоми адвокат бояд дар бланки Иттифоқи адвокатҳо бо усули чопӣ иҷро карда шавад ё ба воситаи дастгоҳҳои электронии чопкунанда чоп карда шуда, аз ҷониби раиси Иттифоқи адвокатҳо (шахсе, ки вазифаи ӯро иҷро мекунад) имзо карда шавад.

27. Дар огоҳинома дар бораи боздоштани мақоми адвокат зикр карда мешаванд:

- номи мақоме, ки ба он огоҳинома равон карда мешавад;

- насаб, ном, номи падари (охирин - ҳангоми мавҷуд будан) адвокат ва рақами бақайдгирӣ дар Феҳрист;

- санаи маҷлиси Раёсати Иттифоқи адвокатҳо, ки дар он қарор дар бораи боздоштани мақоми адвокат қабул карда шудааст;

- асосҳое, ки аз рӯи он мақоми адвокат боздошта шудааст;

- суроғаи маҳалли зисти доимӣ ё ин ки ҷои будубоши асосии адвокат;

- телефони пайваст, факс ва суроғаи почтаи электронии адвокат (дар сурати мавҷуд будани чунин маълумот).

28. Барои ба Феҳрист ворид намудани маълумот дар бораи барқарор кардани мақоми адвокат огоҳиномаи Иттифоқи адвокатҳо дар бораи барқарор кардани мақоми адвокат дар нусхаи аслӣ пешниҳод карда мешавад. Огоҳинома дар бораи барқарор кардани мақоми адвокат бояд дар бланки Иттифоқи адвокатҳо бо усули чопӣ иҷро карда шавад ё ба воситаи дастгоҳҳои электронӣ чоп карда шуда, аз ҷониби раиси Иттифоқи адвокатҳо (шахсе, ки вазифаи ӯро иҷро мекунад) имзо карда шавад.

29. Дар огоҳинома дар бораи барқарор кардани мақоми адвокат зикр карда мешавад:

- номи мақоме, ки ба он огоҳинома равон карда мешавад;

- насаб, ном, номи падари (охирин - ҳангоми мавҷуд будан) адвокат ва рақами бақайдгирӣ дар Феҳрист;

- санаи маҷлиси Раёсати Иттифоқи адвокатҳо, ки дар он қарор дар бораи барқарор кардани мақоми адвокат қабул карда шудааст;

- суроғаи маҳалли зисти доимии адвокат;

- телефони пайваст, факс ва суроғаи почтаи электронии адвокат (дар сурати мавҷуд будани чунин маълумот).

30. Барои ба Феҳрист ворид намудани маълумот дар бораи қатъ кардани мақоми адвокат равон карда мешаванд:

- огоҳиномаи комиссияи тахассусӣ дар бораи қатъ кардани мақоми адвокат;

- нусхаи иқтибос аз қарори комиссияи тахассуси дар бораи қатъ кардани мақоми адвокат.

31. Огоҳиномаи комиссияи тахассусӣ дар бораи қатъ кардани мақоми адвокат бояд дар бланки комиссияи тахассусӣ бо усули чопӣ иҷро карда шавад ё ба воситаи дастгоҳҳои электронӣ чоп карда шуда, аз ҷониби раиси комиссияи тахассусӣ (шахсе, ки вазифаи ӯро иҷро мекунад) имзо карда шавад.

32. Дар огоҳиномаи комиссияи тахассусӣ дар бораи қатъ кардани мақоми адвокат зикр карда мешавад:

- номи мақоме, ки ба он огоҳинома равон карда мешавад;

- насаб, ном, номи падари (охирин - ҳангоми мавҷуд будан) адвокате, ки мақоми он қатъ карда шудааст ва рақами бақайдгирӣ дар Феҳрист;

- санаи маҷлиси комиссияи тахассусӣ; ки дар он қарор дар бораи қатъ кардани мақоми адвокат қабул карда шудааст;

- суроғаи маҳалли зисти доимии адвокате, ки мақоми он қатъ карда шудааст;

- телефони пайваст, факс ва суроғаи почтаи электронии адвокате, ки мақоми он қатъ карда шудааст (дар сурати мавҷуд будани чунин маълумот);

- асосҳои қатъ кардани мақоми адвокат.

33. Барои ба Феҳрист ворид намудани маълумот дар бораи аз нав барқарор кардани мақоми адвокат дар асоси ҳалномаи суд ба Вазорати адлияи Ҷумҳурии Тоҷикистон равон карда мешаванд:

- огоҳиномаи комиссияи тахассусӣ дар бораи аз нав барқарор кардани мақоми адвокат дар асоси ҳалномаи суд;

- нусхаи қарори комиссияи тахассусӣ дар бораи аз нав барқарор кардани мақоми адвокат дар асоси ҳалномаи суд;

- нусхаи ҳалномаи суд дар бораи аз нав барқарор кардани мақоми адвокат, ки эътибори қонунӣ пайдо кардааст;

- расми адвокат, ки ба талаботи муқарраркардаи банди 25 Тартиби мазкур мувофиқат мекунад.

34. Огоҳиномаи комиссияи тахассусӣ дар бораи аз нав барқарор кардани мақоми адвокат дар асоси ҳалномаи суд дар нусхаи аслӣ пешниҳод карда мешавад. Огоҳиномаи комиссияи тахассусӣ дар бораи аз нав барқарор кардани мақоми адвокат дар асоси ҳалномаи суд бояд дар бланки комиссияи тахассусӣ бо усули чопӣ иҷро карда шавад ё ба воситаи дастгоҳҳои электронӣ чоп карда шуда, аз ҷониби раиси комиссияи тахассусӣ (шахсе, ки вазифаи ӯро иҷро мекунад) имзо карда шавад.

35. Дар огоҳиномаи комиссияи тахассусӣ дар бораи аз нав барқарор кардани мақоми адвокат дар асоси ҳалномаи суд зикр карда мешавад:

- номи мақоме, ки ба он огоҳинома равон карда мешавад;

- насаб, ном, номи падари (охирин - ҳангоми мавҷуд будан) адвокат ва рақами бақайдгирӣ дар Феҳрист;

- реквизитҳои ҳалномаи суд дар бораи аз нав барқарор кардани мақоми адвокат;

- санаи маҷлиси комиссияи тахассусӣ, ки дар он қарор дар бораи аз нав барқарор кардани мақоми адвокат дар асоси ҳалномаи суд қабул карда шудааст;

- суроғаи маҳалли зисти доимӣ ё будубоши бештари адвокат;

- телефони пайваст, факс ва суроғаи почтаи электронии адвокат (дар сурати мавҷуд будани чунин маълумот).

36. Барои ба Феҳрист ворид намудани маълумот дар бораи тағйир додани насаб, ном ва (ё) номи падари (охирин - ҳангоми мавҷуд будан) адвокат ба Вазорати адлияи Ҷумҳурии Тоҷикистон пешниҳод карда мешаванд:

- аризаи адвокат;

- нусхаи шаҳодатнома дар бораи бақайдгирии давлатии асноди ҳолати шаҳрвандӣ, ки тағйир додани насаб, ном ва (ё) номи падарро (охирин - ҳангоми мавҷуд будан) тасдиқ менамояд;

- расми адвокат, ки ба талаботи муқарраркардаи банди 25 Тартиби мазкур мувофиқат мекунад.

37. Аризаи адвокат дар бораи ба Феҳрист ворид намудани маълумот дар ҳолати тағйир додани насаб, ном ва (ё) номи падар (охиринҳангоми мавҷуд будан) дар нусхаи аслӣ пешниҳод карда мешавад ва шахсан аз ҷониби адвокат имзо карда мешавад. Аризаи адвокат дар бораи ба Феҳрист ворид намудани маълумот дар ҳолати тағйир додани насаб, ном ва (ё) номи падар (охирин - ҳангоми мавҷуд будан) метавонад бо даст, бо усули чопӣ иҷро карда шавад ё ба воситаи дастгоҳҳои электронӣ чоп карда шавад.

38. Дар аризаи адвокат дар бораи ба Феҳрист ворид намудани маълумот дар бораи тағйир додани насаб, ном ва (ё) номи падар (охирин - ҳангоми мавҷуд будан) зикр карда мешаванд:

- номи мақоме, ки ба он огоҳинома равон карда мешавад;

- насаб, ном, номи падари (охирин - ҳангоми мавҷуд будан) адвокат то тағйир додан ва баъди тағйир додан;

- рақами бақайдгирии адвокатдар Феҳрист; - суроғаи маҳалли зисти доимӣ ё ҷои будубоши бештари адвокат;

- телефони пайваст, факс ва суроғаи почтаи электронии адвокат (дар сурати мавҷуд будани чунин маълумот).

5. Номгӯи асосҳо барои рад кардани ба Феҳрист ворид намудани маълумот ва хориҷ намудани он

39. Огоҳинома дар бораи рад кардани ба Феҳрист ворид намудани маълумот дар ҳолати боздоштани мақом, аз нав барқарор кардани мақом ё қатъ кардани мақоми адвокат равон карда мешавад, агар:

- огоҳиномаи комиссияи тахассусӣ бо вайронкунии тартиби муқарраркардаи мувофиқан бандҳои 22, 26, 28, 30 ва 33 Тартиби мазкур ба расмият дароварда шуда ва (ё) маълумотҳои дар бандҳои 24, 27, 31 ва 34 Тартиби мазкур зикргардидаро надошта бошад;

- ба огоҳиномаи комиссияи тахассусӣ ҳуҷҷатҳои дар Тартиби мазкур зикргардида замима нашуда бошанд;

- расми адвокат пешниҳод карда нашуда бошад ва ё расми пешниҳодшуда ба талаботҳои муқарраркардаи банди 25 Тартиби мазкур мувофиқат накунад.

Ҳангоми бартараф намудани сабабҳое, ки тибқи сархатҳои якум-сеюми банди мазкур асос барои равон кардани огоҳинома дар бораи рад кардани ба Феҳрист ворид намудани маълумот дар ҳолати додани мақоми адвокат шудаанд, комиссияи тахассусӣ ҳуқуқ дорад, ки ҳуҷҷатҳоро такроран пешниҳод намояд.

40. Огоҳинома дар бораи рад кардани ба Феҳрист ворид намудани маълумот дар ҳолати тағйир додани насаб, ном ва (ё) номи падари (охирин - ҳангоми мавҷуд будан) адвокат равон карда мешавад, агар:

- аризаи адвокат бо вайронкунии банди 36 Тартиби мазкур ба расмият дароварда шуда ва (ё) маълумотҳои дар бандҳои 37 ва 38 Тартиби мазкур зикргардидаро дар бар нагирад;

- аз ҷониби адвокат нусхаи шаҳодатнома дар бораи бақайдгирии давлатии асноди ҳолати шаҳрвандӣ, ки тағйир додани насаб, ном ва (ё) номи падарро (охирин - ҳангоми мавҷуд будан) тасдиқ менамояд, пешниҳод нашуда бошад;

- расми адвокат пешниҳод карда нашуда бошад ва ё расми пешниҳодшуда ба талаботи муқарраркардаи банди 25 Тартиби мазкур мувофиқат накунад.

41. Ҳангоми бартараф намудани сабабҳое, ки тибқи сархатҳои якум - сеюми банди мазкур асос барои равон кардани огоҳинома дар бораи рад кардани ба Феҳрист ворид намудани маълумот дар ҳолати тағйир додани насаб, ном ва (ё) номи падар (охирин - ҳангоми мавҷуд будан) шудаанд, адвокат ҳуқуқ дорад, ки ҳуҷҷатҳоро такроран пешниҳод намояд.

Замимаи 1-3